Kapitulo Tres

Padayon nga Manguyapot Sing Hugot sa Pulong Sang Dios

1. (a) Paano naeksperiensiahan sang dumaan nga Israel ang pagkamatuod sang pulong sang Dios? (b) Ngaa interesado kita sa sini?

 “NAKAHIBALO gid kamo sa bug-os ninyo nga tagipusuon kag sa bug-os ninyo nga kalag nga wala sing isa ka tinaga sa tanan nga maayong tinaga nga ginpamulong ni Jehova nga inyo Dios sa inyo ang napaslawan. Ang tanan natuman sa inyo.” (Josue 23:14-16) Amo ini ang ginsiling ni Josue sa mga gulang nga lalaki sang Israel sa tapos nga makasulod sila sa Ginsaad nga Duta. Huo, ang mga saad ni Jehova napamatud-an nga masaligan. Ina nga rekord​—kag ang iban pa nga bahin sang Biblia—​gintipigan para sa aton agod “makatigayon kita sing paglaum.”​—Roma 15:4.

2. (a) Sa anong kahulugan nga ang Biblia “ginbugna sang Dios”? (b) Sa pagkahibalo nga ang Biblia ginbugna sang Dios, ano ang aton salabton?

² Bisan pa mga 40 ka tawo ang gingamit sa pagsulat sa Biblia, si Jehova gid ang Awtor sini. Nagakahulugan bala ini nga gintuytuyan gid niya ang tanan nga ginsulat sa sini? Huo. Ginhimo niya ini paagi sa iya gamhanan nga balaan nga espiritu, ang iya aktibo nga kusog. Si apostol Pablo maminatud-on nga nagsiling: “Ang bug-os nga Kasulatan ginbugna sang Dios . . . agod nga ang tawo sang Dios may lubos nga ikasarang, nga nasangkapan sing bug-os para sa tagsa ka maayong buhat.” Ang mga tawo bisan diin nga kumbinsido sa sini nagapamati sa Biblia kag nagapahisuno sang ila kabuhi sa sini.​—2 Timoteo 3:​16, 17; 1 Tesalonica 2:13.

 Buligi ang Iban nga Mahangpan Ini

3. Ano ang labing maayo nga paagi agod mabuligan ang madamo nga indi kumbinsido nga ang Biblia Pulong sang Dios?

³ Madamo sang masugilanon naton ang wala nagaugyon sa aton pagpati nga ang Biblia Pulong sang Dios. Paano naton sila mabuligan? Sa masami, ang labing maayo nga paagi amo ang pagbukas sang Biblia kag pagpakita sa ila kon ano ang ginaunod sini. “Ang pulong sang Dios buhi kag gamhanan kag matalom pa sa bisan ano nga espada nga duha sing sulab . . . kag may ikasarang sa paghantop sang mga hunahuna kag mga tinutuyo sang tagipusuon.” (Hebreo 4:12) “Ang pulong sang Dios” indi isa ka patay nga maragtas; buhi ini! Ang mga saad sang Biblia di-mapunggan nga nagakatuman. Ang impluwensia sang mensahe sang Biblia sa matuod nga motibo sang tagipusuon sang isa ka tawo mas gamhanan sangsa bisan ano nga butang nga mahimo ihambal naton.

4. Ano nga mga paathag sa mga kamatuoran sang Biblia ang nagpabag-o sa panimuot sang iban nga mga tawo tuhoy sa Biblia, kag ngaa?

⁴ Madamo nga tawo ang nag-usisa sing dugang pa sa Biblia sang nakita nila diri ang ngalan sang Dios. Ang iban namat-od sa pagtuon sa Biblia sang ginpakita sa ila kon ano ang ginasiling sini tuhoy sa katuyuan sang kabuhi, kon ngaa ginapahanugutan sang Dios ang kalautan, kon ano ang kahulugan sang mga nagakatabo karon, ukon ang paglaum nga kabuhi nga dayon sa paraiso nga duta. Sa mga pungsod diin ang mga tawo nadayag sa pagtublag sang malaut nga mga espiritu bangod sang relihioso nga mga buhat, ang paathag sang Biblia kon ano ang kabangdanan sini kag kon paano mahilway sa sini nagpukaw sang interes. Ngaa ining mga punto nagapukaw sa interes sang sinsero nga mga tawo? Bangod ang Biblia amo lamang ang tuburan sang masaligan nga impormasyon tuhoy sa tanan sining importante nga mga butang.​—Salmo 119:130.

5. (a) Kon ang mga tawo magsiling nga wala sila nagapati sa Biblia, ano ang mahimo nga mga kabangdanan? (b) Paano naton mabuligan ini nga mga tawo?

⁵ Apang, ano kon magsiling sa aton ang mga tawo nga wala sila nagapati sa Biblia? Dapat bala matapos na sa sini ang paghambalanay?  Indi kon handa sila sa pagpangatarungan. Mahimo nga ginatamod nila ang Biblia subong libro sang Cristiandad. Ang iya rekord sang pagkasalimpapaw kag pagpasilabot sa politika, subong man ang iya dalayon nga pagpangayo sing kuwarta, mahimo nga amo ang kabangdanan sang ila negatibo nga reaksion sa Biblia. Ngaa indi sila pamangkuton kon bala amo sini ang kabangdanan sang ila negatibo nga reaksion? Ang pagpakamalaut sang Biblia sa kalibutanon nga mga dalanon sang Cristiandad, subong man ang mga kinatuhayan sang mga pagtuluuhan sang Cristiandad kag sang matuod nga Cristianismo, mahimo magpukaw sang ila interes.​—Miqueas 3:​11, 12; Mateo 15:7-9; Santiago 4:4.

6. (a) Ano ang nagkumbinsi mismo sa imo nga ang Biblia Pulong sang Dios? (b) Ano pa nga mga pangatarungan ang mahimo magamit agod buligan ang mga tawo sa paghangop nga ang Biblia naggikan gid sa Dios?

⁶ Para sa iban, ang prangka nga pagbinagbinag sa mga pamatuod nga ang Biblia ginbugna sang Dios mahimo makabulig. Ano ang maathag nga nagapamatuod sa imo nga ang Biblia gikan kay Jehova nga Dios? Ini bala amo ang ginasiling mismo sang Biblia nga ginhalinan sini? Ukon ini bala amo ang katunayan nga ang Biblia may yara madamong tagna nga nagapakita sang detalyado nga ihibalo tuhoy sa palaabuton, mga tagna nga dapat naggikan sa isa ka labaw-sa-tawo nga ginhalinan? (2 Pedro 1:​20, 21) Ukon ini bala bangod ang Biblia nagapakita sing dalayawon nga pagsinantuanay, bisan pa ginsulat ini sang 40 ka lalaki sa sulod sang mga 1,600 ka tuig? Ukon amo bala ang sientipiko nga pagkasibu sini kon ipaanggid sa iban pa nga mga sinulatan sadto nga panahon? Ukon amo bala ang katampad sang mga manunulat sini? Ukon amo bala ang pagtipig sa sini walay sapayan sang mapintas nga mga panikasog nga laglagon ini? Ano man ang imo mismo nasapwan nga nagkumbinsi sa imo mahimo man nga magamit sa pagbulig sa iban nga mga tawo. a

 Ang Aton Pagbasa Sing Biblia

7, 8. (a) Ano ang dapat nga ginahimo naton sa Biblia? (b) Ano pa ang kinahanglan naton luwas sa personal nga pagbasa sing Biblia? (c) Paano ikaw personal nga nakatigayon sing paghangop sa mga katuyuan ni Jehova?

⁷ Dugang sa pagbulig sa iban nga magpati sa Biblia, kita mismo dapat maghinguyang sing tion nga basahon ini sing tayuyon. Ginahimo mo bala ini? Sa tanan nga libro nga nasulat na, amo ini ang labing importante. Sa pagkamatuod, wala ini nagakahulugan nga kon basahon naton ini sing kinaugalingon, wala na kita sing iban pa nga kinahanglan. Ang Kasulatan nagapaandam batok sa pagpain sang aton kaugalingon. Indi kita dapat maghunahuna nga makita naton ang sabat sa tanan nga butang paagi sa pagpanalawsaw sing kinaugalingon. Ang personal nga pagtuon kag tayuyon nga pagtambong sa mga miting sang katawhan sang Dios kinahanglanon agod mangin timbang kita nga mga Cristiano.​—Hulubaton 18:1; Hebreo 10:​24, 25.

⁸ May kaangtanan sini, ang Biblia nagasugid tuhoy sa isa ka Etiopianhon nga opisyal nga nagabasa gikan sa tagna ni Isaias. Gintuytuyan sang isa ka anghel ang Cristianong ebanghelisador nga si Felipe nga pamangkuton ang lalaki: “Nahibaluan mo gid bala ang imo ginabasa?” Sing mapainubuson, ang Etiopianhon nagsabat: “Ang matuod, paano ko bala ini mahimo, luwas kon may isa nga magtuytoy sa akon?” Ginpangabay niya si Felipe nga ipaathag ang teksto sang Kasulatan. Ti, si Felipe indi lamang isa ka independiente nga bumalasa sang Biblia nga nagahatag sang iya opinyon sa Kasulatan. Suod nga nakig-angot sia sa kitaon nga organisasyon sang Dios. Gani mabuligan niya ang Etiopianhon nga makabenepisyo gikan sa instruksion nga ginahatag ni Jehova paagi sa sining organisasyon. (Binuhatan 6:​5, 6; 8:​5, 26-35) Subong man sa karon, wala sing isa nga makatigayon sing husto nga paghangop sa mga katuyuan ni Jehova sa iya lamang kaugalingon. Kita tanan nagakinahanglan sang bulig nga mahigugmaon  nga ginaaman ni Jehova paagi sa iya kitaon nga organisasyon.

9. Ano nga programa sa pagbasa sing Biblia ang makabulig sa aton tanan?

⁹ Agod buligan kita nga mahangpan ang Biblia, ang organisasyon ni Jehova nagaaman sing ekselente nga Makasulatanhon nga materyal sa nanuhaytuhay nga mga publikasyon. Dugang pa, ang regular nga iskedyul sang pagbasa sa Biblia ginahanda para sa aton may kaangtanan sa Teokratikong Eskwelahan Para sa Ministeryo nga ginahiwat sa tanan nga kongregasyon sang mga Saksi ni Jehova sa bug-os nga kalibutan. Matigayon ang daku nga benepisyo gikan sa personal nga pag-usisa sang Balaan nga Kasulatan. (Salmo 1:1-3; 19:​7, 8) Panikasugi gid nga basahon sing tayuyon ang Biblia. Bisan pa indi mo mahangpan sing bug-os ang tanan nga butang, ang pagtigayon mo sing kabilugan nga paghangop sa Kasulatan mapuslanon gid. Halimbawa, kon basahon mo ang apat ukon lima lamang ka pahina kada adlaw, matapos mo ang Biblia sa mga isa ka tuig.

10. (a) San-o mo ginahimo ang imo pagbasa sing Biblia? (b) Sin-o pa ang dapat ilakip kon nagabasa sing Biblia, kag ngaa importante nga himuon ini sing tayuyon?

¹⁰ San-o mo himuon ang imo pagbasa sing Biblia? Kon magtalana ka sing bisan 10 ukon 15 minutos kada adlaw para sa sini, magabenepisyo gid ikaw. Kon indi, mag-iskedyul sing regular nga tion para sa sini kada semana, kag nian sunda ini nga iskedyul. Kon minyo ka, ikaw kag ang imo tiayon malipay sa pagbasa sing mabaskog sang Biblia sa isa kag isa. Kon may mga kabataan nga makabasa na, mahimo sila magbuslanay sa pagbasa sing mabaskog. Ang pagbasa sing Biblia dapat mangin isa ka tubtob-buhi nga batasan, kaangay sang pagkaon. Subong sang nahibaluan mo, kon ang batasan sa pagkaon sang isa ka tawo indi maayo, ang iya panglawas magaantos. Gani, amo man ang aton espirituwal nga kabuhi, kag busa ang aton dayon nga kabuhi, nasandig sa aton tayuyon  nga pagkaon “sa tagsa ka pulong nga nagaguwa sa baba ni Jehova.”​—Mateo 4:4.

Ang Aton Tulumuron

11. Ano ang dapat nga mangin tulumuron naton sa pagbasa sing Biblia?

¹¹ Ano ang dapat nga tulumuron naton sa pagbasa sing Biblia? Ang aton tulumuron indi lamang dapat ang pagbasa sing pila ka pahina. Ang aton motibo dapat nga makilala sing maayo pa ang Dios agod madugangan naton ang aton gugma sa iya kag simbahon sia sing kalahamut-an. (Juan 5:39-42) Ang aton panimuot dapat kaangay sang panimuot sang manunulat sang Biblia nga nagsulat: “Ipahibalo sa akon ang imo mga dalanon, O Jehova; tudlui ako sang imo mga banas.”​—Salmo 25:4.

12. (a) Ngaa ang pagtigayon sing “sibu nga ihibalo” kinahanglanon, kag ano nga panikasog kon nagabasa ang mahimo nga kinahanglan agod matigayon ini nga ihibalo? (b) Paagi sa paggamit sing anong apat ka pagtamod nga mausisa naton sing mapuslanon ang nabasa naton sa Biblia? (Tan-awa ang kahon sa pahina 30.) (c) Iilustrar ining mga punto paagi sa pagsabat sa mga pamangkot sa sini nga parapo. Pangitaa ang mga kasulatan nga ginsambit apang wala ginbalikwat.

¹² Samtang nagabaton kita sing mga panudlo gikan kay Jehova, dapat naton handumon nga makatigayon sing “sibu nga ihibalo.” Kon wala ini, paano naton maaplikar sing nagakaigo ang Pulong sang Dios sa aton mismo kabuhi ukon mapaathag ini sing husto sa iban? (Colosas 3:10; 2 Timoteo 2:15) Ang pagtigayon sing sibu nga ihibalo nagakinahanglan nga magbasa kita sing maayo, kag kon ang isa ka bahin mabudlay mahangpan, mahimo kinahanglan nga basahon naton ini sing indi lamang makaisa agod mahangpan ini. Makabenepisyo man kita kon maghinguyang kita sing tion agod pamalandungan ang materyal, ginahunahuna ini gikan sa nanuhaytuhay nga mga pagtamod. Ang apat ka mapuslanon nga direksion sang panghunahuna nga dapat usisaon ginapadaku sa pahina 30. Madamo nga bahin sang Kasulatan ang mausisa sing mapuslanon paagi sa paggamit sing isa ukon kapin pa sining mga pagtamod. Samtang ginasabat mo ang mga pamangkot  sa masunod nga mga pahina, makita mo kon paano ini mapuslanon.

 (1) Sa masami, ang bahin sang Kasulatan nga imo ginabasa may masugid sa imo kon ano nga sahi sang persona si Jehova. Halimbawa, sa Salmo 139:​13, 14, mahibaluan naton ang daku nga kabalaka sang Dios sa wala pa matawo: “Gin-amligan mo ako sa tiyan sang akon iloy. Magadayaw ako sa imo bangod sa makahalangawa nga paagi ginhimo ako sing makatilingala. Ang imo mga binuhatan makatilingala, subong nahibaluan sing maayo sang akon kalag.” Daw ano gid ka dalayawon ang mga buhat sang pagpanuga ni Jehova! Ang paagi kon paano niya gintuga ang mga tawo nagapamatuod sang iya daku nga gugma sa aton.

 Bangod sang ginasiling sa Juan 14:​9, 10, kon mabasa naton kon paano nakig-angot si Jesus sa iban, ginatan-aw gid naton kon paano mismo si Jehova magapanghikot. Ginahunahuna ini, ano ang mahinakop naton tuhoy kay Jehova gikan sa mga hitabo nga ginrekord sa Lucas 5:​12, 13 kag Lucas 7:11-15?

 (2) Binagbinaga kon paano ang rekord may yara kaangtanan sa tema sang Biblia: ang pagbindikar sa pagkasoberano ni Jehova kag ang pagpakabalaan sa iya ngalan paagi sa Ginharian sa idalom ni Jesucristo, ang ginsaad nga Binhi.

 Paano ginpadaku nanday Ezequiel kag Daniel ang tema sang Biblia? (Ezequiel 38:21-23; Daniel 2:44; 4:17; 7:9-14)

 Paano ginapakilala sing maathag sang Biblia si Jesus subong amo ang ginsaad nga Binhi? (Galacia 3:16)

 Paano ginalaragway sang Bugna ang daku nga talipuspusan sang tema sang Ginharian? (Bugna 11:15; 12:7-10; 17:16-18; 19:11-16; 20:1-3; 21:1-5)

 (3) Pamangkuta ang imo kaugalingon kon paano mo personal nga maaplikar ang imo nabasa. Halimbawa, mabasa naton sa Exodo tubtob sa Deuteronomio ang tuhoy sa imoralidad kag  pagrebelde sang Israel. Natun-an naton nga ining mga panimuot kag mga buhat may malain nga mga resulta. Busa, dapat kita mapahulag nga pahamut-an si Jehova paagi sa indi pag-ilog sa malain nga halimbawa sang Israel. “Ining mga butang nahanabo sa ila subong mga halimbawa, kag ginsulat sila subong paandam sa aton nga naabutan sang katapusan sang sistema sang mga butang.”​—1 Corinto 10:11.

 Ang rekord tuhoy sa pagpatay ni Cain kay Abel may ano nga leksion para sa aton? (Genesis 4:3-12; Hebreo 11:4; 1 Juan 3:10-15; 4:​20, 21)

 Ang laygay bala sang Biblia sa mga Cristiano nga may langitnon nga paglaum naaplikar man sa mga tawo nga may paglaum nga magkabuhi sing dayon sa duta? (Numeros 15:16; Juan 10:16)

 Bisan pa maayo ang aton tindog sa Cristianong kongregasyon, ngaa kinahanglan nga binagbinagon naton kon paano iaplikar sing labi pa ang laygay sang Biblia nga nahibaluan na naton? (2 Corinto 13:5; 1 Tesalonica 4:1)

  (4) Binagbinaga kon paano mo magamit ang imo nabasa sa pagbulig sa iban. Ang tanan nga tawo nabalaka sa mga problema sa panglawas, gani mahimo naton basahon sa ila ang ginhimo ni Jesus agod ipakita kon ano ang himuon niya sa daku pa nga kasangkaron kon maghari na sia sa Ginharian: “Nagpalapit sa iya ang dakung kadam-an, nga kaupod nila ang mga tawo nga piang, baldado, bulag, apa, kag madamong iban pa, . . . kag gin-ayo niya sila.”​—Mateo 15:30.

 Sin-o ang mahimo mabuligan sang rekord tuhoy sa pagbanhaw sa anak nga babayi ni Jairo? (Lucas 8:​41, 42, 49-56)

13. Ano nga mga resulta ang mapaabot naton gikan sa dalayon nga programa sang pagbasa sing Biblia kag pagtuon upod sa organisasyon ni Jehova?

¹³ Daw ano gid ka makapaladya ang pagbasa sing Biblia kon binagbinagon naton ang apat ka punto nga ginsambit sa ibabaw! Sa pagkamatuod, ang pagbasa sing Biblia isa ka hangkat. Apang makabulig ini sa aton tubtob nagakabuhi kita, kay samtang ginabasa naton ang Kasulatan, magabaskog kita sa espirituwal. Ang tayuyon nga pagbasa sing Biblia magapasuod sa aton sing labi pa sa aton mahigugmaon nga Amay, si Jehova, kag sa aton Cristianong mga kauturan. Magabulig ini sa aton sa pagsunod sa laygay nga padayon nga ‘manguyapot sing hugot sa pulong sang kabuhi.’​—Filipos 2:16.

[Mga nota]

Repaso nga Paghinun-anon

• Ngaa ginsulat kag gintipigan ang Biblia tubtob sa aton adlaw?

• Paano naton mabuligan ang iban sa paghangop sa Biblia?

• Ngaa ang tayuyon nga personal nga pagbasa sing Biblia mapuslanon? Paagi sa paggamit sang anong apat ka pagtamod nga mausisa naton sing mapuslanon ang aton nabasa?

[Mga Pamangkot sa Pagtinuon]

[Kahon/Retrato sa pahina 30]

KON GINABASA MO ANG ISA KA BAHIN SANG BIBLIA, BINAGBINAGA

Kon ano ang ginasugid sini sa imo tuhoy kay Jehova subong isa ka persona

Kon ano ang kaangtanan sini sa kabug-usan nga tema sang Biblia

Kon paano ini dapat makaapektar sa imo kabuhi

Kon paano mo ini magamit sa pagbulig sa iban