Nakapoy gid si Jesus sa bilog nga adlaw. Sang gab-i na, nagsiling sia sa mga disipulo: “Matabok kita sa pihak,” ang lugar sa tabok sang Capernaum.—Marcos 4:35.

Sa nasidlangan nga baybayon sang Dagat sang Galilea amo ang rehiyon sang mga taga-Gerasa. Nakilala man ini nga lugar subong Decapolis. Ang mga siudad sa Decapolis amo ang sentro sang Griego nga kultura, bisan pa nga madamo man nga Judiyo ang nagapuyo didto.

Natalupangdan ang paghalin ni Jesus sa Capernaum. May pila ka sakayan nga nagtabok man. (Marcos 4:36) Indi gid man malayo ang talabukon. Ang Dagat sang Galilea kaangay sang daku nga linaw, nga mga 21 ka kilometro ang kalabaon kag 12 ka kilometro ang pinakamalapad nga bahin. Pero indi ini manabaw.

Bisan pa himpit si Jesus, nakapoy man sia sa iya ministeryo. Gani pagkatapos sila maglayag, naghigda sia sa ulin sang sakayan, nag-ulon sa ulunan, kag natulugan.

Pila ka apostoles ang makahibalo maglayag, pero indi ini mahapos nga pagpanakayon. May mga bukid nga nagalibot sa linaw, kag ang kadaygan sang Dagat sang Galilea masami nga mainit. Kon kaisa, ang mabugnaw nga hangin halin sa mga bukid nagahuyop paubos kag nagabunggo sa mainit nga tubig, amo nga nagatuga ini sang mabaskog nga unos sa dagat. Amo sini ang natabo. Wala magdugay nagahampak na ang balod sa sakayan. “Ginkapan sang tubig ang sakayan kag nabutang sila sa katalagman.” (Lucas 8:23) Pero nagakatulog gihapon si Jesus!

Puerte ang panikasog sang mga nagagiya sa sakayan, suno sa ila mga eksperiensia sa pag-atubang sang mga unos. Pero tuhay ini subong. Bangod nahadlok mapatay, ginpukaw nila si Jesus kag nagsinggit: “Ginuo, luwasa kami, mapatay na kita!” (Mateo 8:25) Nahadlok ang mga disipulo nga malumos sila!

Pagbugtaw ni Jesus, nagsiling sia sa mga apostoles: “Ngaa hinadlukan gid kamo, kamo nga diutay sing pagtuo?” (Mateo 8:26) Dayon ginsugo ni Jesus ang hangin kag dagat: “Hipos! Maglinong ka!” (Marcos 4:39) Nagtinong ang nagahagunos nga hangin, kag naglinong ang dagat. (Ginsugid nanday Marcos kag Lucas ining makatilingala nga hitabo, nga nagapadaku una nga ginpauntat ni Jesus ang unos paagi sa milagro, kag nian ginsambit nila ang kakulang sang pagtuo sang mga disipulo.)

Hunahunaa ang epekto sini sa mga disipulo! Nakita nila nga nagabalingaso ang dagat kag pagkatapos gulpi lang ini nagkalma. Hinadlukan gid sila. Nagpinamangkutanay sila: “Sin-o gid bala ini? Bisan ang hangin kag dagat nagatuman sa iya.” Kag nakatabok sila nga wala maano. (Marcos 4:41–5:1) Mahimo nga ang iban nga sakayan nga naglayag man nakabalik na sa nakatundan nga baybayon.

Makapalig-on gid mahibaluan nga ang Anak sang Dios may gahom sa pagkontrol sang tiempo! Kon ang iya bug-os nga igtalupangod masentro na sa duta sa iya paggahom sa Ginharian, ang tanan magapuyo nga may seguridad, kay wala na sing makahaladlok nga mga kalamidad!