Kapitulo 2

Pakadakua si Jehova Subong ang Matuod nga Dios

1. (a) Sin-o ang matuod nga Dios? (b) Samtang nagatuon kita tuhoy sa iya, paano dapat maapektohan ang aton kabuhi?

 NAGSULAT si apostol Pablo sa mga masigka-Cristiano nga, bisan pa madamo ang ginatawag nga dios, “sa aton may isa ka Dios, ang Amay . . . kag isa ka Ginuo, si Jesucristo.” (1 Cor. 8:​5, 6) Ang “isa ka Dios” nga ginapatuhuyan ni Pablo amo si Jehova, ang Manunuga sang tanan nga butang. (Deut. 6:​4; Bug. 4:11) Ang mainapresyahon nga mga tawo nga nakatuon sang iya mga kinaiya kag sang mga butang nga iya nahimo para sa katawhan indi makapugong nga mangin malapit sa iya. Kag ano ang resulta? Natural lamang para sa ila nga pakadakuon ang Isa nga ila gid ginadayaw, ginahimo ini paagi sa pulong kag sa buhat. Samtang nagatubo ang ila gugma para sa Dios, indi sila makapugong nga sugiran man ang iban nahanungod sa iya, kag tubtob sa kasangkaron nga mahimo nila subong mga tawo luyag nila nga ilugon sia. Ginapalig-on kita tanan sang Biblia nga himuon ina, nga nagasiling: “Magmanug-ilog kamo sang Dios, subong nga mga anak nga hinigugma, kag maggawi sa gugma.” (Efe. 5:​1, 2) Sa pag-aplikar sina nga laygay, dapat naton makilala kon sin-o gid si Jehova.

Kon Ano nga Sahi sang Persona si Jehova

2. Ano ang pila sang talalupangdon nga mga kinaiya sang Dios nga nagapahulag sa aton sa pagdayaw sa iya?

² Masapwan sa bug-os nga Biblia ang talangkod nga mga pulong nga nagapakilala sang talalupangdon nga mga kinaiya sang Dios. Kon mabasa ninyo ini,  maghinguyang sing tion sa pagbinagbinag kon ano gid ang mga kinaiya kag kon daw ano ini ka importante sa imo. Halimbawa: “Ang Dios gugma.” (1 Juan 4:8) “Ang tanan niya nga dalanon katarungan.” (Deut. 32:4) ‘Yara sa iya ang kaalam.’ (Job 12:13) Sia “makusog sa gahom.” (Isa. 40:26) Samtang ginabinagbinag mo ining mga kinaiya, indi ka bala napahulag, bangod sang pagdayaw sa Dios, nga himayaon sia?

3. Ano pa nga mga kinaiya sang personalidad ni Jehova ang tuman ka makagalanyat?

³ Agod dugang pa nga makilala naton ang iya makagalanyat nga personalidad, ang Biblia nagasugid sa aton nga si Jehova “isa ka Dios nga maluluy-on kag mainayuhon, makuli sa pagpangakig kag bugana sa mahigugmaon nga kaluoy kag sa kamatuoran.” (Ex. 34:6) “O Jehova, maayo ka kag handa sa pagpatawad.” (Sal. 86:5) “Tuhoy kay Jehova, ang iya mga mata nagapanuluktulok sa bug-os nga duta agod ipakita ang iya kabakod para sa ila nga may bug-os nga tagipusuon sa iya.” (2 Cron. 16:9) “Ang Dios wala sing ginapasulabi, kundi sa tagsa ka pungsod ang tawo nga nagakahadlok sa iya kag nagahimo sing pagkamatarong kalahamut-an sa iya.” (Binu. 10:​34, 35) Si Jehova “maalwan” kag “malipayon nga Dios.” (Sant. 1:​5; 1 Tim. 1:11) Daw ano ka makapabaskog ang mag-alagad sa sining walay kaanggid nga Dios kag maeksperiensiahan ang iya mahigugmaon nga pag-atipan!

4. (a) Ano nga sahi sang debosyon ang ginapatuman ni Jehova, kag daw ano ka importante ini? (b) Sa ano kita ginaagda sang Salmo 34:​3 nga magpakigbahin?

⁴ Nahisanto sa iya mga kinaiya amo ang kamatuoran nga sia “isa ka Dios nga nagapatuman sing pinasahi nga debosyon.” (Ex. 20:5) Agod mahamut-an niya dapat naton ihatag sa iya ang aton bug-os nga debosyon. Indi naton mahigugma man ang kalibutan nga ang dios sini amo si Satanas. (1 Juan 2:​15-17; 2 Cor. 4:​3, 4) Makita ni Jehova ang pakunokuno nga pagkamatarong. Nahibaluan niya sing bug-os indi lamang kon  ano ang aton ginahimo kundi kon ano man ang ginabatyag naton sa sini kag kon ano gid nga sahi sang mga tawo ginatinguhaan naton nga mangin amo kita. Kon ginahigugma gid naton ang pagkamatarong, ginabuligan niya kita. (Jer. 17:​10; Hulu. 15:9) Bangod sang sahi sang pagkapersona ni Jehova, minilyon ka tawo sa bug-os nga duta ang malipayon nga nagbaton sa pangagda sang salmista sang Biblia nga nagsulat: “O pakadakua si Jehova upod sa akon, kamo nga katawhan, kag bayawon naton ang iya ngalan.” (Sal. 34:3) Isa ka bala sa ila?

5. Ano ang makabulig sa aton sa pagbenepisyo sing bug-os gikan sa aton pagtuon sa personalidad ni Jehova?

⁵ Ang imo handum sa paghambal nahanungod sa Dios magabaskog, kag mabuligan gid ikaw sa imo mga panikasog nga ilugon sia kon usisaon mo sing maayo ang iya mataas nga mga kinaiya. Hibalua (1) kon ano gid ang tagsa ka kinaiya, ayhan kon ano ang nagahimo sini nga tuhay sa iban nga mga kinaiya, (2) kon paano ini ginpakita ni Jehova kag sa kay sin-o, subong man (3) kon paano mo ini mapakita ukon kon paano ini dapat mag-apektar sang imo pagtamod.

6. Ginagamit ang gugma subong halimbawa, ipakita kon paano mo mausisa ang mga kinaiya ni Jehova. Himua ini paagi sa pagsabat sa mga pamangkot sa katapusan sini nga parapo, ginalakip ang mga kasulatan sa imo mga sabat.

⁶ Binagbinaga diri ang isa lamang ka halimbawa. Sang magsiling ang Biblia, “ang Dios gugma,” ano ang buot silingon sini? (1 Juan 4:8) Sa pagkamatuod, may yara pila ka sahi sang gugma. Ang Griegong tinaga nga gingamit sa sining teksto amo ang a·gaʹpe, nga nagapatuhoy sa pinakamataas nga porma sang gugma, subong ginapakita mismo ni Jehova nga Dios. Ina nga gugma isa ka pagpabutyag sing bug-os nga pagkawala sing kakagod. Ginahunahuna ini, sabta ang mga pamangkot sa ubos, nga ginagamit ang mga kasulatan nga nasambit.

 Paano ginpakita ini nga kinaiya sa mga buhat sang pagpanuga ni Jehova? (Binu. 14:​16, 17)

 Ano ang labing talalupangdon nga halimbawa sang gugma ni Jehova sa katawhan? (Juan 3:16) Bangod bala sang kaayo sang tawo nga ginhimo ini ni Jehova? (Roma 5:8)

  Paano ang ginhimo ni Jehova paagi sa iya Anak dapat mag-impluwensia sang paagi nga ginagamit naton ang aton kabuhi? (2 Cor. 5:​14, 15, 18, 19)

 Sa anong mga paagi mapakita naton subong mga Cristiano nga may yara kita sina man nga sahi sang gugma para sa mga masigka-Cristiano? (1 Cor. 13:​4-7; 1 Juan 4:​10, 11; 3:​16-18)

 Sa kay sin-o pa kita dapat magpakita sing gugma, kag paano? (Mat. 5:​43-48; 28:​19, 20; Gal. 6:10)

7. Sa imo personal nga pagtuon, paano ka makakita sing kaanggid nga materyal nahanungod sa iban pa nga mga kinaiya ni Jehova?

⁷ Luyag mo man bala usisaon ang pila sang iban pa nga mga kinaiya ni Jehova? Bilang umpisa, sa imo personal nga pagtuon ngaa indi anay tilawan ang “katarungan” kag ang “kaalam,” nian ayhan ang “mahigugmaon nga kaluoy” kag ang “kaluoy.” Paagi sa bulig sang mga in­dex­es sa mga publikasyon sang Watch Tower kag sang konkordansia sa Biblia, makasapo ikaw sing isa ka manggad sang makapasanag nga materyal.

Buligi ang Iban sa Pagtuon sing Kamatuoran Tuhoy sa Dios

8. (a) Ano nga mga dios ang ginasimba sang katawhan sang kalibutan? (b) Sin-o ang sa likod sining tanan nga pagkagumon, kag ngaa amo sina ang imo sabat?

⁸ Batok sa pagsimba sa matuod nga Dios, literal nga minilyon ka iban pa nga mga dios ang ginasimba sang mga tawo. Sang ikap-at nga siglo, ginbaton sang Cristiandad ang pagtuo sa “Trinidad,” nga gintudlo sang mga Babilonianhon, mga Egiptohanon, mga Hindu kag sang mga Budhista antes sadto. Dugang pa sa sini nga ideya tuhoy sa Dios, gin-idolo subong mga dios ang gamhanan nga mga manuggahom, ang talalupangdon nga mga humalampang kag mga manugkanta. Nangin dios man ang kuwarta, kaugalingon kag ang sekso nga ginapakitaan sing daku nga debosyon. Sin-o ang sa likod sining tanan? “Ang dios sining sistema sang mga butang,” si Satanas nga Yawa. (2 Cor. 4:​4; 1 Cor. 10:20) Ginagamit ang tanan nga maisipan kag malimbungon nga mga paagi ginatinguhaan niya nga patalikuron ang mga tawo gikan kay Jehova, ukon sa dimagkubos bahinon ang ila debosyon.

9. Ano ang labing maayo nga paagi sa pagbulig kay bisan sin-o sa pagtuon sing kamatuoran tuhoy sa Dios?

 ⁹ Paano naton mabuligan ina nga mga tawo, kon bala nagapangangkon nga mga Cristiano ukon iban pa, sa paghibalo sang kamatuoran tuhoy sa Dios? Ang isa sang labing maayo nga paagi amo ang ipakita sa ila sa isa ka mabuligon nga paagi kon ano gid ang ginasiling sang Biblia tuhoy sa pagka-Dios sang matuod nga Dios kag kon ano nga sahi sang persona sia. Nian dapat nga sakdagon naton ini paagi sa paggawi nga nagapakita sing diosnon nga mga kinaiya sa aton kabuhi.​—⁠1 Ped. 2:⁠12.

10. Kon nagapakighambal sa isa ka Trinitaryo, ngaa indi maalamon nga maghaumhaom nga nahibaluan mo ang iya ginapatihan?

¹⁰ Apang ano kon ang pila nga mga katapo sang mga iglesia sang Cristiandad makigbais sa imo, nga nagasiling nga ang ila pagtuo sa “Trinidad” Makasulatanhon? Una sa tanan, tandai nga, bisan pa may yara opisyal nga mga paathag tuhoy sa “Trinidad” nga doktrina, madamo nga tawo ang may ila kaugalingon nga mga ideya. Agdaha sila nga ipabutyag nila ang ila kaugalingon, kag dayon buligi sila sa pagpaanggid sang ila mga ginatuohan sa kon ano ang yara sa ila mismo Biblia. Sa ulihi, palig-ona sila nga ipaanggid man ang opisyal nga panudlo sang iglesia sa Pulong sang Dios.

11. Ginagamit sing isa-isa ang lima ka daku nga punto, gamita ang mga pamangkot kag ang mga kasulatan nga nalista upod sa sini nga parapo sa pagpangatarungan tuhoy sa pagkadimakasulatanhon sang “Trinidad” nga doktrina.

¹¹ Ginahunahuna ang handum nga buligan ang sinsero nga mga tawo, binagbinaga kon paano mo magamit ang mga teksto nga nasambit sa ubos sa pagpangatarungan tuhoy sa mga punto nga upod sa sini ginapakita ang mga kasulatan:

 (1) Ginapadaku sang iban nga mga Trinitaryo ang ideya nga may yara tatlo ka balaan nga Persona (Amay, Anak kag Balaan nga Bahoy) apang isa lamang ka Dios.

 Apang ginapakita bala sang Binuhatan 2:​4, 17 nga ang “Balaan nga Bahoy,” ukon ang “balaan nga espiritu,” isa ka persona?

 Ngaa makabulig nga talupangdon kon pila ka persona ang ginapatuhuyan sa  tagsatagsa sang masunod nga kasulatan? (Juan 17:​20-22; Binu. 7:​56; Bug. 7:10)

 (2) Ang iban nagatuo nga ang tanan nga katapo sang “Trinidad” magkatupong sa himaya, nga wala sing isa ang labaw ukon kubos sa isa kag isa, nga sila magkatupong kag lunsay wala sing katapusan.

 Nagaugyon bala ang Kasulatan? (Para sa sabat, tan-awa ang Juan 14:​28; Mateo 24:​36; Bugna 3:⁠14.)

 (3) Ginatudlo sang iban nga tawo ang Juan 1:​1 subong pamatuod sang “Trinidad.” Nagapangatarungan sila nga ang Griegong teksto diri wala sing in­def­i­nite ar­ti­cle nga (“a”) kag busa dapat amo sini kon basahon ang kasulatan: “ang Pulong Dios,” sa baylo sang “isa ka dios.”

 Apang pila ka persona ang ginahambalan sa Juan 1:​1? Tatlo? Ukon duha? Paano ang Juan 1:​18 nagasumpakil man sa “Trinidad” nga doktrina?

 Matuod nga ang Griego wala sing in­def­i­nite ar­ti­cle, apang madamo nga hambal ang may yari sini, kag ginagamit ini sa sina nga mga hambal agod ipabutyag ang mga ideya sing husto. Kon ginabanta sang isa nga sayop ang maggamit sing in­def­i­nite ar­ti­cle sa pagbadbad sang Juan 1:​1, indi man bala niya paggamiton ini sa Binuhatan 28:​6 suno sa King James Version kag sa iban pa? (Ang isa pa ka paagi sa pagbadbad sang Juan 1:​1, subong ginapakita sa An American Translation amo “ang Pulong balaan,” kon sayoron, may yara sia balaan nga mga kinaiya nga pareho sang sa Dios.)

 (4) Nagapangatarungan man ang mga Trinitaryo nga sa Genesis 1:​1, 26 ang Hebreong tinaga nga ginbadbad “Dios” amo ang El·o·himʹ kag nga amo ini ang plu­ral ukon pangmadamo sa Hebreo kag nagakahulugan gid sing “mga Dios.”

 Ngaa wala ina nagasakdag sa panudlo nga tatlo ka balaan nga Persona sa “isa ka Dios”?

 Kon “Trinidad” ang ginapatuhuyan sa Genesis 1:​1, ano ang ginapatuhuyan sa Hukom 16:​23, nga nagagamit sing el·o·himʹ para sa “dios,” upod sa Hebreong berbo sa sin­gu­lar (isa lang) nga numero, indi plural?

 Ngaa plu­ral (pangmadamo) nga porma sang Dios ang gingamit sa sining mga teksto sa Hebreo? Isa ini ka paagi sa Hebreo sa pagpaalinton sing ideya nga pagkahalangdon ukon kamahalan. Kon kapin sa isa ka persona  ang buot silingon, ang kaupod nga mga berbo plu­ral man, apang indi subong sini sa nasambit nga kaso.

 (5) Bangod sang pagpadaku nga ginpatuhoy sang mga iglesia kay Jesus (upod ang kamatuoran nga ang ngalan nga Jehova ginkuha gikan sa madamo nga badbad sang Biblia), si Jesus lamang ang ginahunahuna sang iban nga mga tawo kon masambit ang Dios.

 Apang anong halimbawa sa pagsimba ang ginhatag ni Jesus agod ilugon naton? (Luc. 4:8)

12. Ngaa nagakaigo nga gintawag ni Jesus ang iya Amay subong “ang lamang matuod nga Dios”?

¹² Bisan pa ginpatuhuyan si Jesus sa Kasulatan subong “isa ka dios,” kag “Gamhanan nga Dios” pa gani, ginpadaku niya ang iya Amay kag gintawag niya sia subong “akon Dios kag inyo Dios.” (Juan 1:​1; 20:​17; Isa. 9:6) Nag-ugyon sia kay Moises, nga nagsiling anay: “Si Jehova amo ang matuod nga Dios; wala na gid sing iban luwas sa iya.” (Deut. 4:35) Daku ang kinatuhayan ni Jehova sa iban nga ginasimba subong sang mga idolo, ginadios nga mga tawo kag kay Satanas nga Yawa. Tuhay sa ila tanan, si Jehova suno sa pagtawag ni Jesus sa iya, “ang lamang matuod nga Dios.”​—⁠Juan 17:⁠3.

‘Maglakat sa Ngalan ni Jehova’

13, 14. Ano ang nadalahig sa “pagkilala” kag sa ‘paglakat sa’ ngalan ni Jehova?

¹³ Sa tapos sang tinuig nga pagkagumon tuhoy sa pagkanakilala sang Dios, madamo nga tawo ang nakunyag sang una nga makita nila ang personal nga ngalan sang Dios, nga Jehova, sa ila Biblia. (Ex. 6:3) Apang makabenepisyo lamang sila sing dayon gikan sa sining ihibalo kon sila ‘maglakat sa ngalan ni Jehova tubtob sa walay katubtuban.’ (Miq. 4:5) Kapin pa ang nadalahig sa sini sang sa kilalahon lamang ang ngalan nga Jehova ukon mangangkon nga sila mga Saksi ni Jehova.

¹⁴ Tuhoy sa pagkaimportante sang ngalan sang Dios, ang Salmo 9:​10 nagasiling: “Ang mga nakakilala sang imo ngalan magasalig sa imo, . . . O Jehova.” Ano ang nadalahig sa sina? Nagadalahig ina sing kapin pa sa pagkilala  lamang sa ngalan nga Jehova, nga wala sing awtomatiko nagakahulugan sing pagsalig kay Jehova. Ang “pagkilala” sa ngalan sang Dios diri nagakahulugan sing pag-apresyar sa sahi sang pagka-Dios ni Jehova, pagtahod sa iya awtoridad kag pagtuman sa iya mga sugo. Subong man, ang ‘paglakat sa ngalan ni Jehova’ nagapahangop sing pagdedikar sa iya kag pagtiglawas sa iya subong isa sang iya mga sumilimba, nga ginagamit gid ang imo kabuhi nahisuno sa kabubut-on sang Dios. (Luc. 10:27) Ginahimo mo bala ina?

15. Ano, luwas sa pagbatyag sing katungdanan, ang kinahanglanon kon luyag naton mag-alagad kay Jehova tubtob sa walay katubtuban?

¹⁵ Kon luyag naton mag-alagad kay Jehova sing dayon, indi lamang ang pagbatyag sing katungdanan ang dapat magpahulag sa aton. Ginlaygayan ni apostol Pablo si Timoteo, nga nagaalagad na kay Jehova sa sulod sang madamong tinuig: “Hanasa ang imo kaugalingon nga ginatuyo ang diosnon nga debosyon.” (1 Tim. 4:7) Ang debosyon nagagikan sa tagipusuon; ginapahulag ini sang apresasyon para sa persona nga ginapatuhuyan sini. Ang “diosnon nga debosyon” isa ka daku nga pagtahod para kay Jehova. Nagapakita ini sing mahigugmaon nga kaangtanan sa iya bangod sang apresasyon para sa iya kag sa iya mga dalanon. Bangod sini luyag naton nga tahuron man sang tanan ang iya ngalan. Dapat naton palambuon ang “diosnon nga debosyon” subong amo ang tulumuron ukon lalambuton sa aton kabuhi kon luyag naton maglakat sa ngalan ni Jehova, ang matuod nga Dios, tubtob sa walay katapusan.​—⁠Sal. 37:​4; 2 Ped. 3:⁠11.

Repaso nga Paghinun-anon

● Ano nga sahi sang persona si Jehova? Paano kita makabenepisyo paagi sa pagtigayon sing maathag nga paghangop sa tagsatagsa sang iya mga kinaiya?

● Paano naton mabuligan ang iban nga mga tawo sa pagtuon sing kamatuoran tuhoy sa Dios?

● Ano ang nadalahig sa “pagkilala” kay Jehova kag sa ‘paglakat sa iya ngalan’?

[Mga Pamangkot sa Pagtinuon]