PAGSULOD mo sa Kingdom Hall daw indi mo na ini makilala. Halin pa sang una, ginapabugal mo gid ini nga tinukod. Mahimo nadumduman mo ang masadya nga mga tinion sang ginatukod pa lang ninyo ini pila ka tuig na ang nagligad. Pero subong, mas labi mo ini nga ginapabugal, kay ginhimo ini nga relief center. Bangod sa halit sang bagyo kag baha sa inyo lugar, ang Komite sang Sanga nagpanghikot dayon para ang mga biktima makabaton sing pagkaon, panapton, matinlo nga tubig, kag iban pa nga kinahanglanon. Ang suplay nga bulig naareglar sing maayo. Samtang nagapila ang mga utod sa pagkuha sang ila suplay, ang kalabanan sa ila nagapamahidpahid sang ila mga luha bangod sa kalipay.

Si Jesus nagsiling nga ang pinakatalalupangdon nga tanda sang iya katawhan amo ang gugma sa isa kag isa. (Juan 13:34, 35) Sa sini nga seksion, binagbinagon naton kon paano makita ang gugma sa mga proyekto sa pagtukod kag sa pagbulig sa mga biktima sang kalamidad nga ginahimo sang mga Saksi ni Jehova. Ining gugma isa gid ka daku nga pamatuod nga nagakabuhi kita sa idalom sang paggahom ni Jesus sa Ginharian.