Kapitulo Katorse

Paano Ginatuytuyan ni Jehova ang Iya Organisasyon?

1. Ano nga impormasyon tuhoy sa organisasyon ni Jehova ang ginasugid sang Biblia, kag ngaa importante ini sa aton?

 MAY organisasyon bala ang Dios? Ang inspirado nga Kasulatan nagasugid sa aton nga may yara. Sa iya Pulong, ginahatagan niya kita sing laragway sang makahalawhaw nga langitnon nga bahin sini nga organisasyon. (Ezequiel 1:​1, 4-​14; Daniel 7:​9, 10, 13, 14) Bisan pa indi naton makita ining di-kitaon nga bahin, may daku ini nga epekto sa matuod nga mga sumilimba karon. (2 Hari 6:​15-​17) Ang organisasyon ni Jehova may kitaon man nga bahin, sa duta. Ang Biblia nagabulig sa aton nga mahangpan kon ano ini kag kon paano ini ginatuytuyan ni Jehova.

Pagkilala sa Kitaon nga Bahin

2. Anong bag-ong kongregasyon ang ginpaluntad sang Dios?

² Sa sulod sang 1,545 ka tuig ang pungsod sang Israel amo ang kongregasyon sang Dios. (Binuhatan 7:38) Apang napaslawan ang Israel sa pagsunod sa kasuguan sang Dios kag ginsikway sini ang iya mismo Anak. Subong resulta, ginsikway ni Jehova yadto nga kongregasyon kag ginbiyaan ini. Si Jesus nagsiling sa mga Judiyo: “Yari karon! Ang inyo balay ginpabay-an sa inyo.” (Mateo 23:38) Nian ginpaluntad sang Dios ang isa ka bag-ong kongregasyon, kag upod sa sini naghimo sia sing bag-ong katipan. Ini nga kongregasyon ginahuman sang 144,000 ka indibiduwal nga ginpili sang Dios nga mangin kaupod sang iya Anak sa langit.​​—Bugna 14:​1-4.

3. Ano ang natabo sang Pentecostes 33 C.E. subong maathag nga pamatuod nga ginagamit na karon sang Dios ang isa ka bag-ong kongregasyon?

³ Ang nahauna nga mga katapo sining bag-ong kongregasyon  ginhaplasan sing balaan nga espiritu ni Jehova sang Pentecostes 33 C.E. Tuhoy sa sining talalupangdon nga hitabo, aton mabasa: “Karon samtang ang adlaw sang kapiestahan sang Pentecostes nagapadayon nagtipon sila tanan sa isa ka duog, kag sa hinali nag-abot ang hagunos gikan sa langit subong sang mamadlos nga hangin nga naghuyop, kag nagpuno sang bug-os nga balay diin sila naglingkod. Kag nagpakita sa ila ang mga dila nga daw kalayo kag napanagtag, kag nagtungtong ang isa sa tagsatagsa sa ila, kag napuno sila tanan sang balaan nga espiritu.” (Binuhatan 2:​1-4) Sa amo ang espiritu sang Dios naghatag sing maathag nga pamatuod nga amo na ini karon ang grupo sang mga tawo nga gamiton sang Dios sa pagtuman sang iya katuyuan sa idalom sang panuytoy ni Jesucristo sa langit.

4. Sin-o karon ang nagahuman sa kitaon nga organisasyon ni Jehova?

⁴ Karon, isa na lamang ka nagkalabilin sang 144,000 ang yari sa duta. Apang bilang katumanan sang tagna sang Biblia, ang “dakung kadam-an” sang “iban nga mga karnero,” nga minilyon ang kadamuon, ginpaupod sa hinaplas nga nagkalabilin. Gintingob ni Jesus, ang Maayong Manugbantay, ining iban nga mga karnero sa nagkalabilin agod mangin isa ka panong na lamang sila sa idalom niya subong ang ila isa ka Manugbantay. (Bugna 7:9; Juan 10:​11, 16) Sila tanan nagahuman sing isa ka nahiusa nga kongregasyon, ang kitaon nga organisasyon ni Jehova.

Teokratiko sa Kahimusan

5. Sin-o ang nagatuytoy sa organisasyon sang Dios, kag paano?

⁵ Ang Makasulatanhon nga ekspresyon nga “kongregasyon sang buhi nga Dios” nagapakita kon sin-o ang nagatuytoy sini. Ang organisasyon teokratiko, ukon ginagamhan sang Dios. Si Jehova nagahatag sing panuytoy sa iya katawhan paagi kay Jesus, ang isa nga gintangdo Niya nga mangin di-kitaon nga Ulo sang kongregasyon, kag paagi sa Iya mismo  inspirado nga Pulong, ang Biblia.​​—1 Timoteo 3:​14, 15; Efeso 1:​22, 23; 2 Timoteo 3:​16, 17.

6. (a) Paano ang langitnon nga pagtuytoy sa kongregasyon nangin dayag sang unang siglo? (b) Ano ang nagapakita nga si Jesus amo gihapon ang Ulo sang kongregasyon?

⁶ Ini nga panuytoy maathag gid sang Pentecostes. (Binuhatan 2:​14-​18, 32, 33) Nangin dayag ini sang gintuytuyan sang anghel ni Jehova ang pagpalapnag sing maayong balita sa Aprika, sang ang tingog ni Jesus naghatag sing panuytoy sa pagkumbertir kay Saulo sang Tarsus, kag sang ginsugdan ni Pedro ang hilikuton nga pagbantala sa tunga sang mga Gentil. (Binuhatan 8:​26, 27; 9:​3-7; 10:​9-​16, 19-​22) Apang, sang ulihi, wala na sing mga tingog nga mabatian gikan sa langit, wala na sing mga anghel nga makita, wala na sing milagruso nga mga dulot sang espiritu ang ginhatag. Apang, si Jesus nagsaad: “Yari karon! ako kaupod ninyo sa tanan nga adlaw tubtob sa katapusan sang sistema sang mga butang.” (Mateo 28:20; 1 Corinto 13:8) Sa karon, ginakilala sang mga Saksi ni Jehova ang panuytoy ni Jesus. Kon wala ini, imposible nga mabantala ang mensahe sang Ginharian samtang nagaatubang sing daku nga pagpamatok.

7. (a) Sin-o ang nagahuman sa “matutom kag mainandamon nga ulipon,” kag ngaa? (b) Ano nga hilikuton ang ginhatag sa “ulipon”?

⁷ Wala madugay antes sia mapatay, ginsugid ni Jesus sa iya mga disipulo ang tuhoy sa “matutom kag mainandamon nga ulipon” nga subong Agalon, tulinan niya sing pinasahi nga responsabilidad. Yara ini nga “ulipon” sang nagtaliwan ang Ginuo pa langit kag magapangabudlay gihapon sing lakas tubtob sa tion sang di-makita nga pagbalik ni Cristo nga nagahari sa Ginharian. Ini nga paglaragway wala gid nagabagay sa isa ka indibiduwal, kundi sa hinaplas nga kongregasyon ni Cristo. Bangod ginbakal ini paagi sa iya dugo, ginpatuhuyan ini ni Jesus subong “ulipon” niya. Ginsugo  niya ang mga katapo sini nga maghimo sing mga disipulo kag pakaunon sila sing dalayon, nga nagahatag sa ila sang “ila [espirituwal nga] pagkaon sa nagakaigo nga tion.”​​—Mateo 24:45-​47; 28:19; Isaias 43:10; Lucas 12:42; 1 Pedro 4:10.

8. (a) Ano karon ang mga responsabilidad sang ulipon nga klase? (b) Ngaa importante ang aton reaksion sa instruksion paagi sa alagyan sang Dios?

⁸ Sanglit ang ulipon nga klase matutom nga nagahimo sang hilikuton sang Agalon sa iya di-makita nga pagbalik sang 1914, may pamatuod nga gintulinan ini sing daku pa nga mga responsabilidad sang 1919. Ang mga tinuig nga naglipas sugod sadto nangin tion para sa isa ka tugob-globo nga pagpanaksi sa Ginharian, kag ginatipon ang isa ka dakung kadam-an sang mga sumilimba ni Jehova para amligan sila sa dakung kapipit-an. (Mateo 24:​14, 21, 22; Bugna 7:​9, 10) Nagakinahanglan man sila sing espirituwal nga pagkaon, kag ginahatag ini sa ila sang ulipon nga klase. Busa, agod mahamuot si Jehova, dapat naton batunon ang instruksion nga ginahatag niya paagi sa sining alagyan kag magpanghikot nahisanto sini.

9, 10. (a) Sang unang siglo, ano ang kahimusan sa paglubad sa mga pamangkot tuhoy sa doktrina kag sa paghatag sing panuytoy sa pagbantala sing maayong balita? (b) Ano karon ang kahimusan agod mapahituhog ang mga hilikuton sang katawhan ni Jehova?

⁹ Kon kaisa, nagautwas ang mga pamangkot tuhoy sa doktrina kag pamaagi. Nian ano ang himuon? Ang Binuhatan kapitulo 15 nagasugid sa aton kon paano nalubad ang problema tuhoy sa nakumbertir nga mga Gentil. Gindangop ini sa mga apostoles kag sa mga tigulang nga lalaki sa Jerusalem, nga nagaalagad subong sentro nga nagadumala nga hubon. Ini nga mga tawo nagasayop man, apang gingamit sila sang Dios. Ginbinagbinag nila ang mga kasulatan bahin sa problema kag ang pamatuod man sang pagpanghikot sang espiritu sang Dios sa pagbukas sang Gentil  nga latagon. Nian naghimo sila sing desisyon. Ginpakamaayo sang Dios yadto nga kahimusan. (Binuhatan 15:​1-​29; 16:​4, 5) Gikan sa sining nagadumala nga hubon, ang mga indibiduwal ginpadala agod pauswagon pa ang pagbantala sa Ginharian.

¹⁰ Sa aton adlaw ang Nagadumala nga Hubon sang kitaon nga organisasyon ni Jehova ginahuman sang hinaplas-sang-espiritu nga mga kauturan gikan sa nagkalainlain nga kadutaan kag nahamtang sa bug-os kalibutan nga ulong-talatapan sang mga Saksi ni Jehova. Sa idalom sang pagpanguna ni Jesucristo, ginapauswag sang Nagadumala nga Hubon ang putli nga pagsimba sa tanan nga pungsod, ginapahituhog ang hilikuton nga pagbantala sang mga Saksi ni Jehova sa ila linibo ka kongregasyon. Ang Nagadumala nga Hubon may pagtamod nga kaanggid kay apostol Pablo, nga nagsulat sa mga masigka-Cristiano: “Indi nga mga agalon kami sang inyo pagtuo, kundi mga masigkamanugpangabudlay kami para sa inyo kalipay, kay paagi sa inyo pagtuo nagatindog kamo.”​​—2 Corinto 1:24.

11. (a) Paano ginatangdo ang mga gulang kag mga ministeryal nga alagad? (b) Ngaa dapat kita magkooperar sing maayo sa mga utod nga gintangdo?

¹¹ Ang mga Saksi ni Jehova sa bug-os nga kalibutan nagadepende sa Nagadumala nga Hubon sa pagpili sing kalipikado nga mga utod nga lalaki nga amo naman ang awtorisado sa pagtangdo sing mga gulang kag mga ministeryal nga alagad sa pag-atipan sa mga kongregasyon. Ang mga tulumanon para sa gintangdo nga mga utod ginasambit sa Biblia kag nagabinagbinag sang katunayan nga ini nga mga lalaki indi himpit kag nagasayop man. Ang mga gulang nga nagarekomendar kag ang mga nagatangdo may daku nga responsabilidad sa atubangan sang Dios. (1 Timoteo 3:​1-​10, 12, 13; Tito 1:​5-9) Gani, nagapangamuyo sila sang bulig sang espiritu sang Dios kag nagapangita sing panuytoy  gikan sa iya inspirado nga Pulong. (Binuhatan 6:​2-4, 6; 14:23) Ipakita naton ang aton apresasyon sa sining “dulot nga mga lalaki,” nga nagabulig sa aton tanan nga makadangat sa “paghiusa sa pagtuo.”​​—Efeso 4:​8, 11-​16.

12. Paano ginagamit ni Jehova ang mga babayi sa teokratikong kahimusan?

¹² Ginapakita sang Kasulatan nga mga lalaki dapat ang magdumala sa kongregasyon. Wala ini nagapakanubo sa mga babayi, kay ang iban sa ila mga manunubli sang langitnon nga Ginharian, kag daku ang ginahimo nila sa pagbantala nga hilikuton. (Salmo 68:11) Subong man, paagi sa  dalayon nga pag-atipan sa ila mga responsabilidad sa pamilya, nagaamot ang mga babayi sa maayo nga reputasyon sang kongregasyon. (Tito 2:​3-5) Apang ang pagtudlo sa sulod sang kongregasyon ginahimo sang mga lalaki nga gintangdo sa paghimo sini.​​—1 Timoteo 2:​12, 13.

13. (a) Ano nga pagtamod ang ginalaygay sang Biblia nga ipakita sang mga gulang tuhoy sa ila katungdanan? (b) Sa ano nga pribilehiyo kita tanan mahimo makigbahin?

¹³ Sa kalibutan, ang isa ka indibiduwal nga may mataas nga posisyon ginakabig nga importante, apang sa sulod sang organisasyon sang Dios ang pagsulundan amo: “Sia nga nagagawi subong kubos sa tunga ninyo amo ang isa nga daku.” (Lucas 9:​46-​48; 22:24-​26) Ang Kasulatan nagalaygay sa mga gulang sa paghalong nga indi sila magpakaginuo sa mga palanublion sang Dios kundi, sa baylo, mangin mga halimbawa sa panong. (1 Pedro 5:​2, 3) Indi lamang ang pila, kundi tanan nga Saksi ni Jehova, lalaki kag babayi, may pribilehiyo nga itiglawas ang Soberano sang uniberso, mapainubuson nga nagahambal sa iya ngalan kag nagasugid sa mga tawo bisan diin tuhoy sa iya Ginharian.

14. Ginagamit ang mga kasulatan nga ginapakita, binagbinaga ang mga pamangkot nga nalista sa katapusan sang parapo.

¹⁴ Nagakaigo nga pamangkuton naton ang aton kaugalingon: ‘Ginaapresyar ko gid bala kon paano ginatuytuyan ni Jehova ang iya kitaon nga organisasyon? Makita bala ini sa akon panimuot, panghambal, kag mga buhat?’ Ang pagpamalandong sa masunod nga mga punto makabulig sa tagsatagsa sa aton sa paghimo sini nga pag-usisa.

 Kon nagapasakop gid ako kay Cristo subong Ulo sang kongregasyon, nian, subong ginapakita sa masunod nga kasulatan, ano ang himuon ko? (Mateo 24:14; 28:​19, 20; Juan 13:​34, 35)

 Kon mapinasalamaton nga ginabaton ko ang espirituwal nga mga aman gikan sa ulipon nga klase kag sa Nagadumala  nga Hubon sini, kay sin-o ako nagapakita sing pagtahod? (Lucas 10:16)

 Paano dapat ang tanan sa kongregasyon, ilabi na ang mga gulang, makig-angot sa isa kag isa? (Roma 12:10)

15. (a) Paagi sa aton panimuot sa kitaon nga organisasyon ni Jehova, ano ang ginapakita naton? (b) Ano ang aton mga kahigayunan agod pamatud-an ang Yawa nga butigon kag agod pahalipayon ang tagipusuon ni Jehova?

¹⁵ Si Jehova nagatuytoy sa aton karon paagi sa iya kitaon nga organisasyon sa idalom ni Cristo. Ang aton panimuot sa sini nga kahimusan nagapakita kon ano ang aton ginabatyag sa hulusayon tuhoy sa pagkasoberano. (Hebreo 13:17) Si Satanas nagapangatarungan nga ang aton panguna nga ginakabalak-an amo ang aton kaugalingon. Apang kon nagaalagad kita sa bisan ano nga paagi nga ginakinahanglan kag nagalikaw sa mga butang nga nagapatuhoy sing di-nagakaigo nga igtalupangod sa kaugalingon, ginapamatud-an naton ang Yawa nga butigon. Kon ginahigugma kag ginatahod naton ang mga nagapanguna sa aton apang wala ‘nagadayaw sa mga personalidad para sa aton kaugalingon nga kapuslanan,’ ginapahalipay naton si Jehova. (Judas 16; Hebreo 13:7) Paagi sa pagkamainunungon sa organisasyon ni Jehova, ginapakita naton nga si Jehova amo ang aton Dios kag nahiusa kita sa pagsimba sa iya.​​—1 Corinto 15:58.

Repaso nga Paghinun-anon

• Ano ang kitaon nga organisasyon ni Jehova karon? Ano ang katuyuan sini?

• Sin-o ang gintangdo nga Ulo sang kongregasyon, kag paagi sa anong kitaon nga mga kahimusan nagahatag sia sing mahigugmaon nga panuytoy para sa aton?

• Anong maayo nga mga panimuot ang dapat naton palambuon para sa mga yara sa organisasyon ni Jehova?

[Mga Pamangkot sa Pagtinuon]

[Retrato sa pahina 133]

Ginatuytuyan kita ni Jehova paagi sa iya kitaon nga organisasyon sa idalom ni Cristo