Nagpabilin sa Betlehem sanday Jose kag Maria imbes nga magbalik sa Nazaret. Sang walo na ka adlaw si Jesus, ginpatuli nila sia, suno sa Kasuguan sang Dios sa Israel. (Levitico 12:2, 3) Kinabatasan man nga hatagan sing ngalan ang lapsag nga lalaki sa sini nga adlaw. Gintawag nila ang ila bata nga Jesus, subong sang ginsiling ni anghel Gabriel.

Nagligad ang sobra isa ka bulan, kag 40 ka adlaw na si Jesus. Diin sia dal-on sang iya mga ginikanan? Didto sa templo sa Jerusalem, nga mga pila lang ka kilometro halin sa ila ginateneran. Suno sa Kasuguan, pagkatapos sang 40 ka adlaw nga nakabata sing lalaki, kinahanglan sang iloy magpresentar sa templo sang halad sa pagpaninlo.—Levitico 12:4-8.

Ginhimo ini ni Maria. Nagdala sia sing duha ka gamay nga pispis subong halad. Ginapakita sini kon daw ano ka pigado sanday Jose kag Maria. Suno sa Kasuguan, dapat maghalad sing isa ka tinday nga karnero nga lalaki kag pispis. Pero kon indi masarangan sang iloy ang bili sang karnero, puede na ang duha ka tukmo ukon duha ka pating. Amo ini ang kahimtangan ni Maria kag ang iya halad.

Sa templo, may tigulang nga nagpalapit kanday Jose kag Maria. Sia amo si Simeon. Ang Dios nagpahayag sa iya nga antes sia mapatay, makita niya ang ginpromisa ni Jehova nga Cristo, ukon Mesias. Sini nga adlaw gingiyahan si Simeon sang balaan nga espiritu pakadto sa templo para makita sanday Jose, Maria, kag ang ila lapsag. Ginkugos ni Simeon ang lapsag.

Samtang ginakugos si Jesus, nagpasalamat si Simeon sa Dios: “Karon, Soberanong Ginuo, mahimo na nga mapatay sing mahidaiton ang imo ulipon suno sa imo ginpahayag, kay nakita ko na ang imo paagi sang pagluwas nga gin-aman mo agod makita sang tanan nga tawo, isa ka kapawa sa pagkuha sang tabon sa mga pungsod kag isa ka himaya sa imo katawhan nga Israel.”—Lucas 2:29-32.

Nalipay gid sanday Jose kag Maria sang mabatian nila ini. Ginpakamaayo sila ni Simeon kag nagsiling sia kay Maria nga ang iya lapsag “ginpadala sang Dios . . . kag bangod sa iya ang iban mapukan kag ang iban bayawon sa Israel” kag ang kasubo magalapos sa iya kaangay sang matalom nga espada.—Lucas 2:34.

May isa pa nga yara sa sini nga adlaw. Ang 84 anyos nga manalagna nga si Ana. Yara gid sia pirme sa templo. Sa sini mismo nga oras, nagpalapit sia kanday Jose, Maria, kag sa lapsag nga si Jesus. Nagpasalamat si Ana sa Dios kag ginsugid niya ang parte kay Jesus sa tanan nga mamati.

Nalipay gid sanday Jose kag Maria sa sini nga mga hitabo sa templo! Nagapamatuod ini tanan nga ang ila bata amo ang Isa nga Ginpromisa sang Dios.