Ang Isa nga Ginpanaksihan Sang Tanan nga Manalagna
Kapitulo Kuatro
Ang Isa nga Ginpanaksihan Sang Tanan nga Manalagna
1. Ano ang ginapakita sang mga katunayan tuhoy sa pagluntad ni Jesus antes mangin tawo nahanungod sa iya kaangtanan kay Jehova?
“GINAHIGUGMA sang Amay ang Anak kag ginapakita sa iya ang tanan nga butang nga ginahimo niya.” (Juan 5:20) Daw ano gid ka suod ang kaangtanan sang Anak sa iya Amay, si Jehova! Ang pagkasuod sina nga kaangtanan nagsugod sang panahon nga gintuga sia, indi maisip nga milenyo antes sia mabun-ag subong tawo. Sia ang bugtong nga Anak sang Dios, ang lamang nga gintuga sing direkta ni Jehova mismo. Ang tanan nga iban pa nga butang sa langit kag sa duta gintuga paagi sa sining palangga gid nga panganay nga Anak. (Colosas 1:15, 16) Nag-alagad man sia subong Pulong ukon Humalambal sang Dios, ang Isa nga paagi sa iya ang kabubut-on sang Dios ginpaalinton sa iban. Ining isa, ang Anak nga palangga gid sang Dios, nangin ang tawo nga si Jesucristo.—Hulubaton 8:22-30; Juan 1:14, 18; 12:49, 50.
2. Tubtob sa ano nga kasangkaron ang mga tagna sang Biblia nagapatuhoy kay Jesus?
2 Antes sang milagruso nga pagpanamkon sa panganay nga Anak sang Dios subong tawo, madamong inspirado nga tagna ang ginrekord tuhoy sa iya. Si apostol Pedro nagpamatuod kay Cornelio: “Ang tanan nga manalagna nagapanaksi tuhoy sa iya.” (Binuhatan 10:43) Ang papel ni Jesus ginpatalupangod sa Biblia tubtob sa kasangkaron nga ang isa ka anghel nagsiling kay apostol Juan: “Ang pagpanaksi kay Jesus amo ang nagainspirar sang pagpanagna.” (Bugna 19:10) Ini nga mga tagna maathag nga nagpakilala sa iya subong ang Mesias. Ginpatalupangod sini ang iya nanuhaytuhay nga mga papel sa pagtuman sang mga katuyuan sang Dios. Dapat kita karon mangin interesado gid sa sini tanan.
Kon Ano ang Ginpahayag Sang mga Tagna
3. (a) Sa tagna sa Genesis 3:15, sin-o ang ginarepresentar sang man-ug, sang “babayi,” kag sang ‘binhi sang man-ug’? (b) Ngaa interesado gid ang mga alagad ni Jehova sa ‘pagdugmok sa man-ug sa ulo’?
3 Ang una sa sini nga mga tagna ginpamulong sa tapos sang pagrebelde sa Eden. Si Jehova nagsiling sa man-ug: “Butangan ko sing kaawayon sa tunga mo kag sang babayi kag sa tunga sang imo binhi kag sang iya binhi. Dugmukon ka niya sa ulo kag dugmukon mo sia sa tikod.” (Genesis 3:15) Ini nga tagna ginapatungod gid kay Satanas, ang isa nga ginarepresentar sang man-ug. Ang “babayi” amo ang mainunungon nga langitnon nga organisasyon ni Jehova, nga kaangay sang isa ka matutom nga asawa sa iya. Ang ‘binhi sang man-ug’ nagalakip sa tanan nga anghel kag tawo nga nagapadayag sang espiritu ni Satanas, ang mga nagapamatok kay Jehova kag sa Iya katawhan. Ang ‘pagdugmok sa man-ug sa ulo’ nagakahulugan sang kalaglagan sa ulihi sang rebelde nga si Satanas, nga nagpasipala kay Jehova kag naghatag sing daku nga kalisdanan sa katawhan. Apang paano makilala ang panguna nga bahin sang “binhi” nga amo ang magahimo sang pagdugmok? Sa sulod sang mga siglo, nagpabilin ini nga isa ka “sagrado nga likom.”—Roma 16:20, 25, 26.
4. Paano ang kaliwatan ni Jesus nagabulig sa pagpakita nga sia ang ginsaad nga Binhi?
4 Pagligad sang mga 2,000 ka tuig sa maragtas sang tawo, naghatag si Jehova sing dugang pa nga mga detalye. Ginpahayag niya nga ang Binhi magahalin sa kaliwat ni Abraham. (Genesis 22:15-18) Apang, ang kaliwat nga magadul-ong sa Binhi nasandig, indi sa undanon nga relasyon, kundi sa pagpili sang Dios. Walay sapayan nga ginahigugma ni Abraham ang iya anak nga si Ismael, nga natawo kay Hagar, si Jehova nagsiling: “Ang akon katipan tukuron ko kay Isaac, nga ipanganak ni Sara sa imo.” (Genesis 17:18-21) Sang ulihi yadto nga katipan ginpalig-on, indi sa panganay nga anak nga lalaki ni Isaac nga si Esau, kundi kay Jacob, nga sa iya naggikan ang 12 ka tribo sang Israel. (Genesis 28:10-14) Sang ulihi ginpakita nga ang Binhi matawo sa tribo ni Juda, sa kaliwat ni David.—Genesis 49:10; 1 Cronica 17:3, 4, 11-14.
5. Sang ginsugdan ni Jesus ang iya ministeryo sa duta, ano ang nagpamatuod nga sia ang Mesias?
5 Ano pa nga mga sandigan ang ginhatag tuhoy sa pagkilala sa Binhi? Kapin sa 700 ka tuig sa wala pa, ginsambit sang Biblia ang Betlehem subong ang lugar nga sa diin matawo ang ginsaad nga Binhi. Ginpakita man sini nga ang Binhi nagkabuhi na “kutob sang mga adlaw sang panahon nga wala sing latid,” kutob sang tion nga gintuga sia sa langit. (Miqueas 5:2) Ang eksakto nga tion sang iya pag-abot sa duta subong Mesias gintagna man, paagi kay manalagna Daniel. (Daniel 9:24-26) Kag sang ginhaplasan si Jesus sing balaan nga espiritu, amo nga sia aktuwal nga nangin Isa nga Hinaplas ni Jehova, ang tingog mismo sang Dios halin sa langit maathag nga nagpakilala sa iya subong Anak Niya. (Mateo 3:16, 17) Ang Binhi ginpakilala! Sa amo, si Felipe nakasiling nga may pagsalig: “Nakita namon ang isa nga ginsulat ni Moises, sa Kasuguan, kag sang mga Manalagna, si Jesus.”—Juan 1:45.
6. (a) Suno sa Lucas 24:27, ano ang nahangpan sang mga sumulunod ni Jesus? (b) Sin-o ang panguna nga bahin sang ‘binhi sang babayi,’ kag ano ang kahulugan sang pagdugmok niya sa ulo sang man-ug?
6 Pagkatapos sadto, nahangpan sang mga sumulunod ni Jesus nga madamo gid nga matagnaon nga pagpatuhoy sa iya ang ginrekord sa inspirado nga Kasulatan. (Lucas 24:27) Nangin maathag pa gani nga si Jesus amo ang panguna nga bahin sang ‘binhi sang babayi,’ ang isa nga magadugmok sa ulo sang man-ug, sa amo magalaglag sing bug-os kay Satanas. Paagi kay Jesus, ang tanan nga saad sang Dios sa katawhan, ang tanan nga butang nga ginakalangkagan gid naton, matuman.—2 Corinto 1:20.
7. Dugang sa pagkilala sa Isa nga ginpatuhuyan sa mga tagna, ano pa ang mapuslanon nga mahangpan?
7 Paano kita dapat maapektuhan sini nga ihibalo? Ang Biblia nagasugid sa aton tuhoy sa isa ka Etiopianhon nga eunuco nga nakabasa sang pila sini nga mga tagna tuhoy sa nagapakari nga Manunubos kag Mesias. Bangod indi ini mahangpan, ginpamangkot niya ang ebanghelisador nga si Felipe: “Nahanungod bala kay sin-o nga ginapamulong ini sang manalagna?” Apang wala mag-untat ang eunuco sang mabaton niya ang sabat. Pagkatapos mapamatian sing maayo ang paathag ni Felipe, nahangpan sang eunuco nga bilang pagpasalamat sa sining natuman nga tagna, dapat sia maghulag. Nahangpan niya nga dapat sia magpabawtismo. (Binuhatan 8:32-38; Isaias 53:3-9) Nagahulag man bala kita sing amo sini?
8. (a) Ano ang ginlandong sang pagtinguha ni Abraham nga ihalad si Isaac? (b) Ngaa nagsiling si Jehova kay Abraham nga pakamaayuhon sang tanan nga pungsod ang ila kaugalingon paagi sa Binhi, kag paano ini naaplikar sa aton karon?
8 Binagbinaga, man, ang makatalandog nga rekord tuhoy sa pagtinguha ni Abraham nga ihalad si Isaac, ang iya bugtong nga anak kay Sara. (Genesis 22:1-18) Naglandong yadto sa kon ano ang himuon ni Jehova—ihalad ang iya bugtong nga Anak: “Ginhigugma gid sang Dios ang kalibutan sa bagay nga ginhatag niya ang iya bugtong nga Anak, agod nga ang bisan sin-o nga magtuo sa iya indi mawala kundi may kabuhi nga walay katapusan.” (Juan 3:16) Nagapasalig ini sa aton nga subong nga ginhatag ni Jehova ang iya bugtong nga Anak sa pagtuman sang Iya katuyuan, “mainayuhon [man Niya] nga ihatag sa aton ang tanan nga iban pa nga butang.” (Roma 8:32) Ano ang ginapatuman sini sa aton? Subong sang narekord sa Genesis 22:18, si Jehova nagsiling kay Abraham nga ang tanan nga pungsod magapakamaayo sang ila kaugalingon paagi sa Binhi, “bangod ginpamatian [ni Abraham] ang tingog [sang Dios].” Dapat man naton pamatian si Jehova kag ang iya Anak: “Sia nga nagapakita sing pagtuo sa Anak may kabuhi nga walay katapusan; sia nga wala nagatuman sa Anak indi makakita sing kabuhi, kundi ang kasingkal sang Dios magapabilin sa iya.”—Juan 3:36.
9. Kon ginaapresyar naton ang paglaum nga kabuhi nga walay katapusan nga ginhimo nga posible paagi sa halad ni Jesus, ano ang himuon naton?
9 Kon ginaapresyar naton ang paglaum nga kabuhi nga walay katapusan nga ginhimo nga posible sang halad ni Jesus, himuon naton ang mga butang nga ginpamulong ni Jehova sa aton paagi kay Jesus. May kaangtanan gid ini sa aton gugma sa Dios kag sa aton mga isigkatawo. (Mateo 22:37-39) Ginpakita ni Jesus nga ang aton gugma kay Jehova magapahulag sa aton nga tudluan ang iban nga “tumanon ang tanan nga butang nga ginsugo [ni Jesus sa aton].” (Mateo 28:19, 20) Kag luyag naton nga ipaambit ini nga gugma sa aton mga masigkaalagad kay Jehova paagi sa tayuyon nga ‘pagtipon’ upod sa ila. (Hebreo 10:25; Galacia 6:10) Subong man, sa pagpamati sa Dios kag sa iya Anak, indi kita dapat maghunahuna nga nagaobligar sila sing kahimpitan gikan sa aton. Ang Hebreo 4:15 nagasiling nga si Jesus, subong ang aton Mataas nga Saserdote, “mahanuklog sa aton mga kaluyahon.” Daw ano ka makalulugpay ini, ilabi na kon mangayo kita sing bulig sa Dios sa pangamuyo paagi kay Cristo agod madaug ang aton mga kaluyahon!—Mateo 6:12.
Magpakita Sing Pagtuo kay Cristo
10. Ngaa wala sing kaluwasan luwas kay Jesucristo?
10 Pagkatapos mapaathag sa Judiyo nga mataas nga hukmanan sa Jerusalem nga ang tagna sang Biblia natuman kay Jesus, si apostol Pedro mabaskog nga naghinakop: “Wala sing kaluwasan sa bisan kay sin-o nga iban, kay wala sing iban nga ngalan sa idalom sang langit nga ginhatag sa mga tawo nga paagi sa iya kinahanglan kita maluwas.” (Binuhatan 4:12) Sanglit ang tanan nga kaanakan ni Adan mga makasasala, ang ila kamatayon wala sing balor nga magamit subong gawad para kay bisan sin-o. Apang si Jesus himpit, kag ang iya kabuhi may mahalaron nga balor. (Salmo 49:6-9; Hebreo 2:9) Gindulot niya sa Dios ang gawad nga katumbas gid sa balor sang himpit nga kabuhi nga gindula ni Adan. (1 Timoteo 2:5, 6) Ginbuksan sini ang dalan agod makatigayon kita sing kabuhi nga walay katapusan sa bag-ong kalibutan sang Dios.
11. Ipaathag kon daw ano gid ka daku ang aton benepisyo gikan sa halad ni Jesus.
11 Ginbuksan man sang gawad ang dalan agod makabaton kita sing iban pa nga mga benepisyo, bisan sa karon. Halimbawa, bisan pa nga kita mga makasasala, paagi sa halad ni Jesus makatigayon kita sing matinlo nga konsiensia subong resulta sang pagpatawad sa aton sala. Labaw pa ini sa natigayon anay sang mga Israelinhon paagi sa mga halad nga sapat nga ginpatuman sang Mosaikong Kasuguan. (Binuhatan 13:38, 39; Hebreo 9:13, 14; 10:22) Apang, ini nga pagpatawad nagakinahanglan nga batunon naton sing bunayag nga kinahanglan gid naton ang halad ni Cristo: “Kon magsiling kita: ‘Wala kita sing sala,’ ginadayaan naton ang aton kaugalingon kag ang kamatuoran wala sa aton. Kon itu-ad naton ang aton mga sala, matutom kag matarong sia agod magpatawad sa aton sa aton mga sala kag magtinlo sa aton gikan sa tanan nga pagkadimatarong.”—1 Juan 1:8, 9.
12. Ngaa ang pagpatugmaw sa tubig isa ka importante nga butang sa pagtigayon sing maayo nga konsiensia sa atubangan sang Dios?
12 Paano mapakita sang mga makasasala ang pagtuo kay Cristo kag sa iya halad? Sang ang mga tawo sang unang siglo nangin mga tumuluo, ginpakita nila ini sing dayag. Paano? Nagpabawtismo sila. Ngaa? Bangod si Jesus nagsugo nga ang iya tanan nga disipulo dapat bawtismuhan. (Mateo 28:19, 20; Binuhatan 8:12; 18:8) Ang isa ka tawo indi magaisol kon ang iya tagipusuon ginapahulag gid sang mahigugmaon nga aman nga ginhimo ni Jehova paagi kay Jesus. Magahimo sia sang bisan ano nga mga pagbag-o sa iya kabuhi, idedikar ang iya kaugalingon sa Dios sa pangamuyo, kag simbuluhan ang iya dedikasyon paagi sa pagpatugmaw sa tubig. Paagi sa sini nga pagpakita sing pagtuo nga ‘nagapangabay sia sa Dios sing maayo nga konsiensia.’—1 Pedro 3:21.
13. Kon marealisar naton nga nakahimo kita sing sala, ano ang dapat naton himuon tuhoy sini, kag ngaa?
13 Sa pagkamatuod, bisan sa tapos sini, ang makasasala nga mga kinaiya magalutaw gihapon. Ano nian? Si apostol Juan nagsiling: “Ginasulat ko sa inyo ining mga butang agod indi kamo makahimo sing sala. Apang, kon ang bisan sin-o makahimo sing sala, may mananabang kita upod sa Amay, si Jesucristo, isa nga matarong. Kag sia ang nagatumbas nga halad para sa aton mga sala.” (1 Juan 2:1, 2) Nagakahulugan bala ini nga ano man ang ginahimo naton, kon mangamuyo kita sa Dios sing kapatawaran, ang tanan patawaron? Indi. Ang yabi sa kapatawaran amo ang matuod nga paghinulsol. Mahimo nga kinahanglan man ang bulig gikan sa mas gulang kag mas eksperiensiado nga mga utod sa Cristianong kongregasyon. Dapat naton batunon ang kasaypanan nga ginhimo kag magbatyag sing sinsero nga paghinulsol sa sini agod manikasog kita sing hanuot nga indi na ini pagliwaton. (Binuhatan 3:19; Santiago 5:13-16) Kon himuon naton ini, makasalig kita sa bulig ni Jesus kag sa pagpasag-uli naton sa kahamuot ni Jehova.
14. (a) Ipaathag ang isa ka importante nga paagi kon paano kita nakabenepisyo sa halad ni Jesus. (b) Kon kita may pagtuo gid, ano ang himuon naton?
14 Ginbuksan sang halad ni Jesus ang dalan para sa dayon nga kabuhi sa langit para sa “diutay nga panong,” ang segundaryo nga bahin sang binhi nga ginsambit sa Genesis 3:15. (Lucas 12:32; Galacia 3:26-29) Ginbuksan man sini ang dalan para sa kabuhi nga dayon sa paraiso nga duta para sa binilyon nga iban pa nga katawhan. (Salmo 37:29; Bugna 20:11, 12; 21:3, 4) Ang kabuhi nga dayon amo “ang dulot nga ginahatag sang Dios . . . paagi kay Cristo Jesus nga aton Ginuo.” (Roma 6:23; Efeso 2:8-10) Kon may pagtuo kita sa sini nga dulot kag apresasyon sa kon paano ini ginhimo nga posible, ipakita naton ini. Sa paghantop kon daw ano ka makatilingala nga gingamit ni Jehova si Jesus sa pagtuman sang Iya kabubut-on kag kon daw ano ka importante nga sundon naton tanan sing maayo ang mga tikang ni Jesus, himuon naton ang Cristianong ministeryo nga isa sang labing importante nga mga hilikuton sa aton kabuhi. Ang aton pagtuo makita sa makahalaylo nga pagsugid naton sa iban tuhoy sining dalayawon nga dulot gikan sa Dios.—Binuhatan 20:24.
15. Paano ang pagtuo kay Jesucristo may makapahiusa nga epekto?
15 Daw ano kaayo kag makapahiusa nga epekto ini nga pagtuo! Paagi sini, nagasuod kita kay Jehova, sa iya Anak, kag sa isa kag isa sa sulod sang Cristianong kongregasyon. (1 Juan 3:23, 24) Nalipay kita nga mainayuhon nga ginhatagan ni Jehova ang iya Anak “sing ngalan nga labaw sa tanan iban pa nga ngalan [luwas sa ngalan sang Dios], agod sa ngalan ni Jesus magluhod ang tagsa ka tuhod sa langit kag sa duta kag sa idalom sang duta, kag ang tagsa ka dila dayag nga magakilala nga si Jesucristo Ginuo sa himaya sang Dios nga Amay.”—Filipos 2:9-11.
Repaso nga Paghinun-anon
• Sang nag-abot ang Mesias, ngaa maathag sa mga nagapati gid sa Pulong sang Dios kon sin-o sia?
• Ano ang pila sang mga butang nga dapat naton himuon agod ipakita ang aton apresasyon sa halad ni Jesus?
• Sa anong mga paagi nga nakabenepisyo na kita sa halad ni Jesus? Paano ini nagabulig sa aton kon mangamuyo kita kay Jehova para sa kapatawaran sang mga sala?
[Mga Pamangkot sa Pagtinuon]
[Retrato sa pahina 36]
Ginsugo ni Jesus ang iya mga sumulunod nga dapat nila tudluan ang iban nga tumanon ang mga sugo sang Dios