Bag-o lang natapos si Jesus sa pagtudlo sa apat ka apostoles sa Bukid sang mga Olibo kag sa pagsabat sang ila pamangkot parte sa iya palaabuton nga presensia kag sa hingapusan sang sistema sang mga butang.

Masako gid nga adlaw ang Nisan 11! Mahimo nga samtang nagapauli sila sa Betania sang gab-i nga nagsiling si Jesus sa mga apostoles: “Nakahibalo kamo nga duha na lang ka adlaw Paskua na, kag ang Anak sang tawo itugyan agod patyon sa usok.”—Mateo 26:2.

Mahimo gid nga nagpahuway si Jesus upod sa iya mga apostoles sang madason nga adlaw, sang Mierkoles. Sang Martes, ginsaway niya ang mga lider sang relihion kag ginbuyagyag niya sila sing hayag. Gusto nila sia patyon. Gani wala sia maggua sang Nisan 12 para indi mabalabagan ang pagselebrar niya sang Paskua upod sa iya mga apostoles pagtunod sang adlaw sa madason nga gab-i, pagsugod sang Nisan 14.

Pero wala nagpahimunong ang puno nga mga saserdote kag ang mga gulang sang katawhan antes sang Paskua. Nagtipon sila sa luwang sang mataas nga saserdote nga si Caifas. Ngaa? Naakig sila bangod ginbuyagyag sila ni Jesus. Naghimbon sila sini nga tion para “madakop si Jesus sa malalangon nga paagi kag mapapatay sia.” Paano kag san-o nila ini himuon? Nagsiling sila: “Indi naton sia pagdakpon sa tion sang kapiestahan, agod indi magkinagamo ang mga tawo.” (Mateo 26:4, 5) Nahadlok sila bangod madamo ang nanamian kay Jesus.

Sa sini man nga tion, may nagbisita sa mga lider sang relihion. Nakibot sila nga isa ini sa mga apostoles mismo ni Jesus, si Judas Iscariote. Ginbutang sa iya ni Satanas ang ideya nga luiban ang iya Agalon! Namangkot si Judas sa ila: “Ano ang  ihatag ninyo sa akon kon itugyan ko sia sa inyo?” (Mateo 26:15) “Nalipay sila kag nagsugot sa paghatag sa iya sing kuarta nga pilak.” (Lucas 22:5) Pila? Nagsugot sila nga hatagan sia sing 30 ka bilog nga pilak. Talalupangdon ini kay ang bili sang isa ka ulipon 30 ka siklo. (Exodo 21:32) Gani ginatamay gid sang mga lider sang relihion si Jesus, nga wala sia sing pulos. Nagpangita dayon si Judas “sing kahigayunan sa pagluib sa iya nga indi mahibaluan sang mga tawo.”—Lucas 22:6.

Nagsugod ang Nisan 13 pagtunod sang adlaw sang Mierkoles, kag amo ini ang ikan-om kag katapusan nga gab-i ni Jesus sa Betania. Pagkadason nga adlaw, dapat na tapuson ang paghanda para sa Paskua. Nagakinahanglan sila sing kordero para ihawon kag asalon sing bilog sa tapos magsugod ang Nisan 14. Diin sila manihapon, kag sin-o ang magahanda sini? Wala na ini ginsugid ni Jesus. Gani, indi ini masugid ni Judas sa puno nga mga saserdote.

Mahimo nga temprano pa sang Huebes sang hapon ginsugo ni Jesus sanday Pedro kag Juan halin sa Betania, nga nagasiling: “Lakat kamo kag maghanda agod makakaon kita sang panihapon sa Paskua.” Nagsiling sila: “Diin mo luyag nga ihanda namon ini?” Nagpaathag si Jesus: “Sa pagsulod ninyo sa siudad, may tawo nga nagadala sang tibod sang tubig nga magasugata sa inyo. Sunod kamo sa iya sa balay nga sudlan niya. Kag silingan ninyo ang agalon sang panimalay, ‘Ang Manunudlo nagasiling sa imo: “Diin ang kuarto para sa bisita nga akon pagakaunan sang panihapon sa Paskua upod sa akon mga disipulo?”’ Kag ipakita niya sa inyo ang daku nga kuarto sa ibabaw, nga nasangkapan. Didto ihanda ninyo ini.”—Lucas 22:8-12.

Mahimo gid nga disipulo ni Jesus ang agalon sang panimalay. Mahimo nga ginapaabot na niya nga ipangabay ni Jesus nga gamiton ang iya balay para sa sini nga okasyon. Sang nag-abot ang duha ka apostoles sa Jerusalem, nakita nila nga natabo gid ang ginsiling ni Jesus sa ila. Gani ginpat-od nila nga mahanda ang kordero kag ang iban pa nga kahimusan sa panihapon sa Paskua para sa 13 ka tawo—si Jesus kag ang iya 12 ka apostoles.