Pagligad sang napulo ka adlaw halin sang nagkayab si Jesus, ang pagbubo sang balaan nga espiritu sang Pentecostes nagapamatuod nga ara gid man sia sa langit. Kag magaabot pa ang dugang nga ebidensia parte sa sini. Antes ginbato si disipulo Esteban bangod sa matutom niya nga pagpanaksi, sia nagsiling: “Nakita ko ang langit nga nabuksan kag ang Anak sang tawo nga nagatindog sa tuo sang Dios.”—Binuhatan 7:56.

Bisan ara na si Jesus sa langit kaupod sang iya Amay, kinahanglan pa niya maghulat sa espesipiko nga sugo nga gintagna sa Pulong sang Dios. Sa panuytoy sang Dios, si David nagsulat: “Si Jehova nagsiling sa akon Ginuo [si Jesus]: ‘Pungko ka sa akon tuo tubtob mahimo ko ang imo mga kaaway nga palatungan sang imo mga tiil.’” Kon matapos na ang tion sa paghulat, ‘magagahom sia sa tunga sang iya mga kaaway.’ (Salmo 110:1, 2) Pero ano ang himuon ni Jesus sa langit samtang ginahulat niya ini nga tion?

Sang Pentecostes 33 C.E., gintukod ang Cristianong kongregasyon. Nagsugod sa paggahom ukon paghari si Jesus sa langit sa iya ginhaplasan sing espiritu nga mga disipulo. (Colosas 1:13) Gingiyahan niya sila sa ila pagbantala kag ginhanda para sa ila papel sa palaabuton. Ano ini? Ang magpabilin nga matutom tubtob sa kamatayon pagabanhawon kag magahari kaupod ni Jesus sa Ginharian.

Ang isa ka maayo nga halimbawa sang isa nga mangin hari sa ulihi amo si Saulo, nga mas nakilala sa iya Romano nga ngalan nga Pablo. Judiyo sia kag madugay na nga makugi sa Kasuguan sang Dios, pero napatalang sia sang mga lider sang relihion sang mga Judiyo amo nga nag-ugyon pa gani sia nga batuhon si Esteban. Kag bangod “akig . . . si Saulo sa mga disipulo sang Ginuo kag luyag gid niya nga pamatyon sila tanan,” nagkadto sia sa Damasco. Ginhatagan sia sing awtorisasyon sang Mataas nga Saserdote nga si Caifas nga arestuhon ang mga disipulo ni Jesus kag dalhon sila sa Jerusalem. (Binuhatan 7:58; 9:1) Pero, sang nagalakbay pa lang si Saulo, nagkirab sa palibot niya ang kapawa kag natumba sia sa duta.

“Saulo, Saulo, ngaa ginahingabot mo ako?” siling sang tingog nga indi mahibaluan kon diin naghalin. “Sin-o ka, Ginuo?” pamangkot ni Saulo.  “Ako si Jesus, nga imo ginahingabot,” sabat sa iya.—Binuhatan 9:4, 5.

Ginsilingan ni Jesus si Saulo nga magsulod sa Damasco kag maghulat sing dugang nga mga instruksion, pero kinahanglan sia tuytuyan pakadto sa siudad kay nabulag sia sang milagruso nga kapawa. Sa isa pa ka palanan-awon, nagpakita si Jesus kay Ananias, nga isa sa iya mga disipulo nga nagaistar sa Damasco. Ginsilingan ni Jesus si Ananias nga magkadto sa isa ka lugar kag pangitaon si Saulo. Nagaalang-alang pa si Ananias, pero ginpasalig sia ni Jesus: “Ginpili ko ini nga tawo agod dalhon ang akon ngalan sa mga pungsod, subong man sa mga hari kag sa mga anak ni Israel.” Nakakita liwat si Saulo, kag “nagbantala sia” didto sa Damasco “tuhoy kay Jesus, nga ining isa amo ang Anak sang Dios.”—Binuhatan 9:15, 20.

Paagi sa bulig ni Jesus, ginpadayon ni Pablo kag sang iban pa nga ebanghelisador ang pagbantala nga ginsugdan ni Jesus. Kag ginpakamaayo gid sila sang Dios. Pagligad sang 25 ka tuig halin sang nagpakita si Jesus kay Pablo sa Damasco, nagsulat sia nga ang maayong balita “ginbantala sa tanan nga tinuga sa idalom sang langit.”—Colosas 1:23.

Pagligad sang mga tinuig, ginhatagan ni Jesus ang pinalangga niya nga si apostol Juan sing sunodsunod nga mga palanan-awon, nga mabasa sa libro sang Bugna sa Biblia. Paagi sini nga mga palanan-awon, daw pareho lang nga nagkabuhi si Juan para makita ang pagbalik ni Jesus sa paggahom sa Ginharian. (Juan 21:22) “Paagi sa balaan nga espiritu nakadangat [si Juan] sa adlaw sang Ginuo.” (Bugna 1:10) San-o ini natabo?

Ang maid-id nga pagtuon sa mga tagna sa Biblia nagapakita nga ang “adlaw sang Ginuo” nagsugod sang moderno nga tion. Sang 1914, nagsugod ang Bug-os Kalibutan nga Inaway I. Kag mga dinekada sugod sadto nangin mas madamo ang mga inaway, balatian, gutom, linog, kag iban pa nga pamatuod sang mas masangkad nga katumanan sang “tanda” nga ginhatag ni Jesus sa iya mga apostoles parte sa iya “presensia” kag sa “katapusan.” (Mateo 24:3, 7, 8, 14) Ginahimo na sa karon ang pagbantala sang maayong balita sang Ginharian indi lamang sa sakop sadto sang Emperyo sang Roma kundi sa bilog nga duta.

Gintuytuyan si Juan nga ilaragway kon ano ang buot silingon sini: “Karon nag-abot na ang kaluwasan kag ang gahom kag ang Ginharian sang aton Dios kag ang awtoridad sang iya Cristo.” (Bugna 12:10) Huo, ang Ginharian sang Dios sa langit nga lapnag nga ginbantala ni Jesus matuod gid!

Maayo gid ini nga balita para sa tanan nga mainunungon nga disipulo ni Jesus. Magaugyon sila sa ginsiling ni Juan: “Bangod sini magkalipay kamo nga mga langit kag kamo nga nagaistar sa sini! Makaluluoy ang duta kag ang dagat, bangod ang Yawa nagpanaug sa inyo, nga may daku nga kaakig, kay nahibaluan niya nga malip-ot na lamang ang iya tion.”—Bugna 12:12.

Gani, si Jesus wala na nagapungko sa tuo sang iya Amay kag nagahulat. Nagagahom na sia subong Hari, kag sa indi madugay dulaon niya ang tanan niya nga kaaway. (Hebreo 10:12, 13) Ano pa ang makalilipay nga mga hitabo sa palaabuton?