Samtang nagabantala si Jesus kag ang iya apat ka disipulo sa “mga sinagoga sa bug-os nga Galilea,” naglapnag ang balita parte sa makatilingala nga mga butang nga iya ginhimo. (Marcos 1:39) Nakalab-ot ini sa isa ka siudad nga may isa ka aruon. Ginlaragway sia sang doktor nga si Lucas nga “puno sang aro.” (Lucas 5:12) Kon malala na ini nga balatian, amat-amat nga ginaguba sini ang pila ka bahin sang lawas.

Gani masubo gid ang kahimtangan sini nga aruon kag dapat magpalayo sia sa iban. Dugang pa, dapat magsinggit sia nga “Indi ako matinlo, indi ako matinlo!” para ang mga tawo indi makapalapit kag malatnan. (Levitico 13:45, 46) Pero ano ang ginhimo sang aruon? Nagpalapit sia kay Jesus kag nagluhod sa atubangan niya, nga nagapakiluoy: “Ginuo, kon luyag mo gid, matinluan mo ako.”—Mateo 8:2.

Grabe gid ang pagtuo sang tawo kay Jesus! Kag makaluluoy gid sia tan-awon sa iya balatian! Ano ang reaksion ni Jesus? Ano ang himuon mo kon didto ka? Bangod naluoy si Jesus, gintandog niya ang tawo. Sia nagsiling: “Luyag ko! Magmatinlo ka.” (Mateo 8:3) Bisan pa mabudlay ini patihan sang iban, nadula dayon ang aro sang tawo.

Luyag mo bala nga may hari ka nga maluluy-on kag may ikasarang kaangay ni Jesus? Ginapasalig kita sang pagtatap niya sa aruon nga kon mangin Hari na sia sa bug-os nga duta, ining tagna sa Biblia matuman: “Kaluy-an niya ang kubos kag ang imol, kag luwason niya ang kabuhi sang mga imol.” (Salmo 72:13) Huo, himuon ni Jesus ang iya handum nga buligan ang tanan nga nagaantos.

Dumduma nga antes sang pag-ayo sa aruon, nalangkag gid ang mga tawo bangod sang pagministeryo ni Jesus. Mabatian naman liwat sang mga tawo ining makatilingala niya nga ginhimo. Pero indi luyag ni Jesus nga magtuo ang mga tawo sa iya base lamang sa mga sugidsugid. Nahibaluan niya ang tagna nga “indi niya pag-ipabati ang iya tingog sa dalan,” buot silingon, magpadayawdayaw. (Isaias 42:1, 2) Gani ginsugo ni Jesus ang gin-ayo niya nga aruon: “Indi ka gid manugid kay bisan sin-o, kundi magkadto ka sa saserdote kag magpatan-aw sa iya, kag maghalad ka sing dulot suno sa kasuguan ni Moises.”—Mateo 8:4.

Pero subong sang mahunahuna mo, nalipay gid ang tawo nga nag-ayo sia amo nga indi niya mapunggan nga isugid sa iban ang natabo. Gani nanugid sia sa iban. Bangod sini nalangkag na gid ang mga tawo asta nga indi na makakadto si Jesus sa siudad, amo nga nagtener na lang sia sa lugar nga wala sing nagaistar. Pero nagkadto gihapon ang mga tawo sa iya para tudluan niya kag ayuhon.