NAGPUKSI ka sing mansanas. Ginsimhutan mo ang kahamot sini kag gindugang sa mga mansanas sa imo basket. Inoras ka na nga nagapangabudlay pero daw wala ka pa gihapon ginakapoy. Ang imo iloy ara lang sa pihak nga kahoy nga nagaistorya sa iban ninyo nga paryente kag mga abyan nga nagapangdugos man. Kahoben sa iya tulukon—nadumduman mo nga amo sini ang iya hitsura sang gamay ka pa. Daw indi ka makapati nga nakita mo sia anay nga nagtigulang sa daan nga kalibutan nga madugay na nga naglipas. Nakita mo sia nga nagbalatian, ginkaptan mo ang iya kamot sang nabugtuan sia sang ginhawa, kag naghaya ka sa iya lulubngan. Pero tan-awa sia, buhi kag mapagros pareho sa inyo tanan!

Ina nga tion magaabot gid. Nakahibalo kita bangod ang mga saad sang Dios wala gid nagakapaslawan. Sa sini nga seksion, binagbinagon naton kon paano matuman ang pila ka saad sang Ginharian sa malapit na lang nga palaabuton, nga magadul-ong sa inaway sang Armageddon. Repasuhon man naton ang pila ka makakulunyag nga saad sang Ginharian nga matuman pagkatapos sini. Nalipay gid kita nga makita ang tion nga ang Ginharian sang Dios magagahom na sa bug-os nga duta kag magahimo nga bag-o sang tanan nga butang!