Kapitulo Trese

Isa ka Dakung Kadam-an sa Atubangan Sang Trono ni Jehova

1. (a) Sa wala pa mabaton sang mga alagad sang Dios antes sang Cristianong panahon ukon sang 144,000 ang ila padya, ano dapat ang ila maeksperiensiahan? (b) Ano ang posible para sa “isa ka dakung kadam-an” nga nagakabuhi sa sining tion?

 GIN-UNA sang matutom nga mga alagad sang Dios halin kay Abel tubtob kay Juan Bautista ang paghimo sang kabubut-on sang Dios sa ila kabuhi. Apang, sila tanan napatay, nga nagahulat sang pagbanhaw sa ila sa duta sa bag-ong kalibutan sang Dios. Ang 144,000, nga magagahom kaupod ni Cristo sa langitnon nga Ginharian sang Dios, dapat man mapatay antes nila mabaton ang ila padya. Apang, ginapakita sang Bugna 7:9 nga sa sining katapusan nga adlaw, may “isa ka dakung kadam-an” gikan sa tanan nga pungsod nga indi makaeksperiensia sing kamatayon kundi may paglaum nga magkabuhi sing dayon sa duta. Isa bala ikaw sa ila?

Pagkilala sa Dakung Kadam-an

2. Ano ang nagdul-ong sa maathag nga paghangop sa kon sin-o ang dakung kadam-an sang Bugna 7:9?

² Sang 1923, nahantop sang mga alagad ni Jehova nga ang “mga karnero” sa parabola ni Jesus nga mabasa sa Mateo 25:31-​46 kag ang “iban nga mga karnero” nga ginpatuhuyan niya sa Juan 10:16 amo ang mga tawo nga may kahigayunan sa pagkabuhi sing dayon sa duta. Sang 1931, ang mga tawo nga ginlaragway sa Ezequiel 9:​1-​11 nga ginatandaan sa ila agtang nahangpan man nga amo sila ang may dutan-on nga paglaum. Nian narealisar sang 1935 nga ang dakung kadam-an isa ka bahin sang iban nga mga karnero nga klase nga ginhambal  ni Jesus. Karon, ining nahamut-an nga dakung kadam-an nagadamo sing minilyon.

3. Ngaa ang ekspresyon nga “nagatindog sa atubangan sang trono” wala nagapatuhoy sa isa ka langitnon nga klase?

³ Sa Bugna 7:​9, ang dakung kadam-an wala makita nga didto sa langit. Ang ila ‘pagtindog sa atubangan sang trono’ sang Dios wala nagakinahanglan nga didto sila sa langit. Apang, makita sila sang Dios. (Salmo 11:4) Ang kamatuoran nga ang dakung kadam-an, “nga wala sing tawo nga makaisip,” indi isa ka langitnon nga klase ginapakita paagi sa pagpaanggid sa indi espesipiko nga kadamuon sini sa kon ano ang nasulat sa Bugna 7:​4-8 kag Bugna 14:​1-4. Ginapakita diri nga 144,000 ang kadamuon sang ginkuha sa duta pakadto sa langit.

4. (a) Ano ang “dakung kapipit-an” nga malampuwasan sang dakung kadam-an? (b) Suno sa Bugna 7:​11, 12, sin-o ang nakakita sa dakung kadam-an kag nagbuylog sa ila sa pagsimba?

⁴ Ang Bugna 7:14 nagasiling tuhoy sa dakung kadam-an: “Ini amo sila ang nagguwa sa dakung kapipit-an.” Makalampuwas sila sa pinakamabudlay nga kapipit-an nga naeksperiensiahan sa maragtas sang tawo. (Mateo 24:21) Sa tion nga ipatungod nila sing mapinasalamaton ang ila kaluwasan sa Dios kag kay Cristo, nian ang tanan nga matutom nga tinuga sa langit magahiusa sa ila sa pagsiling: “Kabay pa! Ang pagpakamaayo kag himaya kag kaalam kag pagpasalamat kag dungog kag gahom kag kusog mangin sa aton Dios tubtob sa walay katubtuban. Kabay pa.”​​—Bugna 7:​11, 12.

Pagpamatuod nga Takus

5. Paano naton mahibaluan kon ano ang ginakinahanglan agod mangin bahin sang dakung kadam-an?

⁵ Ang pagtipig sa dakung kadam-an sa dakung kapipit-an mahanabo nahisanto sa matarong nga mga talaksan ni Jehova. Maathag nga ginapakita sang Biblia kon ano ang mga kinaiya sang mga tawo nga pagaluwason. Sa amo, posible para  sa mga mahigugmaon sa pagkamatarong nga magpanghikot karon sa tuyo nga pamatud-an ang ila kaugalingon nga takus sa kaluwasan. Ano dapat ang ila himuon?

6. Ngaa ang dakung kadam-an nagakaigo nga mapaanggid sa mga karnero?

⁶ Ang mga karnero malulo kag mapinasakupon. Gani sang nagsiling si Jesus nga may yara sia iban nga mga karnero nga indi langitnon nga klase, ginpatuhuyan niya ang mga tawo nga indi lamang luyag magkabuhi sing dayon sa duta kundi mangin mapinasakupon man sa iya mga panudlo. “Ang akon mga karnero nagapamati sa akon tingog, kag kilala ko sila, kag nagasunod sila sa akon,” siling niya. (Juan 10:​16, 27) Ini sila amo ang mga tawo nga nagapamati gid kag nagatuman sa ginasiling ni Jesus, kag nangin mga disipulo niya.

7. Ano nga mga kinaiya ang dapat palambuon sang mga sumulunod ni Jesus?

⁷ Ano ang iban pa nga mga kinaiya nga dapat palambuon sang tagsa sining mga sumulunod ni Jesus? Ang Pulong sang Dios nagasabat: ‘Ubaha ninyo ang daan nga personalidad nga nahisuno sa inyo una nga dalanon sang paggawi kag magsuklob sing bag-o nga personalidad nga gintuga suno sa kabubut-on sang Dios sa matuod nga pagkamatarong kag pagkamainunungon.’ (Efeso 4:​22-​24) Ginapalambo nila ang mga kinaiya nga nagapauswag sang paghiusa sang mga alagad sang Dios​—“gugma, kalipay, paghidait, pagkamainantuson, pagkalulo, pagkaayo, pagtuo, pagkakalmado, pagpugong sa kaugalingon.”​​—Galacia 5:​22, 23.

8. Ano ang atubangon sang dakung kadam-an samtang ginasuportahan nila ang nagkalabilin?

⁸ Ginasuportahan sang dakung kadam-an ang diutay nga kadamuon sining may langitnon nga paglaum, nga nagapanguna sa pagbantala nga hilikuton. (Mateo 24:14; 25:40) Ginahatag sang iban nga mga karnero ini nga suporta, bisan  pa nakahibalo sila nga magaatubang sila sing pagpamatok bangod sa pamuno sining katapusan nga mga adlaw, gintabog ni Cristo Jesus kag sang iya mga anghel si Satanas kag ang iya mga demonyo gikan sa langit. Nagkahulugan ini sing “kailo sa duta . . . kay ang Yawa nagpanaug sa inyo nga may daku nga kaakig, kay nahibaluan niya nga malip-ot na lamang ang iya tion.” (Bugna 12:7-​12) Sa amo, ginapabaskog ni Satanas ang pagpamatok sa mga alagad sang Dios samtang nagahilapit ang katapusan sining sistema.

9. Daw ano ka madinalag-on ang mga alagad sang Dios sa pagbantala sing maayong balita, kag ngaa?

⁹ Walay sapayan sang masingki nga paghingabot, ang  pagbantala nga hilikuton padayon nga nagauswag. Halin sa pila lamang ka libo ka manugbantala sang Ginharian pagkatapos sang Bug-os Kalibutan nga Inaway I, may minilyon na karon, kay si Jehova nagsaad: “Bisan ano nga hinganiban nga himuon batok sa imo indi magamadinalag-on.” (Isaias 54:17) Bisan gani ang isa ka katapo sang mataas nga hukmanan sang mga Judiyo nagkilala nga ang hilikuton sang Dios indi mahimo nga malutos. Tuhoy sa mga disipulo, sia nagsiling sa mga Fariseo sang unang siglo: “Pabayai sila; (kay kon ining buko ukon ining buhat naghalin sa mga tawo, mapukan ini; apang kon naghalin ini sa Dios, indi ninyo ini mapukan;) basi masapwan pa kamo nga sa katunayan nagapakig-away sa Dios.”​—Binuhatan 5:​38, 39.

10. (a) Ano ang kahulugan sang “tanda” sa dakung kadam-an? (b) Paano ginatuman sang mga alagad sang Dios ang “tingog gikan sa langit”?

¹⁰ Ang dakung kadam-an ginalaragway subong gintandaan para sa kaluwasan. (Ezequiel 9:​4-​6) Ang “tanda” amo ang ebidensia nga sila dedikado kay Jehova, nabawtismuhan subong mga disipulo ni Jesus, kag nagapanikasog sa pagpalambo sing tulad-Cristo nga personalidad. Ginatuman nila ang “tingog gikan sa langit” nga nagasiling sa iya ni Satanas bug-os kalibutan nga emperyo sang butig nga relihion: “Guwa ka sa iya, katawhan ko, kon indi ninyo luyag makaambit sa iya mga sala, kag kon indi ninyo luyag makabaton sing bahin sa iya mga kalalat-an.”​—Bugna 18:​1-5.

11. Sa anong importante nga paagi ginapakita sang dakung kadam-an nga mga alagad sila ni Jehova?

¹¹ Subong man, si Jesus nagsiling sa iya mga sumulunod: “Sa sini ang tanan makahibalo nga kamo mga disipulo ko, kon maghigugmaanay kamo.” (Juan 13:35) Sa pagpatuhay, ang mga katapo sang mga relihion sining kalibutan nagapinatyanay sa inaway, sa masami bangod lamang magkatuhay sila sing nasyonalidad! Ang Pulong sang Dios nagasiling: “Ang mga anak sang Dios kag ang mga anak sang Yawa makilala  sa sining katunayan: Ang tagsatagsa nga wala nagahimo sing pagkamatarong wala maghalin sa Dios, amo man sia nga wala nagahigugma sang iya utod. . . . Dapat kita maghigugmaanay sa isa kag isa; indi kaangay ni Cain, nga naghalin sa isa nga malauton kag nagpatay sa iya utod.”​—1 Juan 3:​10-​12.

12. Sa dakung kapipit-an, ano ang himuon ni Jehova sa ‘mga kahoy’ sang relihion nga nagapamunga sing walay pulos nga mga bunga?

¹² Si Jesus nagsiling: “Ang tagsa ka maayo nga kahoy nagapatubas sing maayo nga bunga, apang ang tagsa ka dunot nga kahoy nagapatubas sing walay pulos nga bunga; ang maayo nga kahoy indi makapamunga sing walay pulos nga bunga, ukon ang dunot nga kahoy makapamunga sing maayo nga bunga. Ang tagsa ka kahoy nga wala nagapamunga sing maayo nga bunga ginapulod kag ginadap-ong sa kalayo. Sa pagkamatuod, nian, paagi sa ila mga bunga makilala ninyo sila.” (Mateo 7:​17-​20) Ang bunga nga ginapatubas sang mga relihion sining kalibutan nagapakilala sa ila subong dunot nga ‘mga kahoy,’ nga pagalaglagon ni Jehova sa dili madugay sa dakung kapipit-an.​​—Bugna 17:16.

13. Paano ginapakita sang dakung kadam-an nga nahiusa sila nga “nagatindog sa atubangan sang trono” ni Jehova?

¹³ Ginapatalupangod sang Bugna 7:9-15 ang mga butang nga nagadul-ong sa pagtipig sa dakung kadam-an. Ginapakita sila nga nahiusa nga “nagatindog sa atubangan sang trono” ni Jehova, nga nagasakdag sang iya bug-os uniberso nga pagkasoberano. “Ginlabhan nila ang ila mga panapton nga malaba kag ginpaputi ini sa dugo sang Kordero,” nagapakita nga ginakilala nila ang nagatumbas-sala nga halad ni Jesus. (Juan 1:29) Gindedikar nila ang ila kaugalingon sa Dios kag ginsimbuluhan ini paagi sa pagpatugmaw sa tubig. Gani may matinlo nga tindog sila sa atubangan sang Dios, nga ginalaragway sang maputi nga mga panapton, kag nagahimo sa iya sing “sagrado nga pag-alagad adlaw kag gab-i.”  May mga paagi bala agod labi pa nga mapahisanto mo ang imo kabuhi sa ginalaragway diri?

Mga Benepisyo Karon

14. Ano ang pila sang pinasahi nga mga benepisyo nga matigayon sang mga alagad ni Jehova bisan sa karon?

¹⁴ Mahimo nga nakita mo ang pinasahi nga mga benepisyo nga matigayon bisan karon sang mga nagaalagad kay Jehova. Subong isa ka halimbawa, sang matun-an mo ang matarong nga mga katuyuan ni Jehova, nahangpan mo nga may masanag nga paglaum para sa palaabuton. Gani may yara ka karon isa ka matuod nga katuyuan sa kabuhi​​—ang mag-alagad sa matuod nga Dios nga may makalilipay nga paglaum nga mabuhi sing dayon sa isa ka paraiso nga duta. Huo, si Hari Jesucristo “magatuytoy sa [dakung kadam-an] sa mga tuburan sang tubig nga nagahatag sing kabuhi.”​​—Bugna 7:17.

15. Paano nakabenepisyo ang mga Saksi ni Jehova sa pagsunod sa mga prinsipio sang Biblia tuhoy sa politika kag moralidad?

¹⁵ Ang isa ka dalayawon nga benepisyo nga ginaagom sang dakung kadam-an amo ang gugma, paghiusa, kag kalinong nga makita sa mga alagad ni Jehova sa bug-os nga duta. Sanglit kita tanan nagakaon sing pareho nga espirituwal nga pagkaon, ginatuman naton tanan ang pareho nga mga kasuguan kag mga prinsipio nga masapwan sa Pulong sang Dios. Amo kon ngaa wala kita ginabahinbahin sang mga ideolohiya sang politika ukon pungsod. Subong man, ginahuptan naton ang mataas nga mga talaksan sa moral nga ginapatuman sang Dios sa iya katawhan. (1 Corinto 6:​9-​11) Sa amo, sa baylo nga makaeksperiensia sing pinuyas, di-pag-ugyunay, kag imoralidad nga lapnag sa kalibutan, ang katawhan ni Jehova nagaagom sang matawag nga isa ka espirituwal nga paraiso. Talupangda kon paano ini ginalaragway sa Isaias 65:​13, 14.

16. Walay sapayan sang mga problema nga kinaandan sa kabuhi, ano ang paglaum sang dakung kadam-an?

¹⁶ Indi, ang tawhanon nga mga alagad ni Jehova indi himpit.  Kag naapektuhan sila sang mga problema nga kinaandan sa kabuhi sa sining kalibutan, subong sang kapigaduhon ukon mangin inosente nga mga biktima sa mga inaway sang mga pungsod. Sila man nagamasakit, nagaantos, kag nagakapatay. Apang nagatuo sila nga sa bag-ong kalibutan, “pahiran [sang Dios] ang tagsa ka luha sa mga mata nila, kag wala na sing kamatayon, ukon kalisod ukon paghibi ukon kasakit pa.”​​—Bugna 21:4.

17. Bisan ano man ang matabo sa aton karon, anong makatilingala nga palaabuton ang nagahulat sa mga nagasimba sa matuod nga Dios?

¹⁷ Bisan pa madula mo ang imo kabuhi karon bangod sang katigulangon, balatian, aksidente, ukon paghingabot, si Jehova magabanhaw sa imo sa kabuhi sa Paraiso. (Binuhatan 24:15) Nian padayon nga magakalipay ka sa espirituwal nga piesta sa Isa ka Libo ka Tuig nga Paggahom ni Cristo. Ang imo gugma sa Dios magatudok samtang makita mo nga nagakatuman sing makalilipay ang iya mga katuyuan. Kag ang pisikal nga mga pagpakamaayo nga ihatag ni Jehova sa sina nga tion labi nga magapatudok sang imo gugma sa iya. (Isaias 25:​6-9) Daw ano ka dalayawon nga palaabuton ang nagahulat sa katawhan sang Dios!

Repaso nga Paghinun-anon

• Sa anong tumalagsahon nga hitabo ginaangot sang Biblia ang dakung kadam-an?

• Kon luyag gid naton nga malakip sa sining ginakahamut-an sang Dios nga dakung kadam-an, ano dapat ang himuon naton karon?

• Daw ano ka importante sa imo ang mga pagpakamaayo nga ginaagom karon kag agumon pa sang dakung kadam-an sa bag-ong kalibutan sang Dios?

[Mga Pamangkot sa Pagtinuon]

[Retrato sa pahina 123]

Minilyon sang dakung kadam-an ang nahiusa nga nagasimba sa matuod nga Dios