Kapitulo 8

‘Pagpakig-away Batok sa Malaut nga mga Espiritu’

1. Ngaa interesado gid kita sa pagpanghikot sang mga malauton nga espiritu?

 ANG mga tawo nga materyalistiko sing hunahuna mahimo nga magayaguta sa ideya nga may yara malaut nga mga espiritu. Apang indi ini isa ka butang nga kaladlawan. Magapati man sila ukon indi, ang pagpanghikot sang mga demonyo nagaipit sa bisan kay sin-o. Indi puwera sa sini ang mga sumilimba ni Jehova. Sa kamatuoran, sila ang una nga puntariya. Si apostol Pablo nagapaalisto sa aton sa sining inaway, nga nagasiling: “Nagapakig-away kita, indi batok sa dugo kag unod, kundi batok sa mga pangulohan [nga wala sa duog sang dugo kag unod], batok sa mga awtoridad, batok sa mga manuggahom sang kalibutan sining kadudulman, batok sa malaut nga mga espiritu sa langitnon nga mga duog.” (Efe. 6:​12) Sa aton adlaw ang pag-ipit nangin labi kabaskog bangod si Satanas gintagbong gikan sa langit kag akig, bangod nahibaluan niya nga ang iya tion malip-ot.​—⁠Bug. 12:12.

2. Paano posible para sa aton nga makapakig-away sing madinalag-on batok sa labaw sa tawo nga mga espiritu?

² Paano ang bisan sin-o sa aton magmadinalag-on sa pagpakig-away batok sa labaw sa tawo nga mga espiritu? Paagi lamang sa pagsandig sing bug-os kay Jehova. Dapat kita mamati sa iya kag magtuman sang iya Pulong. Paagi sa paghimo sini, maamligan kita gikan sa halit sa lawas, sa moral, sa emosyon, kag sa hunahuna nga naeksperiensiahan sang mga yara sa idalom sang kontrol ni Satanas.​—⁠Efe. 6:​11; Sant. 4:7.

 Mga Manuggahom sang Kalibutan sa Langitnon nga mga Duog

3. Sa ano kag sa kay sin-o si Satanas mapintas nga nagapamatok?

³ Maathag nga ginalaragway ni Jehova para sa aton ang kahimtangan sang kalibutan gikan sa iya pagtamod sa hitaas sa mga langit. Ginhatagan niya si apostol Juan sing isa ka palanan-awon nga sa diin si Satanas ginlaragway subong “isa ka dakung dragon nga mapula” nga nagahana sa paglamon, kon mahimo, sa Mesianikong Ginharian sang Dios sa tion nga ini ginbun-ag sa langit sang 1914 C.E. Sang mapaslawan sadto, ginpaguwa ni Satanas batok sa kitaon nga mga tiglawas sadtong Ginharian, ang ikaduha nga bahin sang binhi sang “babayi” sang Dios, ang isa ka baha sang mapintas nga pagpamatok.​—⁠Bug. 12:​3, 4, 13, 17.

4. (a) Anong kamatuoran nahanungod sa ginahalinan sang gahom sang tawhanon nga mga pangulohan ginapaalisto kita sang Biblia? (b) Sa ano karon ginatipon ang tanan nga politikal nga manuggahom, kag sin-o ang nagatipon sa ila?

⁴ Ang ginahalinan sang gahom kag awtoridad sang tawhanon nga mga pangulohan ginbuyagyag man sa sadto nga bugna kay Juan. Ginpakitaan sia sing isa ka mabangis nga sapat, nga may 7 ka ulo kag 10 ka sungay, isa ka sapat nga may awtoridad sa “ibabaw sang tagsa ka tribo kag katawhan kag hambal kag pungsod.” Ini nagarepresentar, indi lamang sa isa ka pangulohan, kundi sa bug-os globo nga sistema sang politika. Ginpahibalo si Juan nga “ang dragon [si Satanas nga Yawa] naghatag sa sapat sang iya gahom kag sang iya trono kag sang iya daku nga pagbulut-an.” (Bug. 13:​1, 2, 7; ipaanggid ang Lucas 4:​5, 6.) Walay sapayan sang bisan anong relihioso nga mga pangangkon sang politikal nga mga manuggahom, wala sing isa sa katapo nga mga pungsod sang “sapat” ang nagapasakop sa pagkasoberano ni Jehova kag sa iya gintangdo nga Hari, si Jesucristo.  Sila tanan nagapanikasog nga huptan ang ila kaugalingon nga pagkasoberano. Sa karon, subong ginapakita sang Bugna, “ang mga ekspresyon nga gin-inspirar sang mga demonyo nagatipon sa ila tanan padulong sa inaway sang daku nga adlaw sang Dios nga Labing Gamhanan” sa Har–Magedon. (Bug. 16:​13, 14, 16) Sa pagkamatuod, subong ginsulat ni apostol Pablo, “ang mga manuggahom sang kalibutan” indi mga tawo lamang kundi “malaut nga mga espiritu sa langitnon nga mga duog.” (Efe. 6:​12) Ang tanan nga magapamatuod sang ila kaugalingon subong matuod nga mga sumilimba ni Jehova dapat nga makahangop sang bug-os nga kahulugan sina.

5. Ngaa kinahanglan maghalong agod malikawan nga maniobrahon sa pagsakdag sa Sataniko nga sistema?

⁵ Sa adlaw-adlaw ang aton kabuhi ginatandog sang mga pagbinangig nga nagatunga sang pamilya sang tawo. Kinaandan nga ang mga tawo nagadampig, sa pulong ukon sa tuhay nga paagi, upod sa pungsod, tribo, grupo sang hambal ukon sosyal nga grupo nga sa diin bahin sila sini. Bisan pa kon ang ila partikular nga bahin sang katilingban indi talangkod nga nadalahig sa binangig, mahimo nga masapwan nila ang ila kaugalingon nga nagadampig sa isa batok sa isa. Apang ano man ang reklamo, walay sapayan sang tawo ukon sang kausa nga ila ginasakdag, ano gid ang ila ginasakdag? Ang Biblia maathag nga nagasiling nga ang “bug-os nga kalibutan yara sa gahom sang malauton.” (1 Juan 5:​19) Paano, nian, makalikaw ang isa ka tawo nga mapatalang upod sa nabilin nga bahin sang katawhan? Paagi lamang sa pagsakdag sing bug-os sa Ginharian sang Dios kag pagpabilin nga neutral sing bug-os sa mga pagbinangig sang mga nagasumpakilay nga mga bahin sang kalibutan.​—⁠Juan 17:​15, 16.

Malalangon nga mga Pahito sang Malauton

6. Ano ang nalakip sa mga paagi nga gingamit ni Satanas sa pagpatalikod sa mga tawo gikan sa matuod nga pagsimba?

⁶ Sa bug-os nga panahon sang maragtas si Satanas naggamit sing berbal kag pisikal nga paghingabot agod patalikdon ang mga indibiduwal gikan sa matuod nga pagsimba. Apang naggamit man sia sing isa pa ka malalangon nga paagi​—⁠ang malimbungon nga mga buhat kag malalangon nga mga pahito.

7. Paano ang pagkatuso ni Satanas ginpakita sa iya paggamit sa dimatuod nga relihion?

⁷ Tuso nga iya ginhuptan ang daku nga bahin sang katawhan sa kadudulman paagi sa dimatuod nga relihion, nagapahunahuna sa ila, kon luyag nila, nga sila nagaalagad sa Dios.  Bangod kulang sing matuod nga gugma sa kamatuoran, mahimo nga maganyat sila sa mistiko kag relihioso nga mga serbisyo nga nagatandog sang emosyon ukon magadayaw sila sa gamhanan nga mga buhat. (2 Tes. 2:​9, 10) Apang ginpaandaman kita nga, bisan gikan sa tunga sadtong nag-ambit anay sa matuod nga pagsimba, “ang iban magatalikod . . . nagatalupangod sa nagapatalang nga mga espiritu kag sa mga pagtolon-an sang mga demonyo.” (1 Tim. 4:1) Paano ina matabo?

8. Paano ginganyat ni Satanas padulong sa dimatuod nga relihion ang iban nga nagasimba anay kay Jehova?

⁸ Sing malalangon ginagamit sang Yawa ang mga kaluyahon sang isa ka tawo. May yara pa bala sia kahadlok sa tawo? Kon amo mahimo nga magapadaug sia sa pag-ipit sang mga paryente ukon mga kaingod nga mag-ambit sa mga buhat nga naghalin sa dimatuod nga relihion. Bugalon bala ang isa ka indibiduwal? Nian mahimo nga masaklaw sia kon laygayan ukon kon ang iban wala nagabaton sang iya mga ideya. (Hulu. 29:​25; 15:​10; 1 Tim. 6:​3, 4) Ano kon ang iya pagpakigbahin sa pag-alagad sa latagon wala ginapahulag sang gugma? Sa baylo nga pasibuon ang iya pagtamod agod magpauyon sa halimbawa ni Cristo, mahimo nga mahuyog sia sa mga tawo nga ‘nagapakalam sang iya mga dulunggan’ paagi sa pagsiling nga tuman na ang magbasa lamang sing Biblia kag maghimo sing maayo sa isigkatawo. (2 Tim. 4:3) Indi importante kay Satanas kon bala sia aktuwal nga magabuylog sa lain nga grupo sang relihion ukon magpabilin sa iya kaugalingon nga relihion, basta wala lang sia nagasimba kay Jehova sa paagi nga ginatudlo sang Dios paagi sa iya Pulong kag sa iya organisasyon.

9. Paano ginagamit ni Satanas sing malalangon ang sekso sa pagtuman sang iya mga tulumuron?

⁹ Si Satanas malalangon man nga nagahaylo sa mga tawo nga paayawan ang ila normal nga mga handum sa sayop nga mga paagi. Nahimo niya ini tuhoy sa handum para sa seksuwal nga relasyon.  Ginasikway ang moralidad sang Biblia, madamo sa kalibutan ang nagatamod sa seksuwal nga relasyon sang indi kasal nga mga tawo subong legal nga kalipay ukon subong isa ka paagi sa pagpamatuod nga sila mga adulto. Kag kamusta naman ang kinasal nga mga tawo? Kinaandan sa kalibutanon nga mga tawo nga nakaeksperiensia sing mga problema sa pag-asawahay ang magdiborsio kag magminyo liwat ukon magbulagay lamang kag magpuyopuyo upod sa lain nga tiayon. Kon maobserbahan naton ini nga paagi sang pagkabuhi, ginabatyag bala naton nga may yara kita nawasi, nga ang Cristianong paagi tuman ka estrikto? Ang malalangon nga tikang ni Satanas amo ang pagpahunahuna sa tawo nga si Jehova may ginadingot nga isa ka butang nga maayo. Ginahaylo niya kita nga hunahunaon ang kalipay nga aton matigayon karon​—⁠indi ang malawig nga epekto sa aton kaugalingon kag sa iban kag sa pagkamatuod indi ang aton kaangtanan kay Jehova kag sa iya Anak.​—⁠Gal. 6:​7, 8; 1 Cor. 6:​9, 10.

10. Sa anong paagi ginatinguhaan ni Satanas nga pukanon ang aton panimuot sa kasingki?

¹⁰ Ang isa pa ka kinaugali nga handum amo ang kalingawan. Kon maayo, makapapagsik ini sa lawas, sa hunahuna kag sa emosyon. Apang ano ang aton reaksion kon si Satanas tuso nga nagagamit sang mga okasyon sa pagrelaks nga pahilayuon ang aton panghunahuna gikan sa Dios? Nahibaluan naton, halimbawa, nga ginadumtan ni Jehova ang nagahigugma sa kasingki. (Sal. 11:5) Apang kon ginapakita ini sang mga sine sa telebisyon ukon sa sinehan, nagapungko bala kita kag ginatan-aw ini? Ukon kon ginapakita ini sa ngalan sang hampang, ginabaton bala naton ini kag ayhan nagasinggit pa nga nagapalig-on sa mga humalampang?​—⁠Ipaanggid ang Genesis 6:13.

11. Sa anong mga paagi nga bisan ang isa ka tawo nga nakahibalo sang kamatuoran nahanungod sa espiritismo mahimo nga masiod kon indi sia alisto?

¹¹ Nakahibalo man kita nga ang mga nagapatuyang sa bisan ano nga porma sang espiritismo​—⁠pagpamakot, pagpangaswang ukon pagtinguha nga magpakig-angot sa mga patay​—⁠“butang nga kangil-aran kay Jehova.” Indi gid naton paghunahunaon nga magkonsulta sa mga espiritista kag indi gid naton sila pag-abiabihon sa aton puluy-an nga maghimo sang ila demonyohanon nga taliambong. Apang mamati bala kita sa ila kag magtan-aw nga may kawili kon magguwa sila sa aton telebisyon? Bisan pa indi gid kita magpabulong sa isa ka siruhano, higtan bala naton ang bulutkunan sang aton anak nga bag-o natawo sa pagdumdom nga ini magaamlig sa bata gikan sa halit?  Ukon, sa pagkahibalo nga ginapakamalaut sang Biblia ang ‘pagtiwtiw,’ tugutan bala naton ang isa ka manuglupay ukon hyp­no­tist nga magkontrol sang aton hunahuna bisan sing temporaryo lamang?​—⁠Deut. 18:​10-12; Gal. 5:​19-21.

12. (a) Paano ginagamit ang musika sa paghaylo sa aton nga batunon ang mga ideya nga nahibaluan naton sayop? (b) Paano ang pagpamayo, estilo sang buhok, ukon panghambal sang isa ka tawo magapakita sing pagdayaw sa mga tawo nga ang ila estilo sang pagkabuhi wala ginakahamut-an ni Jehova? (c) Ano ang kinahanglan sa aton kon luyag naton likawan nga mangin biktima sang malalangon nga mga pahito ni Satanas?

¹² Nabasa naton sa Kasulatan nga ang ‘pagkamakihilawason kag ang tanan nga kahigkuan, upod ang indi nagakaigo nga motibo, dili dapat sambiton sa tunga naton.’ (Efe. 5:​3-5) Apang ano kon ina nga mga tema tuso nga ginaupdan sang musika nga may makalilipay nga lanton, isa ka makatawag igtalupangod nga ritmo ukon makahalaylo nga tiempo? Aton pa bala ambahon nga wala sa bungog ang mga liriko nga nagahimaya sa sekso nga wala sing kasal, paggamit sing droga para lamang sa kalipay kag kapin pa? Ukon, samtang nahibaluan naton nga indi naton dapat ilugon ang paagi sang pagkabuhi sang mga tawo nga nagapatuyang sa sina nga mga butang, may huyog bala kita nga ipakilala ang aton kaugalingon upod sa ila paagi sa pag-ilog sang ila pagpamayo, sang ila estilo sang buhok ukon sang ila panghambal? Daw ano ka malalangon si Satanas! Daw ano ka malalangon ang mga metodo nga iya ginagamit sa paghaylo sa mga tawo nga magpauyon sa iya malaut nga hunahuna! (2 Cor. 4:​3, 4) Agod indi kita mabiktima sang iya malalangon nga mga pahito, dapat naton likawan nga magpadala sa kalibutan. Dapat naton dumdumon kon sin-o ang “mga manuggahom sang kalibutan sining kadudulman” kag magpakig-away sing lakas batok sa ila impluwensia.​—⁠Efe. 6:​12; 1 Ped. 5:8.

Nasangkapan Agod Mangin mga Dumalaug

13. Paano posible para sa bisan sin-o sa aton, walay sapayan sang aton pagkadihimpit, nga madaug ang kalibutan nga ginagamhan ni Satanas?

¹³ Sa wala pa mapatay si Jesus nagsiling sia sa iya mga apostoles: “Magpakaisog kamo! Nadaug ko ang kalibutan.” Gani, sila man, mahimo mangin mga dumalaug; kag kapin sa 60 ka tuig sang ulihi si apostol Juan nagsulat: “Sin-o bala ang nagadaug sang kalibutan kundi ang nagatuo nga si Jesus amo ang Anak sang Dios?” (Juan 16:​33; 1 Juan 5:5)  Ina nga pagtuo ginapakita paagi sa aton pagtuman sa mga sugo ni Jesus kag pagsandig sa Pulong sang Dios, subong sang iya ginhimo. Ano pa ang kinahanglanon? Nga kita magpabilin nga suod sa kongregasyon nga sa amo sia ang ulo. Kon makasala kita, dapat kita maghinulsol kag tinguhaon ang kapatawaran sang Dios sa sadsaran sang halad ni Jesus. Sa sining paagi, walay sapayan sang aton mga pagkadihimpit, kita man mangin mga dumalaug.

14. (a) Basaha ang Efeso 6:​13-18. (b) Gamita ang mga pamangkot kag ang mga kasulatan nga naaman subong sadsaran sa paghinun-anon sang mga kaayuhan gikan sa tagsa ka bahin sang espirituwal nga hinganib.

¹⁴ Agod magmadinalag-on, dapat naton isuklob “ang bug-os nga hinganib sang Dios,” nga wala ginapatumbayaan ang bisan ano nga bahin sini. Palihog buksi ang inyo Biblia sa Efeso 6:​13-18 kag basaha ang paglaragway sa sina nga hinganib. Nian, paagi sa pagsabat sang mga pamangkot sa ubos, binagbinaga kon paano kamo makabenepisyo gikan sa pag-amlig nga ginahatag sang tagsa ka bahin sang hinganib.

 “Nawagkusan ang inyo mga hawak sing kamatuoran”

 Bisan pa mahimo nahibaluan naton ang kamatuoran, paano ang regular nga pagtuon, pagpamalandong sa kamatuoran sang Biblia kag pagtambong sa mga miting nagaamlig sa aton? (Filip. 3:​1; 4:​8, 9; 1 Cor. 10:​12, 13; 2 Cor. 13:​5; 1 Ped. 1:​13, Kingdom Interlinear)

 “Limbutong sang pagkamatarong”

 Kay sin-o ini talaksan sang pagkamatarong? (Bug. 15:3)

 Iilustrar kon paano ang paglalis sa mga sugo ni Jehova, bangod sang kapaslawan sa pagpalambo sing gugma para sa iya mga dalanon makapadayag sa isa sa daku nga halit sa espirituwal. (Tan-awa ang 1 Samuel 15:​22, 23; Deuteronomio 7:​3, 4.)

 “Nasukluban ang mga tiil sang pangaman sang maayong balita sang paghidait”

 Paano nga isa ka pangamlig para sa aton ang paghupot sang aton mga tiil nga masako sa pagdala sa aton sa pagpakighambal sa mga tawo nahanungod sa mga aman sang Dios para sa paghidait? (Roma 10:​15; Sal. 73:​2, 3; 1 Tim. 5:⁠13)

 “Daku nga taming sang pagtuo”

 Kon may yara kita pagtuo nga may malig-on nga sadsaran, ano ang himuon naton sa atubangan  sang mga panikasog nga gintuyo sa pagpaduhaduha sa aton ukon sa pagpahadlok sa aton? (Ipaanggid ang 2 Timoteo 1:​12; 2 Hari 6:​15-17.)

 “Pandong sang kaluwasan”

 Paano ang ginalauman nga kaluwasan makabulig sa isa sa paglikaw nga masiod sang sobra nga kabalaka sa materyal nga mga pagkabutang? (1 Tim. 6:​7-10, 19)

 “Espada sang espiritu”

 Sa ano kita dapat magsandig pirme kon nagapakig-away sa mga pagsalakay batok sa aton espirituwalidad ukon sang iya sang iban? (Sal. 119:​98; Hulu. 3:​5, 6; ipaanggid ang Mateo 4:​3, 4.)

 Nahisanto sa sina, sa Efeso 6:​18, 19, ano pa ang ginapakita nga importante sa kadalag-an sa espirituwal nga pagpakig-away? Daw ano kasunson ini gamiton? Para kay sin-o?

15. (a) Isa lamang bala ka personal kag espirituwal nga pagpakig-away ang aton tanan ginapakigbahinan? (b) Paano kita makabato sa inaway?

¹⁵ Subong Cristianong mga soldado bahin kita sang isa ka daku nga hangaway nga nagapakigbahin sa espirituwal nga pagpakig-away. Kon magpabilin kita nga alisto kag gamiton naton sing maayo ang bug-os nga hinganib sang Dios, indi kita mabiktima sining inaway. Sa baylo, mangin isa kita ka makapalig-on nga bulig sa mga masigkaalagad sang Dios. Mangin handa kita kag malangkagon sa pagbato, nga ginapalapnag ang maayong balita sang Mesianikong Ginharian sang Dios, ang pangulohan nga masingki gid nga ginapamatukan ni Satanas.

Repaso nga Paghinun-anon

● Ngaa ang mga sumilimba ni Jehova nagatinguha gid sa pagpabilin nga neutral sing bug-os sa mga pagbinangig sang mga elemento sang kalibutan?

● Ano ang pila sang malalangon nga mga pahito ni Satanas agod laglagon ang espirituwalidad sang mga Cristiano?

● Paano ang hinganib nga gin-aman sang Dios makaamlig sa aton sa mga paagi nga kinahanglanon sa sining espirituwal nga pagpakig-away?

[Mga Pamangkot sa Pagtinuon]