Sa katapusan nga gab-i ni Jesus upod sa iya mga apostoles, gintudluan niya sila nga magpaubos paagi sa paghinaw sa ila mga tiil. Ngaa kinahanglan ini? Bangod sang ila kaluyahon. Matutom sila sa Dios, pero nabalaka sila gihapon kon sin-o ang pinakamataas sa ila. (Marcos 9:33, 34; 10:35-37) Nakita liwat ini nga kaluyahon sini nga gab-i.

“Nagbaisay” ang mga apostoles “kon sin-o ang pinakamataas sa ila.” (Lucas 22:24) Nasubuan gid si Jesus nga makita ini liwat! Ano ang ginhimo niya?

Sa baylo nga akigan ni Jesus ang mga apostoles sa ila panimuot kag paggawi, mapinasensiahon sia nga nangatarungan sa ila: “Ang mga hari sang mga pungsod nagapakaginuo sa ila mga sakop, kag ang mga may awtoridad sa ila ginatawag nga mga Manugbulig. Apang, indi kamo dapat mangin subong sina. . . . Kay sin-o ang mas mataas, ang nagakaon sa lamesa ukon ang nagaalagad?” Dayon ginpahanumdom niya sila sang iya ginapakita pirme nga halimbawa sa ila: “Apang ako mismo ang nagaalagad sa inyo.”—Lucas 22:25-27.

Bisan pa indi himpit ang mga apostoles, nag-unong sila kay Jesus sa madamo nga kabudlayan. Gani nagsiling sia: “Nagapakigkatipan ako sa inyo para sa isa ka ginharian, subong nga ang akon Amay nagpakigkatipan sa akon.” (Lucas 22:29) Mainunungon sila nga mga sumulunod ni Jesus. Ginpasalig niya sila nga paagi sa katipan niya sa ila, mangin kaupod niya sila nga magagahom sa Ginharian.

Bisan pa may matahom nga palaabuton ang mga apostoles, mga tawo pa sila kag indi himpit. Nagsiling si Jesus sa ila: “Nagsiling si Satanas nga luyag niya nga ayagon kamo tanan kaangay sang trigo,” nga nagalapta samtang ginaayag. (Lucas 22:31) Nagpaandam man sia: “Tanan kamo masandad bangod sa matabo sa akon karon nga gab-i, kay nasulat na: ‘Patyon ko ang manugbantay, kag magaalaplaag ang mga karnero sang panong.’”—Mateo 26:31; Zacarias 13:7.

May kompiansa nga nagsiling si Pedro: “Bisan pa ang tanan masandad bangod sa matabo sa imo, indi gid ako masandad!” (Mateo 26:33) Nagsiling si Jesus kay Pedro nga sa wala pa makapamalo ang manok sing makaduha sina nga gab-i, ipanghiwala sia ni Pedro. Pero nagsiling pa si Jesus: “Nag-ampo ako nga kabay nga indi magluya ang imo pagtuo; kag kon makapanumbalik ka na, pabakura ang pagtuo sang imo mga kauturan.” (Lucas 22:32) Pero maisugon nga nagsiling si Pedro: “Bisan mapatay pa ako kaupod mo, indi ko gid ikaw pag-ipanghiwala.” (Mateo 26:35) Amo man ang ginsiling sang iban pa nga apostoles.

Nagsiling si Jesus sa iya mga disipulo: “Makaupod ninyo ako sa malip-ot na lang nga tion. Pangitaon ninyo ako; apang subong sang ginsiling ko sa iban nga mga Judiyo kag ginasiling ko man karon sa inyo, ‘Kon diin ako makadto indi kamo makakadto.’” Nagsiling pa sia: “Ginahatag ko sa inyo ang isa ka bag-o nga sugo, nga maghigugmaanay kamo; subong nga ginhigugma ko kamo, maghigugmaanay man kamo. Paagi sini mahibaluan sang tanan nga mga disipulo ko kamo, kon nagahigugmaanay kamo.”—Juan 13:33-35.

Sang mabatian ni Pedro ang ginsiling ni Jesus nga makaupod nila sia sa malip-ot na lang nga tion, namangkot sia: “Ginuo, diin ka makadto?” Nagsabat si Jesus: “Kon diin ako makadto indi ka makasunod sa akon karon, apang sa ulihi magasunod ka.” Natingala si Pedro kag nagsiling: “Ginuo, ngaa indi ako makasunod sa imo karon? Ihatag ko ang akon kabuhi para sa imo.”—Juan 13:36, 37.

Ginpatuhuyan dayon ni Jesus ang tion sang ginpadala niya ang mga apostoles sa pagbantala sa Galilea nga wala sila sing dala nga puyopuyo sang kuarta ukon balunan sang pagkaon. (Mateo 10:5, 9, 10) Namangkot sia: “Ginkulang bala kamo?” Nagsabat sila: “Wala!” Pero ano ang dapat nila himuon sa ulihi? Ginsugo sila ni Jesus: “Ang bisan  sin-o nga may puyopuyo sang kuarta kag balunan sang pagkaon dapat magdala sini, kag ang bisan sin-o nga wala sing espada dapat magbaligya sang iya kunop kag magbakal sing espada. Kay nagasiling ako sa inyo nga dapat matuman ang ginsulat tuhoy sa akon, nga nagasiling, ‘Ginkabig sia nga isa sang mga malinapason.’ Kay ang tanan tuhoy sa akon nagakatuman na.”—Lucas 22:35-37.

Ginapatuhuyan ni Jesus ang tion nga ilansang sia sa usok upod sa mga malauton, ukon mga malinapason. Pagkatapos sini, hingabuton ang iya mga sumulunod. Para sa ila, handa na sila, gani nagsiling sila: “Ginuo, may duha ka espada diri.” Nagsabat sia: “Puede na ina.” (Lucas 22:38) Bangod may duha sila ka espada, matudluan sila sa ulihi ni Jesus sang isa pa ka importante nga leksion.