Kapitulo 15

Paano Ginatuytuyan ni Jehova ang Iya Organisasyon?

1. Anong impormasyon tuhoy sa organisasyon ni Jehova ang ginapahayag sang Biblia, kag ngaa importante ini sa aton?

 PAAGI sa inspirado nga mga Kasulatan, si Jehova nagahatag sa aton sing mga laragway sang iya dalayawon nga organisasyon sa langit. (Isa. 6:​2, 3; Ezeq. 1:​1, 4-28; Dan. 7:​9, 10, 13, 14) Bisan pa indi naton makita ang espiritu nga mga tinuga, ginapahibalo niya kita kon paano ang pagpanghikot sang balaan nga mga anghel nagaapektar sa matuod nga mga sumilimba sa duta. (Gen. 28:​12, 13; 2 Hari 6:​15-17; Sal. 34:​7; Mat. 13:​41, 42; 25:​31, 32) Ginalaragway man sang Biblia ang kitaon nga bahin sang organisasyon ni Jehova kag ginabuligan kita sa paghangop kon paano niya ginatuytuyan ini. Kon matuod gid nga may yara kita espirituwal nga paghangop sa sining mga butang, magabulig ini sa aton sa “paggawi sing takus kay Jehova sa tuyo nga pahamut-an sia sing bug-os.”​—⁠Col. 1:​9, 10.

Pagpakilala sa Kitaon nga Bahin

2. Sugod sang Pentecostes sang 33 C.E. ano ang kongregasyon sang Dios?

² Sa sulod sang 1,545 ka tuig ang pungsod sang Israel amo ang kongregasyon sang Dios. Apang napaslawan sila sa pagtuman sang Kasuguan nga katipan kag ginsikway nila ang Anak sang Dios. Gani ginpaluntad ni Jehova ang isa ka bag-ong kongregasyon, nga upod sa sini naghimo sia sing bag-ong katipan. Ining kongregasyon ginapakilala sa mga Kasulatan subong ang “nobya” ni Cristo, nga ginahuman sang 144,000 nga pinili sang Dios agod maghiusa sa iya Anak sa langit. (Efe. 5:​22-32;  Bug. 14:​1; 21:​9, 10) Ang una nga mga katapo ginhaplasan sing balaan nga espiritu sang tion sang Pentecostes, 33 C.E. Paagi sa iya balaan nga espiritu si Jehova naghatag sing indi masal-an nga pamatuod nga amo na ini karon ang kongregasyon nga iya gamiton sa pagtuman sang iya katuyuan.​—⁠Heb. 2:​2-4.

3. Sin-o sa karon ang nagahuman sa kitaon nga organisasyon ni Jehova?

³ Sa karon isa ka nagkalabilin na lamang sang 144,000 ang yari sa duta. Apang, sa katumanan sang tagna sa Biblia, ang isa ka dakung kadam-an sang “iban nga mga karnero” aktibo nga nagapakig-upod sa ila. Si Jesucristo, ang Maayong Manugbantay, nagtingob sining “iban nga mga karnero” upod sa mga nagkalabilin sang iya ginpanganak sang espiritu nga mga sumulunod agod nga sila maghuman sing “isa ka panong” lamang sa idalom niya subong ang ila “isa ka manugbantay.” (Juan 10:​11, 16; Bug. 7:​9, 10) Ini sila tanan nagahuman sing isa ka nahiusa nga organisasyon, ang kitaon nga organisasyon karon ni Jehova.

Teokratiko sa Kahimusan

4. Sin-o ang nagatuytoy sa organisasyon, kag paano?

⁴ Ang ekspresyon sa Kasulatan nga “kongregasyon sang buhi nga Dios” nagapakita kon sin-o ang nagatuytoy sini. Ang organisasyon teokratiko, ukon ginagamhan sang Dios. Ginatuytuyan ni Jehova ang iya katawhan paagi sa isa nga Iya gintangdo nga mangin dimakita nga ulo sang kongregasyon, si Ginuong Jesucristo, kag paagi sa Iya inspirado nga Pulong, ang Biblia.​—⁠1 Tim. 3:​14, 15; Efe. 1:​22, 23; 2 Tim. 3:​16, 17.

5. (a) Paano ang langitnon nga pagtuytoy sa kongregasyon ginpakita sang unang siglo? (b) Ano ang nagapakita nga si Jesus amo gihapon ang ulo sang kongregasyon?

⁵ Inang teokratiko nga pagtuytoy nangin maathag gid sang ang una nga mga katapo sang kongregasyon ginpahikot sang balaan nga espiritu sang Pentecostes sang 33 C.E. (Binu. 2:​1-4, 32, 33) Ginpakita yadto sang ang anghel ni Jehova nagtuytoy sa mga hitabo nga nagdul-ong sa paglapnag sing maayong balita padulong sa Aprika. (Binu. 8:​26-39)  Kag subong man, sang ang tingog ni Jesus naghatag sing mga pagtuytoy sang makombertir si Saul sang Tarso kag sa liwat sang ang pagmisyonero nga hilikuton ginsugdan sa tunga sang mga Gentil. (Binu. 9:​3-7, 10-17; 10:​9-16, 19-23; 11:​12) Apang ang ginakinahanglan nga pagtuytoy wala pirme gin-aman sa subong sadto ka pinasahi nga mga paagi. Sang ulihi wala na sing mga tingog nga nabatian gikan sa langit, wala na sing mga anghel nga nagapakita sa mga tawo kag wala na sing milagruso nga mga dulot sang espiritu. Apang si Jesus nanaad sa iya matutom nga mga sumulunod: “Yari karon! Ako kaupod ninyo sa bug-os nga mga adlaw tubtob sa katapusan sang sistema sang mga butang,” kag ang mga kamatuoran nagapakita nga kaupod sia. (Mat. 28:​20; 1 Cor. 13:8) Wala lamang ginakilala sang mga Saksi ni Jehova ang iya pagkaulo, kundi hayag nga kuntani indi nila mahimo mapadayon ang pagwali sing mensahe sang Ginharian sa atubangan sang mabaskog nga pagpamatok kon wala ang bulig niya.

6. (a) Sin-o ang nagahuman sa “matutom kag mainandamon nga ulipon,” kag ngaa? (b) Anong tulumanon ang ginhatag niya sa sadtong “ulipon”?

⁶ Sa wala pa mapatay si Jesus naghambal sia sa iya mga disipulo nahanungod sa “matutom kag mainandamon nga ulipon” nga iya pagatugyanan sing pinasahi nga salabton subong amo ang Agalon sini. Ina nga “ulipon,” suno sa paglaragway ni Jesus, nagaluntad sang ang Ginuo nagkayab pa langit kag nagaluntad gihapon sa tion sang pagbalik ni Cristo. Ina nga paglaragway indi mahimo nga nagapatuhoy sa isa ka indibiduwal nga tawo. Kundi nagapatuhoy ini sa matutom kag hinaplas nga kongregasyon ni Cristo nga ginatamod subong kabilugan. Nahibaluan ni Jesus nga baklon niya sila paagi sa iya kaugalingon nga dugo, gani nagakaigo nga ginpatuhuyan niya sila sing kolektibo subong iya “ulipon.”  Ginhatagan niya sila sing hilikuton, kag ginsugo sila tanan sa paghimo sing mga disipulo kag padayon nga pakan-on ini sila sa espirituwal, ginahatagan sila sang “ila [espirituwal] nga kalan-on sa nagakaigo nga tion.” Ang pagtangdo sa ila ginpamatud-an sang balaan nga espiritu sang Pentecostes sang 33 C.E.​—⁠Mat. 24:​45-47; 28:​19, 20; 1 Cor. 6:​19, 20; ipaanggid ang Isaias 43:10.

7. (a) Ano karon ang daku pa nga mga salabton sang “ulipon”? (b) Ngaa ang aton reaksion sa panudlo paagi sa sining alagyan importante?

⁷ Sa pagbalik sang Agalon, kon ang “ulipon” matutom nga nagahimo sang iya hilikuton, pagatugyanan sia sing daku pa nga mga salabton. Ang mga tinuig nga nagsunod mangin tion para sa isa ka pagpanaksi sa bug-os nga globo tuhoy sa Ginharian, kag isa ka “dakung kadam-an” sang mga sumilimba ni Jehova ang tipunon sa tuyo nga sila luwason sa “dakung kapipit-an.” (Mat. 24:​14; Bug. 7:​9, 10) Ini sila nagakinahanglan man sing espirituwal nga kalan-on, kag iserbe ini sa ila paagi sa “ulipon” nga hubon, ang hinaplas sang espiritu nga mga alagad ni Cristo. Agod mapahamut-an si Jehova, dapat naton batunon ang panudlo nga iya ginaaman paagi sa sining alagyan kag maghikot nahisuno sa sini sing bug-os.

8, 9. (a) Sang unang siglo anong kahimusan ang ginhimo sa paglubad sang mga hulusayon nahanungod sa doktrina kag paghatag sing kinahanglanon nga pagtuytoy tuhoy sa pagbantala sing maayong balita? (b) Anong kaanggid nga kahimusan ang nagaluntad karon?

⁸ Sa pagkamatuod, kon kaisa may mga pamangkot nga nagautwas nahanungod sa doktrina kag paagi. Ano nian? Ang ika-15 nga kapitulo sang Binuhatan nagasugid kon paano ang isa ka hulusayon tuhoy sa mga kinahanglanon para sa Gentil nga mga kombertido nalubad. Ginpadala ini sa mga apostoles kag mga gulang sa Jerusalem, nga nag-alagad sadto subong ang sentral nga nagadumala nga hubon. Indi buot silingon nga yadtong mga gulang wala nagasayop; indi sila mga tawo nga wala gid makasala. (Ipaanggid ang Galacia 2:​11-14.) Apang gingamit sila sang Dios. Ginbinagbinag nila kon ano ang ginsiling sang inspirado nga mga Kasulatan tuhoy sa tema nga ginahambalan subong man ang pamatuod sang pagpanghikot sang espiritu sang Dios sa pagbukas sang Gentil nga latagon, kag nian naghimo sila sing desisyon.  Ginpakamaayo sang Dios yadto nga kahimusan. (Binu. 15:​1-29; 16:​4, 5) Gikan sa sadtong sentral nga hubon, ginpadala man ang mga indibiduwal agod pasangkaron ang pagbantala sing maayong balita nahisuno sa ginsugo sang Ginuo.​—⁠Binu. 8:​14; Gal. 2:9.

⁹ Sa aton adlaw ang Nagadumala nga Hubon ginahuman sang hinaplas sang espiritu nga kauturan gikan sa nanuhaytuhay nga pungsod. Nagaalagad ini sa ulong-talatapan sa bug-os nga kalibutan sang mga Saksi ni Jehova. Sing matutom ginapauswag sini ang mga interes sang putli nga pagsimba sa idalom sang pagpangulo ni Jesucristo. Ining kauturan may kaanggid nga pagtamod sa iya ni apostol Pablo, nga, sang magpadala sing espirituwal nga laygay sa mga masigka-Cristiano, nagsulat: “Indi nga nagahari kami sa inyo pagtuo, kundi nagapangabudlay kami kaupod ninyo sa inyo kalipay, kay sa inyo pagtuo malig-on kamo.”​—⁠2 Cor. 1:⁠24.

10. (a) Paano ginadesisyonan kon sin-o ang mangin mga gulang ukon ministeryal nga mga alagad? (b) Ngaa dapat kita magkooperar sing suod sa mga gintangdo sa sinang mga katungdanan?

¹⁰ Ining teokratikong kahimusan ginakilala sang mga Saksi ni Jehova sa bug-os nga kalibutan. Ang ila tanan lokal nga kongregasyon nagapanghikot nga may suod nga kooperasyon sa sini. Nagasandig sila sa Nagadumala nga Hubon sa pagtangdo sing mga gulang kag ministeryal nga mga alagad agod mag-atipan sa mga kongregasyon sing talunsay. Sa anong sadsaran ginapili ang mga tawo para sa sina nga katungdanan? Ang mga kinahanglanon maathag nga ginsambit sa Biblia. Ang mga gulang nga nagahimo sing mga rekomendasyon kag ang mga awtorisado sa pagtangdo may mabug-at nga salabton sa atubangan sang Dios sa pagsunod sini. (1 Tim. 3:​1-10, 12, 13; 5:​22; Tito 1:​5-9) Wala sing eleksion nga ginahiwat sa tunga sang mga katapo sang kongregasyon kag wala man sing piniliay sa kongregasyon. Sa baylo, nahisanto sa ginhimo anay sang mga apostoles sang ang mga pagtangdo ginhimo sang unang siglo, ang mga manugtatap nga may salabton sa pagrekomendar, kag sila nga nagahimo sing mga pagtangdo sa ulihi, nagapangamuyo sa Dios agod pangayuon ang bulig sang iya espiritu kag ginagamit nila ang iya inspirado nga Pulong sa pagtuytoy sa ila. (Binu. 6:​2-4, 6; 14:​23; ipaanggid ang Salmo 75:​6, 7.)  Paagi sa aton pagsunod sa pagtuytoy sang mga gulang, aton mapakita ang aton apresasyon sa mahigugmaon nga pag-aman ni Cristo sining “mga hiyas sa mga tawo” agod mabuligan kita tanan sa pagdangat sa “paghiusa sang pagtuo.”​—⁠Efe. 4:​8, 11-16.

11. (a) Anong mapuslanon nga mga pag-alagad ang ginahimo sang mga babayi sa sulod sang teokratikong kahimusan? (b) San-o sila dapat magbutang sing tabon sa ulo, kag ngaa?

¹¹ Ang mga Kasulatan nagasugo nga ang pagkamanugtatap sa kongregasyon dapat uyatan sang mga lalaki. Wala ini nagapakanubo sa mga babayi, kay madamo sa ila ang nalakip sa mga manunubli sang langitnon nga Ginharian. Paagi sa kaugdang, putli nga paggawi kag maukod nga pag-atipan sa ila pamilya, ang Cristianong mga babayi nagaamot man sa maayo nga dungog sang kongregasyon. (Tito 2:​3-5) Sa masami daku nga bahin ang ila ginahimo sa pagpangita sa bag-uhan nga mga interesado kag sa pagdala sa ila sa organisasyon. (Sal. 68:​11) Apang ang pagpanudlo sa sulod sang kongregasyon ginaatipan sang mga lalaki nga gintangdo. (1 Tim. 2:​12, 13) Kon wala sing sangkol nga mga lalaki sa miting nga ginhimos sang kongregasyon, nian ang isa ka babayi dapat magbutang sing tabon sa iya ulo kon nagadumala ukon nagapangamuyo. * Sa amo ginapakita niya ang pagtahod sa kahimusan ni Jehova, subong nga si Jesus nagpahamtang sing halimbawa para sa tanan sa pagpasakop sa iya Amay.​—⁠1 Cor. 11:​3-16; Juan 8:​28, 29.

12. (a) Anong pagtamod ang ginapalig-on sang Biblia nga huptan sang mga gulang sa ila katungdanan? (b) Sa anong dalayawon nga pribilehiyo nagaambit kita tanan?

¹² Sa kalibutan ang isa ka indibiduwal nga may mataas nga katungdanan ginakabig nga importante,  apang sa sulod sang organisasyon sang Dios ang talaksan amo: “Sia nga nagagawi subong kubos sa tunga ninyo tanan amo ang daku.” (Luc. 9:​46-48; 22:​24-26) Gani ginalaygayan sang Kasulatan ang mga gulang nga indi magpaka­ginuo sa mga gintugyan sa ila sang Dios, kundi, sa baylo, mangin mga halimbawa sa panong. (1 Ped. 5:​2, 3) Indi ang pinili nga pila lamang, kundi ang tanan nga Saksi ni Jehova, lalaki kag babayi, ang may dalayawon nga pri­bilehiyo sa pagrepresentar sa Soberano sang uniberso, mapainubuson nga nagahambal sa iya ngalan kag naga­sugid sa mga tawo bisan diin nahanungod sa iya Ginharian.

13. Ginagamit ang mga kasulatan nga nasambit, hambali ang mga pamangkot nga nalista sa katapusan sining parapo.

¹³ Nagakaigo nga pamangkuton naton ang aton kaugalingon: “Ginaapresyar gid bala naton kon paano ginatuytuyan ni Jehova ang iya kitaon nga organisasyon? Ginapakita bala ina sang aton panimuot, panghambal kag panghulag?” Ang pagpangatarungan sa masunod nga mga punto makabulig sa tagsatagsa sa aton sa paghimo sina nga pag-usisa:​

 Kon nagapasakop gid kita kay Cristo subong ulo sang kongregasyon, nian, subong ginapakita sa masunod nga mga kasulatan, ano ang dapat ginahimo naton? (Mat. 24:​14; 28:​19, 20; Luc. 21:​34-36; Juan 13:​34, 35)

 Sa ila mga panikasog nga mangin mabungahon nga mga Cristiano, sa anong kasangkaron ang tanan nga bahin sang organisasyon dapat magsandig sa Dios kag kay Cristo? (Juan 15:​5; 1 Cor. 3:​5-7)

 Kon ginatinguhaan sang mga gulang nga pasibuon ang panghunahuna sang mga tawo agod nga tamdon nila ang mga butang nahisuno sa nabilin nga bahin sang organisasyon, kay sin-o kabalaka ang dapat naton makilala sa sini? (Efe. 4:​7, 8, 11-13; 2 Cor. 13:​11)

 Kon mainapresyahon nga ginabaton naton ang espirituwal nga mga aman nga nagaabot paagi sa “ulipon” nga klase kag sa Nagadumala nga Hubon sini, sa kay sin-o kita nagapakita sing pagtahod? Apang ano kon ginapakanubo naton ini? (Luc. 10:​16; ipaanggid ang 3 Juan 9, 10.)

 Ngaa indi naton dapat mulayon ang gintangdo nga mga gulang? (Binu. 20:​28; Roma 12:​10)

14. (a) Paagi sa aton panimuot sa teokratikong organisasyon, ano ang aton ginapakita? (b) Sa sining bahin, ano ang aton mga kahigayunan sa pagpamatuod sa Yawa nga butigon, kag sa pagpahalipay sa tagipusuon ni Jehova?

 ¹⁴ Si Jehova nagapakig-angot sa aton karon paagi sa iya kitaon nga organisasyon sa idalom ni Cristo subong ang gintangdo nga ulo sini. Gani ang aton panimuot sa sining organisasyon nagapakita sa isa ka praktikal nga paagi kon diin kita nagadampig sa hulusayon sang pagkasoberano. (Heb. 13:​17) Si Satanas nagabais nga kita tanan ginapahulag sang handum para sa personal nga kaayuhan, nga ang aton una nga ginakabalak-an amo ang aton kaugalingon. Apang kon kita handa sa pag-alagad sa bisan anong paagi nga kinahanglanon, samtang ginalikawan ang paghambal kag paghimo sing mga butang nga magatawag sing dinagakaigo nga igtalupangod sa aton kaugalingon, ginapamatud-an naton nga ang Yawa butigon. Kon ginahigugma naton kag ginatahod ang mga ‘nagapanguna’ sa tunga naton, ginailog ang ila pagtuo apang nagadumili nga mangin sahi sang tawo nga ‘nagadayaw sing mga personalidad para sa iya kaugalingon nga kaayuhan,’ ginapahalipay naton ang tagipusuon ni Jehova. (Heb. 13:​7; Jud. 16) Paagi sa pagpalambo sing husto nga pagtahod sa organisasyon ni Jehova kag bug-os tagipusuon nga paghimo sang hilikuton nga iya ginatuytuyan, nagahatag kita sing pamatuod nga si Jehova amo gid ang aton Dios kag kita nahiusa sa iya pagsimba.​—⁠1 Cor. 15:58.

[Footnote]

Repaso nga Paghinun-anon

● Ano ang kitaon nga organisasyon ni Jehova karon? Ano ang katuyuan sini?

● Sin-o ang gintangdo nga ulo sang kongregasyon? Paagi sa anong kitaon nga kahimusan nagaaman sia sing mahigugmaon nga pagtuytoy para sa aton?

● Anong husto nga panimuot sa salabton kag sa mga tawo sa organisasyon ang dapat naton palambuon?

[Mga Pamangkot sa Pagtinuon]