Kapitulo 14

‘Nagapakigkatipan Ako sa Inyo Para sa Isa Ka Ginharian’

1. Sang gab-i sa wala pa mapatay si Jesus, ano nga paglaum ang ginpahamtang niya sa atubangan sang iya mga apostoles?

 SANG gab-i antes si Jesus ginpatay ginsilingan niya ang iya matutom nga mga apostoles: ‘Sa balay sang akon Amay may madamong hulot. Magakadto ako agod mag-aman sa inyo sing duog, agod nga kon diin ako didto man kamo.’ Dugang pa nga nagsiling sia sa ila: “Nagapakigkatipan ako sa inyo, subong nga ang akon Amay nagpakigkatipan sa akon, para sa isa ka ginharian.” (Juan 14:​2, 3; Luc. 22:​29) Daw ano ka dalayawon nga paglaum ang ginpahamtang sa atubangan nila!

2. Pila ang magapakigbahin upod kay Cristo sa iya langitnon nga Ginharian?

² Apang, indi buot silingon ni Jesus nga ang mga apostoles lamang ang magahari upod sa iya sa langitnon nga Ginharian. Sang ulihi ginpakilala nga ang 144,000 nga gintubos gikan sa duta makatigayon sinang dungganon nga pribilehiyo. (Bug. 5:​9, 10; 14:​1, 4) Ginatinguhaan bala karon sang iban nga malab-ot ini?

Pagtipon sa mga Manunubli sang Ginharian

3. Sa iya ministeryo sa publiko, anong kahigayunan ang ginpatalupangod ni Jesus?

³ Sa tapos ginbilanggo si Juan Bautista ni Herodes Antipas, si Jesus mabaskog nga nagbantala sa publiko nga sa diin iya ginpatalupangod “ang ginharian sang mga langit.” (Mat. 4:​12, 17) Ginpahibalo niya ang katawhan nga may yara sila kahigayunan nga makasulod sa sina nga Ginharian, kag ang iya mga disipulo hanuot nga nagtinguha para sa sina nga padya.​—⁠Mat. 5:​3, 10, 20; 7:​21; 11:12.

4. (a) San-o ginhaplasan sing balaan nga espiritu ang una nga mga katapo sang mga disipulo ni Jesus? (b) Ano ang nagapakita nga ang igtalupangod ginpatuhoy sugod sadto sa pagtipon sa mga manunubli sang Ginharian?

 ⁴ Sang Pentecostes sang 33 C.E. ang una sa ila ginhaplasan sing balaan nga espiritu. (Binu. 2:​1-4; 2 Cor. 1:​21, 22) Ang aman sang Dios para sa kaluwasan nga nagadul-ong sa dimamalatyon nga kabuhi sa langit ginpahibalo. Gingamit ni Pedro “ang mga yabi sang ginharian sang mga langit” sa pagpahibalo sini​—⁠una sa mga Judiyo, masunod sa mga Samaritano, kag dayon sa katawhan sang Gentil nga mga pungsod. (Mateo 16:​19) Ginhatagan sing pinasahi nga igtalupangod ang paghuman sa pangulohan nga magagahom sa katawhan sa sulod sang 1,000 ka tuig, kag halos ang tanan sang inspirado nga mga sulat sa Cristianong Griegong Kasulatan ginpatuhoy una sa tanan sa sining grupo sang mga manunubli sang Ginharian​—⁠“ang mga balaan,” “ang mga umalambit sang langitnon nga pagtawag.” *

5. Sila bala gintawag sa langitnon nga kabuhi bangod mas maayo sila nga mga alagad sang Dios sang sa mga nabuhi sang una?

⁵ Ang pagtawag sa ila padulong sa langitnon nga kabuhi indi bangod mas maayo sila sa tanan nga alagad sang Dios nga napatay sa wala pa ang Pentecostes sang 33 C.E. (Mat. 11:​11) Sa baylo, nagsugod karon si Jehova sa pagpili sing mga magagahom upod kay Jesucristo. Sa sulod sang mga 19 ka siglo sa tapos sini may isa lamang ka pagtawag, ang langitnon nga pagtawag. Isa yadto ka dibagay nga kaluoy nga ginpakita sang Dios sa isa ka limitado nga kadamuon sa pagtuman sang iya maalamon kag mahigugmaon nga mga katuyuan.​—⁠Efe. 2:​8-10.

6. (a) Ngaa magaabot ang tion nga ang langitnon nga pagtawag magatakop? (b) Sin-o ang magatuytoy sa mga butang agod nga ang tagna tuhoy sa “dakung kadam-an” matuman man, kag ano ang aktuwal nga natabo?

⁶ Sa ulihi ang limitado nga kadamuon sang 144,000 makompleto. Ang hingapusan nga pagpat-in sa sining espirituwal nga mga Israelinhon subong naaprobahan malapit na. (Bug. 7:​1-8)  Nian si Jehova, paagi sa iya espiritu kag sa paghangop sa iya Pulong nga iya ginpahayag sa iya kitaon nga organisasyon, magatuytoy sang mga butang agod tumanon ang isa pa ka bahin sang iya katuyuan, subong ginlaragway sa Bugna 7:​9-17. Ang isa ka “dakung kadam-an” gikan sa tanan nga pungsod tipunon, nga may paglaum nga maluwas sa dakung kapipit-an kag mabuhi sing dayon sa kahimpitan sa tunga sang dutan-on nga Paraiso. Kon binagbinagon naton ang aktuwal nga natabo na, daw maathag gid nga ang langitnon nga pagtawag sa kabilugan natapos na sang mga tuig 1935 C.E., sang ang dutan-on nga paglaum sang “dakung kadam-an” maathag nga nahangpan. Kutob sadto gintipon upod sa pila ka libo lamang nga nagkalabilin sang langitnon nga klase ang minilyon ka sumilimba ni Jehova nga nagalaum sing hanuot nga mabuhi sing dayon diri gid sa duta.

7. Posible bala nga ang iban sa karon makabaton sing langitnon nga pagtawag, kag ngaa amo sina ang imo sabat?

⁷ Nagakahulugan bala ina nga wala na karon nagatawag ang Dios para sa langitnon nga kabuhi? Tubtob indi pa mahimo ang hingapusan nga pagpat-in, posible nga ang pila nga may yara sina nga paglaum indi magmatutom, kag gani pilion ang iban sa pagbulos sa ila lugar. Apang daw makatarunganon nga ini talagsa lamang matabo.

Espirituwal nga mga Anak—⁠Paano Nila Mahibaluan?

8. Ano nga paathag ang ginahatag ni Pablo sa pagpakita kon paano ang mga ginpanganak sang balaan nga espiritu nakahibalo sina nga kamatuoran?

⁸ Ang espiritu sang Dios nagahatag sa bawtismado nga mga Cristiano nga nakabaton sing langitnon nga pagtawag sing positibo nga pasalig nga sila gin-adoptar subong espirituwal nga mga anak. Ginpakita ini ni apostol Pablo sang magsulat sia sa “mga balaan” sa Roma, nga ginalaragway kon ano sadto ang kahimtangan sang tanan matuod nga Cristiano.  Sia nagsiling: “Ang tanan nga ginatuytuyan sang espiritu sang Dios, ini mga anak sang Dios. Kay wala kamo makabaton sing espiritu sang kahiulipnan nga sa kahadlok liwat, kundi nakabaton kamo sing espiritu sang pagkaanak, nga paagi sa amo nga espiritu kita nagatuaw: ‘Abba, Amay!’ Ang espiritu gid nagasaksi upod sa aton espiritu nga mga anak kita sang Dios. Kag kon mga anak kita, nian mga manunubli man kita: mga manunubli sa pagkamatuod sang Dios, apang mga masigkamanunubli ni Cristo, kon matuod nga nagaantos kita kaupod niya agod nga paghimayaon man kita kaupod niya.”​—⁠Roma 1:​7; 8:​14-17.

9. Paano ‘ang espiritu gid nagasaksi’ upod sa espiritu sang matuod nga mga anak sang Dios?

⁹ Duha ka paggamit sa tinaga nga “espiritu” ang ginapatalupangod sa aton diri: “ang espiritu gid” kag ang “aton espiritu.” Ang nauna amo ang indi makita kag aktibo nga kusog sang Dios. Nagapatubas ini sa iya espirituwal nga mga anak sing pagsalig nga sila gin-adoptar subong hilway nga mga anak sang Dios. Ina nga espiritu nagapanaksi man paagi sa inspirado nga Pulong sang Dios, ang Biblia, nga subong sang isa ka personal nga sulat sa iya espirituwal nga mga anak. (1 Ped. 1:​10-12) Kon mabasa sang mga hinaplas sang espiritu ang ginasiling sang Kasulatan sa espirituwal nga mga anak sang Dios, sila nagakaigo nga nagasabat: ‘Naaplikar ina sa akon.’ Sa amo ang aktibo nga kusog sang Dios sa nanuhaytuhay nga paagi nagapanaksi upod sa ila espiritu, ang nagapahulag nga kusog sang ila hunahuna kag tagipusuon, nga sila mga anak sang Dios. Nahisuno sa ginapakita sang espiritu, ang ila hunahuna kag tagipusuon nasentro sa paglaum nga sila mangin kaupod nga mga manunubli ni Cristo, kag ginabaton nila ang mga salabton sang espirituwal nga mga anak sang Dios.​—⁠Filip. 3:​13, 14.

10. (a) Ano nga mga butang ang wala sa ila kaugalingon nagapakilala sa isa subong hinaplas nga Cristiano? (b) Ano ang pagtamod sang “iban nga mga karnero” sa ila duog sa katuyuan sang Dios?

¹⁰ Matuod bala ina sa imo? Kon amo, may yara ikaw dalayawon nga pribilehiyo.  Apang, sayop ihinakop nga bangod ang isa ka tawo may hanuot nga apresasyon sa madalom nga espirituwal nga mga butang ukon makugi sa pag-alagad sa latagon ukon may daku nga gugma sa iya kauturan sia, busa, isa ka hinaplas sang espiritu nga Cristiano. Madamo sa “iban nga mga karnero” ang may subong man sina nga mga kinaiya. Ang ila man tagipusuon ginapahulag sang ila nabasahan sa Kasulatan tuhoy sa kaupod nga mga manunubli ni Cristo, apang wala nila ginapangangkon para sa ila kaugalingon ang butang nga wala gintigana sang Dios para sa ila. (Ipaanggid ang Numeros 16:​1-40.) Ginakilala nila ang orihinal nga katuyuan sang Dios para sa duta kag mainapresyahon nga nagapanghikot sa pagpakigbahin sa sina.

Pag-ambit sing Takus

11. Sin-o ang nagatambong sa tuigan nga pagsaulog sang kamatayon ni Jesus, kag ngaa?

¹¹ Kada tuig, sa Nisan 14, pagtunod sang adlaw, ang hinaplas nga mga sumulunod ni Jesucristo sa tanan nga bahin sang duta nagasaulog sang iya kamatayon, nahisuno sa iya ginsugo sa iya mga apostoles. (Luc. 22:​19, 20) Ang “iban nga mga karnero” nagatambong man, indi subong mga umalambit sa tinapay kag alak, kundi subong matinahuron nga mga tumalan-aw.

12. Paano ang iban sang unang mga Cristiano sa Corinto napaslawan sa pagpakita sing nagakaigo nga apresasyon sa Panihapon sang Ginuo?

¹² Indi ini isa ka walay pulos nga rito sang relihion kundi puno ini sing daku nga kahulugan. Si apostol Pablo nagsulat sing serioso nga laygay sa mga Cristiano sang unang siglo sa Corinto, Gresya, nga ang iban sa ila napaslawan sa pagpakita sing nagakaigo nga apresasyon para sa okasyon, nga nagasiling: “Ang bisan sin-o nga magkaon sing tinapay ukon mag-inom sa tagayan sang Ginuo sing indi takus makasala tuhoy sa lawas kag dugo sang Ginuo.”  Ano ang naghimo sa ila nga ‘indi takus’ nga mga umalambit? Wala nila ginhanda sing nagakaigo ang ila kaugalingon sa tagipusuon kag hunahuna. May pagbinahinbahin sa sulod sang kongregasyon. Ang iban man nagpatuyang sa pagkaon kag pag-inom antes magtambong sa miting. Ginpasapayanan nila ang Panihapon sang Ginuo. Wala sila sa kondisyon sa paghangop sang serioso nga kahulugan sang tinapay kag alak.​—⁠1 Cor. 11:​17-34.

13. Ano ang kahulugan sang tinapay kag alak nga ginaserbe sa Memoryal?

¹³ Ano ining kahulugan? Wala ini nasandig sa milagruso nga pagbaylo dagway sang tinapay kag alak nga mangin unod kag dugo. Si Cristo wala sa bisan anong kahulugan ginahalad liwat sa tagsa ka Memoryal. Ang Kasulatan nagasiling nga si “Cristo naghalad sing makaisa sa pagdala sang mga sala sang madamo.” (Heb. 9:​28; 10:​10; Roma 6:9) Ang walay lebadura nga tinapay kag ang mapula nga alak mga emblema lamang nga nagalaragway sang literal nga lawas ni Jesus nga ginhalad kag sang literal nga dugo nga iya ginpatulo. Apang daw ano ka hamili ang mga katunayan sini! Ang walay sala nga lawas ni Jesus ginhalad agod nga ang kalibutan sang katawhan may kahigayunan nga mabuhi sing dayon. (Juan 6:​51) Kag ang iya ginpatulo nga dugo may yara duha ka katuyuan​—⁠pagtinlo gikan sa sala sa mga tawo nga nagatuo sa sini, subong man pagpahikot sa bag-ong katipan sa ulot sang Dios kag sang kongregasyon sang espirituwal nga Israel, nga ginahuman sang hinaplas sing espiritu nga mga Cristiano. (1 Juan 1:​7; 1 Cor. 11:​25; Gal. 6:​14-16) Paagi sa sining hamili nga mga aman, ang mga katapo sang “diutay nga panong” ginakabig nga matarong sang Dios, sa kamatuoran ginakabig sila subong tawhanon nga himpit. (Luc. 12:​32) Ginahimo ini agod nga mapanganak sila sang balaan nga espiritu subong mga anak sang Dios, sa tuyo nga sila magaambit upod kay Cristo sa iya langitnon nga Ginharian. Samtang nagaambit sila sa mga emblema sang Memoryal kada tuig, sa amo nagahatag sing panaksi sa ila langitnon nga paglaum, ang ila apresasyon nga sila bahin sang “bag-ong katipan” nga ginpatung-an ni Cristo ginapapagsik kag ginapabaskog.​—⁠Heb. 8:​6-12.

 “Magaupod Kami sa Inyo”

14. (a) Ngaa ang “iban nga mga karnero” wala nagaambit sa mga emblema sang Memoryal, apang ano ang ila hanuot nga ginakalangkagan? (b) Paano nila ginatamod ang ila pagpakig-upod sa nagkalabilin sang mga manunubli sang Ginharian?

¹⁴ Ang “iban nga mga karnero” nakahantop kon paano si Jehova nagapakig-angot sa iya mga hinaplas, kag nagbuylog sila sa ila, nga nagasiling: “Magaupod kami sa inyo, kay nabatian namon nga ang Dios nagaupod sa inyo.” (Zac. 8:​20-23) Indi lamang nga nagatipon sila kundi nagabuligay sila sa pagbantala sing maayong balita sang Ginharian sa bug-os napuy-an nga duta. Apang, ang “iban nga mga karnero” wala ginapasulod sa “bag-ong katipan” upod sa espirituwal nga Israel kag wala man sila nalakip sa “katipan . . . para sa ginharian” nga ginhimo ni Jesus upod sa mga pinili nga magaambit sa iya sa langitnon nga kabuhi, kag busa, sing nagakaigo, wala sila nagaambit sa mga emblema sang Memoryal. (Luc. 22:​20, 29) Apang samtang ginatigayon sang “bag-ong katipan” ang katuyuan sini, nga amo ang pagtipon sa katapusan nga mga katapo sang “diutay nga panong” padulong sa langitnon nga Ginharian, ang “iban nga mga karnero” nakahisayod nga ini nagapakita nga ang mga pagpakamaayo nga ila mabaton sa duta paagi sa sina nga Ginharian malapit na. Sa tion sang “katapusan nga mga adlaw,” ginaisip nila nga isa ka pribilehiyo ang mag-alagad sing nahiusa upod sa matutom nga nagkalabilin sang mga manunubli sang Ginharian.

[Footnote]

Repaso nga Paghinun-anon

● Ngaa daku nga bahin sang Cristianong Griegong Kasulatan ang nagapatuhoy sing igtalupangod sa langitnon nga paglaum?

● Paano ina nahibaluan sang mga ginpanganak subong mga anak sang Dios? Ano ang kahulugan sang mga emblema sa Memoryal nga ila ginaambitan?

● Paano ginapakita sang “iban nga mga karnero” nga sila sa pagkamatuod nahiusa sa “diutay nga panong”?

[Mga Pamangkot sa Pagtinuon]