Makatuon ikaw tuhoy kay Jehova paagi sa pagbasa sing Biblia. Nagpili ang Dios sang una sing pila ka tawo agod isulat ang iya mga panghunahuna. Yadtong mga sinulatan ginatawag nga Biblia. Sa karon makatuon kita tuhoy sa Dios paagi sa pagbasa sing Biblia. Bangod ang Biblia nagaunod sang pulong ukon mensahe ni Jehova, ginatawag man ini nga Pulong sang Dios. Mapatihan naton ang ginasiling sang Biblia bangod si Jehova wala gid nagabutig. “Imposible nga magbutig ang Dios.” (Hebreo 6:18) Ang Pulong sang Dios nagaunod sing kamatuoran.—Juan 17:17.

Ang Biblia isa sang pinakahamili nga mga regalo sang Dios sa aton. Kaangay ini sang sulat gikan sa isa ka mahigugmaon nga amay para sa iya mga anak. Nagasugid ini sa aton nahanungod sa saad sang Dios nga himuon ang duta nga isa ka matahom nga duog puy-an—isa ka paraiso. Nagasugid ini sa aton kon ano ang iya nahimo sang nagligad, kon ano ang ginahimo niya karon, kag kon ano ang himuon niya sa palaabuton para sa iya matutom nga mga anak. Nagabulig man ini sa aton sa paglubad sang aton mga problema kag kon paano matigayon ang kalipay.—2 Timoteo 3:16, 17.

 Ang mga Saksi ni Jehova mga abyan sang Dios; buligan ka nila nga mahangpan kon ano ang ginatudlo sang Biblia. Sugiri lamang sila nga luyag mo magtuon sa Biblia. Wala sila nagapabayad. (Mateo 10:8) Dugang pa, makatambong ikaw sa Cristianong mga miting. Ginahiwat ini sa mga duog sang pagsimba nga ginatawag Kingdom Hall. Kon magtambong ka sa Cristianong mga miting, madasig nga magadamo ang imo nahibaluan sa Dios.

Makatuon ka tuhoy sa Dios gikan sa mga butang nga nahimo niya. Halimbawa, ang Biblia nagasiling: “Gintuga sang Dios ang mga langit kag ang duta.” (Genesis 1:1) Sang gintuga ni Jehova “ang mga langit,” ginhimo niya ang adlaw. Karon ano ang ginasugid sina sa aton tuhoy sa Dios? Nagasugid ini sa aton nga si Jehova may daku nga gahom. Sia lamang ang makahimo sing butang nga subong ka gamhanan sa adlaw. Nagasugid man ini sa aton nga si Jehova maalam, kay kinahanglan ang kaalam sa pagtuga sing adlaw, nga nagahatag sing init kag kapawa kag wala gid nagakapalong.

Ang mga tinuga ni Jehova nagapakita nga ginahigugma niya kita. Hunahunaa ang tanan nga sahi sang mga prutas nga yari sa duta. Mahimo nga isa lamang ka sahi sang prutas ang ihatag sa aton ni Jehova—ukon wala gid. Sa baylo, ginhatagan kita ni Jehova sing madamo nga sahi sang prutas nga may nanuhaytuhay nga mga korte, kadakuon, duag, kag sabor. Nagapakita ini nga si Jehova isa ka Dios nga indi lamang mahigugmaon kundi maalwan kaayo kag madinumdumon kag mainayuhon.—Salmo 104:24.