Kapitulo Seis

Ang Hulusayon nga Dapat Naton Tanan Atubangon

1, 2. (a) Ano nga hulusayon ang ginpautwas ni Satanas sa Eden? (b) Paano ini nga hulusayon ginpahangop paagi sa ginsiling niya?

 NADALAHIG ka sa labing importante nga hulusayon nga naatubang sang katawhan. Ang imo walay katapusan nga palaabuton nagadepende sa kon ano ang imo panindugan sa sini. Nag-utwas ini nga hulusayon sang natabo ang pagrebelde sa Eden. Ginpamangkot sadto ni Satanas si Eva: “Nagsiling gid bala ang Dios nga indi kamo dapat magkaon gikan sa tanan nga kahoy sa hardin?” Nagsabat sia nga tuhoy sa isa ka kahoy ang Dios nagsiling: “Dili kamo magkaon gikan sini . . . agod indi kamo mapatay.” Nian direkta nga ginsumbong ni Satanas si Jehova sing pagbinutig, sa pagsiling nga ang kabuhi ni Eva ukon ni Adan wala nasandig sa pagkamatinumanon sa Dios. Si Satanas nagsiling nga ang Dios nagadingot sa iya mga tinuga sing butang nga maayo​—ang ikasarang sa paghimo sang ila kaugalingon nga mga talaksan sa kabuhi. Si Satanas nagsiling: “Nakahibalo ang Dios nga sa adlaw nga magkaon kamo gikan sini magamuklat ang inyo mga mata kag mangin kaangay kamo sang Dios, nga nakakilala sang maayo kag malain.”​—Genesis 3:1-5.

² Daw subong bala nga nagsiling si Satanas nga mangin mas maayo ang kahimtangan sang mga tawo kon sila ang maghimo sang ila kaugalingon nga desisyon sa baylo nga magtuman sa mga kasuguan sang Dios. Sa amo ginhangkat niya ang paagi sang Dios sa paggahom. Ginpautwas sini ang pinakaimportante nga hulusayon tuhoy sa bug-os uniberso nga pagkasoberano sang Dios, nga amo, ang iya kinamatarong  sa paggahom. Ginpautwas ang pamangkot: Diin ang mas maayo para sa mga tawo, ang paagi ni Jehova sa paggahom ukon ang paggahom nga hilway sa iya? Ti, mahimo kuntani nga ginpatay gilayon ni Jehova sanday Adan kag Eva, apang wala kuntani sini nalubad sing makaalayaw ang hulusayon tuhoy sa pagkasoberano. Paagi sa pagtugot sa tawhanon nga katilingban sa malawig nga tion, mapakita sang Dios kon ano gid ang resulta sang kahilwayan gikan sa iya kag sa iya mga kasuguan.

3. Anong ikaduha nga hulusayon ang ginpautwas ni Satanas?

³ Ang pag-atake ni Satanas sa kinamatarong ni Jehova sa paggahom wala mag-untat sa kon ano ang natabo sa Eden. Ginduhaduhaan niya ang katutom sang iban kay Jehova. Nangin ikaduha ini nga hulusayon nga naangot gid sa nahauna. Ang iya hangkat naglakip sa mga kaanakan nanday Adan kag Eva kag sa tanan nga espiritu nga mga anak sang Dios, pati na sa pinalangga gid nga panganay nga Anak ni Jehova. Sang mga adlaw ni Job, halimbawa, nangatarungan si Satanas nga nagaalagad lamang ang mga tawo kay Jehova, indi bangod sang gugma sa Dios kag sa iya paagi sang paggahom, kundi bangod sang makagod nga mga rason. Nangatarungan sia nga kon mapaidalom sa kabudlayan, sila tanan magapadaug sa makagod nga mga handum.​—Job 2:1-6; Bugna 12:10.

Kon Ano ang Ginpamatud-an Sang Maragtas

4, 5. Ano ang ginpamatud-an sang maragtas tuhoy sa pagtuytoy sang tawo sang iya kaugalingon nga mga tikang?

⁴ Ang importante nga bahin sa hulusayon sang pagkasoberano amo ini: Wala gintuga sang Dios ang mga tawo agod magkabuhi nga hilway sa iya paggahom kag magmadinalag-on. Para sa ila kaayuhan nga ginhimo niya sila nga magasandig sa iya matarong nga mga kasuguan. Si manalagna Jeremias nagbaton: “Nahibaluan ko, O Jehova, nga ang dalanon sang tawo wala sa iya kaugalingon. Wala sa tawo nga  nagalakat bisan ang pagtuytoy sa iya tikang. Tadlunga ako, O Jehova.” (Jeremias 10:​23, 24) Gani ang Pulong sang Dios nagapalig-on: “Magsalig kay Jehova sa bug-os mo nga tagipusuon kag indi magsandig sa imo kaugalingon nga paghangop.” (Hulubaton 3:5) Subong nga ginhimo sang Dios ang katawhan nga ginakontrol sang iya pisikal nga mga kasuguan agod magpabilin nga buhi, naghimo man sia sing moral nga mga kasuguan, nga kon tumanon magaresulta sa isa ka nahiusa nga katilingban.

⁵ Sing maathag, nahibaluan sang Dios nga ang tawhanon nga pamilya indi gid magmadinalag-on sa pagdumala sa iya kaugalingon kon wala ang iya paggahom. Sa pagtinguha nga mangin hilway sa paggahom sang Dios, ang mga tawo nagtukod sing nagkalainlain nga mga sistema sa politika, ekonomiya, kag relihion. Ining mga kinatuhayan nagdul-ong sa dalayon nga pagbinangig sang mga tawo sa isa kag isa, nga nagaresulta sa kasingki, inaway, kag kamatayon. “Ginagamhan sang tawo ang tawo sa iya kasamaran.” (Manugwali 8:9) Amo gid sini ang natabo sa bug-os nga maragtas sang tawo. Suno sa gintagna sang Pulong sang Dios, ang malauton nga mga tawo kag mga impostor padayon nga ‘naglain kag magalain pa.’ (2 Timoteo 3:13) Kag ang ika-20 nga siglo, nga nakasaksi sang daku nga mga pag-uswag sang katawhan sa siensia kag industriya, nakaeksperiensia sang pinakamalubha nga mga kalamidad. Ang mga pulong sang Jeremias 10:23 napamatud-an gid​—ang mga tawo wala gintuga sa pagtuytoy sang ila kaugalingon nga mga tikang.

6. Paano lubaron sang Dios sa dili madugay ang kahilwayan sang tawo gikan sa iya?

⁶ Ang masubo kag malawig nga mga resulta sang kahilwayan gikan sa Dios nagpakita gid nga ang paggahom sang mga tawo indi mahimo magmadinalag-on. Ang paggahom sang Dios amo lamang ang paagi padulong sa kalipay, paghiusa, kapagros, kag kabuhi. Kag ginapakita sang Pulong sang Dios  nga ang pagpahanugot ni Jehova sa hilway nga paggahom sang tawo malapit na matapos. (Mateo 24:3-14; 2 Timoteo 3:1-5) Sa dili madugay, magapasilabot sia sa mga hilikuton sang tawo agod ipahayag ang iya paggahom sa ibabaw sang duta. Ang tagna sang Biblia nagasiling: “Sa mga adlaw sadto nga mga hari [ang tawhanon nga mga paggahom nga nagaluntad karon] ang Dios sang langit magapatindog sing ginharian [sa langit] nga indi gid malaglag. Kag ang ginharian mismo indi iliton sa iban nga katawhan [indi na liwat magagahom ang mga tawo sa duta]. Dugmukon sini kag papason ini tanan nga ginharian [karon], kag magapadayon ini tubtob sa walay katubtuban.”​—Daniel 2:44.

Paglampuwas Pasulod sa Bag-ong Kalibutan Sang Dios

7. Kon tapuson sang paggahom sang Dios ang paggahom sang tawo, sin-o ang makalampuwas?

⁷ Kon tapuson sang paggahom sang Dios ang paggahom sang tawo, sin-o ang makalampuwas? Ang Biblia nagasabat: “Ang mga matadlong [ang mga nagasakdag sang kinamatarong sang Dios sa paggahom] amo ang magapuyo sa duta, kag ang mga wala sing kasawayan amo ang magapabilin sa sini. Kon tuhoy sa mga malauton [ang mga wala nagasakdag sang kinamatarong sang Dios sa paggahom], utdon sila gikan sa duta.” (Hulubaton 2:​21, 22) Sing kaanggid, ang salmista nagsiling: “Sa diutay pa nga tion, kag ang malauton wala na . . . Ang mga matarong magapanag-iya sang duta, kag magapuyo sila sing dayon sa sini.”​—Salmo 37:​10, 29.

8. Paano ibindikar sing bug-os sang Dios ang iya pagkasoberano?

⁸ Sa tapos laglagon ang sistema ni Satanas, paluntaron sang Dios ang iya bag-ong kalibutan, nga magadula sing bug-os sang makahalapay nga kasingki, inaway, kaimulon, pag-antos, balatian, kag kamatayon nga nag-ulipon sa katawhan sa sulod sang linibo ka tuig. Ang Biblia matahom nga nagalaragway sang mga pagpakamaayo nga nagahulat sa matinumanon  nga katawhan: “Pahiran niya [ang Dios] ang tagsa ka luha sa mga mata nila, kag wala na sing kamatayon, ukon kalisod ukon paghibi ukon kasakit pa. Ang nahaunang mga butang nagtaliwan.” (Bugna 21:​3, 4) Paagi sa iya langitnon nga panguluhan sang Ginharian sa idalom ni Cristo, ibindikar (pakamatarungon, ukon pamatud-an) sing bug-os sang Dios ang Iya kinamatarong nga mangin ang aton Soberano, nga amo, ang aton Manuggahom.​—Roma 16:20; 2 Pedro 3:10-13; Bugna 20:1-6.

Kon Paano Nila Ginpakita ang Ila Panindugan sa Hulusayon

9. (a) Paano gintamod sang mga nagpabilin nga matutom kay Jehova ang iya pulong? (b) Paano ginpamatud-an ni Noe ang iya katutom, kag paano kita makabenepisyo gikan sa iya halimbawa?

⁹ Sa bug-os nga maragtas, may matutom nga mga lalaki kag mga babayi nga nagpamatuod sang ila katutom kay Jehova subong Soberano. Nahibaluan nila nga ang ila kabuhi nasandig sa pagpamati kag sa pagtuman sa iya. Si Noe amo sini nga tawo. Gani ang Dios nagsiling kay Noe: “Ang katapusan sang tanan nga unod nag-abot sa atubangan nakon . . . Himo ka sing arka.” Kag ginsunod ni Noe ang panuytoy ni Jehova. Walay sapayan sang paandam sa ila, ang iban nga mga tawo sadto nagkabuhi nga daw wala sing tumalagsahon nga butang nga mahanabo. Apang si Noe nagtukod sing daku kaayo nga arka kag padayon nga nagbantala sa iban tuhoy sa matarong nga mga dalanon ni Jehova. Ang rekord padayon nga nagasiling: “Ginhimo ni Noe ang tanan suno sa ginsugo sang Dios sa iya. Amo gid ang ginhimo niya.”​—Genesis 6:13-22; Hebreo 11:7; 2 Pedro 2:5.

10. (a) Paano ginsakdag nanday Abraham kag Sara ang pagkasoberano ni Jehova? (b) Sa anong paagi kita makabenepisyo gikan sa mga halimbawa nanday Abraham kag Sara?

¹⁰ Si Abraham kag si Sara maayo man nga mga halimbawa sang pagsakdag sa pagkasoberano ni Jehova, nga naghimo sang bisan ano man nga ginsugo sa ila. Nagapuyo sila  anay sa Ur sang mga Caldeanhon, nga isa ka mahamungayaon nga siudad. Apang sang si Abraham ginsugo ni Jehova sa pagkadto sa iban nga duta, nga indi niya sunado, si Abraham “naglakat subong sang ginhambal ni Jehova sa iya.” Pat-od gid nga masulhay ang pangabuhi ni Sara​—may puluy-an, mga abyan, kag mga himata. Apang, mapinasakupon sia kay Jehova kag sa iya bana kag nagkadto sia sa duta sang Canaan, bisan pa wala sia makahibalo kon ano nga kahimtangan ang nagahulat sa iya didto.​—Genesis 11:31–​12:4; Binuhatan 7:2-4.

11. (a) Sa idalom sang anong mga sirkunstansia ginsakdag ni Moises ang pagkasoberano ni Jehova? (b) Paano kita makabenepisyo sa halimbawa ni Moises?

¹¹ Si Moises isa pa ka tawo nga nagsakdag sang pagkasoberano ni Jehova. Kag ginhimo niya ini sa idalom sang pinakamabudlay nga mga kahimtangan​—sa nawong-sa-nawong nga pagpakig-atubang kay Paraon sang Egipto. Indi buot silingon nga si Moises masinaligon sa kaugalingon. Sa kabaliskaran, nagduhaduha sia sa iya ikasarang sa paghambal sing talunsay. Apang gintuman niya si Jehova. Upod ang pagsakdag ni Jehova kag bulig sang iya utod, si Aaron, liwat kag liwat nga ginpamulong ni Moises ang pulong ni Jehova sa batinggilan nga si Paraon. Bisan gani ang pila sang mga anak ni Israel nagmulay sing masakit kay Moises. Apang, matutom nga ginhimo ni Moises ang tanan nga ginsugo ni Jehova sa iya, kag paagi sa iya, ang Israel ginhilway gikan sa Egipto.​—Exodo 7:6; 12:​50, 51; Hebreo 11:24-27.

12. (a) Ano ang nagapakita nga ang katutom kay Jehova nagadalahig indi lamang kon ano ang maathag nga ginsulat sang Dios? (b) Paano ang paghangop sa sini nga sahi sang katutom magabulig sa aton sa pag-aplikar sang 1 Juan 2:15?

¹² Ang mga matutom kay Jehova wala mangatarungan nga ang lamang nga kinahanglanon amo ang pagtuman sa kon ano ang ginsulat sang Dios. Sang ginsulay sang asawa ni Potifar si Jose nga maghulid sa iya, wala sing nasulat nga sugo  gikan sa Dios nga nagadumili sang panghilahi. Apang, nahibaluan ni Jose ang kahimusan sa pag-asawahay nga ginsugdan ni Jehova sa Eden. Nahibaluan niya nga ang paghulid sa asawa sang iban indi kalahamut-an sa Dios. Indi interesado si Jose nga tilawan nga hibaluon kon tubtob diin magapahanugot ang Dios nga mangin kaangay sia sa mga Egiptohanon. Ginsakdag niya ang mga dalanon ni Jehova paagi sa pagpamalandong kon paano nakig-angot ang Dios sa katawhan kag dayon gin-aplikar niya sing mahalungon ang ginhantop niya nga kabubut-on sang Dios.​—Genesis 39:7-12; Salmo 77:​11, 12.

13. Paano napamatud-an ang Yawa nga butigon may kaangtanan (a) kay Job? (b) sa tatlo ka Hebreo?

¹³ Bisan sa idalom sang mabudlay nga pagtilaw, ang mga nakakilala gid kay Jehova indi magatalikod sa iya. Si Satanas nagsumbong nga kon madula ni Job ang iya madamo nga pagkabutang ukon ang iya kapagros, bisan sia​—nga ginakahamut-an ni Jehova​—magabiya sa Dios. Apang ginpamatud-an ni Job ang Yawa nga butigon, bisan pa nga si Job mismo wala makahibalo kon ngaa nagakahanabo sa iya ang mga kalamidad. (Job 2:​9, 10) Mga siglo sang ulihi, sa panikasog gihapon nga pamatud-an ang iya panumbungon, ginpahulag ni Satanas ang naakig nga hari sang Babilonia nga pahugon ang tatlo ka pamatan-on nga Hebreo nga patyon sa kalayuhon nga hurno kon indi sila magyaub sa atubangan sang imahen nga ginpatindog sang hari. Napilitan sa pagpili sa ulot sang pagkamatinumanon sa sugo sang hari kag sang pagkamatinumanon sa kasuguan ni Jehova batok sa idolatriya, malig-on nila nga ginpahibalo nga ginaalagad nila si Jehova kag nga sia amo ang ila Supremo nga Soberano. Ang katutom sa Dios mas hamili sangsa ila kabuhi!​—Daniel 3:14-18.

14. Paano posible para sa aton nga di-himpit nga mga tawo nga pamatud-an nga matutom gid kita kay Jehova?

¹⁴ Magahinakop bala kita gikan sa sining mga halimbawa nga agod mangin matutom kay Jehova, ang isa dapat mangin  himpit ukon nga ang isa nga nagahimo sing kasaypanan napaslawan na? Indi! Ang Biblia nagasugid sa aton nga kon kaisa si Moises nakahimo sing sayop. Bisan pa wala mahamuot si Jehova, wala niya ginsikway si Moises. Ang mga apostoles ni Jesucristo may mga kaluyahon man. Bangod sang aton napanubli nga pagkadihimpit, si Jehova nahamuot kon wala naton ginalapas sing hungod ang iya kabubut-on sa bisan ano man nga butang. Kon bangod sa kaluyahon makasala kita, importante nga maghinulsol kita sing hanuot kag indi ugalion ang pagpakasala. Sa sining paagi ginapakita naton nga ginahigugma gid naton ang ginasiling ni Jehova nga maayo kag ginadumtan ang ginapakita niya nga malain. Pasad sa aton pagtuo sa nagatumbas-sala nga balor sang halad ni Jesus, maagom naton ang matinlo nga tindog sa atubangan sang Dios.​—Amos 5:15; Binuhatan 3:19; Hebreo 9:14.

15. (a) Sin-o sa tunga sang tanan nga tawo ang naghupot sing himpit nga integridad sa Dios, kag ano ang ginapamatud-an sini? (b) Paano kita ginabuligan sang kon ano ang ginhimo ni Jesus?

¹⁵ Apang, ang himpit nga pagkamatinumanon sa pagkasoberano ni Jehova indi gid bala posible para sa mga tawo? Ang sabat sa sini nangin daw “sagrado nga likom” sing mga 4,000 ka tuig. (1 Timoteo 3:16) Si Adan, walay sapayan nga gintuga nga himpit, wala magpahamtang sing himpit nga halimbawa sang diosnon nga debosyon. Gani sin-o ang makahimo sini? Pat-od nga wala sing isa sa iya makasasala nga mga kaanakan. Ang lamang nga tawo nga makahimo sini amo si Jesucristo. (Hebreo 4:15) Ang ginhimo ni Jesus nagpamatuod nga si Adan, nga mas maayo ang kahimtangan, mahimo kuntani nga nakahupot sing himpit nga integridad kon luyag niya. Wala sa pagpanuga sang Dios ang diperensya. Busa si Jesucristo amo ang huwaran nga ginapanikasugan naton nga ilugon sa pagpakita indi lamang sing pagkamatinumanon sa kasuguan sang Dios kundi sing personal nga debosyon man kay Jehova, ang Bug-os Uniberso nga Soberano.​—Deuteronomio 32:​4, 5.

 Ano ang Aton Personal nga Sabat?

16. Ngaa dapat kita dalayon nga magbantay kon tuhoy sa aton panimuot sa pagkasoberano ni Jehova?

¹⁶ Dapat atubangon sang kada isa sa aton karon ang hulusayon tuhoy sa bug-os uniberso nga pagkasoberano. Kon ginsiling naton sing dayag nga dampig kita kay Jehova, si Satanas magapuntariya sa aton. Pabudlayan niya kita gikan sa tanan nga direksion kag himuon niya ini tubtob sa katapusan sang iya malauton nga sistema sang mga butang. Dapat kita magbantay. (1 Pedro 5:8) Ang aton paggawi nagapakita kon diin kita nagatindog sa panguna nga hulusayon sang pagkasoberano ni Jehova kag sa ikaduha nga hulusayon sang integridad sa Dios nga ginatilawan. Makahalit sa aton kon tamdon naton ang di-matutom nga paggawi nga indi importante bangod lamang kinaandan ini sa kalibutan. Ang paghupot sing integridad nagakinahanglan nga nagapanikasog kita nga iaplikar ang matarong nga mga talaksan sang Dios sa tanan nga bahin sang kabuhi.

17. Diin naghalin ang pagbinutig kag pagpangawat amo nga dapat naton ini likawan?

¹⁷ Halimbawa, indi naton mahimo ilugon si Satanas, nga amo ang “amay sang kabutigan.” (Juan 8:44) Dapat kita mangin bunayag sa tanan naton nga pagpakig-angot. Sa sistema ni Satanas, ang mga pamatan-on masami nga indi bunayag sa ila mga ginikanan. Apang ang Cristianong mga pamatan-on nagalikaw sa sini, kag sa amo ginapamatud-an nila nga indi matuod ang panumbungon ni Satanas nga talikdan sang katawhan sang Dios ang ila integridad kon ginatilawan. (Job 1:9-11; Hulubaton 6:16-19) Kag may yara mga buhat sa negosyo nga mahimo magpakilala sa isa ka tawo nga kaupod sang “amay sang kabutigan” sa baylo sang Dios sang kamatuoran. Ginalikawan naton ini. (Miqueas 6:​11, 12) Ang pagpangawat man indi gid mapakamatarong, bisan pa ang isa ka tawo nagakinahanglan ukon kon ang ginkawatan manggaranon. (Hulubaton 6:​30, 31; 1 Pedro 4:15) Bisan pa kinaandan  ini sa duog nga aton ginapuy-an ukon bisan pa diutay lamang nga butang ang ginkuha, ang pagpangawat supak gihapon sa mga kasuguan sang Dios.​—Lucas 16:10; Roma 12:2; Efeso 4:28.

18. (a) Sa katapusan sang Isa ka Libo ka Tuig nga Paggahom ni Cristo, ano nga pagtilaw ang magaabot sa tanan nga katawhan? (b) Ano nga batasan ang dapat naton palambuon karon?

¹⁸ Sa Isa ka Libo ka Tuig nga Paggahom ni Cristo, si Satanas kag ang iya mga demonyo yara sa kadadalman, nga indi makaimpluwensia sa katawhan. Daw ano gid ina nga paumpaw! Apang pagkatapos sang isa ka libo ka tuig, buy-an sila sa makadali. Tilawan ni Satanas kag sang mga nagasunod sa iya ang ginpasag-uli nga katawhan nga nagahupot sang ila integridad sa Dios. (Bugna 20:7-10) Kon matigayon naton ang hamili nga kahigayunan nga magkabuhi sa sina nga tion, ano ang mangin reaksion naton sa hulusayon tuhoy sa bug-os uniberso nga pagkasoberano? Sanglit ang tanan nga katawhan himpit na sa sina nga tion, ang bisan ano nga buhat sang pagkadimatutom mangin hungod kag magaresulta sa dayon nga kalaglagan. Daw ano gid ka importante nga ugalion naton karon ang pagtuman sa bisan ano nga pagtuytoy nga ginahatag ni Jehova sa aton, paagi man sa iya Pulong ukon paagi sa iya organisasyon! Paagi sini, ginapakita naton ang aton matuod nga debosyon sa iya subong ang Bug-os Uniberso nga Soberano.

Repaso nga Paghinun-anon

• Ano ang daku nga hulusayon nga dapat naton tanan atubangon? Paano kita nadalahig?

• Ano ang talalupangdon sa mga paagi kon paano ginpamatud-an sang mga lalaki kag mga babayi sang dumaan nga mga tion ang ila integridad kay Jehova?

• Ngaa importante gid nga padunggan naton si Jehova paagi sa aton paggawi kada adlaw?

[Mga Pamangkot sa Pagtinuon]