Kapitulo 11

‘Padayon nga Pangitaa Anay ang Ginharian’

1. (a) Ngaa, sang nagligad nga 1,900 ka tuig, nagsiling si Jesus nga pangitaon anay ang Ginharian? (b) Anong pamangkot ang dapat naton ipamangkot sa aton kaugalingon?

 KAPIN sa 1,900 ka tuig nga nagligad, sa isa ka diskurso sa Galilea, ginpalig-on ni Jesus ang iya mga tagpalamati: “Padayon, nian, nga pangitaa anay ang ginharian kag ang iya pagkamatarong.” Apang ngaa? Indi bala madamo nga siglo pa ang kalayuon sang paglingkod ni Cristo sa trono? Huo. Apang yadtong Mesianikong Ginharian amo ang paagi nga ang balaan nga ngalan ni Jehova mabindikar kag ang iya dakung katuyuan sa duta matuman. Ang bisan sin-o nga nagaapresyar sang importansia sini magahatag sa Ginharian sing una nga duog sa iya kabuhi. Matuod ina sang nahaunang siglo kag labi na sa karon nga ang Ginharian nagagahom na. Ginapakita bala sang imo dalanon sang pagkabuhi nga imo ginapangita anay ang Ginharian sang Dios?​—⁠Mat. 6:33.

2. Anong mga butang ang ginahimud-osan gid sang mga tawo sa kabilugan?

² Ang katawhan sa kabilugan kapin nga interesado sa iban nga mga butang. Malangkagon nga nagatinguha sila para sa kamanggaran kag panapton, kalan-on kag sing iban pa materyal nga mga pagkabutang kag sing mga kalipayan nga mabakal sang kuwarta. (Mat. 6:​31, 32) Ang dalanon sang ila pagkabuhi nagapakita sing tuman nga pagkawili sa kaugalingon kag sa kalipayan. Sa ila kabuhi, ang Dios ginabutang sa ikaduha nga duog​—⁠kon nagatuo pa sila sa iya.

3. (a) Ano nga sahi sang mga bahandi ang ginpalig-on ni Jesus sa iya mga disipulo nga pangitaon, kag ngaa? (b) Ngaa indi dapat sadto magkabalaka sing sobra nahanungod sa materyal nga mga kinahanglanon?

 ³ Apang si Jesus naglaygay sa iya mga disipulo: “Dili kamo magtipon sa inyo kaugalingon sing mga bahandi sa duta,” bangod wala sing isa sining pagkabutang ang magadugay sing dayon. “Sa baylo,” siling niya, “magtipon kamo sa inyo kaugalingon sing mga bahandi sa langit,” paagi sa pag-alagad kay Jehova. Ginlaygayan niya ang iya mga sumulunod nga ‘simplehon’ lamang ang ila mata, ginasentro ang ila igtalupangod sa isa ka butang lamang, ang paghimo sang kabubut-on sang Dios. “Indi kamo makapaulipon para sa Dios kag para sa Manggad,” siling niya sa ila. Apang kamusta naman ang materyal nga mga kinahanglanon​—⁠ang kalan-on, panapton kag puluy-an? “Dili kamo magkabalaka,” laygay ni Jesus. Ginpatalupangod niya ang mga pispis​—⁠ginapakaon sila sang Dios. Ginpalig-on niya ang iya mga sumulunod nga magkuha sing leksion gikan sa mga bulak​—⁠matahom nga ginapapanaptan sila sang Dios. Indi bala kapin pa ang bili sang intelihente tawhanon nga mga alagad ni Jehova sang sa bisan diin sini? “Padayon, nian, nga pangitaa anay ang ginharian kag ang iya pagkamatarong,” siling ni Jesus, “kag ining tanan nga iban pa [kinahanglanon] nga mga butang idugang sa inyo.” (Mat. 6:​19-34) Nagapati ka bala sa sina? Ginapakita bala ini sang imo mga ginabuhat?

Dili Pagtuguti nga Malumos ang Kamatuoran sang Ginharian

4. Kon pasobrahan sang isa ka tawo ang pagpadaku sa materyal nga mga butang, ano ang mahimo mangin resulta? Iilustrar.

⁴ Kon ang isa ka tawo nabalaka gid sa materyal nga mga butang, ang mga resulta mahimo nga mangin malaglagon. Bisan pa magasiling sia nga may interes sia sa Ginharian, kon sa iya tagipusuon ginauna niya ang iban nga mga butang, ang kamatuoran sang Ginharian malumos. (Mat. 13:​18, 19, 22) Halimbawa, sang isa ka okasyon ang isa ka manggaranon kag pamatan-on pa nga manuggahom namangkot kay Jesus, “Ano ang dapat ko himuon agod makapanubli sing kabuhi nga walay katapusan?” Ang iya sabat sa sabat ni Jesus nagapakita nga sia may moral nga pagkabuhi kag mainayuhon sa iban. Apang sobra ang iya gugma sa iya materyal nga mga pagkabutang. Indi niya mabiyaan ini pabor sa pagsunod kay Cristo.  Gani ginpaligad niya ang kahigayunan nga kuntani magahimo sa iya nga mangin kaupod nga manuggahom ni Cristo sa langitnon nga Ginharian. Subong ginsiling ni Jesus sadto nga okasyon: “Daw ano kabudlay sa mga may manggad ang pagsulod sa ginharian sang Dios!”​—⁠Mar. 10:​17-23.

5. (a) Ginpalig-on ni Pablo si Timoteo nga mangin kontento sa anong mga butang, kag ngaa? (b) Paano ginagamit ni Satanas ang “gugma sa kuwarta” subong isa ka malaglagon nga siod?

⁵ Tinuig sang ulihi, si apostol Pablo nagsulat kay Timoteo, nga sadtong tion didto sa Efeso, isa ka manggaranon nga sentro sang komersio. Ginpahanumdom niya sia: “Wala kita sing nadala sa kalibutan, kag wala man kita sing makuha paguwa sa kalibutan. Gani, kon kita may kalan-on kag panapton, dapat kita mangin kontento sa sini.” Ang pagtrabaho agod makaaman sing nagakaigo nga “kalan-on kag panapton” para sa kaugalingon kag sa pamilya husto. Apang si Pablo nagpaandam: “Ang determinado sa pagmanggaranon nagakahulog sa pagsulay kag siod kag sa madamong kailigbon nga binuang kag makahalalit, nga nagatugdang sang mga tawo sa kadulaan kag kalaglagan.” Si Satanas malalangon. Sa primero mahimo nga hayluhon niya ang isa ka tawo sa diutay nga mga paagi. Sa masami ginasundan ini sing dakudaku nga pag-ipit​—⁠ayhan kahigayunan nga madelanto sa trabaho nga mas daku sing suweldo apang nagakinahanglan sing tion nga sang una ginatigana para sa espirituwal nga mga butang. Kon indi kita magmabinantayon, ang “gugma sa kuwarta” makalumos sang importante gid nga mga interes sang Ginharian. Suno kay Pablo, “Paagi sa pagtinguha sa sining gugma [sa kuwarta] ang iban nagtalang gikan sa pagtuo kag nagsuntok sang ila tagipusuon sing madamong kasakitan.”​—⁠1 Tim. 6:​7-10.

6. (a) Agod indi masiod, ano ang dapat naton himuon? (b) Realistiko bala ina bangod sang kahimtangan sa ekonomiya sang kalibutan karon?

⁶ Upod ang matuod nga gugma para sa iya Cristianong utod, ginlaygayan ni Pablo si Timoteo: “Palagyo ka sa sining mga butang,” kag, “Pakig-away sing maayong pag-away sang pagtuo.” (1 Tim. 6:​11, 12) Kinahanglan ang hanuot nga panikasog agod malikawan naton nga madala kita sang materyalistiko nga paagi sang pagkabuhi sang kalibutan sa palibot naton.  Apang kon magtinguha gid kita nga magpahisuno sa aton pagtuo, indi gid kita pagbiyaan ni Jehova. Walay sapayan sang mataas nga mga bili kag lapnag nga pagkawala sing trabaho, pat-uron niya nga matigayon naton ang aton ginakinahanglan gid.​—⁠Heb. 13:​5, 6.

Ang Unang mga Disipulo Naghatag sing Sulundan

7. Sang ginpadala ni Jesus ang mga apostoles agod magwali sa Israel, anong mga instruksion ang ginhatag niya sa ila, kag ngaa nagakaigo ini?

⁷ Sa tapos mahanas ni Jesus ang iya mga apostoles ginpadala niya sila sa Israel agod ibantala ang maayong balita. “Ang ginharian sang mga langit malapit na.” Daw ano yadto ka makalilipay nga balita! Si Jesucristo, ang Mesianikong Hari, yadto sa ila tunga. Sanglit ginhugod sang mga apostoles ang ila kaugalingon sa pag-alagad sa Dios, ginpalig-on sila ni Jesus nga magsalig sila nga ang Dios magaatipan sa ila. Gani sia nagsiling: “Dili magdala sing bisan ano sa inyo panlakatan, bisan sungkod, bisan balalunan, bisan tinapay, bisan kuwarta; kag dili magdala sing duha ka bayo. Kag bisan diin nga balay kamo magsulod, dayon kamo didto kag maghalin kamo gikan didto.” (Mat. 10:​5-10; Luc. 9:​1-6; 10:​4-7) Pat-uron ni Jehova nga ang ila mga kinahanglanon mahatag paagi sa mga kamot sang mga masigka-Israelinhon nga may kinabatasan sa pag-abiabi sa mga dumuluong.

8. (a) Ngaa tuhay nga mga instruksion ang ginhatag ni Jesus sang malapit na sia mapatay? (b) Walay sapayan, ano gihapon ang dapat mangin una sa ila kabuhi?

⁸ Sang ulihi, sa wala pa sia mapatay, ginpaalisto ni Jesus ang iya mga apostoles sa kamatuoran nga sila magapanghikot sa idalom sang nagbalhin nga mga kahimtangan. Subong resulta sang pagpamatok sang mga opisyal, ang pagkamaabiabihon indi na mangin kinaandan sa Israel. Subong man, sa indi madugay dalhon nila ang mensahe sang Ginharian sa Gentil nga kadutaan. Karon magadala sila sing “puyo” kag sing “balalunan.” Walay sapayan, dapat nila padayunon ang pagpangita anay sa Ginharian ni Jehova kag sa iya pagkamatarong, nagasalig nga pakamaayuhon sang Dios ang ila mga panikasog sa pagtigayon sing kinahanglanon nga kalan-on kag panapton.​—⁠Luc. 22:​35-37.

9. (a) Paano ginhuptan ni Pablo ang Ginharian sa una nga duog? (b) Paano niya gin-atipan ang iya pisikal nga mga kinahanglanon? (c) Anong laygay ang ginhatag niya sa iban sa sini nga butang?

 ⁹ Si apostol Pablo naghatag sing maayong halimbawa kon paano iaplikar ang laygay ni Jesus. Gintukod niya ang iya kabuhi sa palibot sang iya ministeryo. (Binu. 20:​24, 25) Sang magkadto sia sa isa ka duog agod magbantala gin-atipan niya ang iya materyal nga mga kinahanglanon paagi sa paghimo sing mga tolda. Wala sia magpaabot sa iban nga atipanon sia. (Binu. 18:​1-4; 1 Tes. 2:​9; 1 Cor. 9:​18) Apang mapinasalamaton nga ginbaton niya ang pagkamaabiabihon kag ang mga regalo kon ang iban luyag magpabutyag sang ila gugma kag apresasyon sa sining paagi. (Binu. 16:​15, 34; Filip. 4:​15-17) Wala niya pagpalig-ona ang Cristianong mga lalaki kag mga babayi nga patumbayaan ang ila mga obligasyon sa pamilya agod makabantala, kundi sa baylo atipanon ang ila nanuhaytuhay nga mga salabton sa balanse nga paagi. Ginlaygayan niya sila nga gamiton ang ila mga kamot sa pagpangabudlay, higugmaon ang ila pamilya, kag magmaalwan sa iban. (Efe. 4:​28; 2 Tes. 3:​7-12; Tito 2:​3-5) Ginpalig-on man niya sila nga magsalig indi sa materyal nga pagkabutang, kundi sa Dios kag magkabuhi sa isa ka paagi nga nagapakita nga nahangpan gid nila kon ano ang labi ka importante nga mga butang sa kabuhi. Nahisuno sa mga panudlo ni Jesus, nagkahulugan yadto sang pagpangita anay sa Ginharian sang Dios kag sa iya pagkamatarong.​—⁠Filip. 1:​9-11.

HUPTI ANG GINHARIAN NGA UNA SA INYO KABUHI

10. (a) Ano ang buot silingon sang ‘pagpangita anay sa Ginharian’? (b) Apang ano ang indi dapat patumbayaan?

¹⁰ Tubtob sa anong kasangkaron kita mismo nagapaambit sa iban sing maayong balita sang Ginharian? Depende ina, sa bahin, sa aton mga kahimtangan kag, sa dakung kasangkaron, sa kadalumon sang aton apresasyon. Dumduma nga si Jesus wala magsiling, ‘Pangitaa ang Ginharian kon wala na kamo sing iban pa nga himuon.’ Wala man sia magsiling, ‘Tubtob nagahambal ikaw nahanungod sa Ginharian sa tion kag tion, ginahimo mo ang tanan nga kinahanglanon.’  Wala man sia magsiling, ‘Mag-umpisa nga may kakugi para sa mga interes sang Ginharian; apang kon ang bag-ong sistema daw malayo pa, maghimo ka sing pag-alagad sa Dios apang magkabuhi nga subong sang iban nga tawo.’ Bangod nahibaluan niya ang pagkaimportante sang Ginharian, ginpabutyag niya ang kabubut-on sang iya Amay sa sini nga butang, nga nagasiling: “Padayon nga pangitaa ang iya ginharian.” Ukon, suno sa rekord ni apostol Mateo: “Padayon, nian, nga pangitaa anay ang ginharian kag ang iya pagkamatarong.” (Luc. 12:​31; Mat. 6:​33) Bisan pa nahibaluan sang kalabanan sa aton nga dapat kita magtrabaho agod maatipan ang aton pisikal nga mga kinahanglanon kag sang aton pamilya, kon may pagtuo gid kita, ang aton kabuhi masentro sa hilikuton nga ginhatag sang Dios sa aton may kaangtanan sa iya Ginharian. Sa amo man nga tion indi naton pagpatumbayaan ang mga salabton sa aton pamilya.​—⁠1 Tim. 5:​8; Hulu. 29:15.

11. (a) Paano gin-ilustrar ni Jesus ang kamatuoran nga indi tanan makahimo sing pareho nga kadakuon sa pagpalapnag sing mensahe sang Ginharian? (b) Ano nga mga butang ang may kahilabtanan sa sini?

¹¹ Ang iban sa aton makahugod sing kapin nga tion sa pag-alagad sa latagon sang sa iban. Apang sa iya parabola nahanungod sa nanuhaytuhay nga sahi sang duta ginpakita ni Jesus nga ang tanan nga may tagipusuon subong sang maayo nga duta magapamunga. Tubtob sa anong kasangkaron? Nanuhaytuhay ang mga kahimtangan sang mga indibiduwal. Ang edad, panglawas kag ang mga salabton sa pamilya mga kabangdanan tanan. Apang kon may yara matuod nga apresasyon, daku ang mahimo.​—⁠Mat. 13:​19, 23.

12. Anong maayo nga espirituwal nga tulumuron ang ginapalig-on labi na para sa mga pamatan-on nga binagbinagon nila?

¹² Maayo nga magpahamtang sing mga tulumuron nga magabulig sa aton sa pagpasangkad sang aton bahin sa ministeryo sa Ginharian. Ang mga pamatan-on dapat maghunahuna sing serioso nahanungod sa maayo gid nga halimbawa sang makugi nga Cristianong pamatan-on nga si Timoteo. (Filip. 2:​19-22) Ano pa ang mas maayo para sa ila sang sa magsulod sa bug-os tion nga ministeryo kon natapos na nila ang ila sekular nga pag-eskwela? Ang mga may edad man, makabenepisyo paagi sa pagpahamtang sing maayo espirituwal nga mga tulumuron.

13. (a) Sin-o ang nagapamat-od kon ano ang imo personal nga masarangan sa pag-alagad sa Ginharian? (b) Kon ginapangita gid naton sing una ang Ginharian, pamatuod ini sang ano?

 ¹³ Sa baylo nga mulayon ang iban nga makahimo sing kapin, dapat kita pahulagon sang pagtuo sa pagpanghikot para sa personal nga pag-uswag agod nga kita makaalagad sa Dios tubtob sa bug-os nga kasangkaron nga ipahanugot sang aton kaugalingon nga mga kahimtangan. (Roma 14:​10-12; Gal. 6:4) Subong ginapakita sa bahin ni Job, si Satanas nagsiling nga interesado lamang kita sa aton materyal nga mga pagkabutang, sa aton kaugalingon nga kasulhay kag sa aton kaayuhan, kag nga ang aton motibo sa pag-alagad sa Dios makagod. Apang kon pangitaon gid naton anay ang Ginharian, may bahin kita sa pagpamatuod sa Yawa nga butigon. Nagahatag kita sing pamatuod nga ang una sa aton kabuhi indi ang materyal nga mga pagkabutang ukon ang personal nga kasulhayan kundi ang pag-alagad sa Dios. Sa pulong kag sa buhat dapat naton pamatud-an ang aton tudok nga gugma para kay Jehova, ang aton matutom nga pagsakdag sa iya pagkasoberano kag ang aton gugma sa isigkatawo.​—⁠Hulu. 27:​11; Job 1:​9-11; 2:​4, 5.

14. (a) Ngaa mapuslanon ang isa ka iskedyul para sa pag-alagad sa latagon? (b) Tubtob sa anong kasangkaron ang madamo nga mga Saksi nagapakigbahin sa pag-alagad sa latagon, kag ngaa?

¹⁴ Ang isa ka iskedyul makabulig sa aton sa paghimo sing kapin. Si Jehova mismo may ‘napat-od nga tion’ sa pagtuman sang iya katuyuan, kag maayo nga ilugon naton ina. (Ex. 9:​5; Mar. 1:​15; Gal. 4:4) Kon posible, maayo nga magpakigbahin sa pag-alagad sa latagon sa gintalana nga tion sing makaisa ukon kapin pa kada semana. Tignapulo ka libo ka mga Saksi ni Jehova sa bilog nga kalibutan ang nagpalista subong mga aux­il­iary payunir kag nalipay sa paghinguyang sing duha ka oras ukon kapin pa kada adlaw, sa promedyo, sa pagbantala sing maayong balita. Ang iban nagahimo sini sing regular; ang iban, sing pila ka beses kada tuig. Linibolibo pa ang nagaalagad subong mga regular payunir, nagahinguyang sa dimagkubos sing tatlo ka oras kada adlaw, sa promedyo, sa pagwali sang mensahe sang Ginharian.  Ang iban, subong mga espesyal payunir kag mga misyonero, nagahinguyang sing kapin pa nga tion sa pag-alagad sa Ginharian. Kag kon bala aktuwal nga nagaalagad sa latagon ukon wala, makapangita kita sing mga kahigayunan sa pagpaambit sing paglaum sa Ginharian sa bisan kay sin-o nga magapamati sa tagsa ka nagakaigo nga okasyon. (Ipaanggid ang Juan 4:​7-15.) Dapat naton tanan hunahunaon sing serioso ang mga ginapahangop sang tagna ni Jesus nga “ining maayong balita sang Ginharian ibantala sa bug-os napuy-an nga duta subong panaksi sa tanan nga pungsod; kag ugaling magaabot ang katapusan.” Ang aton handum dapat nga amo ang pagpakigbahin sing bug-os sa sina nga hilikuton suno sa ginatugot sang aton kahimtangan.​—⁠Mat. 24:​14; Efe. 5:​15-17.

15. May kaangtanan sa aton ministeryo, ngaa ginabatyag naton nga ang laygay sa 1 Corinto 15:​58 sibu?

¹⁵ Sing nahiusa, sa tanan nga bahin sang duta, walay sapayan sang pungsod nga ila ginapuy-an, ang mga Saksi ni Jehova aktibo nga nagapakigbahin sa sining daku nga pribilehiyo sang pag-alagad. Ginaaplikar nila sa ila kaugalingon ang inspirado nga laygay sang Biblia: “Magpakalig-on kamo, nga dimationg, pirme may bugana nga hilimuon sa hilikuton sang Ginuo, sa nahibaluan ninyo nga ang inyo pagpangabudlay indi walay pulos sa Ginuo.”​—⁠1 Cor. 15:58.

Repaso nga Paghinun-anon

● Sang magsiling si Jesus nga pangitaon anay ang Ginharian, ano ang iya ginpakita nga dapat ibutang sa ikaduha nga lugar?

● Ano nga pagtamod ang dapat naton huptan tuhoy sa pag-atipan sang pisikal nga mga kinahanglanon sang aton kaugalingon kag sang aton pamilya? Ano nga bulig ang ihatag sa aton sang Dios?

● May kinaliwan bala kon daw ano kadaku ang aton ginahimo sa pag-alagad sa Ginharian basta lamang nagapakigbahin kita? Ngaa?

[Mga Pamangkot sa Pagtinuon]