Agod mangin abyan sang Dios, dapat ikaw magtuon tuhoy sa iya. Nahibaluan bala sang imo mga abyan ang imo ngalan kag ginagamit ini? Huo. Luyag man sang Dios nga mahibaluan mo kag gamiton ang iya ngalan. Jehova ang ngalan sang Dios. (Salmo 83:18; Mateo 6:9) Dapat mo man mahibaluan kon ano ang iya mga naluyagan kag wala naluyagan. Dapat mo man mahibaluan kon sin-o ang iya mga abyan kag kon sin-o ang iya mga kaaway. Kinahanglan ang tion agod makilala ang isa ka tawo. Ang Biblia nagasiling nga maalamon nga magpain sing tion sa pagtuon tuhoy kay Jehova.—Efeso 5:15, 16.

Ginahimo sang mga abyan sang Dios kon ano ang kalahamut-an sa iya. Binagbinaga ang imo mga abyan. Kon indi maayo ang ginapakita mo sa ila kag ginahimo mo ang mga butang nga ginakaugtan nila, makig-abyan pa bala sila sa imo? Sa pagkamatuod indi! Gani man, kon luyag mo mangin abyan sang Dios, dapat mo himuon kon ano ang kalahamut-an sa iya.—Juan 4:24.

Indi tanan nga relihion nagadul-ong sa pagpakig-abyan sa Dios. Si Jesus, nga amo ang pinakasuod nga abyan sang Dios, naghambal tuhoy sa duha ka dalan. Ang isa ka dalan malapad kag madamo sing tawo. Ina nga dalan nagadul-ong sa kalaglagan. Ang isa pa ka dalan makitid kag pila lamang ka tawo ang nagalakat sa sini. Ina nga dalan nagadul-ong sa kabuhi nga walay katapusan. Nagakahulugan ini nga kon luyag mo mangin abyan sang Dios, dapat mo tun-an ang husto nga paagi sa pagsimba sa iya.—Mateo 7:13, 14.