Ang pag-abyanay napasad sa gugma. Samtang nagadugang ang imo nahibal-an kay Jehova, nagadaku man ang imo gugma sa iya. Samtang nagabaskog ang imo gugma sa Dios, nagabaskog man ang imo handum nga mag-alagad sa iya. Magapahulag ini sa imo nga mangin disipulo ni Jesucristo. (Mateo 28:19) Paagi sa pagbuylog sa malipayon nga pamilya sang mga Saksi ni Jehova, maeksperiensiahan mo ang pagpakig-abyan sang Dios sing dayon. Ano ang imo dapat himuon?

Dapat mo ipakita ang imo gugma sa Dios paagi sa pagtuman sang iya mga sugo. “Amo ini ang kahulugan sang gugma sa Dios, nga sundon naton ang iya mga sugo; apang ang iya mga sugo indi makapabug-at.”—1 Juan 5:3.

Iaplikar ang imo matun-an. Nagsugid si Jesus sing isa ka sugilanon nga nagailustrar sini. Ang isa ka maalam nga tawo nagtukod sang iya balay sa ibabaw sang igang. Ang isa ka buangbuang nga tawo nagtukod sang iya balay sa ibabaw sang balas. Sang mag-abot ang isa ka mabaskog nga bagyo, ang balay nga gintukod sa ibabaw sang igang wala mapukan, apang ang balay nga gintukod sa ibabaw sang balas napukan. Si Jesus nagsiling nga ang mga tawo nga nagapamati sa iya mga panudlo kag nagahimo sini kaangay sang maalam nga tawo nga nagtukod sa ibabaw sang igang. Apang ang mga tawo nga nagapamati sa iya mga panudlo kag wala nagahimo sini kaangay sang buangbuang nga tawo nga nagtukod sa ibabaw sang balas. Sin-o nga tawo ang luyag mo ilugon?—Mateo 7:24-27.

 Pagdedikar. Nagakahulugan ini nga magapalapit ka kay Jehova sa pangamuyo kag sugiran sia nga luyag mo himuon ang iya kabubut-on sing dayon. Ang paghimo sang kabubut-on sang Dios nagapakita nga ikaw isa ka disipulo ni Jesucristo.—Mateo 11:29.

Bawtismo. “Magpabawtismo kag manghugas sang imo mga sala paagi sa pagtawag sa iya ngalan.”—Binuhatan 22:16.

Mag-alagad sing bug-os sa Dios. “Bisan ano ang inyo himuon, himua ninyo ini sing bug-os tagipusuon subong nga kay Jehova, kag indi nga sa mga tawo.”—Colosas 3:23.