Kapitulo Dos

Pakadakua si Jehova Subong ang Lamang Matuod nga Dios

1. Sin-o ang lamang matuod nga Dios?

 ANG Biblia nagasiling nga bisan pa madamo ang ginakabig nga dios, “sa aton sa pagkamatuod may isa ka Dios ang Amay.” (1 Corinto 8:​5, 6) Inang “isa ka Dios” amo si Jehova, ang Manunuga sang tanan nga butang. (Deuteronomio 6:4; Bugna 4:11) Ginpatuhuyan sia ni Jesus nga “akon Dios kag inyo Dios.” (Juan 20:17) Nag-ugyon sia kay Moises, nga nagsiling sang una: “Si Jehova amo ang matuod nga Dios; wala na gid sing iban luwas sa iya.” (Deuteronomio 4:35) Si Jehova labaw gid sa bisan ano nga mga butang sang pagsimba, subong sang mga idolo, mga tawo nga ginpakadios, ukon sang iya kaaway nga si Satanas nga Yawa, “ang dios sining sistema sang mga butang.” (2 Corinto 4:​3, 4) Kon ipaanggid sa sini nga tanan, si Jehova amo, subong sang pagtawag ni Jesus sa iya, “ang lamang matuod nga Dios.”​—Juan 17:3.

2. Samtang nagatuon kita tuhoy sa Dios, paano dapat maapektuhan ang aton kabuhi?

² Ang mapasalamaton nga mga tawo nga nakatuon sang makalilipay nga mga kinaiya sang Dios, subong man sang ginhimo niya kag pagahimuon pa para sa aton, nabuyok sa iya. Samtang ang ila gugma kay Jehova nagatubo, ginapahulag sila nga pakadakuon sia. Paano? Ang isa ka paagi amo ang pagsugid sa iban tuhoy sa iya. “Paagi sa baba ang isa nagapahayag sing dayag para sa kaluwasan,” siling sang Roma 10:10. Ang isa pa ka paagi amo ang pag-ilog sa iya sa pulong kag sa buhat. “Mangin mga manug-ilog kamo sang Dios, subong nga mga anak nga hinigugma,” siling sang Efeso 5:1. Agod  mahimo ini sing labi pa, kinahanglan nga mahibaluan naton ang matuod nga mga kinaiya ni Jehova.

3. Ano ang panguna nga mga kinaiya sang Dios?

³ Sa bug-os nga Biblia madamo nga pinamulong ang nagapakilala sa talalupangdon nga mga kinaiya sang Dios. Ang apat ka panguna nga kinaiya niya amo ang kaalam, katarungan, gahom, kag gugma. “Sa iya yara ang kaalam.” (Job 12:13) “Ang tanan niya nga dalanon katarungan.” (Deuteronomio 32:4) “Makusog man sia sa gahom.” (Isaias 40:26) “Ang Dios gugma.” (1 Juan 4:8) Apang, sa apat ka panguna nga kinaiya sang Dios, ano ang labing talalupangdon, ang isa nga labaw sa iban pa nagapakita kon ano nga sahi sia sang Dios?

“Ang Dios Gugma”

4. Diin nga mga kinaiya sang Dios ang kinahanglanon sa pagtuga niya sang uniberso kag sang tanan buhi nga butang?

⁴ Binagbinaga kon ano ang nagpahulag kay Jehova sa pagtuga sang uniberso kag sang intelihente nga mga espiritu kag sang mga tawo. Ang iya bala kaalam ukon gahom? Indi, kay bisan pa gingamit ini sang Dios, indi ini ang nagapahulag nga mga puwersa. Kag ang iya katarungan wala nagakinahanglan nga ipaambit niya ang dulot nga kabuhi. Sa baylo, ang daku nga gugma sang Dios amo ang nagpahulag sa iya nga ipaambit ang kalipay sang pagluntad subong intelihente nga persona upod sa iban. Ang gugma nagpahulag sa iya sa paghimo sing katuyuan nga magkabuhi sing dayon sa Paraiso ang matinumanon nga katawhan. (Genesis 1:28; 2:15) Ang gugma nagtiklod sa iya sa paghimo sing kahimusan nga madula ang katagudilian nga gindala sang paglapas ni Adan sa katawhan.

5. Suno sa Biblia, si Jehova personipikasyon sang ano nga kinaiya, kag ngaa?

⁵ Gani, sa tanan nga kinaiya sang Dios, ang labing talalupangdon amo ang iya gugma. Amo ini ang iya kinaugali. Bisan pa nga ang iya kaalam, katarungan, kag gahom importante, ang Biblia wala gid nagasiling nga si Jehova isa sa sini. Apang nagasiling ini nga sia gugma. Huo, si Jehova amo ang personipikasyon  sang gugma. Amo ini ang gugma nga ginaubayan sang prinsipio, indi sang emosyon. Ang gugma sang Dios ginagamhan sang mga prinsipio sang kamatuoran kag pagkamatarong. Amo ini ang pinakamataas nga sahi sang gugma, nga ginpakita mismo ni Jehova nga Dios paagi sa halimbawa. Ini nga gugma amo ang ekspresyon sang bug-os nga pagkadi-makagod kag pirme ginaupdan sang makita nga pamatuod sang buhat.

6. Paano naton mailog ang Dios, bisan pa superyor sia sa aton?

⁶ Ining dalayawon nga kinaiya sang gugma amo ang nagabulig sa aton nga ilugon ini nga Dios. Subong kubos, di-himpit, makasasala nga mga tawo, mahimo kita maghunahuna nga indi gid naton mailog ang Dios sing madinalag-on. Apang yari ang isa pa ka halimbawa sang daku nga gugma ni Jehova: Nakahibalo sia sang aton mga limitasyon kag wala sia nagapangayo sing kahimpitan sa aton. Nakahibalo sia nga indi pa kita himpit. (Salmo 51:5) Amo kon ngaa ang Salmo 130:​3, 4 nagasiling: “Kon ang mga sayop amo ang imo ginabantayan, O Jah, O Jehova, sin-o bala ang makatindog? Kay may matuod nga pagpatawad sa imo.” Huo, si Jehova “isa ka Dios nga maluluy-on kag mainayuhon, mahinay sa pagpangakig kag bugana sa mahigugmaon nga kaayo.” (Exodo 34:6) “Ikaw, O Jehova, maayo kag handa magpatawad.” (Salmo 86:5) Daw ano ka makalipay! Daw ano ka makapapagsik nga maalagad ining dalayawon gid nga Dios kag maagom ang iya mahigugmaon kag maluluy-on nga pag-atipan!

7. Paano makita ang gugma ni Jehova sa iya mga buhat sang pagpanuga?

⁷ Ang gugma ni Jehova makita man sa iya mga buhat sang pagpanuga. Hunahunaa lamang ang madamong maayo nga butang nga ginhatag ni Jehova para sa aton kalipay, subong sang matahom nga mga kabukiran, kagulangan, linaw, kag kadagatan. Ginhatag niya sa aton ang nanuhaytuhay nga mga pagkaon nga magapahalipay sang aton panabor kag magapabaskog sa aton. Subong man, si Jehova nag-aman sing madamong matahom kag mahumot nga kabulakan subong man sing makawiwili nga mga kasapatan. Naghimo sia  sing mga butang nga makapahalipay sa mga tawo, bisan pa nga indi kinahanglan nga himuon niya ini. Matuod, bangod sang pagkabuhi sa sining malauton nga kalibutan sa aton karon di-himpit nga kahimtangan, indi bug-os ang aton kalipay sa iya ginpanuga. (Roma 8:22) Apang handurawa lamang ang himuon ni Jehova sa aton sa Paraiso! Ang salmista nagapasalig sa aton: “Ginahumlad mo ang imo kamot kag ginabusog ang [nagakaigo nga] handum sang tagsa ka butang nga buhi.”​—Salmo 145:16.

8. Ano ang labing talalupangdon nga halimbawa sang gugma ni Jehova sa aton?

⁸ Ano ang labing talalupangdon nga halimbawa sang gugma ni Jehova sa katawhan? Ang Biblia nagapaathag: “Ginhigugma gid sang Dios ang kalibutan sa bagay nga ginhatag niya ang iya bugtong nga Anak, agod nga ang bisan sin-o nga magtuo sa iya indi mawala kundi may kabuhi nga walay katapusan.” (Juan 3:16) Bangod bala sang kaayo sang tawo nga ginhimo ini ni Jehova? Ang Roma 5:8 nagasabat: “Ginarekomendar sang Dios ang iya mismo nga gugma sa aton amo nga, samtang mga makasasala pa kita, si Cristo napatay tungod sa aton.” Huo, ginpadala sang Dios ang iya himpit nga Anak sa duta agod ihatag ang iya kabuhi subong halad nga gawad agod tubuson kita gikan sa pagpakamalaut sang sala kag kamatayon. (Mateo 20:28) Nagbukas ini sang dalan agod ang mga tawo nga nagahigugma sa Dios makatigayon sing kabuhi nga walay katapusan. Sing mapasalamaton, ang gugma sang Dios ginapakita sa tanan nga maluyag sa paghimo sang iya kabubut-on, kay ang Biblia nagasiling sa aton: “Ang Dios wala sing ginapasulabi, apang sa tagsa ka pungsod ang tawo nga nagakahadlok sa iya kag nagahimo sing pagkamatarong kalahamut-an sa iya.”​—Binuhatan 10:​34, 35.

9. Paano kita dapat maimpluwensiahan sang katunayan nga ginhatag ni Jehova ang iya Anak nga gawad para sa aton?

⁹ Paano ang katunayan nga ginhatag ni Jehova ang iya Anak nga gawad para sa aton, nga nagabukas sang dalan padulong sa kabuhi nga walay katapusan, nagaimpluwensia kon paano naton  karon ginagamit ang aton kabuhi? Dapat ini magpatudok sang aton gugma sa matuod nga Dios, si Jehova. Subong man, dapat ini magpahulag sa aton nga pamatian si Jesus, nga nagatiglawas sa Dios. “Napatay [si Jesus] para sa tanan agod nga ang mga nagakabuhi indi na magkabuhi para sa ila kaugalingon, kundi para sa iya nga napatay para sa ila.” (2 Corinto 5:15) Daw ano gid nga kalipay ang pagsunod sa mga tikang ni Jesus, kay huwaran sia sa pag-ilog sang gugma kag kaawa ni Jehova! Ginapakita ini sang ginsiling ni Jesus sa mga mapainubuson: “Kari sa akon, kamo tanan nga ginabudlayan kag ginabug-atan, kag papagsikon ko kamo. Itakod ang akon gota kag magtuon kamo sa akon, kay ako malulo kag mapainubuson sing tagipusuon, kag makakita kamo sing kaumpawan sa inyo mga kalag. Kay ang akon gota mahulas kag ang akon lulan mamag-an.”​—Mateo 11:28-30.

Pagpakita Sing Gugma sa Iban

10. Ano ang pila ka paagi nga mapakita naton ang gugma sa mga masigka-Cristiano?

¹⁰ Paano naton mapakita nga ang aton gugma sa mga masigka-Cristiano kaangay sang ginpakita ni Jehova kag ni Jesus sa aton? Talupangda ang madamo nga paagi nga mahimo naton ini: “Ang gugma mainantuson kag malulo. Ang gugma wala nagakahisa, wala ini nagapabugal, wala nagapahambog, wala nagagawi sing indi disente, wala nagapangita sang kaugalingon nga mga kaayuhan, wala ginapukaw sa kaakig. Wala ini nagaisip sang kahalitan. Wala ini nagakalipay sa katikuan, kundi nagakalipay sa kamatuoran. Ginaagwanta sini ang tanan nga butang, ginapatihan ang tanan nga butang, ginalauman ang tanan nga butang, ginabatas ang tanan nga butang. Ang gugma wala gid nagakapaslawi.”​—1 Corinto 13:4-8; 1 Juan 3:14-18; 4:7-12.

11. Kay sin-o pa naton dapat ipakita ang gugma, kag paano?

¹¹ Kay sin-o pa dapat naton ipakita ang gugma, kag paano? Si Jesus nagsiling: “Busa lakat kamo kag maghimo sing mga disipulo sa mga tawo sa tanan nga kapungsuran, nagabawtismo sa ila sa ngalan sang Amay kag sang Anak kag sang balaan  nga espiritu, nagatudlo sa ila nga tumanon ang tanan nga butang nga ginsugo ko sa inyo.” (Mateo 28:​19, 20) Nagalakip ini sang pagpaambit sing maayong balita tuhoy sa nagapakari nga tulad-paraiso nga bag-ong kalibutan sang Dios sa mga indi pa naton mga masigka-Cristiano. Maathag nga ginpakita ni Jesus nga ang aton gugma indi dapat latiran sa aton masigkatumuluo lamang, kay sia nagsiling: “Kon ginahigugma [lamang] ninyo ang mga nagahigugma sa inyo, ano bala ang inyo padya? Indi bala nga ginahimo man sang mga manugsukot sang buhis ini man nga butang? Kag kon ang inyo mga utod lamang ang inyo ginabugno, ano nga pinasahi nga butang ang ginahimo ninyo? Indi bala ginahimo man sang mga tawo sang mga pungsod ini man nga butang?”​—Mateo 5:​46, 47; 24:14; Galacia 6:10.

‘Maglakat sa Ngalan ni Jehova’

12. Ngaa ang ngalan sang Dios naaplikar lamang sa iya?

¹² Ang isa pa ka importante nga bahin sang pagpakadaku sa matuod nga Dios amo ang pagkilala, paggamit, kag pagtudlo sa iban sang iya pinasahi nga ngalan nga Jehova. Ginpabutyag sang salmista ining tinagipusuon nga handum: “Agod makilala sang katawhan nga ikaw, nga ang ngalan si Jehova, ikaw lamang ang Labing Mataas sa bug-os nga duta.” (Salmo 83:18) Ang ngalan nga Jehova nagakahulugan sing “Sia nga Nagapahanabo nga Mangin Amo.” Sia ang Dakung Manugtuyo, nga pirme nagatuman sang iya mga katuyuan sing madinalag-on. Kag ang matuod nga Dios lamang ang nagakaigo nga magdala sina nga ngalan, kay indi gid makapat-od ang mga tawo nga magamadinalag-on ang ila mga panikasog. (Santiago 4:​13, 14) Si Jehova lamang ang makasiling nga ang iya pulong “pat-od nga magamadinalag-on” sa ginpadalhan niya sini. (Isaias 55:11) Madamo ang nakunyag sang una nila nga nakita ang ngalan sang Dios sa ila mga Biblia kag mahibaluan kon ano ang kahulugan sini. (Exodo 6:3) Apang makabenepisyo lamang sila sa sining ihibalo kon ‘maglakat [sila] sa ngalan ni Jehova sa walay katubtuban.’​—Miqueas 4:5.

13. Ano ang nadalahig sa pagkilala kay Jehova kag sa paglakat sa iya ngalan?

 ¹³ Tuhoy sa ngalan sang Dios, ang Salmo 9:10 nagasiling: “Ang mga nakakilala sa imo ngalan magasalig sa imo.” Indi lamang ang pagkilala sa ngalan ni Jehova ang nadalahig sa sini, nga indi awtomatiko nga nagakahulugan sing pagsalig sa iya. Ang pagkilala sa ngalan sang Dios nagakahulugan sing paghangop kon ano nga sahi sang Dios si Jehova, nga ginatahod ang iya awtoridad, ginatuman ang iya mga sugo, ginasaligan sia sa tanan nga butang. (Hulubaton 3:​5, 6) Sing kaanggid, ang ‘paglakat sa ngalan ni Jehova’ nagapahangop sing pagdedikar sa iya kag pagtiglawas sa iya subong isa sang iya mga sumilimba, nga ginagamit gid ang aton kabuhi suno sa kabubut-on sang Dios. (Lucas 10:27) Ginahimo mo bala ina?

14. Agod maalagad naton si Jehova sa walay katubtuban, ano pa ang kinahanglan luwas sa pagbatyag nga ini isa ka obligasyon?

¹⁴ Agod maalagad naton si Jehova sa walay katubtuban, indi naton dapat batyagon nga ini isa ka obligasyon lamang. Ginlaygayan ni apostol Pablo si Timoteo, nga madamong tinuig na nga nagaalagad kay Jehova: “Hanasa ang imo kaugalingon nga ang imo tulumuron amo ang diosnon nga debosyon.” (1 Timoteo 4:7) Ang debosyon nagagikan sa tagipusuon nga puno sing pasalamat sa isa nga ginapatuhuyan sang debosyon. Ang “diosnon nga debosyon” nagapabutyag sing daku nga pagtahod kay Jehova. Nagapakita ini sing mahigugmaon nga pagkasuod sa iya bangod sang daku nga pagpabalor sa iya kag sa iya mga dalanon. Bangod sini, luyag man naton nga tahuron sing daku sang tanan ang iya ngalan. Dapat naton palambuon ang diosnon nga debosyon sa aton kabuhi agod makalakat kita sa ngalan ni Jehova, ang lamang matuod nga Dios, sa walay katubtuban.​—Salmo 37:4; 2 Pedro 3:11.

15. Paano naton mahatag sa Dios ang aton eksklusibo nga debosyon?

¹⁵ Agod maalagad ang Dios sing kalahamut-an, dapat naton ihatag sa iya ang bug-os nga pagsimba, kay sia “isa ka Dios nga nagapatuman sing eksklusibo nga debosyon.” (Exodo  20:5) Indi naton mahigugma ang Dios kag sa amo man nga tion ginahigugma ang malauton nga kalibutan nga si Satanas ang dios. (Santiago 4:4; 1 Juan 2:15-17) Nakahibalo gid si Jehova kon ano nga sahi sang pagkatawo ang ginatinguhaan sang kada isa sa aton. (Jeremias 17:10) Kon ginahigugma gid naton ang pagkamatarong, makita niya ina kag buligan niya kita nga mabatas ang aton adlaw-adlaw nga mga pagtilaw. Sa pagsakdag sa aton paagi sa iya gamhanan nga balaan nga espiritu, buligan niya kita nga madaug ang kalautan nga lapnag gid sa sining kalibutan. (2 Corinto 4:7) Buligan man niya kita nga mahuptan ang aton malig-on nga paglaum nga mabuhi sing walay katapusan sa paraiso nga duta. Daw ano ini katahom nga palaabuton! Dapat magpasalamat gid kita sa sini kag kinabubut-on nga alagaron ang matuod nga Dios, si Jehova, nga nagapaposible sini.

16. Ano ang dapat mo himuon upod sa minilyon nga iban pa?

¹⁶ Minilyon ka tawo sa bug-os nga duta ang malipayon nga nagbaton sang imbitasyon sang salmista nga nagsulat: “O pakadakua ninyo si Jehova upod sa akon, kag pakataason naton sing tingob ang iya ngalan.” (Salmo 34:3) Si Jehova nagaagda sa imo nga mangin isa sang nagadamo nga kadam-an sa tanan nga pungsod nga nagahimo sini.

Repaso nga Paghinun-anon

• Ano nga sahi sang persona si Jehova? Paano kita nagabenepisyo paagi sa maathag nga paghangop sa iya mga kinaiya?

• Paano naton mabuligan ang iban nga mga tawo nga matun-an ang kamatuoran tuhoy sa Dios?

• Ano ang nadalahig sa pagkilala kay Jehova kag sa paglakat sa iya ngalan?

[Mga Pamangkot sa Pagtinuon]

 [Mga retrato sa pahina 14]

Si Jehova, sa iya daku nga gugma, ‘magahumlad sang iya kamot kag magapaayaw sa handum sang tanan nga buhi nga butang’