1, 2. (a) Ngaa indi mahapos kon kaisa makita nga matuod gid ang Paraiso? (b) Ano ang makabulig sa aton para mapalig-on ang aton pagtuo sa mga saad sang Dios?

 NAG-ABOT ang isa ka matutom nga brother sa miting nga kapoy gid sa trabaho. Ginapabudlayan sia sang iya amo nga mabudlay pahamut-an, na-stress sia bangod sang kabudlay sa pag-aman sa iya pamilya, kag nabalaka sia bangod may balatian ang iya asawa. Pero sang nagtokar na ang nagabukas nga ambahanon, nakaginhawa sia sing masulhay kag nalipay nga ara sia sa Kingdom Hall upod sa iya mga kauturan. Ang kanta parte sa paglaum nga kabuhi sa paraiso, kag ang liriko sini nagasiling nga handurawon niya ina nga paglaum, kag hunahunaon nga ato na sia didto. Nanamian gid sia sa sini nga ambahanon, kag samtang ginakanta niya ini upod sa iya pamilya, ang paglaum naglugpay sa iya nabalaka nga tagipusuon.

² Nakabatyag ka na bala sini? Naagihan na ini sang kalabanan sa aton. Pero bangod sa kabudlay sang kabuhi sa sining daan nga sistema, kon kaisa indi mahapos makita nga matuod gid ang Paraiso. Ari kita sa “makahalanguyos nga mga tion nga mabudlay atubangon,” kag ang kalibutan nga aton ginapuy-an daw ka layo gid sa paraiso. (2 Tim. 3:1) Ano ang makabulig sa aton nga makita nga matuod gid ang aton paglaum? Paano naton nahibaluan nga malapit na gamhan sang Ginharian sang Dios ang tanan nga katawhan? Binagbinagon naton ang pila ka tagna halin kay Jehova nga nakita sang iya katawhan nga natuman sang una. Dayon repasuhon naton kon paano ini kag ang kaanggid nga mga tagna nagakatuman subong. Sa katapusan, bangod napalig-on na ang aton pagtuo, binagbinagon naton kon ano ang kahulugan sini nga mga tagna sa aton palaabuton.

3. Ano nga saad ang nagpalig-on sa mga Judiyo nga gintapok sa Babilonia?

³ Handurawa ang kabuhi sang mga Judiyo nga natapok sa Babilonia sang ikan-om nga siglo B.C.E. Madamo sa ila ang didto na nagdaku, pareho sang ila mga ginikanan, kag mabudlay gid ang kabuhi. Ginayaguta sila sang mga Babilonianhon bangod sang ila pagtuo kay Jehova. (Sal. 137:1-3) Sa sulod sang mga dekada, ginahuptan sang mainunungon nga mga Judiyo ining masanag nga paglaum: Nagsaad si Jehova nga ibalik niya sila sa ila dutang  natawhan. Nagsiling sia nga manami ang kahimtangan didto. Ginpaanggid pa gani niya ang ginpasag-uli nga Juda sa hardin sang Eden—isa ka paraiso! (Basaha ang Isaias 51:3.) Ini nga mga saad gintuyo para pasaligon ang katawhan sang Dios kag para madula ang kabalaka sa ila tagipusuon. Paano? Binagbinaga ang pila ka espesipiko nga tagna.

4. Paano ginpasalig ni Jehova ang mga Judiyo nga may seguridad sa ila dutang natawhan?

⁴ Seguridad. Ang mga gintapok magabalik, indi sa literal nga paraiso, kundi sa malayo nga lugar nga nahapay sa sulod sang 70 ka tuig, nga diutay lang sa ila ang nakakita. Sadto kinaandan ang mga leon, subong man mga lobo, leopardo, kag iban pa nga manunukob. Ang isa ka ulo sang pamilya mahimo mamangkot, ‘Paano ko masiguro ang kaluwasan sang akon asawa kag kabataan? Kamusta naman ang akon mga karnero kag mga baka—paano ko sila maamligan?’ Natural lamang ini nga mga kabalaka. Dayon, hunahuna ang saad sang Dios sa Isaias 11:6-9 kag kon daw ano ini ka makalulugpay. (Basaha.) Paagi sa sining mabinalaybayon nga tinaga, ginpasalig ni Jehova ang mga tinapok nga amligan sila kag ang ila mga sapat. Ang leon magahalab sing dagami sa kahulugan nga indi sini pagkaunon ang mga baka sang mga Judiyo. Ang mga matutom indi dapat mahadlok sa ila. Nagsaad si Jehova nga ang iya katawhan maamligan sa napasag-uli nga duta sang Juda, bisan pa sa kamingawan kag sa kagulangan.—Ezeq. 34:25.

5. Ano nga mga tagna ang nakabulig sa mga nagbalik nga tinapok nga magsalig nga amanan sila sing bugana ni Jehova sang ila mga kinahanglanon?

⁵ Kabuganaan. May iban pa nga mahimo kabalak-an. ‘Mapakaon ko bala ang akon pamilya sa napasag-uli nga duta? Diin kami maistar? May obra bala ako didto, kag mas maayo bala ini sangsa magkabuhi nga tinapok sa idalom sang kontrol sang mga nagsakop sa amon?’ Paagi sa gin-inspirar nga mga tagna, ginsabat man ini ni Jehova. Nagsaad si Jehova nga makasalig ang mga matutom sa ulan; subong resulta, ang duta magapatubas sing “bugana kag masustansia” nga tinapay. (Isa. 30:23) Parte naman sa puluy-an kag trabaho, nagsaad si Jehova: “Magapatindog sila sing balay kag magapuyo sa sini, kag magatanom sila sing mga ulubasan kag magakaon sang bunga sini. Indi sila magpatindog kag iban ang magapuyo, ukon magtanom kag iban ang magakaon.” (Isa. 65:21, 22) Huo, mangin mas maayo gid ang ila kabuhi sangsa tinapok sila sa pagano nga Babilonia. Apang kamusta naman ang ila mas serioso nga problema—ang rason kon ngaa gintapok sila?

6. Ano nga balatian ang madugay na nga ginaantos sang katawhan sang Dios, kag ano ang ginpasalig ni Jehova sa nagbalik nga tinapok?

⁶ Espirituwal nga kapagros. Antes sila gintapok, ang katawhan sang Dios nagbalatian sa espirituwal. Si Jehova nagsiling sa iya katawhan paagi kay manalagna Isaias: “Ang bug-os nga ulo puno sang pilas, kag ang bug-os nga tagipusuon balatianon.” (Isa. 1:5) Bulag sila kag bungol sa espirituwal, kag wala nila ginapamatian ang laygay ni Jehova kag ginapiyong nila ang ila mata sa kasanagan nga ginahatag niya. (Isa. 6:10; Jer. 5:21; Ezeq. 12:2) Kon ini nga mga problema matabo man sa nagbalik nga mga tinapok, ano ang ila kasiguruhan? Madula ayhan nila liwat ang kahamuot ni Jehova? Makapalig-on gid ang saad ni Jehova: “Sa sina nga  adlaw, ang mga bungol makabati sa ginabasa sa libro, kag bisan sa kadulom makakita ang mga mata sang mga bulag.” (Isa. 29:18) Huo, ayuhon ni Jehova sa espirituwal ang iya gindisiplina kag naghinulsol nga katawhan. Basta magpabilin sila nga mabinatunon kag matinumanon, amanan sila ni Jehova sing nagahatag-kabuhi nga panuytoy kag kasanagan.

7. Paano natuman ang mga saad sang Dios sa iya tinapok nga katawhan, kag ngaa makapalig-on gid sang pagtuo ang katumanan sini?

⁷ Gintuman bala ni Jehova ang iya mga saad? Makita naton ang sabat sa kasaysayan. Ang mga Judiyo nga nagbalik sa ila dutang natawhan nakaagom sing seguridad, kabuganaan, kag espirituwal nga kapagros. Halimbawa, gin-amligan sila ni Jehova sa ila mga kaingod nga mas makusog kag mas madamo sangsa ila. Wala naubos sang mga manunukob ang ila mga sapat. Huo, ang nakita sang mga Judiyo limitado lamang nga katumanan sang mga tagna parte sa paraiso nga ginsulat nanday Isaias, Jeremias, kag Ezequiel—pero ang katumanan nga nakita sang katawhan sang Dios makakulunyag kag amo gid ang ila kinahanglan sadto. Samtang ginabinagbinag naton ang ginhimo ni Jehova para sa iya katawhan sang una, magabakod pa gid ang aton pagtuo. Kon ang una kag limitado nga katumanan sini nga tagna makakulunyag na, ano pa ayhan ang mas daku sini nga katumanan? Binagbinaga kon ano ang ginhimo ni Jehova para sa aton subong.

8. Ano nga sahi sang “duta” ang ginapuy-an sang katawhan sang Dios subong?

⁸ Ang katawhan ni Jehova subong indi na isa ka literal nga pungsod, nga nagapuyo sa isa lang ka lugar. Kundi, ang hinaplas nga mga Cristiano nagahuman sang isa ka espirituwal nga pungsod, ang “Israel sang Dios.” (Gal. 6:16) Ang “iban nga mga karnero” nagaupod sa ila sa isa ka espirituwal nga “duta,” isa ka malaragwayon nga lugar diin ginasimba nila si Jehova nga Dios sing nahiusa. Ina nga pagsimba amo ang ila paagi sang pagkabuhi. (Juan 10:16; Isa. 66:8) Kag ano nga sahi sang “duta” ang ginhatag ni Jehova sa aton? Isa ini ka espirituwal nga paraiso. Diri ang mga saad sang Dios parte sa kaangay-paraiso nga kahimtangan nagakatuman sa espirituwal nga paagi. Binagbinaga ang pila ka halimbawa.

9, 10. (a) Paano nagakatuman subong ang tagna sa Isaias 11:6-9? (b) Ano nga pamatuod sang paghidait ang makita naton sa katawhan sang Dios?

⁹ Seguridad. Ginapakita sang tagna sa Isaias 11:6-9, kon paano ang mabangis nga mga sapat kag ang mga tawo upod ang ila mga hinuptanan may paghidait sa isa kag isa. Nagakatuman bala ini sa espirituwal subong? Huo! Sa bersikulo 9, matun-an naton nga ining mga tinuga indi na manghalit ukon mangguba: “Bangod ang duta mapuno sang ihibalo tuhoy kay Jehova kaangay sang tubig nga nagahil-ob sa dagat.” Ginabag-o bala sang “ihibalo tuhoy kay Jehova” ang batasan sang mga sapat? Wala, ang ginabag-o sini amo ang mga tawo nga nakakilala sa Labing Mataas nga Dios kag nagailog sa iya mahidaiton nga mga dalanon. Amo sini kon ngaa makita naton subong sa aton espirituwal nga  paraiso ang makapalig-on nga katumanan sinang tagna. Sa idalom sang paggahom sang Ginharian, natun-an sang mga sumulunod sang Cristo nga dulaon ang ila mabangis, sapatsapaton nga mga kinaiya kag magkabuhi sing mahidaiton upod sa ila espirituwal nga mga kauturan.

¹⁰ Halimbawa, ginbinagbinag naton sa sini nga publikasyon ang parte sa Cristianong neutralidad—lakip ang basihan sa Kasulatan sang aton paghangop kag ang paghingabot sa katawhan sang Dios bangod sang ila neutral nga panindugan. Indi bala dalayawon gid nga bisan sa sining masingki nga kalibutan, may isa ka “pungsod” sang mga tawo nga indi gid maghimo sing bisan ano nga kasingki bisan pa patyon sila? Pamatuod gid ini nga ang mga sakop sang Mesianikong Hari nagaagom karon sing paghidait nga ginalaragway ni Isaias! Nagsiling si Jesus nga ang iya mga sumulunod makilal-an bangod sa gugma sa isa kag isa. (Juan 13:34, 35) Sa sulod sang kongregasyon, mapinasensiahon nga ginagamit sang Cristo ang iya “matutom kag mainandamon nga ulipon” para tudluan ang tanan nga matuod nga Cristiano nga mangin mahidaiton, mahigugmaon, kag mabuot.—Mat. 24:45-47.

11, 12. Ano nga sahi sang gutom ang ginaantos subong sang kalibutan, kag paano bugana nga ginaamanan ni Jehova ang iya katawhan?

¹¹ Kabuganaan. Ang kalibutan ginagutom sa espirituwal. Ang Biblia nagpaandam: “‘Magaabot ang tion,’ siling sang Soberanong Ginuong Jehova, ‘nga magapadala ako sing tiggulutom sa  duta, indi sing tiggulutom sa kalan-on ukon sing kauhaw sa tubig, kundi sa pagpamati sang pulong ni Jehova.’” (Amos 8:11) May gutom man bala sa mga banwahanon sang Ginharian sang Dios? Gintagna ni Jehova ang kinatuhayan sa ulot sang iya katawhan kag sa iya mga kaaway: “Ang akon mga alagad magakaon, apang kamo gutumon. Tan-awa! Ang akon mga alagad magainom, apang kamo uhawon. Tan-awa! Ang akon mga alagad magakasadya, apang kamo mahuy-an.” (Isa. 65:13) Nasaksihan mo bala ang katumanan sini?

¹² Ang espirituwal nga mga aman nagailig sa aton kaangay sang labi nga nagalapad kag labi nga nagadalom nga suba. Ang aton base sa Biblia nga mga publikasyon pati na ang mga rekording kag video; miting kag kombension; kag mga materyal sa aton Web site—nagabaha kag nagaaman sang sigesige nga espirituwal nga sustansia sa sining ginagutom sa espirituwal nga kalibutan. (Ezeq. 47:1-12; Joel 3:18) Wala ka bala nalipay nga maeksperiensiahan adlaw-adlaw ang katumanan sang saad ni Jehova nga kabuganaan sa imo kabuhi? Ginapat-od mo bala nga regular ka nga nagakaon sa lamesa ni Jehova?

13. Paano mo nasaksihan ang katumanan sang saad ni Jehova parte sa bulag nga nakakita kag bungol nga nakabati?

¹³ Espirituwal nga kapagros. Lapnag gid karon ang espirituwal nga pagkabulag kag pagkabungol. (2 Cor. 4:4) Pero ginaayo karon sang Cristo ang mga kasablagan kag balatian sa bilog nga kalibutan. Nakasaksi ka na bala sang bulag nga nakakita kag bungol nga nakabati? Kon may kilala ka nga sang una bulag kag bungol sa kamatuoran bangod sa relihioso nga kabutigan pero ginsikway ini sang nakatuon sila sang sibu nga ihibalo sa Pulong sang Dios, nasaksihan mo na ang katumanan sini nga saad: “Sa sina nga adlaw, ang mga bungol makabati sa ginabasa sa libro, kag bisan sa kadulom makakita ang mga mata sang mga bulag.” (Isa. 29:18) Kada tuig, ginatos ka libo sa bilog nga kalibutan ang ginaayo sa espirituwal. Ang kada tawo nga nagabiya sa Babilonia nga Daku kag nagasimba upod sa aton sa espirituwal nga paraiso isa ka buhi nga pamatuod nga nagakatuman gid ang mga saad ni Jehova!

14. Ano ang aton pamalandungan para mapalig-on ang aton pagtuo?

¹⁴ Makita sa kada kapitulo sini nga libro ang daku nga pamatuod nga gindala sang Cristo ang iya mga sumulunod sa matuod nga espirituwal nga paraiso sa sining tion sang katapusan. Pamalandungan naton pirme ang madamo nga pagpakamaayo sa sinang paraiso subong. Kon himuon naton ini, magabakod pa gid ang aton pagtuo sa mga saad ni Jehova sa palaabuton.

15. Paano naton masiguro nga ang duta mangin isa ka paraiso?

¹⁵ Madugay na gintuyo ni Jehova nga himuon ang bilog nga duta nga paraiso. Ginbutang niya sanday Adan kag Eva sa isa ka paraiso nga hardin, kag ginsugo sila nga pun-on ang duta kag atipanon ang tanan nga tinuga sa sini. (Gen. 1:28) Apang, ginsunod nanday Adan kag Eva si Satanas sa pagrebelde kag ginpapanubli  sa ila mga kaliwat ang pagkadihimpit, sala, kag kamatayon. Pero wala nagbag-o ang katuyuan sang Dios. Kon ang iya pulong mahambal na, indi puede nga indi ini matuman. (Basaha ang Isaias 55:10, 11.) Gani makasalig gid kita nga ang mga kaliwat nanday Adan kag Eva magapuno sa sining duta kag magadumala sini, kag magaatipan sing mahigugmaon sa mga tinuga ni Jehova sa paraiso. Sa sina nga tion, ang tagna nga ginhatag sa tinapok nga mga Judiyo parte sa paraiso matuman na sing bug-os! Binagbinaga ang masunod nga mga halimbawa.

16. Paano ginlaragway sang Biblia ang seguridad nga maagom naton sa Paraiso?

¹⁶ Seguridad. Sa katapusan, ang makalilipay nga paglaragway sa Isaias 11:6-9 matuman na sing bug-os kag sing literal. Ang mga lalaki, babayi, kag mga bata wala na sing katalagman bisan diin sila makadto. Wala na sing tawo ukon sapat nga magahalit sa ila. Imadyina kon mangin puluy-an mo na ining bug-os nga planeta, diin malangoy mo ang mga suba, mga linaw, kag mga dagat; mataklad ang mga kabukiran; kag malagaw ang mga wayang nga wala sing katalagman. Sa gab-i, indi ka na mahadlok. Ang Ezequiel 34:25 matuman na, agod mangin posible para sa katawhan sang Dios nga “magaistar . . . sing malinong sa kamingawan kag magatulog sa kagulangan.”

17. Ngaa masiguro naton nga iaman sing bugana ni Jehova ang aton mga kinahanglanon kon maggahom na ang Ginharian sang Dios sa bug-os nga duta?

¹⁷ Kabuganaan. Handurawa ang tion nga wala na sing kaimulon, malnutrisyon, gutom, ukon mga ahensia para sa mga imol. Ang kabuganaan sa espirituwal sang katawhan sang Dios karon isa ka garantiya nga busgon sang Mesianikong Hari ang iya mga sakop sa tanan nga aspekto. Sang ari si Jesus sa duta, ginpakita niya sa gamay nga kasangkaron nga sarang niya tumanon ining mga saad, kay ginpakaon niya ang linibo ka gutom nga tawo paagi lamang sa pila ka tinapay kag isda. (Mat. 14:17, 18; 15:34-36; Mar. 8:19, 20) Kon maggahom na ang Ginharian sang Dios sa bug-os nga duta, ang mga tagna kaangay sini matuman na sing literal: “Magapaulan ang Dios sa binhi nga ginsab-ug mo sa duta, kag ang tinapay nga ipatubas sang duta mangin bugana kag masustansia. Sa sina nga adlaw, ang inyo kasapatan magahalab sa malapad nga halalban.”—Isa. 30:23.

18, 19. (a) Ano ang kahulugan sa imo sang tagna sa Isaias 65:20-22? (b) Sa ano nga kahulugan ang aton mga adlaw “mangin kaangay sang mga adlaw sang kahoy”?

¹⁸ Subong madamo nga tawo ang wala na nagalaum nga makatigayon pa sing komportable nga puluy-an ukon makakita sing manami kag makalilipay nga trabaho. Sa sining garuk nga sistema, madamo ang nagabatyag nga sobra ang ila pagpangabudlay pero diutay lamang ang mabaton sang ila pamilya, samtang ang mga manggaranon kag mga sakon, amo ang nagapaayaw. Imadyina ang kahimtangan kon ining tagna matuman na sa bilog nga kalibutan: “Magapatindog sila sing balay kag magapuyo sa sini, kag magatanom sila sing mga ulubasan kag magakaon sang bunga sini. Indi sila magpatindog kag iban ang magapuyo, ukon magtanom kag iban ang magakaon. Kay ang mga adlaw sang akon katawhan mangin kaangay sang mga adlaw sang kahoy, kag ang akon mga pinili magakalipay sa binuhatan sang ila kamot.”—Isa. 65:20-22.

 ¹⁹ Sa ano nga kahulugan ang aton mga adlaw “mangin kaangay sang mga adlaw sang kahoy”? Kon magtindog ka sa tupad sang daku nga kahoy, nahalawhaw ka bala samtang ginapensar mo kon daw ano na ayhan kalawig ang kabuhi sini—ayhan nagaluntad na ini antes pa natawo ang imo kalolohan? Mahimo mapensaran mo man nga kon magpabilin ka nga indi himpit, patay ka na pero ining kahoy buhi gihapon, kag padayon ini nga magaluntad sing malinong samtang ikaw handumanan na lang. Pero maluluy-on gid si Jehova nga nagapasalig sa aton nga sa Paraiso, ang aton mga adlaw mangin malawig kag malinong! (Sal. 37:11, 29) Maabot ang tion nga bisan ang malawig sing kabuhi nga kahoy mangin kaangay na lang sa hilamon, nga nagatubo kag nagakapatay samtang kita padayon nga nagakabuhi sing walay katapusan!

20. Paano maagom sang mainunungon nga mga sakop sang Ginharian ang himpit nga panglawas?

²⁰ Himpit nga panglawas. Sa karon, ang balatian kag kamatayon nagaapektar sa tanan. Sa isa ka kahulugan, tanan kita nagamasakit—may balatian nga ginatawag nga sala. Ang lamang nga bulong amo ang halad-gawad sang Cristo. (Roma 3:23; 6:23) Sa Isa ka Libo ka Tuig nga Paggahom, iaplikar sing bug-os ni Jesus kag sang iya kaupod nga mga manuggahom ang mga benepisyo sina nga halad kag amat-amat nga dulaon ang halit sang sala sa matutom nga mga tawo. Ang tagna ni Isaias matuman sing bug-os: “Wala sing pumuluyo nga magasiling: ‘Nagamasakit ako.’ Ang katawhan nga nagapuyo sa duta napatawad na sa ila sala.” (Isa. 33:24) Imadyina ang tion nga wala na sing bulag, bungol, ukon piang. (Basaha ang Isaias 35:5, 6.) Wala sing balatian nga indi mabulong ni Jesus—pisikal man, mental, ukon emosyonal. Maagom na sang mainunungon nga mga sakop sang Ginharian ang himpit nga panglawas!

21. Ano ang matabo sa kamatayon, kag ngaa makalulugpay sa imo ini nga saad?

²¹ Pero kamusta naman ang kamatayon—ang resulta sang balatian kag indi malikawan nga resulta sang sala? Amo ini ang aton “katapusan nga kaaway,” ang kaaway nga pagaatubangon sang tanan nga indi himpit nga tawo pero indi nila madaug. (1 Cor. 15:26) Indi man bala madaug ni Jehova ang kamatayon? Talupangda ang tagna ni Isaias: “Dulaon niya sing dayon ang kamatayon, kag pahiran sang Soberanong Ginuong Jehova ang luha sa tanan nga nawong.” (Isa. 25:8) Mahanduraw mo bala ina nga tion? Wala na sing lubong, patyo, ukon luha sang kasubo! Sa baylo—may mga luha sang kalipay samtang ginatuman ni Jehova ang iya makakulunyag nga saad nga banhawon ang mga patay! (Basaha ang Isaias 26:19.) Sa katapusan, ang tanan nga pilas nga gintuga sang kamatayon magaayo na.

22. Ano ang matabo kon tumanon na sang Mesianikong Ginharian ang kabubut-on sang Dios sa duta?

²² Sa katapusan sang Milenyo, tumanon sing bug-os sang Ginharian ang kabubut-on sang Dios sa duta, kag ihatag sang Cristo ang paggahom sa iya Amay. (1 Cor. 15:25-28) Ang katawhan mangin himpit na kag handa para sa katapusan nga pagtilaw kon buy-an na si Satanas. Pagkatapos sini, dugmukon sang Cristo inang malaut nga man-ug kag ang tanan sini nga sumalakdag.  (Gen. 3:15; Bug. 20:3, 7-10) Pero ang tanan nga mainunungon nga nagahigugma kay Jehova may masanag nga paglaum. Wala na kita sing makita nga mas maayo nga paglaragway sangsa mabasa naton sa Biblia. Amo ini ang saad nga ang mga matutom magaagom sing “mahimayaon nga kahilwayan sang mga anak sang Dios.”—Roma 8:21.

23, 24. (a) Ngaa sigurado gid nga matuman ang mga saad sang Dios? (b) Ano ang determinado mo nga himuon?

²³ Ini nga mga saad indi lamang paglaum, handum, ukon damgo. Ang mga saad ni Jehova sigurado gid nga matuman! Ngaa? Dumduma ang ginsiling ni Jesus nga ginbinagbinag naton sa una nga kapitulo sini nga libro. Gintudluan niya ang iya mga sumulunod nga mangamuyo kay Jehova: “Magkari ang imo Ginharian. Matuman ang imo kabubut-on sa duta subong sang sa langit.” (Mat. 6:9, 10) Ang Ginharian sang Dios indi lang imahinasyon. Matuod gid ini! Nagagahom na ini subong sa langit. Sa sulod sang isa ka siglo, gintuman sini ang mga saad ni Jehova nga makita naton sing maathag sa Cristianong kongregasyon. Gani, makasalig kita nga ang tanan nga saad ni Jehova matuman gid kon magkari na ang Ginharian sang Dios kag gamiton ang bug-os sini nga gahom para sa duta!

²⁴ Nakahibalo kita nga magakari ang Ginharian sang Dios. Nahibaluan naton nga ang tagsa ka pulong ni Jehova matuman. Ngaa? Bangod NAGAGAHOM ANG GINHARIAN SANG DIOS! Gani, dapat mamangkot ang kada isa sa aton, ‘Ginagamhan bala ako sang Ginharian?’ Kabay nga himuon naton ang aton tanan nga masarangan nga magkabuhi subong mainunungon nga mga sakop sinang Ginharian karon, agod nga makabenepisyo kita sa himpit nga paggahom sini sing walay katapusan!