‘Pagpakig-away Batok sa Malaut nga mga Puwersa nga Espiritu’
Kapitulo Otso
‘Pagpakig-away Batok sa Malaut nga mga Puwersa nga Espiritu’
1. Ngaa interesado gid kita sa ginahimo sang malaut nga mga espiritu?
MADAMO nga tawo ang nagayubit sa ideya nga may yara malaut nga mga espiritu. Apang indi ini butang nga kaladlawan. Mapati man ukon indi ang mga tawo, ang malaut nga mga espiritu nagaluntad, kag ginatinguhaan nila nga hayluhon ang tanan. Lakip man sa sini ang mga sumilimba ni Jehova. Sa katunayan, sila ang una nga puntariya. Ginaalerto kita ni apostol Pablo sa sini nga katunayan, nga nagasiling: “Nagapakig-away kita, indi batok sa unod kag dugo, kundi batok sa [di-kitaon nga] mga panguluhan, batok sa mga awtoridad, batok sa mga manuggahom sang kalibutan sining kadudulman, batok sa malaut nga mga puwersa nga espiritu sa langitnon nga mga duog.” (Efeso 6:12) Sa aton adlaw ang paghaylo sang malaut nga mga puwersa nga espiritu labi pa nga nagabaskog bangod si Satanas gintagbong gikan sa langit kag akig gid sia, sa pagkahibalo nga malip-ot na lamang ang iya tion.—Bugna 12:12.
2. Paano posible nga magdaug kita sa pagpakig-away batok sa labaw-sa-tawo nga mga espiritu?
2 Posible bala nga magdaug sa pagpakig-away batok sa labaw-sa-tawo nga mga puwersa nga espiritu? Huo, apang paagi lamang sa bug-os nga pagsalig kay Jehova. Dapat naton sia pamatian kag tumanon ang iya Pulong. Paagi sa sini, malikawan naton ang daku nga halit sa pisikal, moral, kag emosyon nga naeksperiensiahan karon sang mga napaidalom sa gahom ni Satanas.—Santiago 4:7.
Mga Manuggahom Sang Kalibutan sa Langitnon nga mga Duog
3. Sin-o ang malaut nga ginapamatukan ni Satanas, kag paano?
3 Maathag nga ginalaragway ni Jehova sa aton ang kahimtangan sa kalibutan samtang ginatan-aw niya ini gikan sa iya mataas nga duog sa mga langit. Ginhatagan niya si apostol Juan sing palanan-awon nga sa sini ginlaragway si Satanas subong “daku nga dragon nga duag-kalayo.” Nagahana sia nga tukbon, kon posible, ang Mesianikong Ginharian sang Dios sa gilayon nga nabun-ag ini sa langit sang 1914. Sang mapaslawan sia, ginhimo ni Satanas ang madamong malaut nga pagpamatok sa dutan-on nga mga tiglawas sini nga Ginharian. (Bugna 12:3, 4, 13, 17) Paano ginahimo ni Satanas ini nga pagpakig-away? Paagi sa iya tawhanon nga mga tiglawas.
4. Sin-o ang ginahalinan sang gahom sang tawhanon nga mga panguluhan, kag paano naton ini nahibaluan?
4 Masunod nga ginpakita kay Juan ang sapat nga mapintas nga may pito ka ulo kag napulo ka sungay, ang sapat nga may awtoridad “sa ibabaw sang tanan nga tribo kag katawhan kag hambal kag pungsod.” Ini nga sapat nagarepresentar sa bug-os kalibutan nga sistema sa politika. Ginsugid kay Juan nga “ginhatag sang dragon [si Satanas nga Yawa] sa sapat ang iya gahom kag ang iya trono kag daku nga awtoridad.” (Bugna 13:1, 2, 7) Huo, si Satanas amo ang ginahalinan sang gahom kag awtoridad sang tawhanon nga mga panguluhan. Sa amo, subong sang ginsulat ni apostol Pablo, ang matuod nga “mga manuggahom sang kalibutan” amo ang “malaut nga mga puwersa nga espiritu sa langitnon nga mga duog,” nga nagakontrol sang tawhanon nga mga panguluhan. Dapat mahangpan sang tanan nga magasimba kay Jehova ang bug-os nga kahulugan sini.—Lucas 4:5, 6.
5. Sa ano karon ginatipon ang mga manuggahom sa politika?
5 Bisan pa madamong manuggahom sa politika ang nagapangangkon nga relihioso, wala sing isa sa mga pungsod ang nagapasakop sa paggahom ni Jehova ukon sa gintangdo niya nga Hari, si Jesucristo. Ang tanan nagapanikasog gid nga manguyapot sa ila gahom. Sa karon, subong sang ginapakita sang rekord sa Bugna, ang “mga kapahayagan nga gin-inspirar sang mga demonyo” nagatipon sang mga manuggahom sang kalibutan sa “inaway sang dakung adlaw sang Dios nga Labing Gamhanan” sa Armagedon.—Bugna 16:13, 14, 16; 19:17-19.
6. Ngaa kinahanglan nga maghalong agod malikawan nga maniobrahon sa pagsuporta sa satanikong sistema?
6 Kada adlaw, ang kabuhi sang mga tawo apektado sang politikal, sosyal, ekonomiko, kag relihioso nga mga binangig nga nagabungkag sang tawhanon nga pamilya. Sa sining mga binangig, kinaandan nga ang mga tawo nagadampig—sa pulong man ukon buhat—sa ila pungsod, tribo, hambal, ukon katilingban. Bisan pa ang mga tawo indi direkta nga nadalahig sa pila ka binangig, masami nga may ginapaboran sila. Apang bisan sin-o man nga tawo ukon bisan ano man nga kausa ang ila ginasakdag, sin-o gid ang ila ginasuportahan? Ang Biblia maathag nga nagasiling: “Ang bug-os nga kalibutan yara sa gahom sang isa nga malauton.” (1 Juan 5:19) Paano, nian, malikawan sang isa ka tawo nga mapatalang upod sa nabilin nga bahin sang katawhan? Paagi lamang sa iya bug-os nga pagsakdag sa Ginharian sang Dios kag paagi sa paghupot sing bug-os nga neutralidad kon tuhoy sa mga binangig sang kalibutan.—Juan 17:15, 16.
Malimbungon nga mga Padihot Sang Isa nga Malaut
7. Paano ginapakita ang pagkatuso ni Satanas sa paggamit niya sang butig nga relihion?
7 Sa bug-os nga panahon sang maragtas, si Satanas naggamit sing paghingabot sa porma sang pulong kag pagpanakit agod patalikuron ang mga indibiduwal gikan sa matuod nga pagsimba. Naggamit man sia sing mas malalangon nga mga paagi—tuso nga mga buhat kag malimbungon nga mga padihot. Tuso nga ginhuptan niya ang kalabanan nga katawhan sa kadudulman paagi sa butig nga relihion, nagapahunahuna sa ila nga nagaalagad sila sa Dios. Bangod kulang sing sibu nga ihibalo tuhoy sa Dios kag sing gugma sa kamatuoran, mahimo naganyat sila sa misteryoso kag emosyonal nga relihioso nga mga serbisyo ukon nagdayaw sa gamhanan nga mga buhat. (2 Tesalonica 2:9, 10) Apang ginapaandaman kita nga bisan gikan sa tunga sang nakig-ambit anay sa matuod nga pagsimba, “ang iban magatalikod . . . , nagahatag sing igtalupangod sa nagapatalang nga inspirado nga mga pinamulong kag mga panudlo sang mga demonyo.” (1 Timoteo 4:1) Paano ini mahanabo?
8. Paano kita maganyat ni Satanas sa butig nga relihion bisan pa ginasimba naton si Jehova?
8 Sing malimbungon, ginahingalitan sang Yawa ang aton mga kaluyahon. Nahadlok bala kita gihapon sa tawo? Kon amo, mahimo nga mahaylo kita sang mga himata ukon mga kaingod nga makigbahin sa mga buhat sang butig nga relihion. Bugalon bala kita? Kon amo, mahimo masaklaw kita kon laygayan ukon kon indi pagbatunon sang iban ang mga ideya nga ginasakdag naton. (Hulubaton 15:10; 29:25; 1 Timoteo 6:3, 4) Sa baylo nga bag-uhon ang aton pagtamod agod ipahisanto sa halimbawa ni Cristo, mahimo mabuyok kita sa mga ‘nagapakalam sang aton dulunggan’ paagi sa pagsiling nga tuman na nga basahon lamang ang Biblia kag magkabuhi sing maayo. (2 Timoteo 4:3) Indi importante kay Satanas kon aktuwal man kita nga magbuylog sa iban nga relihion ukon magpabilin lamang sa aton relihion, basta wala kita nagasimba kay Jehova sa paagi nga ginasugo sang Dios sa iya Pulong kag sa iya organisasyon.
9. Paano tuso nga ginagamit ni Satanas ang sekso agod matigayon ang iya mga tulumuron?
9 Si Satanas tuso man nga nagaganyat sa mga tawo nga busgon ang normal nga mga handum sa sayop nga mga paagi. Ginhimo niya ini sa handum sa seksuwal nga butang. Nagasikway sang moralidad sang Biblia, ginatamod sang madamo sa kalibutan ang seksuwal nga relasyon sa ulot sang mga indi kasal subong nagakaigo nga pagpangalipay ukon isa ka paagi sa pagpamatuod nga mga hamtong na sila. Kag kamusta naman ang mga minyo? Madamo ang nagapanghilahi. Kag bisan pa wala nagaluib sa ila tiayon, madamo nga indibiduwal ang nagatinguha nga makakuha sing diborsio ukon makabulag agod mapuyo nila ang iban. Katuyuan sang malalangon nga paagi ni Satanas nga impluwensiahan ang mga tawo sa pagpangalipay karon, nagaganyat sa ila nga indi pagsapakon ang malawig nga mga epekto indi lamang sa ila kaugalingon kag sa iban kundi ilabi na sa ila kaangtanan kay Jehova kag sa iya Anak.—1 Corinto 6:9, 10; Galacia 6:7, 8.
10. Sa anong paagi ginatinguhaan ni Satanas nga patikuon ang aton panimuot tuhoy sa imoralidad kag kasingki?
10 Ang isa pa ka kinaugali nga handum amo ang kalingawan. Kon maayo, makapapagsik ini sa pisikal, mental, kag emosyonal. Apang ano ang reaksion naton kon ginagamit sing tuso ni Satanas ang mga okasyon sang pagrelaks sa pagpahilayo sang aton panghunahuna sa Dios? Halimbawa, nahibaluan naton nga ginadumtan ni Jehova ang seksuwal nga imoralidad kag kasingki. Kon ang mga sine, mga programa sa telebisyon, ukon mga palaguwaon sa teatro nagapasundayag sini nga mga butang, kita bala nagapungko lamang kag nagatan-aw sini? Dumduma, man, nga pat-uron ni Satanas nga ini nga mga butang labi nga magalain samtang ang tion sang iya kalaglagan nagahilapit, kay “ang malaut nga mga tawo kag mga impostor magalain kag magalain pa, nga nagapatalang kag ginapatalang.” (2 Timoteo 3:13) Gani dapat kita pirme magbantay batok sa mga padihot ni Satanas.—Genesis 6:13; Salmo 11:5; Roma 1:24-32.
11. Sa anong mga paagi bisan ang tawo nga nakahibalo sang kamatuoran tuhoy sa espiritismo masiod kon indi sia alisto?
11 Nakahibalo man kita nga ang mga nagapaduyog sa bisan ano nga porma sang espiritismo—nagabuhat sing babaylan, nagagamit sing panghiwit, ukon nagapanikasog nga makigkomunikar sa mga patay—kalangil-aran kay Jehova. (Deuteronomio 18:10-12) Nagadumdom sini, indi kita magahunahuna sa pagkonsulta sa mga espiritista, kag indi gid naton sila pag-abiabihon sa aton puluy-an agod maghimo sang ila demonyohanon nga mga buhat. Apang magapamati bala kita sa ila kon magguwa sila sa telebisyon ukon sa Internet? Bisan indi gid kita magpabulong sa isa ka siruhano, higtan bala naton ang bulutkunan sang aton bag-o natawo nga anak, sa pagpati nga magaamlig ini sa bata gikan sa kahalitan? Sa pagkahibalo nga ginapakamalaut sang Biblia ang pagtiwtiw sa iban, tugutan bala naton ang isa ka hipnotista nga kontrolon ang aton hunahuna?—Galacia 5:19-21.
12. (a) Paano ginagamit ang musika agod hunahunaon naton ang mga ideya nga nahibaluan naton nga sayop? (b) Paano ang pamayo, estilo sang buhok, ukon panghambal sang isa ka tawo nagapakita sing pagdayaw sa mga tawo nga ang ila pagkabuhi wala ginakahamut-an ni Jehova? (c) Ano ang ginakinahanglan sa bahin naton agod indi kita mabiktima sang malimbungon nga mga padihot ni Satanas?
12 Ang Biblia nagasiling nga ang pagpakighilawas kag ang tanan nga sahi sang kahigkuan indi gani dapat sambiton (nga may mahigko nga mga motibo) sa tunga naton. (Efeso 5:3-5) Apang ano kon ini nga mga tema ginaupdan sang musika nga may matahom nga tono, makagalanyat nga ritmo, ukon makabilihag nga tiempo? Sulitsuliton bala naton ang mga liriko nga nagahimaya sang paghulid nga indi kasal, paggamit sing droga sa kalipayan, kag iban pa makasasala nga mga buhat? Ukon bisan pa nahibaluan naton nga indi naton dapat ilugon ang pagkabuhi sang mga tawo nga nagapatuyang sa sini nga mga butang, may huyog bala kita nga makilal-an upod sa ila paagi sa pag-ilog sang ila pamayo, sang ila estilo sang buhok, ukon sang ila panghambal? Daw ano ka malalangon ang mga paagi nga ginagamit ni Satanas agod sulayon ang mga tawo nga mag-ugyon sa iya malain nga panghunahuna! (2 Corinto 4:3, 4) Agod indi mabiktima sang iya malimbungon nga mga padihot dapat naton likawan nga madaldal sang kalibutan. Dapat naton dumdumon kon sin-o ang “bug-os kalibutan nga mga manuggahom sining kadudulman” kag batuan gid ang ila impluwensia.—1 Pedro 5:8.
Nasangkapan nga Mangin mga Mandadaug
13. Paano posible para kay bisan sin-o sa aton, walay sapayan sang aton pagkadihimpit, nga madaug ang kalibutan nga ginagamhan ni Satanas?
13 Antes sia mapatay, si Jesus nagsiling sa iya mga apostoles: “Magpakaisog! Nadaug ko ang kalibutan.” (Juan 16:33) Mahimo man sila mangin mga mandadaug. Pagligad sang mga 60 ka tuig, si apostol Juan nagsulat: “Sin-o ang isa nga nagadaug sang kalibutan kundi sia nga nagatuo nga si Jesus amo ang Anak sang Dios?” (1 Juan 5:5) Ini nga pagtuo ginapakita paagi sa pagtuman naton sang mga sugo ni Jesus kag pagsalig sa Pulong sang Dios, subong sang ginhimo ni Jesus. Ano pa ang kinahanglan? Nga magpabilin kita nga suod sa kongregasyon nga sia ang Ulo. Kon makasala kita, dapat kita hanuot nga maghinulsol kag mangayo sing kapatawaran sang Dios pasad sa halad ni Jesus. Sa sining paagi, walay sapayan sang aton mga pagkadihimpit kag kasaypanan, mahimo man kita mangin mga mandadaug.—Salmo 130:3, 4.
14. Basaha ang Efeso 6:13-17, kag gamita ang mga pamangkot kag mga kasulatan nga gin-aman sa sining parapo subong basihan sa paghinun-anon sang mga benepisyo sang tagsa ka bahin sang espirituwal nga hinganib.
14 Agod magmadinalag-on, dapat naton isuklob ang “bug-os nga hinganib gikan sa Dios,” nga wala ginapatumbayaan ang bisan ano nga bahin sini. Buksi palihug ang imo Biblia sa Efeso 6:13-17, kag basaha ang paglaragway sini sa sina nga hinganib. Nian, paagi sa pagsabat sa mga pamangkot sa ubos, binagbinaga kon paano ka makabenepisyo gikan sa pangamlig nga ginahatag sang tagsa ka bahin sang hinganib.
“Mga balikawang nga nawagkusan sang kamatuoran”
Bisan pa mahimo nga nahibaluan naton ang kamatuoran, paano ang regular nga pagtuon, pagpamalandong sa kamatuoran sang Biblia, kag pagtambong sa mga miting magaamlig sa aton? (1 Corinto 10:12, 13; 2 Corinto 13:5; Filipos 4:8, 9)
“Limbutong sang pagkamatarong”
Kay sin-o ini talaksan sang pagkamatarong? (Bugna 15:3)
Iilustrar kon paano ang indi pagsunod sa matarong nga mga dalanon ni Jehova nagapadayag sa isa sa espirituwal nga kahalitan. (Deuteronomio 7:3, 4; 1 Samuel 15:22, 23)
“Mga tiil nga nagasuksok sing kasangkapan sang maayong balita sang paghidait”
Paano isa ka pangamlig para sa aton nga gamiton naton pirme ang aton mga tiil sa paglakat kag sa pagpakigsugilanon sa mga tawo tuhoy sa mga aman sang Dios para sa paghidait? (Salmo 73:2, 3; Roma 10:15; 1 Timoteo 5:13)
“Daku nga taming sang pagtuo”
Kon may pagtuo kita nga napasad sing malig-on, ano ang reaksion naton sa mga panikasog nga ang katuyuan amo nga magduhaduha ukon mahadlok kita? (2 Hari 6:15-17; 2 Timoteo 1:12)
“Helmet sang kaluwasan”
Paano ang paglaum sang kaluwasan nagabulig sa isa nga likawan nga masiod sang sobra nga pagkabalaka sa materyal nga mga pagkabutang? (1 Timoteo 6:7-10, 19)
“Espada sang espiritu”
Sa ano kita dapat magsalig kon nagapakig-away sa mga pagsalakay batok sa aton espirituwalidad kag sa iya sang iban? (Salmo 119:98; Hulubaton 3:5, 6; Mateo 4:3, 4)
Ano pa ang kinahanglan agod magmadinalag-on sa espirituwal nga pagpakig-away? Daw ano kasunson ini dapat gamiton? Para kay sin-o? (Efeso 6:18, 19)
15. Paano kita makasulong sa espirituwal nga inaway?
15 Subong mga soldado ni Cristo, bahin kita sang daku nga hangaway nga nagapakig-away sa espirituwal. Kon magpabilin kita nga alisto kag gamiton sing maayo ang bug-os nga hinganib sang Dios, indi kita masamad ukon mapatay sa sining inaway. Sa baylo, mangin nagapabakod nga bulig kita sa aton kaupod nga mga alagad sang Dios. Mangin handa kita kag nalangkag sa pagsulong, ginapalapnag ang maayong balita sang Mesianikong Ginharian sang Dios, ang langitnon nga panguluhan nga ginapamatukan gid ni Satanas.
Repaso nga Paghinun-anon
• Ngaa ginahuptan sang mga sumilimba ni Jehova ang bug-os nga neutralidad kon tuhoy sa mga binangig sang kalibutan?
• Ano ang pila sang malimbungon nga mga padihot nga ginagamit ni Satanas agod malaglag sa espirituwal ang mga Cristiano?
• Paano ang espirituwal nga hinganib nga ginaaman sang Dios nagaamlig sa aton sa espirituwal nga pagpakig-away naton?
[Mga Pamangkot sa Pagtinuon]
[Mga retrato sa pahina 76]
Ang mga pungsod ginatipon sa Armagedon