Kapitulo 22

Padayon nga Ipamulong ang Pulong sang Dios nga May Kasidla

1. (a) Anong maayong balita ang ginwali sang mga disipulo ni Jesus sugod sang Pentecostes sang 33 C.E., apang ano ang reaksion sadto sang mga manuggahom kag sang mga gulang sang mga Judiyo? (b) Ano nga mga pamangkot ang mahimo ipamangkot naton sa aton kaugalingon nahanungod sini?

 ANG labing importante nga mga hitabo sa sulod sang 4,000 ka tuig sa maragtas sang tawo natabo. Ang Anak sang Dios, si Jesucristo, ginhaplas subong ang palaabuton nga Hari sa ibabaw sang bug-os nga duta. Walay sapayan sang pagpatay kay Jesus sa sugyot sang relihioso nga mga kaaway, ginbanhaw ni Jehova ang iya Anak gikan sa minatay. Paagi sa iya posible ang kaluwasan nga may paglaum sa kabuhi nga walay katapusan. Apang sang ginpabutyag sing dayag sang matutom nga mga disipulo ni Jesus ining maayong balita, natabo ang mabaskog nga pagpamatok. Una, ang duha sang mga apostoles ginbilanggo, nian sila tanan. Ginbunal sila kag ginmanduan nga mag-untat sa paghambal sa ngalan ni Jesus. (Binu. 4:​1-3, 17; 5:​17, 18, 40) Ano ang dapat nila himuon? Ano kuntani ang imo ginhimo? Nagpadayon ka bala sa pagpanaksi sing masidla?

2. (a) Ano nga labi pa ka makatilingala nga balita ang dapat iwali sa aton karon adlaw? (b) Sin-⁠o ang may salabton sa paghimo sini?

² Sang tuig 1914 C.E. ang labi pa ka makatilingala nga hitabo nga importante sa bug-os nga uniberso natabo. Ang Ginharian sang Dios sa mga kamot ni Jesucristo gintukod sa langit. Masunod, si Satanas kag ang iya mga demonyo gintagbong sa duta. (Bug. 12:​1-5, 7-12) Nagsugod ang katapusan nga mga adlaw sang karon malauton nga sistema.  Sa indi pa mapatay tanan ang kaliwatan nga nakasaksi sang mga hitabo sang 1914, dugmukon sang Dios ang bug-os nga sistema sang mga butang ni Satanas. (Mat. 24:​34) Ang mga makalampuwas may paglaum nga makaagom sing dayon nga kabuhi. Sa katumanan sang orihinal nga katuyuan sang Dios, ang bug-os nga duta mangin isa ka Paraiso. Kon nabaton mo na ining maayong balita, may salabton ikaw nga ipaambit ini sa iban. (Mat. 24:​14) Apang ano nga sabat ang imo mapaabot?

3. (a) Ano ang reaksion sang mga tawo sa mensahe sang Ginharian? (b) Gani, ano nga pamangkot ang dapat naton atubangon?

³ Samtang mahimo nga batunon ikaw sang pila ka tawo nga may kainit subong isa ka manugwali sang Ginharian, ang kalabanan indi magasapak. (Mat. 24:​37-39) Ang iban mahimo nga magayubit ukon mabaskog nga magapamatok. Si Jesus nagpaandam nga ang pila ka pagpamatok mahimo nga maghalin sa imo mga paryente. (Luc. 21:​16-19) Mahimo nga masumalang man ini sa imo ginatrabahoan ukon sa eskwelahan. Sa madamo nga bahin sang duta, ang mga Saksi ni Jehova indi makatarunganon nga ginadumilian sang pangulohan. Kon ginaatubang sang bisan ano ukon sini tanan nga kahimtangan, magapadayon ka bala sa paghambal sang Pulong sang Dios sing masidla?

4. Makapasalig bala ang personal nga determinasyon nga magapadayon kita sa pag-alagad sa Dios sing matutom?

⁴ Sa wala sing duhaduha, luyag mo mangin maisugon nga alagad sang Dios. Apang, ang iban nga nagbatyag nga wala sing makapatalikod sa ila nadula gikan sa grupo sang mga manugbantala sang Ginharian. Sa kabaliskaran, ang iban pa, lakip ang mga tawo nga daw mahuluy-on sa kinaugali, nagapadayon gihapon subong makugi nga mga alagad sang Dios. Paano mo mapamatud-an nga ikaw magatindog sing “malig-on sa pagtuo”?​—⁠1 Cor. 16:13.

Wala Nagasandig sa Aton Kaugalingon nga Kusog

5. (a) Agod pamatud-an nga matutom kita nga mga alagad sang Dios, ano ang sadsaran nga kinahanglanon? (b) Ngaa importante gid ang mga miting?

⁵ Sa pagkamatuod, madamo nga butang ang nadalahig subong matutom nga alagad sang Dios. Apang ang sadsaran sining tanan amo ang pagsandig kay Jehova kag sa iya mga aman. Paano naton ginapakita ina nga pagsandig?  Ang isa ka paagi amo ang pagtambong sa mga miting sang kongregasyon. Ang Kasulatan nagapalig-on sa aton nga indi ini pagwasihon. (Heb. 10:​23-25) Ang mga nagpadayon subong matutom nga mga saksi ni Jehova, bisan sa atubangan sang indi pagsapak sang publiko ukon sang paghingabot, nagpanikasog agod mangin regular sa pagtambong sa mga miting upod sa mga masigkasumilimba. Sa sining mga miting ang aton ihibalo sa Kasulatan nagadugang, apang indi lamang ang interes sa bag-o nga mga butang ang nagaganyat sa aton. (Ipaanggid ang Binuhatan 17:​21.) Nagauswag ang aton apresasyon sa nahibaluan sing maayo nga mga kamatuoran, kag subong man ang aton ihibalo sang mga paagi sa paggamit sini. Ang halimbawa ni Jesus para sa aton labi pa nga ginapatudok sa aton hunahuna kag tagipusuon. (Efe. 4:​20-24) Labi pa nga nagasuod kita sa aton Cristianong mga kauturan sa nahiusa nga pagsimba kag ginapalig-on kita mismo nga magpadayon sa paghimo sang kabubut-on sang Dios. Ang espiritu ni Jehova nagaaman sing pagtuytoy paagi sa kongregasyon, kag paagi sa sina nga espiritu si Jesus yara sa aton tunga kon kita nagatipon sa iya ngalan.​—⁠Bug. 3:​6; Mat. 18:20.

6. Kon ginadumilian ang mga Saksi ni Jehova, ano ang ginahimo sa aton mga miting?

⁶ Tayuyon bala ikaw nga nagatambong sa tanan nga miting kag ginaaplikar mo bala ang imo nabatian? Kon kaisa, bangod sang pagdumili, kinahanglanon nga hiwaton ang mga miting sa diutay nga mga grupo sa pribado nga mga puluy-an. Ang mga duog kag mga oras mahimo nga lainlainon kag mahimo nga indi pirme kombenyente, ang iban nga mga miting ginahiwat sing gab-i na. Apang, walay sapayan sang personal nga kabudlayan ukon katalagman, ang matutom nga kauturan nga mga lalaki kag mga babayi nagpanikasog gid sa pagtambong sa tagsa ka miting.

7. (a) Paano pa naton ginapakita ang aton pagsandig kay Jehova? (b) Paano ini makabulig sa aton nga magpadayon sa paghambal sing masidla?

⁷ Ang pagsandig kay Jehova ginapakita man paagi sa tayuyon nga pagpalapit sa iya sa pangamuyo​—⁠indi subong isa lamang ka pormal nga rutina, kundi upod ang tinagipusuon nga pagkasayod nga kinahanglan naton ang bulig sang Dios.  Ginahimo mo bala ina? Si Jesus makapila nga nagpangamuyo sa tion sang iya ministeryo sa duta. (Luc. 3:​21; 6:​12, 13; 9:​18, 28; 11:​1; 22:​39-44) Kag sang gab-i sa wala pa sia ginlansang ginpalig-on niya ang iya mga disipulo: “Magpulaw kag magpangamuyo kamo, agod nga indi kamo makasulod sa panulay.” (Mar. 14:​38) Kon wala sing nagasapak sa mensahe sang Ginharian, mahimo nga masulay kita sa paghinay sa aton ministeryo. Kon yagutaon kita sang mga tawo ukon may yara daku nga paghingabot, mahimo nga masulay kita sa paghipos agod malikawan ini. Apang kon kita hanuot nga mangamuyo para sa espiritu sang Dios agod buligan kita sa pagpadayon sa paghambal sing masidla, pagaamligan kita batok sa pagpadaug sa sina nga pagsulay.​—⁠Luc. 11:​13; Efe. 6:​18-20.

Rekord sang Masidla nga Pagpanaksi

8. (a) Ngaa interesado gid kita sa rekord sang Mga Binuhatan? (b) Sabta ang mga pamangkot sa katapusan sining parapo, ginapadaku kon paano kita makabenepisyo sa impormasyon.

⁸ Interesado gid kita tanan sa rekord sang tolon-an sang Mga Binuhatan. Ginasugid sini kon paano ang mga apostoles kag ang iban pa sang unang mga disipulo, mga tawo nga may balatyagon kasubong naton, nakalandas sang mga balagbag kag nagpamatuod subong masidla kag matutom nga mga saksi ni Jehova. Usisaon naton ang isa ka bahin sina nga rekord upod sa bulig sang masunod nga mga pamangkot kag nasambit nga mga kasulatan. Samtang ginahimo naton ini, binagbinaga kon paano ikaw makabenepisyo gikan sa imo ginabasa.

 May mataas bala nga edukasyon ang mga apostoles? Sila bala mga tawo nga sa kinaugali wala sing kahadlok, bisan ano man ang matabo? (Binu. 4:​13; Juan 18:​17, 25-27; 20:​19)

 Ano ang nakabulig kay Pedro sa paghambal sing masidla sa atubangan sang Judiyong korte nga nagpakamalaut sa Anak sang Dios sang nagligad nga pila ka semana? (Binu. 4:​8; Mat. 10:​19, 20)

 Ano ang ginhimo sang mga apostoles  sa sulod sang mga semana sa wala pa sila gindala sa atubangan sang Sanhedrin? (Binu. 1:​14; 2:​1, 42)

 Sang ginmanduan sila sang mga manuggahom nga mag-untat sa pagbantala sa ngalan ni Jesus, ano ang ginsabat nanday Pedro kag Juan? (Binuhatan 4:​19, 20)

 Sang makaguwa sila, kay sin-o sila liwat nangayo sing bulig? Nagpangamuyo bala sila nga pauntaton ang paghingabot, ukon ano? (Binu. 4:​24-31)

 Sa anong paagi nagbulig si Jehova sang ang mga manugpamatok nagtinguha sa pagpadulog sang pagbantala nga hilikuton? (Binu. 5:​17-20, 33-40)

 Paano ginpakita sang mga apostoles nga nahangpan nila ang rason nga sila ginluwas? (Binu. 5:​21, 41, 42)

 Bisan sang madamo sang mga disipulo ang nag-aplaag bangod sang kabaskugon sang paghingabot, ano ang padayon nga ginhimo nila? (Binu. 8:​3, 4; 11:​19-21)

9. (a) Ano ang makakulunyag nga mga resulta sang ministeryo sang unang mga disipulo? (b) Paano kita nadalahig?

⁹ Ang ila hilikuton may kaangtanan sa maayong balita indi walay pulos. Mga 3,000 ka disipulo ang nabawtismuhan sang Pentecostes sang 33 C.E. “Nagdugang pa gid ang mga tumuluo sa Ginuo, mga kadam-an sang mga lalaki kag mga babayi.” (Binu. 2:​41; 4:​4; 5:​14) Sang ulihi ginreport nga bisan ang isa sang labing mainit nga mga manughingabot, si Saul nga taga-Tarso, nangin isa ka Cristiano kag sia mismo masidla nga nagapanaksi sa kamatuoran. Nakilal-an sia subong si apostol Pablo. (Gal. 1:​22-24) Ang hilikuton nga nagsugod sang unang siglo wala magdulog. Nagbaskog ini sining “katapusan nga mga adlaw” kag nakalab-ot sa tanan nga bahin sang duta. May pribilehiyo kita nga makapakigbahin sa sini, kag samtang ginahimo naton ini makatuon kita gikan sa halimbawa sang matutom nga mga saksi nga nag-alagad sa wala pa kita.

10. (a) Anong mga kahigayunan ang gingamit ni Pablo sa pagpanaksi? (b) Sa anong mga paagi ginapalapnag mo ang mensahe sang Ginharian sa iban?

¹⁰ Sang maton-an ni Pablo ang kamatuoran nahanungod kay Jesucristo, wala sia mag-isol.  “Sa gilayon ginbantala niya . . . si Jesus, nga Sia Anak sang Dios.” (Binu. 9:​20) Gin-apresyar niya ang dibagay nga kaluoy sang Dios sa iya kag narealisar niya nga kinahanglan sang tanan ang maayong balita nga iya nabaton. Suno sa kinabatasan sadtong adlaw, sanglit isa sia ka Judiyo nagkadto sia sa mga sinagoga, nga amo ang Judiyong mga duog nga ginatipunan sang publiko, agod magpanaksi. Nagbantala man sia sa balay kag balay kag nagpangatarungan sa mga tawo sa merkado. Kag nangin handa sia sa pagsaylo sa bag-ong mga teritoryo agod ibantala ang maayong balita.​—⁠Binu. 17:​17; 20:​20; Roma 15:​23, 24.

11. (a) Paano ginpakita ni Pablo nga, samtang masidla, mahinantupon man sia sa iya paagi sang pagpanaksi? (b) Paano naton mapakita ina nga kinaiya kon nagapanaksi sa mga paryente, sa mga kaupod sa trabaho ukon sa eskwelahan?

¹¹ Si Pablo masidla, apang mahinantupon man, kag dapat amo man kita. Nakighambal sia sa mga Judiyo pasad sa mga saad nga ginsaad sang Dios sa ila mga ginikanan. Nakighambal sia sa mga Griego pasad sa mga butang nga nahibaluan na nila. Kon kaisa gingamit niya ang iya eksperiensia kon paano niya naton-an ang kamatuoran subong paagi sa pagpanaksi. Subong iya ginpaathag: “Nagahimo ako sini tanan tungod sa maayong balita, agod nga mangin umalambit ako sini upod sa iban.”​—⁠1 Cor. 9:​20-23; Binu. 22:​3-21.

12. (a) Bisan pa masidla, ano ang ginhimo ni Pablo agod likawan ang pilit nga pagpakig-atubang pirme sa mga manugpamatok? (b) San-o naton mailog sing maalamon ina nga halimbawa, kag paano? (c) Sa diin nagahalin ang gahom sa pagpadayon hambal sing masidla?

¹² Sang bangod sang pagpamatok sa maayong balita nangin kinahanglanon nga magbantala sa iban nga duog ukon magsaylo sa lain nga teritoryo sing temporaryo, ginhimo ini ni Pablo sa baylo nga mamilit sa pagpakig-atubang pirme sa mga kaaway sang kamatuoran. (Binu. 14:​5-7; 18:​5-7; Roma 12:​18) Apang wala gid niya ginkahuya ang maayong balita. (Roma 1:​16)  Bisan pa wala mahamuot si Pablo sa matamayon, kag masingki pa gani nga pagtratar sang mga manugpamatok, “nakatipon [sia] sing kasidla bangod sang aton Dios” agod magpadayon sa pagbantala. Walay sapayan sang mabudlay nga mga kahimtangan nga iya naeksperiensiahan, sia nagsiling: “Ang Ginuo nagtupad sa akon kag ginhatagan ako sing gahom, agod nga paagi sa akon ang pagbantala matuman sing bug-os.” (1 Tes. 2:​2; 2 Tim. 4:​17) Ang ulo sang Cristianong kongregasyon, si Ginuong Jesus, nagapadayon sa pag-aman sing gahom nga kinahanglanon sa paghimo sang hilikuton nga iya gintagna para sa aton adlaw.​—⁠Mar. 13:10.

13. Ano ang nagahatag sing pamatuod sa Cristianong kasidla, kag ano ang sadsaran sini?

¹³ May rason gid kita nga magpadayon sa paghambal sang Pulong sang Dios sing masidla, subong sang ginhimo ni Jesucristo kag sang iban pa matutom nga mga alagad sang Dios sang unang siglo. Wala ini nagakahulugan nga mangin mapintas kita ukon mabinatuon sa aton paagi. Likawan naton nga mangin indi mapatugsilingon ukon ipilit ang mensahe sa mga indi luyag sini. Apang indi kita magdulog bangod ang mga tawo wala nagasapak, ukon indi kita mahadlok kag maghipos bangod sang pagpamatok. Kasubong ni Jesus, ginatudlo naton ang Ginharian sang Dios subong amo ang may kinamatarong nga pangulohan sa bug-os nga duta. Nagahambal kita nga may pagsalig bangod nagatiglawas kita kay Jehova, ang Soberano sang Uniberso, kag ang mensahe nga aton ginawali indi aton kundi gikan sa iya.​—⁠Filip. 1:​27, 28; 1 Tes. 2:13.

Repaso nga Paghinun-anon

● Ngaa importante nga ipaambit ang mensahe sang Ginharian sa tanan kon mahimo? Apang ano nga mga reaksion ang paabuton naton?

● Paano naton mapakita nga wala kita nagasandig sa aton kaugalingon nga kusog sa pag-alagad kay Jehova?

● Anong mapuslanon nga mga leksion ang maton-an naton gikan sa tolon-an sang Mga Binuhatan?

[Mga Pamangkot sa Pagtinuon]