Padayon nga Ipamulong ang Pulong Sang Dios Sing Masidla
Kapitulo Disinuebe
Padayon nga Ipamulong ang Pulong Sang Dios Sing Masidla
1. (a) Anong maayong balita ang ginbantala sang mga disipulo ni Jesus, apang ano ang reaksion sang pila ka Judiyo? (b) Ano nga mga pamangkot ang mahimo naton ipamangkot?
SANG naglipas nga halos 2,000 ka tuig, ang Anak sang Dios, nga si Jesucristo, gintangdo nga mangin palaabuton nga Hari sa bug-os nga duta. Ginpatay si Jesus sa sugyot sang relihioso nga mga kaaway, apang ginbanhaw sia ni Jehova gikan sa minatay. Paagi kay Jesus, ang kabuhi nga walay katapusan posible na karon. Apang, sang ginbantala sing dayag sang mga disipulo ni Jesus ang maayong balita, nag-utwas ang paghingabot. Ang iban sa ila ginbilanggo, ginbunal pa gani kag ginmanduan nga mag-untat sa pagpamulong tuhoy kay Jesus. (Binuhatan 4:1-3, 17; 5:17, 18, 40) Ano ang himuon nila? Ano kuntani ang ginhimo mo? Padayon ka bala nga magpanaksi sing masidla?
2. (a) Anong makalilipay nga mga balita ang dapat ibantala sa aton adlaw? (b) Sin-o ang may salabton nga ibantala ang maayong balita?
2 Sang 1914 ang Hari sang Ginharian sang Dios, nga si Jesucristo, ginpalingkod sa trono sa langit agod maggahom sa ‘tunga sang iya mga kaaway.’ (Salmo 110:2) Pagkatapos sini, si Satanas kag ang iya mga demonyo gintagbong sa duta. (Bugna 12:1-5, 7-12) Ang katapusan nga mga adlaw sang karon malauton nga sistema nagsugod na. Kon matapos na ini nga panag-on, dugmukon sang Dios ang bug-os nga sistema sang mga butang ni Satanas. (Daniel 2:44; Mateo 24:21) Ang mga makalampuwas may paglaum nga mabuhi sing walay katapusan sa duta nga mangin isa ka paraiso. Kon ginbaton mo na ining maayong balita, luyag mo ipaambit ini sa iban. (Mateo 24:14) Apang ano nga reaksion ang mapaabot mo?
3. (a) Ano ang reaksion sang mga tawo sa mensahe sang Ginharian? (b) Ano nga pamangkot ang dapat naton atubangon?
3 Kon ginabantala mo ang maayong balita sang Ginharian, ang iban nga mga tawo mahimo magapamati sa sini, apang ang kalabanan indi magasapak. (Mateo 24:37-39) Ang iban mahimo magayaguta ukon magapamatok sa imo. Nagpaandam si Jesus nga ang pagpamatok mahimo maghalin mismo sa imo mga himata. (Lucas 21:16-19) Mahimo man ini maghalin sa imo ulubrahan ukon sa eskwelahan. Sa iban nga mga bahin sang duta, ang mga Saksi ni Jehova ginadumilian pa gani sang gobierno. Kon nagaatubang sini nga mga kahimtangan, padayon mo bala nga ipamulong ang pulong sang Dios sing masidla kag ‘magtindog nga malig-on sa pagtuo’?—1 Corinto 16:13.
Wala Nagasandig sa Aton Kaugalingon nga Kusog
4. (a) Agod mangin matutom nga mga alagad kita sang Dios, ano ang kinahanglanon gid? (b) Ngaa ang Cristianong mga miting tuman ka importante?
4 Kinahanglanon gid sa isa ka matutom nga alagad ni Jehova nga magsandig sa iya mga kahimusan. Ang isa sini amo ang mga miting sa kongregasyon. Ang mga Kasulatan nagalaygay sa aton nga indi ini pagpatumbayaan. (Hebreo 10:23-25) Ginapanikasugan sang matutom nga mga Saksi ni Jehova nga makatambong sing tayuyon sa mga miting upod sa mga masigkatumuluo. Sa sining mga miting ang aton ihibalo sa Kasulatan nagadugang. Subong man, ang aton paghangop sa nahibaluan na nga mga kamatuoran nagatubo, kag ang ihibalo naton sa mga paagi kon paano ini gamiton nagauswag. Labi pa kita nga nagasuod sa aton Cristianong mga kauturan sa nahiusa nga pagsimba kag ginapabakod sa paghimo sang kabubut-on sang Dios. Ang espiritu ni Jehova nagahatag sing panuytoy paagi sa kongregasyon, kag paagi sa sining espiritu, si Jesus yara sa tunga naton.—Mateo 18:20; Bugna 3:6.
5. Kon ang mga Saksi ni Jehova ginadumilian, ano ang ginahimo sa mga miting?
5 Tayuyon ka bala nga nagatambong sa tanan nga miting, kag personal mo bala nga ginaaplikar ang nabatian mo nga ginbinagbinag? Kon kaisa, kon ang mga Saksi ni Jehova ginadumilian, ang mga miting kinahanglan nga hiwaton sa magagmay nga mga grupo sa pribado nga mga puluy-an. Ang mga lugar kag mga oras mahimo nga magbag-obag-o kag mahimo nga indi pirme kombeniente, kay ang iban nga mga miting ginahiwat sing gab-i na ka tama. Apang walay sapayan sang kabudlayan kag katalagman, ang matutom nga mga kauturan nagapanikasog sing hanuot nga makatambong sa tanan nga miting.
6. Paano naton ginapakita ang aton pagsandig kay Jehova, kag paano ini makabulig sa aton nga padayon nga magpamulong sing masidla?
6 Ang pagsandig kay Jehova mapalambo paagi sa tayuyon nga pagdangop sa iya sa tinagipusuon nga pangamuyo, nakahibalo nga kinahanglan naton ang bulig sang Dios. Ginahimo mo bala ini? Si Jesus sulit-sulit nga nangamuyo sa tion sang iya ministeryo sa duta. (Lucas 3:21; 6:12, 13; 22:39-44) Kag sang gab-i antes sia ginlansang, ginlaygayan niya ang iya mga disipulo: “Padayon kamo sa pagbantay kag sa pagpangamuyo, agod indi kamo makasulod sa panulay.” (Marcos 14:38) Kon ang aton mensahe sang Ginharian wala ginasapak, mahimo kita masulay nga maghinay sa aton ministeryo. Kon ginayaguta kita ukon ginahingabot sang mga tawo, mahimo kita masulay nga mag-untat sa pagbantala agod malikawan ang mga problema. Apang kon hanuot kita nga mangamuyo para sa espiritu sang Dios agod buligan kita nga padayon nga magpamulong sing masidla, maamligan kita agod indi madaug sang mga pagsulay.—Lucas 11:13; Efeso 6:18-20.
Isa ka Rekord Sang Masidla nga Pagpanaksi
7. (a) Ngaa interesado gid kita sa rekord sang Mga Binuhatan? (b) Sabta ang mga pamangkot sa katapusan sining parapo, nga ginapadaku kon paano kita makabenepisyo sa impormasyon.
7 Interesado gid kita tanan sa rekord sa tulun-an sang Mga Binuhatan. Nagasugid ini kon paano nalandas sang mga apostoles kag sang iban pa nga mga disipulo sang una—mga tawo nga may mga balatyagon katulad naton—ang mga balagbag kag nangin masidla kag matutom nga mga saksi ni Jehova. Usisaon naton ang isa ka bahin sini nga rekord sa bulig sang masunod nga mga pamangkot kag sang nasambit nga mga kasulatan. Samtang ginahimo naton ini, binagbinaga kon paano ka personal nga makabenepisyo gikan sa imo pagbasa.
Ang mga apostoles bala mga tawo nga may mataas sing tinun-an? Mga indibiduwal bala sila nga kinaugali na nga wala nahadlok, bisan ano man ang matabo? (Juan 18:17, 25-27; 20:19; Binuhatan 4:13)
Ano ang nagbulig kay Pedro nga magpamulong sing masidla sa atubangan sang Judiyong hukmanan nga nagpakamalaut sa Anak sang Dios mismo? (Mateo 10:19, 20; Binuhatan 4:8)
Ano ang ginhimo sang mga apostoles mga semana antes sila ginpaatubang sa Sanhedrin? (Binuhatan 1:14; 2:1, 42)
Sang ginmanduan sang mga manuggahom ang mga apostoles nga mag-untat sa pagbantala pasad sa ngalan ni Jesus, ano ang ginsabat nanday Pedro kag Juan? (Binuhatan 4:19, 20)
Sang ginbuy-an sila, kay sin-o liwat nangayo sing bulig ang mga apostoles? Nangamuyo bala sila nga untaton na ang paghingabot, ukon ano ang ginpangamuyo nila? (Binuhatan 4:24-31)
Sa ano nga paagi naghatag si Jehova sing bulig sang nagtinguha ang mga manugpamatok nga pauntaton ang hilikuton nga pagbantala? (Binuhatan 5:17-20)
Paano ginpakita sang mga apostoles nga nahangpan nila ang rason kon ngaa ginbilanggo sila? (Binuhatan 5:21, 41, 42)
Bisan pa sang nag-alaplaag ang madamo nga disipulo bangod sang paghingabot, ano ang padayon nila nga ginhimo? (Binuhatan 8:3, 4; 11:19-21)
8. Ano ang makakulunyag nga mga resulta sang pagministeryo sang unang mga disipulo, kag paano kita nakigbahin sa sini man nga ministeryo?
8 Ang hilikuton nga pagbantala sing maayong balita indi walay pulos. Mga 3,000 ka disipulo ang ginbawtismuhan sang Pentecostes 33 C.E. “Ang mga tumuluo sa Ginuo padayon nga nagdugang, mga kadam-an sang mga lalaki kag mga babayi.” (Binuhatan 2:41; 4:4; 5:14) Sang ulihi, bisan gani ang mapintas nga manughingabot sa katawhan sang Dios, nga si Saulo sang Tarsus, nangin Cristiano kag masidla nga nagpanaksi sa kamatuoran. Nakilal-an sia nga si apostol Pablo. (Galacia 1:22-24) Ang hilikuton nga ginsugdan sang unang siglo wala mag-untat. Labi ini nga nag-uswag sa sining katapusan nga mga adlaw kag naglab-ot sa tanan nga bahin sang duta. May pribilehiyo kita nga makigbahin sa sini, kag samtang ginahimo naton ini, makatuon kita gikan sa halimbawa sang matutom nga mga saksi nga nag-alagad sing una sa aton.
9. (a) Ano nga mga kahigayunan ang gingamit ni Pablo sa pagpanaksi? (b) Sa anong mga paagi ginapalapnag mo ang mensahe sang Ginharian sa iban?
9 Sang mahibaluan ni Pablo ang kamatuoran tuhoy kay Jesucristo, ano ang ginhimo niya? “Sa gilayon ginbantala niya . . . si Jesus, nga ining Isa amo ang Anak sang Dios.” (Binuhatan 9:20) Nagpasalamat sia sa di-bagay nga kaluoy sang Dios sa iya, kag nahangpan niya nga kinahanglan sang tanan ang maayong balita nga nabaton niya. Si Pablo isa ka Judiyo, kag suno sa kinabatasan sadto, nagkadto sia sa mga sinagoga agod magpanaksi. Nagbantala man sia sa mga pamalay kag nangatarungan sa mga tawo sa merkado. Kag handa sia nga magsaylo sa bag-ong mga teritoryo agod ibantala ang maayong balita.—Binuhatan 17:17; 20:20; Roma 15:23, 24.
10. (a) Paano ginpakita ni Pablo nga bisan pa masidla, mahinantupon man sia sa iya pagpanaksi? (b) Paano naton mapakita ang mga kinaiya ni Pablo kon nagapanaksi sa mga himata, mga kaupod sa trabaho, ukon mga kabutho?
10 Si Pablo masidla apang mahinantupon man, subong nga dapat kita man. Ginpalig-on niya ang mga Judiyo pasad sa mga saad sang Dios sa ila mga katigulangan. Nagpamulong sia sa mga Griego pasad sa mga butang nga pamilyar sila. Kon kaisa gingamit niya ang iya naeksperiensiahan kon paano niya natun-an ang kamatuoran subong paagi sa pagpanaksi. Nagsiling sia: “Ginahimo ko ang tanan nga butang tungod sa maayong balita, agod mangin manugpaambit ako sini sa iban.”—1 Corinto 9:20-23; Binuhatan 22:3-21.
11. (a) Ano ang ginhimo ni Pablo agod malikawan ang liwat kag liwat nga pagkomprontar sa mga manugpamatok? (b) San-o maalamon nga mailog naton ang halimbawa ni Pablo, kag paano? (c) Diin nagahalin ang gahom agod padayon nga magpamulong sing masidla?
11 Kon sa banta ni Pablo mas maayo nga magbantala anay sa iban nga lugar bangod sang pagpamatok, ginhimo niya ini sa baylo nga komprontahon liwat kag liwat ang mga manugpamatok. (Binuhatan 14:5-7; 18:5-7; Roma 12:18) Apang wala gid niya ginkahuya ang maayong balita. (Roma 1:16) Bisan pa wala maluyagi ni Pablo ang matinaastaason kag ang masingki pa gani nga pagtrato sang mga manughingabot, “nagtipon [sia] sing kaisog paagi sa aton Dios” agod makapadayon sa pagbantala. Nagsiling sia: “Ang Ginuo nagtindog malapit sa akon kag naghatag sing gahom sa akon, agod paagi sa akon matuman sing bug-os ang pagbantala.” (1 Tesalonica 2:2; 2 Timoteo 4:17) Ang Ulo sang Cristianong kongregasyon, nga si Jesus, padayon nga nagahatag sing gahom nga kinahanglan naton agod mahimo ang hilikuton nga gintagna para sa adlaw naton.—Marcos 13:10.
12. Ano ang nagahatag sing pamatuod sang Cristianong kasidla, kag ano ang basihan sa sini?
12 May rason gid kita nga padayon nga ipamulong ang pulong sang Dios sing masidla, subong sang ginhimo ni Jesus kag sang iban nga matutom nga mga alagad sang Dios sang unang siglo. Wala ini nagakahulugan nga mangin di-mapatugsilingon kita ukon ipilit ang mensahe sa mga tawo nga indi luyag sini. Apang wala kita nagauntat bangod wala nagasapak ang mga tawo; ukon nagahipos kita bangod sang pagpamatok. Kaangay ni Jesus, ginatudlo naton ang Ginharian sang Dios subong ang panguluhan nga may kinamatarong sa bug-os nga duta. Nagapamulong kita sing masinaligon bangod ginatiglawas naton si Jehova, ang Soberano sa Bug-os nga Uniberso, kag bangod ang mensahe nga ginabantala naton indi aton kundi iya. Kag ang gugma naton kay Jehova amo ang aton pinakamabakod nga motibo agod dayawon sia.—Filipos 1:27, 28; 1 Tesalonica 2:13.
Repaso nga Paghinun-anon
• Ngaa importante nga ipaambit ang mensahe sang Ginharian sa tanan kon mahimo, apang ano nga mga reaksion ang mapaabot naton?
• Paano naton mapakita nga wala kita nagasalig sa aton kaugalingon nga kusog sa pag-alagad kay Jehova?
• Anong hamili nga mga leksion ang matun-an naton gikan sa tulun-an sang Mga Binuhatan?
[Mga Pamangkot sa Pagtinuon]
[Retrato sa pahina 173]
Subong sang una, ang mga alagad ni Jehova karon nagapamulong sang pulong sang Dios sing masidla