Pagkatapos si Jesus nagtudlo parte sa pagpatawad sa balay sang Fariseo nga si Simon, ginsugdan niya ang ikaduha nga paglakbay sa pagbantala sa Galilea. Ikaduha niya ini nga tuig sa pagministeryo, kag wala sia nagaisahanon. Kaupod niya ang 12 ka apostoles, kag ang pila ka babayi nga “ginhilway niya sa malaut nga mga espiritu kag gin-ayo niya sa ila mga balatian.” (Lucas 8:2) Lakip sa ila amo si Maria Magdalena, si Susana, kag si Juana nga ang iya bana opisyal ni Hari Herodes Antipas.

Samtang nagadamo ang nakahibalo parte kay Jesus, mas nagadugang ang kontrobersiya sa iya hilikuton. Nangin maathag ini sang ang tawo nga ginsudlan sang demonyo, nga bulag kag apa, gindala kay Jesus kag gin-ayo. Karon ang tawo nahilway na sa demonyo kag makakita na kag makahambal. Nagdayaw gid ang mga tawo nga nagasiling: “Sia ayhan ang Anak ni David?”—Mateo 12:23.

Tuman kadamo ang tawo nga nagalibot sa balay nga ginadayunan ni Jesus, amo nga indi na sia makakaon upod sa iya mga disipulo. Pero indi tanan nagahunahuna nga si Jesus ang ginsaad nga “Anak ni David.” Ang pila ka escriba kag Fariseo naglakbay halin pa sa Jerusalem, pero indi para magtuon kay Jesus ukon magsuportar sa iya. Ginahambalan nila ang mga tawo: “Yara sa iya si Beelzebub” kag kaupod niya ang “manuggahom sang mga demonyo.” (Marcos 3:22) Sang nabatian sang mga paryente ni Jesus ang parte sa kinagamo, nagkadto sila para dakpon si Jesus. Ngaa?

Sa sini nga tion, wala nagapati ang mga utod mismo ni Jesus nga sia ang Anak sang Dios. (Juan 7:5) Ang Jesus nga gintunaan sang kagamo indi pareho sa Jesus nga nakaupod nila samtang nagadaku sila sa Nazaret. Naghinakop sila nga may diperensia na sia sa hunahuna, nga nagasiling: “Nagbuang sia.”—Marcos 3:21.

 Pero ano ang ginapakita sang mga pamatuod? Bag-o lang gin-ayo ni Jesus ang tawo nga ginsudlan sang demonyo, nga makakita na kag makahambal. Wala sing makapanghiwala sini. Gani ginpakalain sang mga escriba kag mga Fariseo si Jesus paagi sa sayop nga panumbungon. Nagsiling sila: “Ini nga tawo nagatabog sang mga demonyo paagi kay Beelzebub, ang manuggahom sang mga demonyo.”—Mateo 12:24.

Nahibaluan ni Jesus ang ginahunahuna sang mga escriba kag mga Fariseo, gani nagsiling sia: “Ang tanan nga ginharian nga nabahinbahin mahapay, kag ang tanan nga siudad ukon panimalay nga nabahinbahin indi makatindog. Sing kaanggid, kon si Satanas nagatabog kay Satanas, nabahinbahin sia; kon amo paano makatindog ang iya ginharian?”—Mateo 12:25, 26.

Dalayawon gid ang sabat ni Jesus! Nahibaluan sang mga Fariseo nga ang pila ka Judiyo nagatabog man sing mga demonyo. (Binuhatan 19:13) Gani namangkot si Jesus: “Kon nagatabog ako sang mga demonyo paagi kay Beelzebub, paagi kay sin-o sila ginatabog sang inyo mga sumulunod?” Buot silingon, mahimo man ibalik sa ila ang ila ginasumbong. Dayon ginpasangkad ni Jesus ang iya pagpangatarungan: “Apang kon nagatabog ako sang mga demonyo paagi sa espiritu sang Dios, ang Ginharian sang Dios nag-abot kag wala ninyo ini matalupangdi.”—Mateo 12:27, 28.

Sa pag-ilustrar nga ang iya pagtabog sang mga demonyo pamatuod nga mas gamhanan sia kay Satanas, si Jesus nagsiling: “Paano makasulod ang isa sa balay sang makusog nga tawo sa pagkuha sang iya pagkabutang kon indi anay niya sia paggapuson? Dayon makuha na niya ang iya mga pagkabutang. Ang indi dampig sa akon batok sa akon, kag ang wala nagapanipon upod sa akon nagapalapta.” (Mateo 12:29, 30) Akig gid kay Jesus ang mga escriba kag mga Fariseo, kag nagapamatuod ini nga ginagamit sila ni Satanas. Ginatabog nila ang mga tawo palayo sa Anak sang Dios nga ginasuportahan ni Jehova.

Ginpaandaman ni Jesus ining sataniko nga mga manugpamatok: “Ang tanan nga sala kag pagpasipala nga ginahimo sang mga tawo mapatawad. Apang, ang bisan sin-o nga nagapasipala sa balaan nga espiritu indi gid mapatawad, kundi nakahimo sia sing wala sing katapusan nga sala.” (Marcos 3:28, 29) Hunahunaa ang epekto sini sa mga nagasiling nga si Satanas ang nagahimo sang mga butang nga ginahimo gali sang espiritu sang Dios!