Pagligad sang duha ka adlaw sa Samaria, nagpauli si Jesus sa ila lugar. Nadugayan sia sa iya pagbantala sa Judea, pero wala sia nagpauli sa Galilea para magpahuway kundi para sugdan ang mas masangkad nga pagministeryo sa lugar nga iya gindak-an. Mahimo wala si Jesus nagapaabot nga batunon sia sang tanan didto, kay sia nagsiling, “ang manalagna wala ginapadunggan sa iya kaugalingon nga lugar.” (Juan 4:44) Imbes nga mag-upod sa iya, nagpauli ang iya mga disipulo sa ila pamilya kag nagbalik sa ila mga palangabuhian.

Ano nga mensahe ang ginbantala ni Jesus? Amo ini: “Malapit na ang Ginharian sang Dios. Maghinulsol kamo, kag magtuo sa maayong balita.” (Marcos 1:15) Ano ang reaksion sang mga tawo? Madamo sa taga-Galilea ang nagbaton kay Jesus, nga nagapadungog sa iya. Indi lamang ini bangod sa iya mensahe. Mga binulan antes sini, ang pila sa mga taga-Galilea ara sa Jerusalem para sa Paskua kag nakita nila ang dalayawon nga mga tanda nga ginhimo ni Jesus.—Juan 2:23.

Diin nagsugod si Jesus sa iya pagministeryo sa Galilea? Maathag nga sa Cana, diin ginhimo niya ang tubig nga alak sa isa ka punsion. Samtang didto sia sa ikaduha nga bes, nahibaluan ni Jesus ang parte sa bata nga lalaki nga may malala nga balatian kag daw mapatay na. Bata sia sang opisyal sa gobierno ni Herodes Antipas, ang hari nga nagpapugot sang ulihi kay Juan nga Manugbawtismo. Nabatian sini nga opisyal nga nagkadto si Jesus sa Cana halin sa Judea. Gani naglakbay sia halin sa Capernaum pakadto sa Cana para pangitaon si Jesus. Ang nasubuan gid nga opisyal nagsiling kay Jesus: “Ginuo, magdulhog ka na sa wala pa mapatay ang akon anak.”—Juan 4:49.

Ang ginsiling ni Jesus mahimo gid nagpakibot sa tawo: “Lakat ka; ang imo anak nag-ayo na.” (Juan 4:50) Nagpati ang opisyal ni Herodes kay Jesus kag nagpauli. Samtang nagapauli, ginsugata sia sang iya mga alagad nga nagadalidali sa pagsugid sa iya sang maayong balita. Huo, nag-ayo na ang iya bata kag maayo ang panglawas! “Ano nga oras sia nag-ayo?” pamangkot niya.

“Mga ikapito nga oras kahapon sang nadula ang iya hilanat,” sabat nila.—Juan 4:52.

Nadumduman sang opisyal nga amo yadto ang oras nga nagsiling si Jesus, “Ang imo anak nag-ayo na.” Pagkatapos sini, ini nga tawo, nga manggaranon kay may mga suluguon, nangin disipulo sang Cristo pati ang iya bilog nga panimalay.

Gani, duha ka milagro ang ginhimo ni Jesus sa Cana. Ang isa amo ang paghimo niya sang tubig nga alak kag ang isa amo ang pag-ayo niya sang bata halin sa kalayuon nga mga 26 ka kilometro. Apang siempre, indi lang amo ini ang iya milagro. Pero importante ini nga pag-ayo kay nagtanda ini sang iya pagbalik sa Galilea. Maathag nga manalagna sia nga ginakahamut-an sang Dios, pero tubtob diin nga ‘padunggan ini nga manalagna sa iya kaugalingon nga lugar’?

Mangin maathag ini samtang nagapauli si Jesus sa Nazaret. Ano ayhan ang matabo sa iya didto?