Kapitulo Disiotso

“Indi Sila Bahin Sang Kalibutan”

1. (a) Antes sia napatay, ano ang ginpangamuyo ni Jesus para sa iya mga disipulo? (b) Ngaa importante gid nga mangin “indi bahin sang kalibutan”?

 SANG gab-i antes sia ginpatay, si Jesus nangamuyo para sa iya mga disipulo. Bangod nahibaluan niya nga hingabuton gid sila ni Satanas, si Jesus nagsiling sa iya Amay: “Nagapangabay ako sa imo, indi agod kuhaon sila gikan sa kalibutan, kundi agod bantayan sila bangod sa isa nga malaut. Indi sila bahin sang kalibutan, subong nga ako indi bahin sang kalibutan.” (Juan 17:15, 16) Ngaa importante gid nga mahamulag sa kalibutan? Bangod si Satanas amo ang manuggahom sini nga kalibutan. Indi luyag sang mga Cristiano nga mangin bahin sang kalibutan nga kontrolado niya.​—Lucas 4:​5-8; Juan 14:30; 1 Juan 5:​19.

2. Sa anong mga paagi indi bahin si Jesus sang kalibutan?

² Ang mangin indi bahin sang kalibutan wala nagakahulugan nga wala ginahigugma ni Jesus ang iban. Sa baylo, gin-ayo niya ang mga masakiton, ginbanhaw ang mga patay, kag gintudluan ang mga tawo tuhoy sa Ginharian sang Dios. Ginhatag pa gani niya ang iya kabuhi para sa katawhan. Apang wala niya ginhigugma ang di-diosnon nga mga panimuot kag mga buhat sadtong may espiritu sang kalibutan ni Satanas. Sa amo, nagpaandam sia batok sa imoral nga mga kailigbon, materyalistiko nga dalanon sang kabuhi, kag paghingamo sa kabantugan. (Mateo 5:​27, 28; 6:​19-​21; Lucas 20:46, 47) Gani, indi makapakibot nga ginlikawan man ni Jesus ang politika sang kalibutan. Bisan pa Judiyo sia, wala sia magdampig sa mga sinuay sa politika sa ulot sang Roma kag sang mga Judiyo.

 “Ang Akon Ginharian Indi Bahin Sining Kalibutan”

3. (a) Ano ang ginsumbong sang mga Judiyong relihiosong lider kay Pilato tuhoy kay Jesus, kag ngaa? (b) Ano ang nagapakita nga indi interesado si Jesus nga mangin tawhanon nga hari?

³ Binagbinaga ang natabo sang ginpadakop si Jesus sang mga Judiyong relihiosong lider kag gindala kay Poncio Pilato, ang Romanong gobernador. Ang matuod, indi mapahamtang ining mga lider bangod ginbuyagyag ni Jesus ang ila pagkasalimpapaw. Agod maghulag ang gobernador batok kay Jesus, ginsumbong nila sia paagi sa pagsiling: “Nakita namon ining tawo nga nagapukan sang aton pungsod kag nagadumili sa pagbayad sing buhis kay Cesar kag nagasiling nga sia gid amo ang Cristo nga isa ka hari.” (Lucas 23:2) Maathag gid nga kabutigan ini bangod isa ka tuig antes sini, sang luyag sang mga tawo nga himuon si Jesus nga hari, nagdis-ayri sia. (Juan 6:15) Nahibaluan niya nga mangin langitnon nga Hari sia sa ulihi. (Lucas 19:11, 12) Subong man, si Jehova mismo, indi ang mga tawo, ang magapalingkod sa iya sa trono.

4. Ano ang panimuot ni Jesus sa pagbayad sing buhis?

⁴ Tatlo ka adlaw lamang antes gindakop si Jesus, gintinguhaan sang mga Fariseo nga pahambalon si Jesus sing butang nga mahimo isumbong sa iya may kaangtanan sa pagbayad sing buhis. Apang nagsiling sia: “Pakitai ako sing denario [isa ka Romanong sensilyo]. Kay sin-o bala dagway kag sinulat ang yari diri?” Sang nagsiling sila “kay Cesar,” nagsabat sia: “Nian, ihatag kay Cesar ang mga butang nga iya ni Cesar, apang sa Dios ang mga butang nga iya sang Dios.”​—Lucas 20:20-​25.

5. (a) Ano nga leksion ang gintudlo ni Jesus sa iya mga disipulo sang tion nga gindakop sia? (b) Paano ginpaathag ni Jesus ang rason sang ginhimo niya? (c) Ano ang resulta sadto nga kasaba?

⁵ Wala, si Jesus wala magtudlo sing pagrebelde batok sa sekular nga mga awtoridad. Sang nag-abot ang mga soldado  kag ang iban pa nga mga lalaki sa pagdakop kay Jesus, naggabot si Pedro sing espada kag ginlabo ang isa sang mga lalaki, kag nautod ang iya dulunggan. Apang si Jesus nagsiling: “Itagob ang imo espada, kay ang tanan nga nagagamit sing espada sa espada mapatay.” (Mateo 26:51, 52) Pagkadason nga adlaw ginpaathag ni Jesus ang iya mga ginhimo kay Pilato, nga nagasiling: “Ang akon ginharian indi bahin sining kalibutan. Kon ang akon ginharian bahin sining kalibutan, ang akon mga alagad nakig-away kuntani agod indi ako matugyan sa mga Judiyo.” (Juan 18:36) Ginbaton ni Pilato nga ‘wala sing basihan ang mga panumbungon’ batok kay Jesus. Apang bangod sang pag-ipit sang kadam-an, ginpalansang ni Pilato si Jesus.​—Lucas 23:13-​15; Juan 19:12-​16.

Ginasunod Sang mga Disipulo ang Pagpanguna ni Jesus

6. Paano ginpakita sang unang mga Cristiano nga ginlikawan nila ang espiritu sang kalibutan apang ginhigugma ang katawhan?

⁶ Sa amo nahangpan sang mga disipulo ni Jesus kon ano ang kinahanglan agod mangin indi bahin sang kalibutan. Nagkahulugan ini sang paglikaw sa di-diosnon nga espiritu kag mga buhat sang kalibutan, nga nagalakip sang masingki kag imoral nga kalingawan sa Romanong arena kag teatro. Tungod sina, ang mga disipulo gintawag nga mga madinumtanon sa katawhan. Apang, sa baylo nga dumtan ang ila mga isigkatawo, nagpangabudlay sila sing lakas nga buligan ang iban nga makabenepisyo sa mga aman sang Dios para sa kaluwasan.

7. (a) Bangod indi bahin sang kalibutan, ano ang naeksperiensiahan sang unang mga disipulo? (b) Paano nila ginatamod ang politikal nga mga manuggahom kag ang pagbayad sing buhis, kag ngaa?

⁷ Ang mga sumulunod ni Jesus ginhingabot man kaangay niya, sa masami sang mga opisyales sang gobierno nga ginsugiran  sing sayop nga mga impormasyon. Apang, sang mga 56 C.E., si apostol Pablo nagsulat sa mga Cristiano sa Roma, nga nagalaygay sa ila nga “magpasakop sa superyor nga mga awtoridad [politikal nga mga manuggahom], kay wala sing awtoridad nga indi paagi sa Dios.” Wala ini nagakahulugan nga si Jehova ang nagatukod sa sekular nga mga gobierno, kundi ginatugutan niya sila nga magluntad tubtob ang iya Ginharian lamang ang magagahom sa bug-os nga duta. Sing nagakaigo, ginlaygayan ni Pablo ang mga Cristiano nga tahuron ang sekular nga mga opisyales kag magbayad sing buhis.​—Roma 13:​1-7; Tito 3:​1, 2.

8. (a) Tubtob sa ano nga kasangkaron dapat magpasakop ang mga Cristiano sa superyor nga mga awtoridad? (b) Paano gin-ilog sang unang mga Cristiano ang halimbawa ni Jesus?

⁸ Apang, ang pagpasakop sa politikal nga mga manuggahom relatibo lamang, indi walay latid. Kon nagasumpakilay ang mga kasuguan ni Jehova kag ang mga kasuguan sang tawo, ginatuman sang mga nagaalagad kay Jehova ang Iya mga kasuguan. Talupangda ang ginsiling sang libro nga On the Road to Civilization​—A World History tuhoy sa unang mga Cristiano: “Ang mga Cristiano nangindi sa paghimo sang pila ka katungdanan sang Romanong mga banwahanon. Ang mga Cristiano . . . nagbatyag nga supak sa ila pagtuo ang magsoldado. Wala sila mag-uyat sing katungdanan sa politika. Wala sila magsimba sa emperador.” Sang ‘ginmanduan’ sang Judiyong mataas nga hukmanan ang mga disipulo nga mag-untat sa pagbantala, nagsabat sila: “Dapat namon tumanon ang Dios subong manuggahom sa baylo sang mga tawo.”​—Binuhatan 5:​27-​29.

9. (a) Ngaa amo sadto ang ginhimo sang mga Cristiano sa Jerusalem sang 66 C.E.? (b) Sa anong paagi isa yadto ka mapuslanon nga sulundan?

⁹ Bahin sa mga binais sa politika kag militar, ang mga disipulo nagpabilin gid nga neutral. Sang 66 C.E., ang mga Judiyo  sa Judea nagribok batok kay Cesar. Maabtik nga ginpalibutan sang Romanong hangaway ang Jerusalem. Ano ang ginhimo sang mga Cristiano sa siudad? Nadumduman nila ang laygay ni Jesus nga magguwa sa siudad. Sang umalagi nga nag-isol ang mga Romano, ang mga Cristiano nagpalagyo sa tabok sang Suba Jordan pakadto sa mabukid nga rehiyon sang Pella. (Lucas 21:20-​24) Ang ila pagkaneutral isa ka sulundan para sa matutom nga mga Cristiano sang ulihi.

Neutral nga mga Cristiano Sining Katapusan nga mga Adlaw

10. (a) Sa ano nga hilikuton padayon nga masako ang mga Saksi ni Jehova, kag ngaa? (b) Sa ano sila neutral?

¹⁰ Ginapakita bala sang rekord sang maragtas nga may isa ka grupo sa sining katapusan nga mga adlaw nga nagapabilin gid nga neutral bilang pag-ilog sa unang mga Cristiano? Huo, nahimo ini sang mga Saksi ni Jehova. Sa sulod sining tanan nga tion, padayon nila nga ginabantala nga ang Ginharian sang Dios amo lamang ang paagi agod magluntad ang dayon nga paghidait, kabuganaan, kag kalipay sa mga nagahigugma sa pagkamatarong. (Mateo 24:14) Apang bahin sa mga binais sa tunga sang mga pungsod, neutral sila.

11. (a) Paano ang pagkaneutral sang mga Saksi tuhay sa ginahimo sang mga klero? (b) Ano ang pagtamod sang mga Saksi ni Jehova tuhoy sa ginahimo sang iban sa politika?

¹¹ Sing tuhay, ang klero sang mga relihion sining kalibutan nadalahig gid sa politika. Sa iban nga mga pungsod, aktibo sila nga nangampanya para ukon batok sa mga kandidato. Ang iban nga mga klero nag-uyat pa gani sing katungdanan sa politika. Gin-ipit pa gani sang iban ang mga politiko nga paboran ang mga programa nga aprobado sang mga klero. Apang, ang mga Saksi ni Jehova wala nagapasilabot sa politika. Wala man sila nagapasilabot sa ginahimo sang iban subong sang pagbuylog sa isa ka partido politika, pagkandidato, ukon pagboto sa mga piniliay. Si Jesus nagsiling nga ang iya  mga disipulo indi dapat mangin bahin sang kalibutan, gani ang mga Saksi ni Jehova wala nagapakigbahin sa politika.

12. Ano ang resulta bangod ang mga relihion sang kalibutan indi neutral?

¹² Subong sang gintagna ni Jesus, ang mga pungsod makapila na nga nag-inaway. Bisan ang mga grupo sa sulod sang mga pungsod nagainaway sa isa kag isa. (Mateo 24:​3, 6, 7) Halos pirme suportado sang mga relihiosong lider ang isa ka pungsod ukon grupo, nagapalig-on sa ila mga sumulunod nga himuon man ini. Ang resulta? Ang mga katapo sang isa ka relihion nagapinatyanay sa inaway bangod lamang magkatuhay sila sing nasyonalidad ukon tribo. Supak ini sa kabubut-on sang Dios.​—1 Juan 3:​10-​12; 4:​8, 20.

13. Ano ang ginapakita sang pamatuod tuhoy sa pagkaneutral sang mga Saksi ni Jehova?

¹³ Apang, ang mga Saksi ni Jehova neutral sa tanan nga inaway. Ang Lalantawan sang Nobiembre 1, 1939, nagsiling: “Ang tanan nga dampig sa Ginuo mangin neutral sa nagailinaway nga mga pungsod.” Ang mga Saksi ni Jehova sa tanan nga pungsod kag sa idalom sang tanan nga kahimtangan padayon nga may amo sini nga panindugan. Wala nila ginatugutan ang nagapabahinbahin nga mga politika kag mga inaway sang kalibutan nga magguba sang ila internasyonal nga paghiliutod. ‘Ginsalsal nila ang ila mga espada nga mga punta sang arado kag ang ila mga bangkaw nga mga galab nga inughagbas.’ Bangod neutral, wala na sila nagatuon sing inaway.​—Isaias 2:​3, 4; 2 Corinto 10:​3, 4.

14. Bangod sang pagpabilin nga nahamulag sa kalibutan, ano ang naeksperiensiahan sang mga Saksi ni Jehova?

¹⁴ Ano ang isa ka resulta sang ila pagkaneutral? Si Jesus nagsiling: “Bangod kamo indi bahin sang kalibutan, . . . ang kalibutan nagadumot sa inyo.” (Juan 15:19) Madamong Saksi ni Jehova ang ginbilanggo bangod mga alagad sila sang Dios. Ang iban ginsakit, ginpatay pa gani, kaanggid sa natabo sa  unang-siglo nga mga Cristiano. Ini bangod ginapamatukan ni Satanas, nga “dios sining sistema sang mga butang,” ang mga alagad ni Jehova, nga indi bahin sini.​—2 Corinto 4:4; Bugna 12:12.

15. (a) Padulong sa ano nagamartsa ang tanan nga pungsod, kag ano ang mahalungon nga ginalikawan sang mga Saksi ni Jehova? (b) Ngaa ang pagkanahamulag sa kalibutan isa gid ka serioso nga butang?

¹⁵ Nalipay ang mga alagad ni Jehova nga indi sila bahin sang kalibutan, kay ang tanan nga pungsod sini nagamartsa padulong sa ila kalaglagan sa Armagedon. (Daniel 2:​44; Bugna 16:14, 16; 19:11-​21) Malikawan naton ini bangod nagapabilin kita nga indi bahin sang kalibutan. Subong nahiusa nga katawhan sa bug-os nga duta, matutom kita sa langitnon nga Ginharian sang Dios. Matuod, bangod indi kita bahin sang kalibutan, ginayaguta kag ginahingabot kita. Apang, sa dili madugay, magauntat na ini, kay ining karon nga malauton nga kalibutan sa idalom ni Satanas pagalaglagon sing dayon. Sa pihak nga bahin, ang mga nagaalagad kay Jehova magakabuhi sing dayon sa iya matarong nga bag-ong kalibutan sa idalom sang Ginharian sang Dios.​—2 Pedro 3:​10-​13; 1 Juan 2:​15-​17.

Repaso nga Paghinun-anon

• Paano ginpakita ni Jesus kon ano ang nadalahig nga mangin “indi bahin sang kalibutan”?

• Ano ang pagtamod sang unang mga Cristiano sa (a) espiritu sang kalibutan, (b) sekular nga mga manuggahom, kag (c) pagbayad sing buhis?

• Sa anong mga paagi ginpamatud-an sang mga Saksi ni Jehova sa moderno nga tion ang ila Cristiano nga pagkaneutral?

[Mga Pamangkot sa Pagtinuon]

 [Retrato sa pahina 165]

Ginpaathag ni Jesus nga sia kag ang iya mga sumulunod “indi bahin sang kalibutan”