Kon luyag mo mangin abyan sang Dios, dapat mo buhaton ang relihion nga ginakahamut-an sang Dios. Si Jesus nagsiling nga “ang matuod nga mga sumilimba” magasimba sa Dios nahisanto sa “kamatuoran.” (Juan 4:23, 24) Isa lamang ang husto nga paagi sa pagsimba sa Dios. (Efeso 4:4-6) Ang matuod nga relihion nagadul-ong sa kabuhi nga walay katapusan, kag ang butig nga relihion nagadul-ong sa kalaglagan.—Mateo 7:13, 14.

Makilala mo ang matuod nga relihion paagi sa pagpanilag sa mga tawo nga nagabuhat sini. Sanglit si Jehova maayo, ang iya matuod nga mga sumilimba dapat mangin maayo nga mga tawo. Subong nga ang maayo nga puno sang kahil nagapamunga sing maayo nga mga kahil, ang matuod nga relihion nagapamunga sing maayo nga mga tawo.—Mateo 7:15-20.

Ang mga abyan ni Jehova may tudok nga pagtahod sa Biblia. Nahibaluan nila nga ang Biblia gikan sa Dios. Ginatugutan nila ang ginasiling sini nga magtuytoy sa ila kabuhi, maglubad sang ila mga palaligban, kag magbulig sa ila sa pagtuon tuhoy sa Dios. (2 Timoteo 3:16) Nagatinguha sila nga iaplikar ang ila ginabantala.

 Ang mga abyan ni Jehova nagapakita sing gugma sa isa kag isa. Si Jesus nagpakita sing gugma sa katawhan paagi sa pagtudlo sa ila tuhoy sa Dios, paagi sa pag-ayo sa mga nagbalatian. Ang mga nagabuhat sang matuod nga relihion nagapakita man sing gugma sa iban. Kaangay ni Jesus, wala nila ginapakanubo ang mga imol ukon ang tuhay nga rasa. Si Jesus nagsiling nga makilala sang katawhan ang iya mga disipulo paagi sa gugma nga ginapakita nila sa isa kag isa.—Juan 13:35.

Ang mga abyan sang Dios nagapadungog sa ngalan sang Dios, nga Jehova. Kon ang isa ka tawo indi luyag maggamit sang imo ngalan, sia bala suod mo nga abyan? Indi! Kon may abyan kita, ginagamit naton ang iya ngalan kag nagahambal kita sing maayong mga butang tuhoy sa sina nga abyan sa iban. Gani ang mga tawo nga luyag mangin mga abyan sang Dios dapat maggamit sang iya ngalan kag maghambal tuhoy sa iya sa iban. Luyag ni Jehova nga himuon naton ina.—Mateo 6:9; Roma 10:13, 14.

Kaangay ni Jesus, ang mga abyan sang Dios nagatudlo sa mga tawo tuhoy sa Ginharian sang Dios. Ang Ginharian sang Dios amo ang langitnon nga panguluhan nga magahimo sang duta nga isa ka paraiso. Ginapaambit sang mga abyan sang Dios sa iban ining maayong balita nahanungod sa Ginharian sang Dios.—Mateo 24:14.

Ang mga Saksi ni Jehova nagatinguha nga mangin mga abyan sang Dios. Ginatahod nila ang Biblia kag may gugma sa tunga nila. Ginagamit man nila kag ginapadunggan ang ngalan sang Dios kag nagapanudlo sa iban nahanungod sa Ginharian sang Dios. Ginabuhat sang mga Saksi ni Jehova ang matuod nga relihion sa duta karon.