Magpakita Sing Diosnon nga Debosyon sa Puluy-an
Kapitulo Disisiete
Magpakita Sing Diosnon nga Debosyon sa Puluy-an
1. Ano ang epekto sa mga pag-asawahay sang pag-aplikar sang panuytoy gikan sa Pulong sang Dios?
SI Jehova amo ang Naghimuno sang pag-asawahay, kag ang iya Pulong nagahatag sing labing maayo nga panuytoy para sa mga pamilya. Bangod sang pag-aplikar sini nga panuytoy, madamo nga tawo ang madinalag-on sa ila pag-asawahay. Maayo gid nga ang iban nga nagapuyopuyo lamang sang una napahulag nga magpakasal. Ginbugto naman sang iban pa ang ila indi legal nga relasyon. Ang masingki nga mga lalaki nga mapintas anay sa ila mga asawa kag mga kabataan nakatuon na karon sa pagpakita sing pagkaayo kag pagpalangga.
2. Ano ang nadalahig sa Cristianong pagkabuhi sang pamilya?
2 Ang Cristianong pagkabuhi sang pamilya nagadalahig sing madamo nga butang, subong sang kon paano naton ginatamod ang pagkapermanente sang pag-asawahay, kon ano ang ginahimo naton agod matuman ang aton mga responsabilidad sa pamilya, kag kon paano kita nagapakig-angot sa mga katapo sang pamilya. (Efeso 5:33–6:4) Bisan pa mahimo nga nahibaluan naton ang ginasiling sang Biblia tuhoy sa pagkabuhi sang pamilya, ang pag-aplikar sa laygay sang Biblia tuhay gid nga butang. Wala sing isa sa aton ang luyag nga mangin kaangay sadtong ginpakamalaut ni Jesus bangod sang paglapas sa mga kasuguan sang Dios. Nangatarungan sila sing sayop nga ang relihioso lamang nga debosyon bastante na. (Mateo 15:4-9) Indi naton luyag nga may isa ka dagway sang diosnon nga debosyon apang wala ini ginaaplikar sa aton mismo panimalay. Sa baylo, luyag naton magpakita sing matuod nga diosnon nga debosyon, nga amo ang “isa ka paagi sang daku nga daug.”—1 Timoteo 5:4; 6:6; 2 Timoteo 3:5.
Tubtob San-o Magadugay ang Pag-asawahay?
3. (a) Ano ang nagakatabo sa madamo nga pag-asawahay, apang ano dapat ang mangin determinasyon naton? (b) Ginagamit ang imo Biblia, sabta ang mga pamangkot nga nalista sa ubos sini nga parapo.
3 Ang higot sang pag-asawahay dugang kag dugang nga nagatapok karon. Ang iban nga mag-asawa nga tinuig na nga kasal namat-od nga magdiborsio kag magminyo sing lain. Kinaandan man nga mabatian karon nga ang lamharon nga mga mag-asawa nagbulagay paglipas lamang sang malip-ot nga tion nga pag-asawahay. Ano man ang ginahimo sang iban, luyag naton pahamut-an si Jehova. Gani binagbinagon naton ang masunod nga mga pamangkot kag mga kasulatan agod hibaluon kon ano ang ginasiling sang Pulong sang Dios tuhoy sa pagkapermanente sang pag-asawahay.
Kon ang lalaki kag babayi magminyo, daw ano ka dugay dapat ginapaabot nila nga mag-updanay? (Marcos 10:6-9; Roma 7:2, 3)
Ano lamang ang rason sa pagdiborsio nga may posibilidad nga magminyo liwat ang makatarunganon sa atubangan sang Dios? (Mateo 5:31, 32; 19:3-9)
Ano ang pagtamod ni Jehova sa mga diborsio nga wala ginatugot sang iya Pulong? (Malaquias 2:13-16)
Ginasuportahan bala sang Biblia ang pagbulagay subong isa ka paagi agod malubad ang mga problema sa pag-asawahay? (1 Corinto 7:10-13)
Sa ano nga mga kahimtangan ang pagbulagay mahimo nga makatarunganon? (Salmo 11:5; Lucas 4:8; 1 Timoteo 5:8)
4. Ngaa ang iban nga mga pag-asawahay nagadugay?
4 Ang iban nga pag-asawahay madinalag-on kag nagadugay. Ngaa? Ang indi pagminyo tubtob nga ang duha hamtong na isa ka importante nga butang, apang importante man ang pagpangita sing milinyuon nga pareho mo sing mga intereses kag makahambalanay kamo sing tampad. Apang, ang labi ka importante amo ang makakita ikaw sing tiayon nga nagahigugma kay Jehova kag nagatahod sang iya Pulong subong basihan sa paglubad sa mga problema. (Salmo 119:97, 104; 2 Timoteo 3:16, 17) Ang subong sini nga tawo wala sing panimuot nga kon indi magmadinalag-on ang inyo pag-asawahay, madali sia makabulag ukon makadiborsio. Indi niya paggamiton ang mga kakulangan sang iya tiayon subong balibad agod likawan ang iya mga responsabilidad. Sa baylo, atubangon niya ang problema kag mangita sing praktikal nga mga solusyon.
5. (a) Paano ang pagkamainunungon kay Jehova nadalahig sa pag-asawahay? (b) Bisan pa makasumalang sing pagpamatok, ano nga mga benepisyo ang matigayon sa padayon nga pagsunod sa mga talaksan ni Jehova?
5 Si Satanas nangatarungan nga kon mag-antos kita, biyaan naton ang mga dalanon ni Jehova. (Job 2:4, 5; Hulubaton 27:11) Apang ang kalabanan nga mga Saksi ni Jehova nga nag-antos bangod sang pagpamatok sang ila tiayon wala magtalikod sa ila ginsumpaan sa kasal. Padayon sila nga mainunungon kay Jehova kag sa iya mga sugo. (Mateo 5:37) Ang iban nga nagbatas nakatigayon sing kalipay nga ang ila tiayon nagbuylog sa ila sa pag-alagad kay Jehova—pagligad sang tinuig nga pagpamatok! (1 Pedro 3:1, 2) Tuhoy sa mga Cristiano nga ang ila mga tiayon wala nagapakita sing mga tanda nga magabag-o sila ukon ginbiyaan sila sang ila mga tiayon bangod nagaalagad sila kay Jehova, nahibaluan man nila nga pakamaayuhon sila bangod may pamatuod sila nga nagpakita sila sing diosnon nga debosyon sa puluy-an.—Salmo 55:22; 145:16.
Ang Tagsatagsa Nagahimo Sang Iya Bahin
6. Agod mangin madinalag-on ang pag-asawahay, ano nga kahimusan ang dapat tahuron?
6 Sa pagkamatuod, indi lamang ang pagpabilin nga nagaupdanay ang kinahanglan agod mangin madinalag-on ang pag-asawahay. Ang kinahanglan gid sang tagsa ka tiayon amo ang pagtahod sa kahimusan ni Jehova tuhoy sa pagkaulo. Nagahatag ini sing kahim-ong kag kalig-unan sa puluy-an. Sa 1 Corinto 11:3, aton mabasa: “Ang ulo sang tagsa ka lalaki amo si Cristo; ang ulo naman sang babayi amo ang lalaki; ang ulo naman ni Cristo amo ang Dios.”
7. Paano dapat himuon ang pagkaulo sa pamilya?
7 Natalupangdan mo bala kon ano ang una nga ginsambit sang bersikulo? Huo, ang tagsa ka lalaki may isa ka Ulo, si Cristo, nga sa iya dapat sia magpasakop. Nagakahulugan ini nga ang bana dapat magpanghikot subong ulo sa isa ka paagi nga nagapabanaag sang mga kinaiya ni Jesus. Si Cristo nagapasakop kay Jehova, nagahigugma sing tudok sa kongregasyon, kag nagaatipan sini. (1 Timoteo 3:15) “Ginhatag [pa gani niya] ang iya kaugalingon para sa sini.” Si Jesus, indi bugalon kag indi walay patugsiling, kundi “malulo kag mapainubuson sing tagipusuon.” Ang mga nagapasakop sa iya pagkaulo “makasapo sing kaumpawan sa [ila] mga kalag.” Kon ang isa ka bana nagapakig-angot sa iya pamilya sa sining paagi, ginapakita niya nga nagapasakop sia kay Cristo. Nian masapwan sang Cristiano nga asawa nga mapuslanon kag makapaumpaw nga magkooperar sa iya bana kag magpasakop sa iya pagkaulo.—Efeso 5:25-33; Mateo 11:28, 29; Hulubaton 31:10, 28.
8. (a) Ngaa ang Cristianong mga paagi daw wala sing maayo nga mga resulta sa iban nga mga puluy-an? (b) Ano ang dapat naton himuon kon nagaatubang sing amo sini nga kahimtangan?
8 Apang, ang mga problema mahimo mag-utwas. Antes nagsugod sa pag-aplikar sa mga prinsipio sang Biblia, mahimo nga nanggamot na sa tagipusuon sang isa ka katapo ang hinakit nga may iban nga tawo nga nagadiriher sang iya kabuhi. Ang mainayuhon nga mga pangabay kag mahigugmaon nga pamatasan mahimo nga daw wala sing maayo nga mga resulta. Nahibaluan naton nga ang Biblia nagasiling nga dulaon naton ang “kaakig kag kasingkal kag sininggitanay kag maparas nga hambal.” (Efeso 4:31) Apang kon ang isa ka katapo sang pamilya palasinggit kag palapangakig gihapon, ano ang dapat himuon? Ti, wala gin-ilog ni Jesus ang mga tawo nga nagpamahog kag nagpasipala, kundi nagsalig sia sa iya Amay. (1 Pedro 2:22, 23) Gani kon mag-utwas ang mabudlay nga mga kahimtangan sa puluy-an, pamatud-i nga may diosnon nga debosyon ka paagi sa pagpangayo sing bulig kay Jehova sa pangamuyo sa baylo nga sundon ang mga dalanon sang kalibutan.—Hulubaton 3:5-7.
9. Sa baylo nga mangin mamulayon, ano ang natun-an nga himuon sang madamo nga Cristianong mga bana?
9 Indi sa tanan nga tion madali makita ang mga pagbag-o, apang epektibo gid ang laygay sang Biblia kon ginaaplikar ini sing mapailubon kag maukod. Nasapwan sang madamo nga bana nga nag-uswag ang ila pag-asawahay sang ginhangop nila kon paano ginapakig-angutan ni Cristo ang kongregasyon. Ini nga kongregasyon wala ginatapuan sang himpit nga mga tawo. Apang, ginahigugma ini ni Jesus, nagapahamtang sia sing maayo nga halimbawa para sa sini, kag nagagamit sing Kasulatan agod buligan ini nga mag-uswag. Ginhatag niya ang iya kabuhi para sa kongregasyon. (1 Pedro 2:21) Ang iya halimbawa nagpalig-on sa madamong Cristianong mga bana nga magpanghikot subong maayo nga mga ulo sang pamilya kag maghatag sing mahigugmaon nga bulig agod mag-uswag ang ila pag-asawahay. Nagadul-ong ini sa mas maayo nga mga resulta sangsa kon mamulayon ukon mangindi sa pagpakighambal.
10. (a) Sa anong mga paagi mahimo ginapabudlayan sang bana ukon asawa—bisan sang isa nga nagapangangkon nga Cristiano—ang iban sa puluy-an? (b) Ano ang mahimo himuon agod mapauswag ang kahimtangan?
10 Ano kon ang bana indi sensitibo sa emosyonal nga mga kinahanglanon sang iya pamilya ukon wala nagamatumato sa paghimo sing kahimusan para sa pamilya agod hambalan ang Biblia kag para sa iban pa nga mga hilikuton? Ukon ano kon ang asawa wala nagakooperar kag wala nagapakita sing diosnon nga pagpasakop? Nakatigayon ang iban sing maayo nga mga resulta paagi sa matinahuron nga mga paghambalanay sang pamilya tuhoy sa mga problema. (Genesis 21:10-12; Hulubaton 15:22) Apang bisan pa indi naton matigayon ang tanan nga resulta nga ginalauman naton, mapauswag sang kada isa sa aton ang kahimtangan sa puluy-an paagi sa pagpakita sing mga bunga sang espiritu sang Dios sa iya kabuhi, nga nagapakita sing mahigugmaon nga pasunaid sa iban nga mga katapo sang pamilya. (Galacia 5:22, 23) Ang pag-uswag matigayon, indi paagi sa paghulat sa iban nga maghimo sila sing pila ka butang, kundi paagi sa paghimo sang aton bahin, sa amo ginapakita naton nga kita may diosnon nga debosyon.—Colosas 3:18-21.
Kon Diin Makatigayon Sing mga Sabat
11, 12. Ano ang gin-aman ni Jehova agod buligan kita nga magmadinalag-on ang pagkabuhi sang pamilya?
11 Madamo ang ginadangpan sang mga tawo agod mangayo sing laygay tuhoy sa ila mga problema sa pamilya. Apang nahibaluan naton nga ang Pulong sang Dios amo ang may labing maayo nga laygay, kag nagapasalamat kita nga paagi sa iya kitaon nga organisasyon, ginabuligan kita sang Dios nga maaplikar ini. Nagabenepisyo ka bala sing bug-os gikan sa sina nga bulig?—Salmo 119:129, 130; Miqueas 4:2.
12 Magluwas sa pagtambong sa mga miting sa kongregasyon, nagapain ka bala sing regular nga tion para sa pagtuon sa Biblia sang pamilya? Ang mga pamilya nga nagahimo sini nagapanghikot agod mahiusa sila sa ila pagsimba. Ang ila pagkabuhi subong pamilya nagauswag samtang ginaaplikar nila ang Pulong sang Dios sa ila mga kahimtangan.—Deuteronomio 11:18-21.
13. (a) Kon may mga pamangkot ka bahin sa pamilya, diin ka sa masami makakita sing kinahanglanon nga bulig? (b) Ano ang dapat makita sa tanan nga desisyon nga aton ginahimo?
13 Mahimo nga may mga pamangkot ka bahin sa pamilya. Halimbawa, kamusta ang pagpugong sa pagpamata? Makatarunganon gid bala ang aborsion? Kon ang bata daw indi interesado sa espirituwal nga mga butang, tubtob sa ano nga kasangkaron dapat sia obligahon nga makigbahin sa pagsimba sang pamilya? Madamo sang subong sini nga mga pamangkot ang nabinagbinag na sa mga literatura nga ginbalhag sang mga Saksi ni Jehova. Tun-i ang paggamit sa mga bulig sa pagtuon sa Biblia, pati na ang mga indese, agod makita ang mga sabat. Kon wala ka sang mga publikasyon nga ginasambit sa indese, magkadto ka sa librarya sang Kingdom Hall. Ukon mahimo nga makita mo ini nga mga publikasyon sa imo kompyuter. Mahambalan mo man ang imo mga pamangkot upod sa hamtong nga Cristianong mga lalaki kag mga babayi. Apang indi pirme magpaabot sing sabat nga nagasugid sa imo sing maathag kon ano ang imo dapat kag indi dapat nga himuon. Sa masami ikaw ang dapat mamat-od, subong indibiduwal ukon subong mag-asawa. Nian maghimo sing mga desisyon nga nagapakita nga ikaw may diosnon nga debosyon indi lamang sa publiko kundi sa puluy-an man.—Roma 14:19; Efeso 5:10.
Repaso nga Paghinun-anon
• Paano ang pagkamainunungon kay Jehova nadalahig sa katutom sa tiayon?
• Kon ginaipit bangod sang mga problema sa pamilya, ano ang magabulig sa aton nga himuon kon ano ang kalahamut-an sa Dios?
• Bisan kon ang iban sa pamilya may kakulangan, ano ang sarang naton himuon agod mapauswag ang kahimtangan?
[Mga Pamangkot sa Pagtinuon]
[Retrato sa pahina 155]
Ang pagkaulo sang bana dapat magpabanaag sang mga kinaiya ni Jesus
[Kapsion sa pahina 157]
Ang regular nga pagtuon sa Biblia upod sa pamilya nagabulig agod mahiusa ini