‘Padayon nga Pangitaa Anay ang Ginharian’
Kapitulo Onse
‘Padayon nga Pangitaa Anay ang Ginharian’
1. (a) Ngaa ginpalig-on ni Jesus ang iya mga tagpalamati nga unahon ang pagpangita sa Ginharian? (b) Ano nga pamangkot ang dapat naton ipamangkot sa aton kaugalingon?
SANG nagligad nga kapin sa 1,900 ka tuig, ginpalig-on ni Jesus ang iya mga tagpalamati sa isa ka diskurso sa Galilea: “Padayon, nian, nga pangitaa anay ang ginharian kag ang [iya sang Dios] pagkamatarong.” Apang ngaa hilingagawon gid ini? Indi bala nga madamo pa nga siglo ang magalipas antes maghari si Cristo sa Ginharian? Huo, apang ang Mesianikong Ginharian amo ang paagi nga gamiton ni Jehova sa pagbindikar sang iya pagkasoberano kag sa pagtuman sang iya daku nga katuyuan para sa duta. Ang bisan sin-o nga nakahangop gid sang kahulugan sini nga mga butang magauna sang Ginharian sa iya kabuhi. Kon matuod ini sang nahaunang siglo, daw ano pa karon, karon nga nagalingkod na si Cristo sa trono subong Hari! Gani ang pamangkot amo, Ginapakita bala sang akon pagkabuhi nga ginauna ko ang pagpangita sa Ginharian sang Dios?—Mateo 6:33.
2. Ano nga mga butang ang malangkagon nga ginahimud-usan sang katawhan sa kabilugan?
2 Sa katunayan, ginauna sang minilyon ka tawo karon sa bug-os nga kalibutan ang pagpangita sa Ginharian. Ginapakita nila ang ila suporta sa paggahom sang Ginharian paagi sa paghugod sang ila kabuhi sa paghimo sang kabubut-on ni Jehova, kay gindedikar nila ang ila kaugalingon sa iya. Sa pihak nga bahin, ang kalabanan nga mga tawo interesado sa pagpangita sa kalibutanon nga mga butang. Ginahimud-usan sang mga tawo ang kuwarta kag ang mga pagkabutang kag mga kalipay nga mabakal sang kuwarta. Ukon nagapanikasog gid sila nga pauswagon ang ila mga karera. Ginapakita sang ila pagkabuhi nga masako sila sa ila kaugalingon, sa materyal nga mga butang, kag sa mga kalipayan. Ikaduha lamang ang Dios sa ila, kon nagapati gid man sila sa iya.—Mateo 6:31, 32.
3. (a) Ano nga sahi sang mga bahandi ang ginpalig-on ni Jesus nga pangitaon sang iya mga disipulo, kag ngaa? (b) Ngaa indi kinahanglan nga magkabalaka sing tuman sa materyal nga mga butang?
3 Apang, ginhatag ni Jesus ini nga laygay sa iya mga disipulo: “Mag-untat kamo sa pagtipon para sa inyo kaugalingon sing mga bahandi sa duta,” kay wala sing isa sini nga mga pagkabutang ang magapabilin sing dayon. “Sa baylo,” siling niya, “magtipon kamo para sa inyo kaugalingon sing mga bahandi sa langit” paagi sa pag-alagad kay Jehova. Ginpalig-on ni Jesus ang iya mga sumulunod nga huptan nga “simple” ang ila mata paagi sa pagtuon sang igtalupangod kag kusog sa paghimo sang kabubut-on sang Dios. “Indi kamo mahimo nga makaalagad sa Dios kag sa Manggad,” siling niya sa ila. Apang ano naman ang materyal nga mga kinahanglanon—pagkaon, panapton, kag puluy-an? “Mag-untat sa pagkabalaka,” laygay ni Jesus. Ginpatalupangod niya sa ila ang mga pispis—ginapakaon sila sang Dios. Ginpalig-on ni Jesus ang iya mga sumulunod nga magtuon sing leksion gikan sa mga bulak—ginapapanaptan sila sang Dios. Indi bala labaw ang bili sang intelihente nga tawhanon nga mga alagad ni Jehova sangsa bisan diin sini sa ila? “Padayon, nian, nga pangitaa anay ang ginharian kag ang iya pagkamatarong,” siling ni Jesus, “kag ining tanan iban pa nga [kinahanglanon nga] mga butang idugang sa inyo.” (Mateo 6:19-34) Ginapakita bala sang imo mga buhat nga nagapati ka sa sini?
Indi Pagtuguti nga Malumsan ang Kamatuoran Tuhoy sa Ginharian
4. Kon sobra gid ang pagpabalor sang isa ka tawo sa materyal nga mga butang, ano mahimo ang resulta?
4 Nagakaigo lamang nga mabalaka ang isa nga matigayon ang iya materyal nga mga kinahanglanon kag sang iya pamilya. Apang, kon sobra gid ang kabalaka sang isa ka tawo sa materyal nga mga butang, ang mga resulta mahimo nga makahalalit. Bisan pa masiling sia nga nagatuo sia sa Ginharian, kon ginauna naman niya sa iya tagipusuon ang iban nga mga butang, ang kamatuoran sang Ginharian malumsan. (Mateo 13:18-22) Halimbawa, sang isa ka okasyon ginpamangkot si Jesus sang isa ka manggaranon nga pamatan-on nga manuggahom: “Ano ang dapat ko himuon agod makapanubli sing kabuhi nga walay katapusan?” May matinlo sia nga moral kag mainayuhon sa iban, apang sobra ang iya gugma sa iya materyal nga mga pagkabutang. Indi niya ini mabiyaan agod mangin sumulunod ni Cristo. Gani ginpaligad niya ang higayon nga kuntani magadul-ong sa iya nga mangin kaupod ni Cristo sa langitnon nga Ginharian. Nagsiling si Jesus sadto nga okasyon: “Mabudlay gid para sa mga may kuwarta ang magsulod sa ginharian sang Dios!”—Marcos 10:17-23.
5. (a) Sa anong mga butang ginpalig-on ni Pablo si Timoteo nga mangin kontento, kag ngaa? (b) Paano ginagamit ni Satanas “ang gugma sa kuwarta” subong isa ka malaglagon nga siod?
5 Paglipas sang mga tuig, ginsulatan ni apostol Pablo si Timoteo, nga sadto didto sa Efeso, nga isa ka mahamungayaon nga sentro sang komersio. Ginpahanumdom sia ni Pablo: “Wala kita sing nadala sa kalibutan, kag wala man kita sing madala nga bisan ano nga butang paguwa. Gani, kon may pagkaon kag panapton, mangin kontento na kita sa sining mga butang.” Ang pagpangabudlay agod maamanan sing “pagkaon kag panapton” ang kaugalingon kag ang pamilya nagakaigo. Apang si Pablo nagpaandam: “Ang mga determinado nga magmanggaranon nagakahulog sa pagsulay kag sa siod kag sa madamong binuang kag makahalalit nga kailigbon, nga nagatugdang sang mga tawo sa kalaglagan kag kahapayan.” Si Satanas malalangon. Sa primero mahimo sulayon niya ang isa ka tawo sa magagmay nga mga butang. Mahimo nga sundan ini sang daku pa nga pag-ipit, ayhan sang isa ka kahigayunan nga mapataas ang posisyon ukon isa ka mas maayo nga trabaho nga mas daku ang suweldo apang magakuha sang tion nga ginahinguyang anay para sa espirituwal nga mga butang. Kon indi kita magbantay, malumsan sang “gugma sa kuwarta” ang mas importante nga mga intereses sang Ginharian. Amo sini ang ginsiling ni Pablo: “Paagi sa paghingamo sini nga gugma ang iban nagtalang gikan sa pagtuo kag nagsuntok sang ila mga kaugalingon sing madamong kasakitan.”—1 Timoteo 6:7-10.
6. (a) Agod indi masiod sang materyalismo, ano dapat ang himuon naton? (b) Ano ang masaligan naton walay sapayan sang kahimtangan sa ekonomiya sang kalibutan karon?
6 Upod ang matuod nga gugma sa iya Cristianong utod, ginpalig-on ni Pablo si Timoteo: “Palagyo ka sa sining mga butang” kag, “Makig-away ka sang maayong pagpakig-away sang pagtuo.” (1 Timoteo 6:11, 12) Kinahanglan ang hanuot nga panikasog agod indi kita madaldal sang materyalistiko nga pagkabuhi sang kalibutan sa palibot naton. Apang kon manikasog kita nahisanto sa aton pagtuo, si Jehova indi gid magabiya sa aton. Walay sapayan sang mataas nga mga presyo kag lapnag nga pagkawalay palamugnan, pat-uron niya nga may yara kita sang kon ano gid ang kinahanglanon naton. Si Pablo nagsulat: “Tuguti ang inyo paagi sang pagkabuhi nga hilway sa gugma sa kuwarta, samtang kontento kamo sa karon nga mga butang. Kay [ang Dios] nagsiling: ‘Indi ko kamo nga mas-a pagbiyaan ni pagpatumbayaan.’ Agod nga makatigayon kita sing kaisog kag magsiling: ‘Si Jehova ang akon manugtabang; indi ako mahadlok. Ano ang mahimo sang tawo sa akon?’” (Hebreo 13:5, 6) Kag si Hari David nagsulat: “Nangin pamatan-on ako, kag karon tigulang na, apang wala ako makakita nga ang bisan sin-o nga matarong ginpabayaan, ukon ang iya kaliwat nga nagapakilimos sing tinapay.”—Salmo 37:25.
Ang Dumaan nga mga Disipulo Isa ka Sulundan
7. Anong mga instruksion tuhoy sa pagbantala ang ginhatag ni Jesus sa iya mga disipulo, kag ngaa nagakaigo ini?
7 Sa tapos mahatagan ni Jesus ang iya mga apostoles sing nagakaigo nga paghanas, ginpalakat niya sila sa Israel agod ibantala ang maayong balita kag ipahayag: “Ang ginharian sang mga langit malapit na.” Daw ano yadto ka makakulunyag nga mensahe! Si Jesucristo, ang Mesianikong Hari, yara sa tunga nila. Sanglit ang mga apostoles mahugod sa pag-alagad sa Dios, ginpalig-on sila ni Jesus sa pagsalig nga atipanon sila sang Dios. Gani sia nagsiling: “Indi kamo magdala sing bisan ano para sa paglakbay, bisan baston ukon puyo sang pagkaon, ni tinapay ukon kuwarta nga pilak; ni duha ka pang-idalom nga panapton. Kundi kon magsulod kamo sa isa ka puluy-an, magpabilin kamo didto kag maglakat gikan didto.” (Mateo 10:5-10; Lucas 9:1-6) Pat-uron ni Jehova nga ang ila mga kinahanglanon mahatag sang mga masigka-Israelinhon, nga sa tunga nila ang pag-abiabi sa mga estranghero isa ka kinabatasan na.
8. (a) Antes sia mapatay, ngaa naghatag si Jesus sing bag-ong mga instruksion sa pagbantala? (b) Ano gihapon ang unahon sa kabuhi sang mga sumulunod ni Jesus?
8 Sang ulihi, antes sia mapatay, ginpaandaman ni Jesus ang iya mga apostoles nga sa ulihi magapangabudlay sila sa idalom sang bag-o nga mga kahimtangan. Subong resulta sang opisyal nga pagpamatok sa ila hilikuton, mahimo nga indi sila dayon pag-abiabihon sa Israel. Subong man, malapit na nila dalhon ang mensahe sang Ginharian sa kadutaan sang mga Gentil. Magadala sila karon sing “puyopuyo” kag “puyo sang pagkaon.” Walay sapayan sini, dapat nila unahon ang pagpangita sa Ginharian ni Jehova kag sa iya pagkamatarong, nagasalig nga pakamaayuhon sang Dios ang ila mga panikasog agod matigayon ang kinahanglanon nga pagkaon kag panapton.—Lucas 22:35-37.
9. Paano gin-una ni Pablo ang Ginharian sa iya kabuhi samtang ginaatipan ang iya pisikal nga mga kinahanglanon, kag ano nga laygay ang ginhatag niya sa sining butang?
9 Si apostol Pablo isa ka maayong halimbawa sang isa nga nagtuman sang laygay ni Jesus. Gin-una ni Pablo ang ministeryo sa iya kabuhi. (Binuhatan 20:24, 25) Sang nagkadto sia sa isa ka lugar agod magbantala, gin-atipan niya ang iya materyal nga mga kinahanglanon, nagtrabaho pa gani sa paghimo sing tolda. Wala sia magpaabot nga atipanon sia sang iban. (Binuhatan 18:1-4; 1 Tesalonica 2:9) Apang, mapinasalamaton nga ginbaton niya ang pagkamaabiabihon kag mga dulot sang ginpabutyag sang iban ang ila gugma sa sining paagi. (Binuhatan 16:15, 34; Filipos 4:15-17) Ginpalig-on ni Pablo ang mga Cristiano, nga indi pagpatumbayaan ang ila mga obligasyon sa pamilya agod makabantala, kundi tigaylo balansehon ang ila nagkalainlain nga mga responsabilidad. Ginlaygayan niya sila nga magtrabaho, higugmaon ang ila mga pamilya, kag buligan ang iban. (Efeso 4:28; 2 Tesalonica 3:7-12) Ginpalig-on niya sila nga magsalig sa Dios, indi sa materyal nga mga pagkabutang, kag gamiton ang ila kabuhi sa paagi nga nagapakita nga nahangpan gid nila kon ano ang mas importante nga mga butang. Nahisanto sa mga panudlo ni Jesus, nagkahulugan ini sang pagpangita anay sa Ginharian sang Dios kag sa iya pagkamatarong.—Filipos 1:9-11.
Padayon nga Unaha ang Ginharian sa Imo Kabuhi
10. Ano ang kahulugan sang pagpangita anay sa Ginharian?
10 Tubtob sa anong kasangkaron ginapaambit naton ang maayong balita sang Ginharian sa iban? Depende ini, sa bahin, sa aton mga kahimtangan kag sa kadalumon sang aton apresasyon. Dumduma nga si Jesus wala magsiling, ‘Pangitaa ang Ginharian kon wala ka na sing himuon pa.’ Bangod nahibaluan niya ang pagkaimportante sang Ginharian, ginpabutyag niya ang kabubut-on sang iya Amay, nga nagasiling: “Padayon ninyo nga pangitaa ang iya ginharian.” (Lucas 12:31) Bisan pa dapat mangabudlay ang kalabanan sa aton agod maatipan ang aton mga kinahanglanon kag sang aton pamilya, kon may pagtuo kita, dapat nga ang aton kabuhi nasentro sa hilikuton sang Ginharian nga ginhatag sang Dios sa aton. Sa amo man nga tion, atipanon naton ang aton mga responsabilidad sa pamilya.—1 Timoteo 5:8.
11. (a) Paano gin-ilustrar ni Jesus nga indi tanan sarang makahimo sing pareho nga oras sa pagpalapnag sing mensahe sang Ginharian? (b) Ano nga mga kabangdanan ang makaapektar sa kon daw ano kadamo ang mahimo sang isa?
11 Ang iban sa aton makahugod sing mas madamo nga tion sangsa iban sa pagbantala sing maayong balita sang Ginharian. Apang sa iya parabola tuhoy sa nagkalainlain nga sahi sang duta, ginpakita ni Jesus nga ang tanan nga ang ila tagipusuon kaangay sang maayong duta magapamunga. Tubtob sa anong kasangkaron? Ang mga kahimtangan sang mga indibiduwal nagakalainlain. Ang edad, kapagros, kag mga responsabilidad sa pamilya amo ang pila sang mga kabangdanan. Apang kon may matuod nga apresasyon, madamo ang mahimo.—Mateo 13:23.
12. Anong maayong espirituwal nga tulumuron ang ginapalig-on sa mga pamatan-on nga binagbinagon?
12 Maayo nga may mga tulumuron kita nga magabulig sa aton sa pagpasangkad sang aton bahin sa ministeryo sa Ginharian. Dapat hunahunaon sing serioso sang mga pamatan-on ang maayo gid nga halimbawa sang makugi nga pamatan-on nga Cristiano nga si Timoteo. (Filipos 2:19-22) Ano ang mas maayo pa sangsa magsulod sila sa bug-os tion nga ministeryo kon makatapos sila sang ila sekular nga pag-eskwela? Ang mga tigulang makabenepisyo man paagi sa pagpahamtang sing maayong espirituwal nga mga tulumuron.
13. (a) Sin-o ang nagapamat-od kon ano ang personal naton nga mahimo sa pag-alagad sa Ginharian? (b) Kon ginauna gid naton ang pagpangita sa Ginharian, ano ang ginapamatud-an naton?
13 Tigaylo nga mulayon yadtong sa banta naton makahimo sing labi pa, dapat kita pahulagon sang pagtuo nga tinguhaan ang personal nga pag-uswag agod maalagad naton ang Dios sa bug-os nga kasangkaron nga ginatugot sang aton mismo mga kahimtangan. (Roma 14:10-12; Galacia 6:4, 5) Subong ginpakita sa halimbawa ni Job, si Satanas nangatarungan nga ang aton panguna nga ginakabalak-an amo ang aton materyal nga mga pagkabutang, ang aton kaugalingon nga kasulhayan, kag ang aton personal nga kaayuhan kag nga ang aton motibo sa pag-alagad sa Dios makagod. Apang kon ginauna gid naton ang pagpangita sa Ginharian, nagapakigbahin kita sa pagpamatuod nga ang Yawa isa ka daku nga butigon. Nagahatag kita sing pamatuod nga ang una sa aton kabuhi amo ang pag-alagad sa Dios. Gani sa pulong kag buhat, ginapamatud-an naton ang aton tudok nga gugma para kay Jehova, ang aton mainunungon nga pagsuporta sa iya pagkasoberano, kag ang aton gugma sa isigkatawo.—Job 1:9-11; 2:4, 5; Hulubaton 27:11.
14. (a) Ngaa ang isa ka iskedyul para sa ministeryo sa latagon mapuslanon? (b) Tubtob sa anong kasangkaron nagapakigbahin ang madamong Saksi sa ministeryo sa latagon?
14 Ang isa ka iskedyul makabulig sa aton sa paghimo sing labi pa sangsa mahimo naton kon wala sini. Si Jehova mismo may “gintalana nga tion” sa pagtuman sang iya katuyuan. (Exodo 9:5; Marcos 1:15) Kon mahimo, maayo nga makigbahin sa ministeryo sa latagon sa isa ukon kapin pa ka gintalana nga tion kada semana. Ginatos ka libo ka Saksi ni Jehova sa bug-os nga kalibutan ang nagapalista subong mga auxiliary payunir, nga nagahinguyang sing mga duha ka oras sa isa ka adlaw sa pagbantala sing maayong balita. Ginatos ka libo pa ang nagaalagad subong mga regular payunir, nga nagahinguyang sing mga duha ka oras kag tunga sa isa ka adlaw sa pagwali sang mensahe sang Ginharian. Ang mga espesyal payunir kag mga misyonero nagahinguyang sing mas madamo pa gani nga oras sa pag-alagad sa Ginharian. Makapangita man kita sing mga kahigayunan agod mapaambit ang paglaum sa Ginharian sing di-pormal kay bisan sin-o nga magapamati. (Juan 4:7-15) Dapat nga handum gid naton nga makapakigbahin sing bug-os sa sining hilikuton suno sa ginatugot sang aton mga kahimtangan, kay si Jesus nagtagna: “Ining maayong balita sang ginharian ibantala sa bug-os napuy-an nga duta subong panaksi sa tanan nga kapungsuran; kag ugaling magaabot ang katapusan.”—Mateo 24:14; Efeso 5:15-17.
15. May kaangtanan sa aton ministeryo, ngaa sa banta mo ang laygay sa 1 Corinto 15:58 suno sa tion?
15 Sing nahiusa, sa tanan nga bahin sang duta, bisan diin man sila nga pungsod nagapuyo, ang mga Saksi ni Jehova nagapakigbahin sa sining pribilehiyo sang pag-alagad. Ginaaplikar nila sa ila kaugalingon ang inspirado nga laygay sang Biblia: “Magpakalig-on kamo, nga di-mationg, nga madamo pirme sing ginahimo sa hilikuton sang Ginuo, kay nahibaluan ninyo nga ang inyo pagpangabudlay may kaangtanan sa Ginuo indi walay pulos.”—1 Corinto 15:58.
Repaso nga Paghinun-anon
• Sang nagsiling si Jesus nga padayon nga “pangitaa anay ang Ginharian,” ano ang ginapakita niya nga dapat ibutang sa ikaduha nga duog?
• Ano dapat ang pagtamod naton sa pag-atipan sa aton pisikal nga mga kinahanglanon kag sang aton pamilya? Ano nga bulig ang ihatag sang Dios sa aton?
• Sa anong mga bahin sang pag-alagad sa Ginharian kita makapakigbahin?
[Mga Pamangkot sa Pagtinuon]
[Retrato sa pahina 107]
Sa tanan nga kadutaan, ginabantala karon sang mga Saksi ni Jehova ang maayong balita, antes mag-abot ang katapusan