1, 2. Sin-o ang nagakalipay kon may ginabawtismuhan?

KON madugay ka na nga nagaalagad kay Jehova, mahimo madamo ka na sing nabatian nga pamulongpulong para sa bawtismo sa aton mga asembleya kag mga kombension. Apang bisan masunson ka na nga nagatambong sa sini nga mga okasyon, mahimo matandog gihapon ang imo balatyagon kon magtindog na ang mga kandidato sa bawtismo. Mabatyagan ang kalangkag sang mga tumalambong kag mabatian dayon ang matunog nga pinalakpak. Mahimo maglumawlumaw ang imo mga mata samtang ginatan-aw mo ang isa na naman ka grupo sang mga tawo nga nagdampig kay Jehova. Makalilipay gid ini nga tion!

² Mahimo nga pila lang ka beses sa isa ka tuig nga masaksihan naton sa aton lugar ang pagbawtismo, pero ang mga anghel may pribilehiyo nga makasaksi sini sing mas madamo nga beses. Mahanduraw mo bala kon daw ano nga “kalipay sa langit” kon makita nila ang linibo ka indibiduwal sa bug-os nga kalibutan nga nagadugang sa kitaon nga bahin sang organisasyon ni Jehova kada semana? (Lucas 15:7, 10) Wala sing duhaduha nga nalipay gid ang mga anghel nga makita ini nga pagdamo!—Hageo 2:7.

3. Ngaa nagaluyong si Satanas “subong sang nagangurob nga leon,” kag ano ang luyag niya himuon?

³ Sa kabaliskaran, akig gid si Satanas kag ang mga demonyo nga makita ang linibo nga ginabawtismuhan nga nagbiya sa  sining malaut nga kalibutan. Ngaa? Kay man, ginapabugal gid ni Satanas nga wala sing tawo nga magaalagad kay Jehova bangod sa gugma kag wala sing magapabilin nga matutom sa iya kon yara sa mabudlay nga pagtilaw. (Basaha ang Job 2:4, 5.) Gani kon may magdedikar sang iya kaugalingon kay Jehova, mapamatud-an nga butigon si Satanas. Daw subong bala nga ginatampa si Satanas sing linibo ka beses kada semana. Indi katingalahan nga “nagaluyong [sia] subong sang nagangurob nga leon, nga nagapangita sing tulukbon”! (1 Pedro 5:8) Luyag kita tukbon sining “leon” agod halitan ukon gub-on pa gani ang aton kaangtanan sa Dios.—Salmo 7:1, 2; 2 Timoteo 3:12.

4, 5. (a) Sa anong duha ka talalupangdon nga paagi ginlimitehan ni Jehova ang impluwensia ni Satanas? (b) Sa ano makasalig ang matuod nga Cristiano?

 ⁴ Bisan pa mabangis ang aton kaaway, indi kita dapat magpadala sa kahadlok. Ngaa? Bangod ginlimitehan ni Jehova ang gahom sinang “nagangurob nga leon” sa duha ka talalupangdon nga paagi. Ano ini? Una, gintagna ni Jehova nga ang “daku nga kadam-an” sang matuod nga mga Cristiano makalampuwas sa “dakung kapipit-an.” (Bugna 7:9, 14) Ang mga tagna sang Dios indi gid mapaslawan. Gani nahibaluan gid ni Satanas nga indi niya madala ang tanan nga katawhan sang Dios.

⁵ Ang ikaduha nga paagi mahibaluan naton sa sadsaran nga kamatuoran nga ginhambal sang isa ka matutom nga alagad sang Dios sang una. Si manalagna Azarias nagsiling kay Hari Asa: “Kaupod ninyo si Jehova kon padayon kamo nga mag-upod sa iya.” (2 Cronica 15:2; basaha ang 1 Corinto 10:13.) Ginapakita sang madamo nga halimbawa sang una, nga ang mga alagad sang Dios nga nagpabilin nga suod sa iya, wala gid mapatalikod ni Satanas. (Hebreo 11:4-40) Gani kon ang isa ka Cristiano karon magpabilin nga suod sa Dios, mapamatukan kag madaug pa gani niya ang Yawa. Ang Pulong sang Dios nagapasalig gid sa aton: “Pamatuki ang Yawa, kag magapalagyo sia sa inyo.”—Santiago 4:7.

6. Paano nagapakig-away si Satanas sa indibiduwal nga mga Cristiano?

⁶ Si Satanas indi gid magdaug sa inaway, apang may mabiktima sia sa aton subong indibiduwal kon indi kita magbantay. Nahibaluan ni Satanas nga kon magluya ang aton kaangtanan kay Jehova mahimo niya kita mabiktima. Paano ini ginahimo ni Satanas? Paagi sa pagsalakay sa aton sing mapintas, sing personal, kag sing mapahituon. Binagbinagon naton ining panguna nga mga paagi ni Satanas.

7. Ngaa ginasalakay sing mapintas ni Satanas ang katawhan ni Jehova?

⁷ Pagsalakay sing mapintas. Si apostol Juan nagsiling: “Ang  bug-os nga kalibutan yara sa gahom sang isa nga malauton.” (1 Juan 5:19) Ini nga pinamulong isa ka paandam para sa tanan nga matuod nga Cristiano. Bangod nabiktima na ni Satanas ang bug-os nga kalibutan sang malauton nga katawhan, mahimo na niya karon isentro kag pabaskugon ang iya pagsalakay sa mga wala pa niya mabiktima—ang katawhan ni Jehova. (Miqueas 4:1; Juan 15:19; Bugna 12:12, 17) Akig gid sia bangod nahibaluan niya nga malip-ot na lang ang iya tion. Gani ginapabudlay pa gid niya ang kahimtangan. Sa karon, nagaatubang kita sa katapusan kag mapintas nga pagsalakay ni Satanas agod gub-on ang aton kaangtanan sa Dios.

8. Ano ang buot silingon ni apostol Pablo sang nagsiling sia nga “nagapakig-away” kita batok sa malaut nga mga espiritu?

⁸ Pagsalakay sing personal. Ginpaandaman ni apostol Pablo ang iya mga masigka-Cristiano: “Nagapakig-away [“nagapakigdumog,” footnote] kita, . . . batok sa puersa sang malaut nga mga espiritu sa langitnon nga mga lugar.” (Efeso 6:12) Ngaa naggamit si Pablo sing termino nga “nagapakig-away”? Bangod nagapahangop ini sing manomano nga away. Gani ginpadaku diri ni Pablo nga ang kada isa sa aton nagapakig-away sing personal sa malaut nga mga espiritu. Lapnag man ukon indi ang pagpati sa malaut nga mga espiritu sa lugar nga ginaistaran naton, dapat naton dumdumon nga sang gindedikar naton ang aton kaugalingon kay Jehova, daw pareho lang nga nagsugod na kita sa pagpakigdumog. Sugod pa sang nagdedikar ang tagsa ka Cristiano nagaentra na sila sa sini nga pagpakig-away. Amo gani nga tatlo ka beses nga ginpalig-on ni Pablo ang mga Cristiano sa Efeso nga ‘magtindog sing malig-on’!—Efeso 6:11, 13, 14.

9. (a) Ngaa nagagamit si Satanas kag ang mga demonyo sing lainlain nga “tuso nga mga pahito”? (b) Ngaa ginatinguhaan ni Satanas nga impluwensiahan ang aton hunahuna, kag paano naton ini mapamatukan? (Tan-awa ang kahon nga “ Mag-andam sa Paglimbong ni Satanas!”) (c) Ano ang tuso nga pahito ni Satanas nga aton binagbinagon?

⁹ Pagsalakay sing mapahituon. Ginpalig-on ni Pablo ang mga Cristiano nga magtindog sing malig-on batok sa “tuso nga mga pahito” ni Satanas. (Efeso 6:11) Talupangda nga naggamit sia sing termino nga “mga pahito.” Nagakahulugan ini  nga indi lamang isa kundi madamo ang pahito nga ginagamit sang malaut nga mga espiritu. Ngaa? Bangod bisan pa nangin malig-on ang pila ka tumuluo sa isa ka pagtilaw, pagligad sang tion nadala sila sa lain nga pagtilaw. Gani ginapanilagan sing maayo sang Yawa kag sang mga demonyo ang paggawi sang kada isa sa aton agod mahibaluan nila ang aton kaluyahon. Dayon ginahingalitan nila ang bisan ano nga espirituwal nga kaluyahon naton. Apang nagapasalamat kita nga ginapakita sa aton sang Biblia ang madamo nga pahito sang Yawa. (2 Corinto 2:11) Sa nagligad nga mga kapitulo sini nga publikasyon, ginbinagbinag naton ini nga mga pahito subong sang siod sang materyalismo, indi maayo nga mga kaupdanan, kag seksuwal nga imoralidad. Binagbinagon naton karon ang isa pa sa tuso nga mga pahito ni Satanas—ang espiritismo.

10. (a) Ano ang espiritismo? (b) Ano ang pagtamod ni Jehova sa espiritismo, kag ano ang pagtamod mo sa sini?

¹⁰ Kon nagahimo ang isa sing espiritismo ukon demonismo, nagapakig-angot sia sa malaut nga mga espiritu. Ang pagpamakot, binabaylan, paglumay, kag pagpamangkot sa mga patay amo ang pila ka porma sang espiritismo. Subong sang nahibaluan na naton, ang espiritismo “makangilil-ad” kay Jehova. (Deuteronomio 18:10-12; Bugna 21:8) Bangod dapat man naton ‘kangil-aran ang malaut,’ indi gid nagakaigo nga makig-angot kita sa malaut nga mga espiritu. (Roma 12:9) Isa gid ini ka pagluib batok sa aton langitnon nga Amay nga si Jehova!

11. Ngaa mangin madinalag-on gid si Satanas kon madala niya kita nga makigbahin sa espiritismo? Iilustrar.

¹¹ Apang bangod ang pagtilawtilaw sa espiritismo pagluib batok kay Jehova, determinado si Satanas nga ipahimo ini sa aton. Sa tagsa ka tion nga madala ni Satanas ang isa ka Cristiano sa pagpakigbahin sa demonismo, nagamadinalag-on gid sia. Ngaa? Binagbinaga ini nga pagpaanggid: Kon makumbinsi ang isa ka soldado nga magtraidor sa iya grupo, malipay gid ang kumander sang kaaway nga grupo. Mahimo pa gani  ipadayawdayaw sang kumander ang nagtraidor, agod insultuhon ang anay kumander sining soldado. Sing kaanggid, kon ang Cristiano makigbahin sa espiritismo, kinabubut-on kag hungod niya nga ginaluiban si Jehova kag nagapasakop sia kay Satanas. Binagbinaga kon daw ano ang kalipay ni Satanas nga ipadayawdayaw ang maluib! Luyag bala naton nga magdaug ang Yawa? Indi gid! Kay indi kita maluib.

12. Ano nga paagi ang ginagamit ni Satanas agod maimpluwensiahan ang aton pagtamod tuhoy sa espiritismo?

¹² Kon ginakangil-aran naton ang espiritismo, indi gid magmadinalag-on si Satanas batok sa aton paagi sa paggamit sini. Gani nagatinguha sia nga bag-uhon ang aton panghunahuna. Paano? Nagapangita sia sing paagi nga gumunon ang panghunahuna sang mga Cristiano agod nga maghunahuna ang pila nga “ang maayo malain kag ang malain maayo.” (Isaias 5:20) Agod mahimo ini, masami nga nagagamit si Satanas sing isa sang iya epektibo nga mga paagi—ang pagpautwas sing mga pamangkot agod magtuga sing pangduhaduha.

13. Paano gingamit ni Satanas ang pagpautwas sing mga pamangkot agod magtuga sing pangduhaduha?

¹³ Talupangda kon paano ini gingamit ni Satanas sang una. Sa hardin sang Eden, ginpamangkot niya si Eva: “Matuod gid bala nga nagsiling ang Dios nga indi kamo magkaon sang bunga sang tanan nga kahoy sa hardin?” Sang panahon ni Job, sang magtipon ang mga anghel sa langit, si Satanas namangkot: “Nahadlok bala si Job sa Dios sa wala sing rason?” Sa pagsugod sang ministeryo ni Jesus sa duta, ginhangkat ni Satanas ang Cristo nga nagasiling: “Kon ikaw anak sang Dios, sugua ining mga bato nga mangin mga tinapay.” Hunahunaa lamang, gingamit ni Satanas ang ginhambal mismo ni Jehova kay Jesus mga anom ka semana antes sini: “Ini ang akon Anak, ang hinigugma, nga ginakahamut-an ko.”—Genesis 3:1; Job 1:9; Mateo 3:17; 4:3.

14. (a) Ano nga pahito ang ginagamit ni Satanas agod magtuga sing pangduhaduha tuhoy sa espiritismo? (b) Ano ang binagbinagon naton karon?

 ¹⁴ Sa karon, ang Yawa nagagamit gihapon sing pareho sini nga pahito agod magtuga sing pangduhaduha tuhoy sa kalautan sang espiritismo. Makapasubo nga nagmadinalag-on sia sa pagtuga sing pangduhaduha sa pila ka tumuluo. Ang iban nagaduhaduha na kon bala malaut gid man ang pila ka porma sang espiritismo. (2 Corinto 11:3) Paano naton sila mabuligan nga matadlong ang ila panghunahuna? Paano naton mapat-od nga indi kita maimpluwensiahan sang mga pahito ni Satanas? Agod masabat ini, binagbinagon naton ang duha ka bahin sang aton kabuhi nga malimbungon nga ginadagtaan ni Satanas sing espiritismo. Ini amo ang kalingawan kag ang pag-atipan sang aton panglawas.

15. (a) Paano ginatamod sang madamo karon sa mga pungsod sa Nakatundan ang espiritismo? (b) Paano naimpluwensiahan ang pila ka Cristiano sang pagtamod sang kalibutan sa espiritismo?

¹⁵ Sa mga pungsod sa Nakatundan, ordinaryo na lang ang okultismo, pagpanghiwit, kag iban pa nga porma sang espiritismo. Ginapakita sang mga pelikula, libro, programa sa TV, kag mga hampang sa kompyuter nga ang espiritismo makalilingaw, makadalayaw, kag indi makahalalit. Ang iban nga mga pelikula kag mga libro tuhoy sa okultismo nangin tuman ka popular amo nga nag-organisar pa gani sing grupo ang mga nagaidolo sa sini. Maathag nga nagmadinalag-on ang mga demonyo nga pakadiutayon ang halit sang okultismo. Naimpluwensiahan man bala sini nga pagtamod ang mga Cristiano? Ang iban naimpluwensiahan. Sa ano nga paagi? Halimbawa, sa tapos matan-aw sang isa ka Cristiano ang pelikula tuhoy sa madyik, nagsiling sia, “Nagtan-aw man lang ako, pero wala man ako nagahimo sang espiritismo.” Ngaa makahalalit ini nga pangatarungan?

16. Ngaa makatalagam ang kalingawan may kaangtanan sa okultismo?

¹⁶ Bisan pa may kinatuhayan ang aktual nga paghimo sing espiritismo sangsa pagtan-aw sini, indi buot silingon  nga indi ini makahalalit. Ngaa? Binagbinaga ini: Ginapakita sang Pulong sang Dios nga wala sing ikasarang si Satanas ukon ang iya mga demonyo sa pagbasa sang aton hunahuna. * Gani subong sang nahinambitan na, agod mahibaluan nila ang aton ginahunahuna kag kaluyahon sa espirituwal, ginapanilagan nila sing maayo ang aton mga ginahimo—lakip na ang aton ginapili nga kalingawan. Kon nanamian ang isa ka Cristiano sa mga pelikula, ukon mga libro tuhoy sa espiritismo, madyik, mga tawo nga ginasudlan sang demonyo, kag iban pa nga kaangay sini, ginahatagan niya sing ideya ang mga demonyo tuhoy sa iya kaluyahon! Gani nagapakigdumog pa gid ang mga demonyo sa sina nga Cristiano agod hingalitan ang iya kaluyahon tubtob nga mapierde nila sia. Ang matuod, ang iban nga napukaw ang interes sa espiritismo bangod sang mga kalingawan nga nagapakita sing okultismo, aktual gid nga nakahimo sing espiritismo sang ulihi.—Basaha ang Galacia 6:7.

17. Anong tuso nga pahito ang ginagamit ni Satanas agod hingalitan ang isa nga nagabalatian?

¹⁷ Ginahingalitan ni Satanas indi lamang ang aton handum sa paglingawlingaw kundi ang pag-atipan man sang aton panglawas. Paano? Halimbawa, mahimo nga maluyahan sing buot ang isa ka Cristiano nga wala gihapon mag-ayo bisan madamo nga beses na sia magpabulong. (Marcos 5:25, 26) Magahatag ini sing maayo nga kahigayunan kay Satanas kag sa mga demonyo nga hingalitan sia. Mahimo sulayon sang mga demonyo ang nagabalatian nga pilion na lang ang pagpabulong ukon paagi sang pagbulong nga ‘nagagamit sing madyik,’ ukon espiritismo. (Isaias 1:13) Kon magmadinalag-on inang tuso nga pahito sang mga demonyo, maguba ang kaangtanan sa Dios sang isa nga nagabalatian. Sa ano nga paagi?

18. Ano nga mga paagi sang pagbulong ang dapat sikwayon sang isa ka Cristiano, kag ngaa?

 ¹⁸ Ginpaandaman ni Jehova ang mga Israelinhon nga ‘naggamit sing madyik’: “Kon ibayaw ninyo ang inyo mga kamot sa pagpangamuyo, magapabulagbulag ako. Bisan ano kadamo ang inyo pangamuyo, indi ako magpamati.” (Isaias 1:15) Siempre pa, luyag naton pirme likawan ang bisan ano nga butang nga makaupang sang aton pangamuyo kag sang bulig ni Jehova, ilabi na kon nagamasakit kita. (Salmo 41:3) Gani, kon mamutikan sang isa ka matuod nga Cristiano nga ang pagsayasat ukon paagi sa pagbulong naangot sa espiritismo, dapat niya ini sikwayon. * (Mateo 6:13) Kon himuon niya ini, makasalig sia sing bulig ni Jehova.—Tan-awa ang kahon nga “ Espiritismo Gid Bala Ini?”

19. (a) Tuhoy sa gahom sang Yawa, ano ang ginapapati niya sa madamo nga tawo? (b) Ano nga mga sugilanon ang dapat likawan sang matuod nga mga Cristiano?

¹⁹ Ginapakadiutay sang madamo nga tawo sa Nakatundan ang katalagman sang gahom ni Satanas, apang kabaliskaran naman ang nagakatabo sa iban nga bahin sang kalibutan. Ginapapati sang Yawa ang madamo nga tawo sa sini nga lugar nga mas gamhanan sia sangsa matuod niya nga masarangan. Ang  pila ka tawo nagakabuhi, nagakaon, nagaobra, ukon nagatulog, nga nahadlok sa malaut nga espiritu. Lapnag ang sugilanon tuhoy sa gamhanan nga mga demonyo. Nakunyag gid ang mga nagaistorya sini, kag ang iban naman nanamian mamati. Subong mga alagad sang matuod nga Dios, ipanugidsugid man bala naton ini nga mga sugilanon sa iban? Indi, bangod sa duha ka importante nga rason.

20. Paano mapalapta sang isa, ayhan sing indi hungod, ang mga propaganda ni Satanas?

²⁰ Una, kon ginapanugidsugid sang isa ang mga hinimuan sang mga demonyo, ginasakdag niya ang mga pahito ni Satanas. Paano? Ginapamatud-an sang Pulong sang Dios nga si Satanas may gahom, apang nagapaandam man ini nga nagagamit sia sing “butig nga mga tanda” kag “pagpangdaya.” (2 Tesalonica 2:9, 10) Bangod si Satanas amo ang panguna nga manuglimbong, nahibaluan niya kon paano impluwensiahan ang panghunahuna sang mga may huyog sa espiritismo kag kon paano niya sila papatihon  sang mga butang nga indi matuod. Mahimo magpati gid sila nga nakakita sila kag nakabati sang mga butang nga katingalahan kag mahimo nila isugid nga matuod gid ini. Sang ulihi, gindugangdugangan na ini bangod sa pasapasa nga istorya. Kon ipanugidsugid man ini sang isa ka Cristiano, subong lang nga ginahimo niya ang kabubut-on sang Yawa—ang “amay sang kabutigan.” Ginapalapta man niya ang mga propaganda ni Satanas.—Juan 8:44; 2 Timoteo 2:16.

21. Sa ano naton dapat isentro ang aton paghambalanay?

²¹ Ikaduha, bisan pa matuod nga nakapakig-angot ang isa ka Cristiano sa malaut nga espiritu sang una, indi niya dapat ini pag-iistorya sa iya mga masigkatumuluo. Ngaa? Ginapalig-on kita, nga ‘magtulok sing maayo kay Jesus, ang Pangulo nga Ahente kag Manughimpit sang aton pagtuo.’ (Hebreo 12:2) Huo, dapat naton isentro ang aton igtalupangod sa Cristo, indi kay Satanas. Talalupangdon nga sang yari si Jesus sa duta, wala niya gin-istoryahan ang iya mga disipulo sing mga sugilanon tuhoy sa malaut nga mga espiritu, bisan pa madamo sia sing masugid tuhoy sa ikasarang ni Satanas. Sa baylo, ginsentro niya ang ila igtalupangod sa mensahe sang Ginharian. Gani, bilang pag-ilog kay Jesus kag sa mga apostoles, luyag naton nga isentro ang aton paghambalanay “sa gamhanan nga mga binuhatan sang Dios.”—Binuhatan 2:11; Lucas 8:1; Roma 1:11, 12.

22. Paano kita padayon nga makahatag sing “kalipay sa langit”?

²² Matuod nagagamit si Satanas sing lainlain nga tuso nga pahito, lakip na ang espiritismo agod gub-on ang aton kaangtanan kay Jehova. Apang paagi sa pagdumot sa malaut kag pagpanguyapot sa kon ano ang maayo, wala naton ginahatagan sing kahigayunan ang Yawa nga paluyahon ang aton determinasyon nga isikway ang tanan nga porma sang espiritismo. (Basaha ang Efeso 4:27.) Handurawa lamang kon daw ano nga “kalipay sa langit” kon padayon kita nga ‘makatindog sing malig-on batok sa tuso nga mga pahito sang Yawa’ tubtob wala na sia!—Lucas 15:7; Efeso 6:11.