Kapitulo Dose

Ang Kahulugan Sang Imo Bawtismo

1. Ngaa dapat interesado gid ang tagsatagsa sa aton sa bawtismo sa tubig?

 SANG tuig 29 C.E., si Jesus ginbawtismuhan, kay gintugmawan sia ni Juan Bautista sa Suba Jordan. Si Jehova mismo nagatan-aw kag nagpabutyag sing kahamuot. (Mateo 3:​16, 17) Sa amo si Jesus nagpahamtang sing sulundan nga dapat sundon sang tanan niya nga disipulo. Paglipas sang tatlo ka tuig kag tunga, ginhatag ni Jesus ini nga instruksion sa iya mga disipulo: “Ang bug-os nga awtoridad ginhatag na sa akon sa langit kag sa duta. Busa lakat kamo kag maghimo sing mga disipulo sa mga tawo sa tanan nga kapungsuran, nagabawtismo sa ila sa ngalan sang Amay kag sang Anak kag sang balaan nga espiritu.” (Mateo 28:​18, 19) Ginbawtismuhan ka bala nahisanto sa ginsugo ni Jesus didto? Kon indi, nagahanda ka bala sa paghimo sini?

2. May kaangtanan sa bawtismo, anong mga pamangkot ang dapat sabton?

² Bisan diin man sini, ang maathag nga paghangop sa bawtismo importante para sa tanan nga luyag sa pag-alagad kay Jehova kag sa pagkabuhi sa iya matarong nga bag-ong kalibutan. Ang mga pamangkot nga takus sabton nagalakip sini: Ang Cristianong bawtismo karon may pareho man bala nga kahulugan sa bawtismo ni Jesus? Ano ang kahulugan sang pagpabawtismo “sa ngalan sang Amay kag sang Anak kag sang balaan nga espiritu”? Ano ang nalakip sa pagkabuhi nahisanto sa kahulugan sang Cristianong bawtismo sa tubig?

Mga Bawtismo nga Ginhimo ni Juan

3. Para kay sin-o lamang ang pagbawtismo ni Juan?

³ Mga anom ka bulan antes si Jesus ginbawtismuhan, nagbantala  si Juan Bautista sa kahanayakan sang Judea, nga nagasiling: “Maghinulsol kamo, kay ang ginharian sang mga langit malapit na.” (Mateo 3:​1, 2) Nabatian sang mga tawo ang ginsiling ni Juan kag ginsunod ini. Gintu-ad nila sing dayag ang ila mga sala, ginhinulsulan ini, kag nian nagkadto kay Juan agod magpabawtismo sa iya sa Suba Jordan. Yadto nga bawtismo para sa mga Judiyo.​​—Lucas 1:​13-​16; Binuhatan 13:​23, 24.

4. Ngaa kinahanglan gid nga maghinulsol ang mga Judiyo sang unang siglo?

⁴ Ang mga Judiyo kinahanglan gid nga maghinulsol. Sa Bukid Sinai sang tuig 1513 B.C.E., ang ila mga ginikanan naghimo sing pungsudnon nga pagpakigkatipan​​—isa ka pormal, solemne nga kasugtanan—​kay Jehova nga Dios. Apang bangod sang ila daku nga mga kasal-anan, wala nila masunod ang ila mga responsabilidad sa idalom sina nga katipan, amo nga ginpakamalaut sila. Sang panahon ni Jesus ang ila kahimtangan ital-ital. “Ang daku kag makakulugmat nga adlaw ni Jehova” nga gintagna ni Malaquias malapit na. Sang 70 C.E., yadto nga “adlaw” nag-abot sang ginlaglag sang Romanong hangaway ang Jerusalem, ang templo sini, kag ang kapin sa isa ka milyon nga Judiyo. Si Juan Bautista, nga makugi para sa matuod nga pagsimba, ginpadala sing una sa sadto nga kalaglagan, “sa paghanda kay Jehova sing katawhan nga naaman.” Kinahanglan nila hinulsulan ang ila mga sala batok sa Mosaikong Kasuguan nga katipan kag handa nga batunon ang Anak sang Dios, nga si Jesus, nga ginpadala ni Jehova sa ila.​​—Malaquias 4:​4-6; Lucas 1:​17; Binuhatan 19:4.

5. (a) Sang nagkari si Jesus agod magpabawtismo, ngaa ginduhaduhaan ini ni Juan? (b) Ano ang kahulugan sang bawtismo ni Jesus?

⁵ Si Jesus isa sang mga nagkari kay Juan Bautista agod magpabawtismo. Apang ngaa? Sa pagkahibalo nga si Jesus wala sing sala nga itu-ad, si Juan nagsiling: “Ako amo ang kinahanglan nga bawtismuhan mo, kag nagakari ka sa akon?”  Apang tuhay ang kahulugan sang bawtismo ni Jesus. Gani si Jesus nagsabat: “Pabayai nga mangin subong sini, sa karon nga tion, kay sa sina nga paagi nagakaigo para sa aton nga tumanon ang tanan nga matarong.” (Mateo 3:​13-​15) Bangod si Jesus wala sing sala, ang iya bawtismo wala magkahulugan sing paghinulsol sa sala; ni kinahanglan niya nga magdedikar sa Dios, kay katapo sia sang isa ka pungsod nga gindedikar na kay Jehova. Sa baylo, ang iya bawtismo sa edad nga 30 anyos pinasahi sa iya, kag nagkahulugan ini sang pagpresentar sang iya kaugalingon sa iya langitnon nga Amay sa paghimo sang Iya dugang pa nga kabubut-on.

6. Daw ano ka serioso si Jesus sa paghimo sa kabubut-on sang Dios para sa iya?

⁶ Ang kabubut-on sang Dios para kay Cristo Jesus naglakip sang hilikuton may kaangtanan sa Ginharian. (Lucas 8:1) Naglakip man ini sang paghalad sa iya himpit tawhanon nga kabuhi subong gawad kag subong sadsaran para sa isa ka bag-ong katipan. (Mateo 20:28; 26:26-​28; Hebreo 10:​5-​10) Serioso gid si Jesus sa kahulugan sang iya bawtismo sa tubig. Wala sia magtugot nga ang iya igtalupangod maagaw sang iban nga mga intereses. Tubtob sa katapusan sang iya kabuhi sa duta, matutom nga ginhimo niya ang kabubut-on sang Dios, kag ginhimo niya ang pagbantala sa Ginharian sang Dios nga amo ang iya panguna nga hilikuton.​​—Juan 4:34.

Pagpabawtismo sa Tubig Sang Cristianong mga Disipulo

7. Sugod sang Pentecostes 33 C.E., ano ang ginpahimo sa mga Cristiano may kaangtanan sa bawtismo?

⁷ Ang unang mga disipulo ni Jesus ginbawtismuhan ni Juan sa tubig kag nian gintuytuyan padulong kay Jesus subong palaabuton nga mga katapo sang Ginharian sa langit. (Juan 3:​25-​30) Sa idalom sang pagtuytoy ni Jesus ining mga disipulo nagbawtismo man, nga may pareho nga kahulugan sa bawtismo ni Juan. (Juan 4:​1, 2) Apang, sugod sang Pentecostes  33 C.E., gintuman nila ang sugo nga magbawtismo “sa ngalan sang Amay kag sang Anak kag sang balaan nga espiritu.” (Mateo 28:19) Mapuslanon gid nga repasuhon mo kon ano ang kahulugan sini.

8. Ano ang kahulugan sang pagpabawtismo “sa ngalan sang Amay”?

⁸ Ano ang kahulugan sang pagpabawtismo “sa ngalan sang Amay”? Nagakahulugan ini sang pagbaton sa iya ngalan, posisyon, awtoridad, katuyuan, kag kasuguan. Binagbinaga kon ano ang nalakip sa sini. (1) Tuhoy sa iya ngalan, ang Salmo 83:18 nagasiling: “Ikaw, nga ang ngalan si Jehova, ikaw lamang ang Labing Mataas sa bug-os nga duta.” (2) Tuhoy sa iya posisyon, ang 2 Hari 19:15 nagasiling: “O Jehova . . . , ikaw lamang ang matuod nga Dios.” (3) Tuhoy sa iya awtoridad, ang Bugna 4:​11 nagasugid sa aton: “Takus ka, Jehova, nga amon Dios, sa pagbaton sang himaya kag dungog kag gahom, kay ikaw ang nagtuga sang tanan nga butang, kag bangod sang imo kabubut-on nangin amo kag gintuga sila.” (4) Dapat man naton kilalahon nga si Jehova amo ang Manughatag-Kabuhi, nga ang katuyuan amo ang pagluwas sa aton gikan sa sala kag kamatayon: “Ang kaluwasan iya ni Jehova.” (Salmo 3:8; 36:9) (5) Dapat naton batunon nga si Jehova amo ang Supremo nga Manughatag-Kasuguan: “Si Jehova ang aton Hukom, si Jehova ang aton Manughatag-kasuguan, si Jehova ang aton Hari.” (Isaias 33:22) Bangod nagauyat sia sining tanan nga posisyon, ginalaygayan kita: “Higugmaa si Jehova nga imo Dios sa bug-os mo nga tagipusuon kag sa bug-os mo nga kalag kag sa bug-os mo nga hunahuna.”​​—Mateo 22:37.

9. Ano ang kahulugan sang pagpabawtismo “sa ngalan . . . sang Anak”?

⁹ Ano ang kahulugan sang bawtismo “sa ngalan . . . sang Anak”? Nagakahulugan ini sang pagkilala sa ngalan, posisyon, kag awtoridad ni Jesucristo. Ang iya ngalan, nga Jesus, nagakahulugan sing “Si Jehova Kaluwasan.” Natigayon niya ang iya posisyon bangod sia amo ang bugtong nga Anak sang  Dios, ang panganay sa mga tinuga sang Dios. (Mateo 16:16; Colosas 1:​15, 16) Tuhoy sini nga Anak, ang Juan 3:​16 nagasugid sa aton: “Ginhigugma gid sang Dios ang kalibutan [sang galawaron nga katawhan] sa bagay nga ginhatag niya ang iya bugtong nga Anak, agod nga ang bisan sin-o nga magtuo sa iya indi mawala kundi may kabuhi nga walay katapusan.” Bangod napatay si Jesus nga matutom, ginbanhaw sia sang Dios gikan sa minatay kag ginhatagan sia sing bag-ong awtoridad. Suno kay apostol Pablo, “ginbayaw [si Jesus sang Dios] sa mataas gid nga posisyon” sa uniberso, ikaduha lamang kay Jehova. Amo kon ngaa “sa ngalan ni Jesus magluhod ang tagsa ka tuhod . . . kag ang tagsa ka dila dayag nga magakilala nga si Jesucristo Ginuo sa himaya sang Dios nga Amay.” (Filipos 2:​9-​11) Nagakahulugan ini sang pagtuman sa mga sugo ni Jesus, nga nagahalin kay Jehova mismo.​​—Juan 15:10.

10. Ano ang kahulugan sang pagpabawtismo “sa ngalan . . . sang balaan nga espiritu”?

¹⁰ Ano ang kahulugan sang pagpabawtismo “sa ngalan . . . sang balaan nga espiritu”? Nagakahulugan ini sang pagkilala sa papel kag pagpanghikot sang balaan nga espiritu. Kag ano ang balaan nga espiritu? Ini amo ang aktibo nga kusog ni Jehova, nga paagi sini ginahimo niya ang iya mga katuyuan. Nagsiling si Jesus sa iya mga sumulunod: “Magapangabay ako sa Amay kag magahatag sia sa inyo sing isa pa ka mananabang nga mangin kaupod ninyo sing dayon, ang espiritu sang kamatuoran.” (Juan 14:​16, 17) Ano ang mahimo nila sa bulig sini? Si Jesus nagsiling pa sa ila: “Magabaton kamo sing gahom kon ang balaan nga espiritu mag-abot sa inyo, kag mangin saksi ko kamo sa Jerusalem kag sa bug-os nga Judea kag Samaria kag tubtob sa ukbong sang duta.” (Binuhatan 1:8) Paagi sa balaan nga espiritu, gin-inspirar man ni Jehova ang pagsulat sa Biblia: “Ang tagna wala mag-abot paagi sa kabubut-on sang tawo, kundi ang mga tawo nagpamulong samtang ginatuytuyan sila sang balaan nga espiritu.”  (2 Pedro 1:21) Gani ginakilala naton ang papel sang balaan nga espiritu kon ginatun-an naton ang Biblia. Ang isa pa ka paagi nga ginakilala naton ang balaan nga espiritu amo ang pagpangabay kay Jehova nga buligan kita nga mapatubas ang “mga bunga sang espiritu,” nga amo “ang gugma, kalipay, paghidait, pagkamainantuson, pagkalulo, pagkaayo, pagtuo, pagkakalmado, pagpugong sa kaugalingon.”​​—Galacia 5:​22, 23.

11. (a) Ano ang matuod nga kahulugan sang bawtismo sa aton adlaw? (b) Paano ang bawtismo kaangay sang pagkapatay kag pagkabanhaw?

¹¹ Ang una nga mga nagpabawtismo nahisanto sa instruksion ni Jesus amo ang mga Judiyo kag Judiyo nga mga proselita, sugod sang 33 C.E. Wala madugay pagkatapos sadto, ginhatag man sa mga Samaritano ang pribilehiyo nga mangin Cristianong mga disipulo. Nian, sang 36 C.E., ginpasangkad ang panawagan agod maglakip sa di-sirkunsidado nga mga Gentil. Antes magpabawtismo, ang mga Samaritano kag mga Gentil dapat maghimo sing personal nga dedikasyon kay Jehova nga alagaron sia subong mga disipulo sang iya Anak. Amo ini gihapon ang kahulugan sang Cristianong bawtismo sa tubig tubtob karon. Ang bug-os nga pagtum-oy sa tubig isa ka nagakaigo nga simbulo sining personal nga dedikasyon, kay ang bawtismo isa ka simbuliko nga lubong. Ang imo pagpaidalom sa tubig sang bawtismo nagarepresentar sang imo pagkapatay sa imo dalanon sa kabuhi anay. Ang imo pagbutwa sa tubig nagasimbulo sang imo pagkabuhi liwat agod himuon ang kabubut-on sang Dios. Ining “isa ka bawtismo” naaplikar sa tanan nga nangin matuod nga mga Cristiano. Sa bawtismo sila mangin Cristianong mga Saksi ni Jehova, ang ordenado nga mga ministro sang Dios.​ ​—Efeso 4:5; 2 Corinto 6:​3, 4.

12. Ano ang katumbas sang Cristianong bawtismo sa tubig, kag paano?

¹² Ini nga bawtismo may daku nga balor sa pagluwas sa mata sang Dios. Halimbawa, sa tapos masambit ang pagtukod  ni Noe sing arka, nga paagi sini sia kag ang iya pamilya gintipigan sa Anaw, si apostol Pedro nagsulat: “Ina nga katumbas sini nagaluwas man karon sa inyo, nga amo, ang bawtismo, (indi ang pagkuha sang higko gikan sa lawas, kundi ang pagpangabay sa Dios sing maayo nga konsiensia,) paagi sa pagkabanhaw ni Jesucristo.” (1 Pedro 3:21) Ang arka isa ka kitaon nga pamatuod nga ginhimo ni Noe sing matutom ang hilikuton nga gintangdo sang Dios. Sang matapos ang paghimo sing arka, “ang kalibutan sadto nga tion nalaglag sang ginlapawan ini sang tubig.” (2 Pedro 3:6) Apang “walo ka kalag, ang naluwas sa tubig,” si Noe kag ang iya pamilya.​—1 Pedro 3:20.

13. Gikan sa ano ginaluwas ang isa ka Cristiano paagi sa bawtismo sa tubig?

¹³ Sa karon, ang mga nagadedikar sang ila kaugalingon kay Jehova pasad sa pagtuo sa ginbanhaw nga si Cristo nagapabawtismo bilang simbulo sina nga dedikasyon. Ginahimo nila ang kabubut-on sang Dios para sa aton adlaw kag ginaluwas gikan sa karon malauton nga kalibutan. (Galacia 1:​3, 4) Wala na sila nagapadulong sa kalaglagan upod sang karon malauton nga sistema sang mga butang. Ginaluwas sila gikan sa sini kag ginahatagan sang Dios sing matinlo nga konsiensia. Ginapasalig ni apostol Juan ang mga alagad sang  Dios: “Ang kalibutan nagataliwan kag amo man ang kailigbon sini, apang sia nga nagahimo sang kabubut-on sang Dios nagapabilin sing dayon.”​​—1 Juan 2:17.

Pagpanghikot Nahisanto sa Aton mga Responsabilidad

14. Ngaa ang bawtismo mismo indi isa ka garantiya sang kaluwasan?

¹⁴ Sayop ang maghinakop nga ang bawtismo isa mismo ka garantiya sang kaluwasan. May balor lamang ini kon ang isa ka tawo nagdedikar gid sang iya kaugalingon kay Jehova paagi kay Jesucristo kag pagkatapos sini ginahimo ang kabubut-on sang Dios sing matutom tubtob sa katapusan. “Sia nga nakabatas tubtob sa katapusan amo sia ang maluwas.”​​—Mateo 24:13.

15. (a) Ano ang kabubut-on sang Dios karon para sa bawtismado nga mga Cristiano? (b) Daw ano ka importante dapat ang mangin Cristianong disipulo sa aton kabuhi?

¹⁵ Ang kabubut-on sang Dios para kay Jesus naglakip kon paano niya gingamit ang iya kabuhi subong tawo. Dapat ini itugyan sa kamatayon subong isa ka halad. Sa bahin naton, ang aton lawas dapat ipresentar sa Dios, kag dapat kita magkabuhi sing masinakripisyuhon sa kaugalingon paagi sa paghimo sang kabubut-on sang Dios. (Roma 12:​1, 2) Wala gid naton ginahimo ang kabubut-on sang Dios kon bisan sa pulupanag-on hungod nga nagagawi kita kaangay sang kalibutan sa palibot naton ukon kon ginasentro naton ang aton kabuhi sa makagod nga mga paghimud-os, nga nagaalagad sa Dios sing pakulahaw lamang. (1 Pedro 4:​1-3; 1 Juan 2:​15, 16) Sang namangkot ang isa ka Judiyo kon ano ang dapat niya himuon agod makatigayon sing kabuhi nga walay katapusan, ginkilala ni Jesus ang pagkaimportante sang pagkabuhi nga matinlo sa moral. Apang ginpatalupangod man niya ang isa ka butang nga mas importante pa: ang kinahanglanon nga mangin isa ka Cristianong disipulo, isa ka sumulunod ni Jesus. Amo ini dapat ang pinakaimportante  nga butang sa kabuhi. Indi mahimo nga ikaduha lamang ini sa materyal nga mga paghimud-os.​​—Mateo 19:16-​21.

16. (a) Ano ang responsabilidad sang tanan nga Cristiano may kaangtanan sa Ginharian? (b) Subong sang ginailustrar sa pahina 116 kag 117, ano ang pila ka epektibo nga mga paagi sa paghimo sang hilikuton sa Ginharian? (c) Ano nga pamatuod ang ginahatag sang aton tinagipusuon nga pagpakigbahin sa pagpanaksi nga hilikuton?

¹⁶ Dapat ipadaku liwat nga ang kabubut-on sang Dios para kay Jesus naglakip sang importante nga hilikuton may kaangtanan sa Ginharian sang Dios. Si Jesus mismo gintangdo nga mangin Hari. Apang samtang yari sa duta, nagpanaksi man sia sing makugi tuhoy sa Ginharian. Magahimo man kita sing kaanggid nga hilikuton sa pagpanaksi, kag may rason gid kita nga himuon ini sing tinagipusuon. Paagi sa paghimo sini, ginapakita naton ang aton apresasyon sa pagkasoberano ni Jehova subong man ang aton gugma sa isigkatawo. (Mateo 22:36-​40) Ginapakita man naton nga nahiusa kita sa mga masigkasumilimba sa bug-os nga kalibutan, tanan sila mga manugbantala sang Ginharian. Sing tingob, nga nahiusa sa bug-os nga kalibutan, nagapadayon kita padulong sa tulumuron nga magkabuhi sa walay katapusan sa dutan-on nga bahin sining Ginharian.

Repaso nga Paghinun-anon

• Ano ang mga pagkaanggid kag ano ang mga pagkatuhay sang bawtismo ni Jesus kag sang bawtismo sa tubig karon?

• Ano ang kahulugan sang pagpabawtismo “sa ngalan sang Amay kag sang Anak kag sang balaan nga espiritu”?

• Ano ang nadalahig sa pagkabuhi nahisanto sa mga responsabilidad sang Cristianong bawtismo sa tubig?

[Mga Pamangkot sa Pagtinuon]

[Mga retrato sa pahina 116, 117]

 PILA KA PAAGI SA PAGBANTALA SA GINHARIAN

Sa mga himata

Sa mga kaupod sa trabaho

Sa mga kabutho

Sa mga dalan

Sa pamalaybalay

Sa pagduaw liwat sa mga interesado

Sa mga pagtuon sa Biblia sa puluy-an