Kon may abyan ikaw nga imo ginadayaw kag ginatahod, ginatinguhaan mo nga mangin kaangay niya. “Maayo kag matadlong si Jehova,” siling sang Biblia. (Salmo 25:8) Agod mangin abyan sang Dios, dapat kita mangin maayo kag matadlong. Ang Biblia nagasiling: “Mangin mga manug-ilog kamo sang Dios, subong nga mga anak nga hinigugma, kag padayon nga maglakat sa gugma.” (Efeso 5:1, 2) Yari ang pila ka paagi sa paghimo sina:

Mangin mabinuligon sa iban. “Magbuhat kita sing maayo sa tanan.”—Galacia 6:10.

Magpangabudlay sing lakas. “Ang kawatan dili na magpangawat, kundi sa baylo magpangabudlay sia sing lakas, nga nagabuhat paagi sa iya mga kamot sing maayo nga buhat.”—Efeso 4:28.

Magpabilin nga matinlo sa pisikal kag sa moral. “Tinluan naton ang aton kaugalingon sang tanan nga kadagtaan sang lawas kag espiritu, nga ginahimpit ang pagkabalaan nga may kahadlok sa Dios.”—2 Corinto 7:1.

 Higugmaa kag tahura ang mga katapo sang imo pamilya. “Ang tagsatagsa sa inyo . . . maghigugma sang iya asawa subong sang iya kaugalingon; sa pihak nga bahin, ang asawa dapat man may tudok nga pagtahod sa iya bana. Mga kabataan, magmatinumanon sa inyo mga ginikanan.”—Efeso 5:33–6:1.

Magpakita sing gugma sa iban. “Padayon kita nga maghigugmaanay, kay ang gugma gikan sa Dios.”—1 Juan 4:7.

Tumana ang kasuguan sang pungsod. “Ang tagsa ka kalag magpasakop sa [panguluhan] . . . Ibayad sa tanan ang mga natungod sa ila, sa iya nga nagapangayo sing buhis, ang buhis.”—Roma 13:1, 7.