NAKITA mo nga nagasanag ang mata sang imo Bible study samtang ginaintiende niya ang kahulugan sang teksto nga ginbasa ninyo. Dayon nagsiling sia, “Buot mo silingon ginatudlo sang Biblia nga mabuhi kita sa Paraiso sing walay katapusan—diri mismo sa duta?” Ang imo partner nagyuhum kag nagsiling, “Ti, ano bala ang nabasa mo sa Biblia?” Daw indi makapati nga naglungolungo ang Bible study, kag nagsiling, “Ngaa wala ko ni ’ya nabal-an man?” Nadumduman mo nga amo man sini ang iya ginsiling mga pila ka semana ang nagligad, sang natun-an niya nga ang ngalan sang Dios Jehova.

Natabo man bala ini sa imo? Madamo nga alagad sang Dios ang nakaeksperiensia sini. Kon kaisa nagakalipatan naton nga ginhatagan kita sing hamili nga regalo—ang ihibalo sa kamatuoran! Pamensara sing makadali: Paano nakalab-ot sa imo ini nga regalo? Binagbinagon naton sa sini nga seksion ina nga pamangkot. Ang amat-amat nga pagbaton sang katawhan sang Dios sang espirituwal nga kasanag isa ka maathag nga ebidensia nga matuod gid ang Ginharian sang Dios. Sa sulod sang mga isa ka gatos ka tuig, ginasiguro gid sang Hari sini, nga si Jesucristo, nga ang katawhan sang Dios matudluan sang kamatuoran.