Indi pagtugutan ni Jehova ang malain nga mga tawo nga gub-on ang Paraiso. Mga abyan lamang niya ang magapuyo didto. Ano ang matabo sa malain nga mga tawo? Agod mahibaluan ang sabat, binagbinaga ang matuod nga sugilanon ni Noe. Nagkabuhi si Noe sang nagligad nga linibo ka tuig. Isa sia ka maayo nga tawo nga nagtinguha pirme sa paghimo sang kabubut-on ni Jehova. Apang ang iban nga mga tawo sa duta naghimo sing malain nga mga butang. Gani ginsugiran ni Jehova si Noe nga mapadala Sia sing anaw agod laglagon yadtong tanan nga malaut nga mga tawo. Ginsugo niya si Noe nga magtukod sing isa ka arka agod nga sia kag ang iya pamilya indi mapatay kon mag-abot ang Anaw.—Genesis 6:9-18.

Si Noe kag ang iya pamilya nagtukod sing arka. Ginpaandaman ni Noe ang mga tawo nga ang Anaw magaabot, apang wala sila mamati sa iya. Nagpadayon sila sa paghimo sing malain nga mga butang. Sang matapos na ang arka, ginpasulod ni Noe ang mga sapat sa arka, kag sia kag ang iya pamilya nagsulod man. Nian nagpadala si Jehova sing isa ka mabaskog nga bagyo. Nag-ulan sing 40 ka adlaw kag 40 ka gab-i. Nag-anaw ang bug-os nga duta.—Genesis 7:7-12.

 Napatay ang malaut nga mga tawo, apang naluwas si Noe kag ang iya pamilya. Ginluwas sila ni Jehova sa Anaw padulong sa isa ka duta nga natinluan sa kalautan. (Genesis 7:22, 23) Ang Biblia nagasiling nga magaabot liwat ang tion nga laglagon ni Jehova ang mga nagapangindi sa paghimo sang kon ano ang husto. Ang maayo nga katawhan indi paglaglagon. Magakabuhi sila sing dayon sa Paraiso nga duta.—2 Pedro 2:5, 6, 9.

Madamo nga tawo karon ang nagahimo sing malain nga mga butang. Ang kalibutan puno sing kagamo. Ginapadala ni Jehova ang iya mga Saksi sa liwat kag liwat agod paandaman ang mga tawo, apang ang kalabanan indi luyag mamati sa mga pulong ni Jehova. Indi nila luyag magbag-o. Wala nila ginabaton ang ginasiling sang Dios tuhoy sa kon ano ang husto kag sayop. Ano ang mahanabo sa sining mga tawo? Magabag-o ayhan sila sa pila ka adlaw? Madamo ang indi na gid magbag-o. Magaabot ang tion nga ang malaut nga mga tawo pagalaglagon kag indi na gid mabuhi liwat.—Salmo 92:7.

Ang duta indi paglaglagon; himuon ini nga isa ka paraiso. Ang mga abyan sang Dios magakabuhi sing dayon sa Paraiso sa duta.—Salmo 37:29.