Nabatian ni Pedro ang laygay ni Jesus kon paano solbaron ang problema sang duha ka utod paagi sa paghambalanay sing prangka. Pero daw luyag ni Pedro nga hibaluon kon pila ka beses ini dapat himuon.

Si Pedro namangkot: “Ginuo, pila ka beses ko patawaron ang akon utod nga nakasala sa akon? Pito bala ka beses?” Ang pila ka lider sang relihion nagtudlo nga dapat magpatawad ang isa sing tatlo ka beses. Gani nagbatyag sia nga mas maluluy-on sia kon patawaron niya ang utod sing ‘pito ka beses.’—Mateo 18:21.

Pero ang ideya nga isipon ang kadamuon sang sala sang isa indi suno sa panudlo ni Jesus. Gani gintadlong niya si Pedro: “Nagasiling ako sa imo, indi pito ka beses, kundi 77 ka beses.” (Mateo 18:22) Buot silingon, wala ini sing untat. Dapat wala sing limite ang kadamuon nga patawaron ni Pedro ang iya utod.

Ginsugiran dayon ni Jesus si Pedro kag ang iban sang isa ka ilustrasyon para magtudok sa ila nga dapat sila magpatawad. Parte ini sa isa ka ulipon nga wala mag-ilog sa iya maluluy-on nga agalon. Ginsukot sang hari ang mga utang sang iya mga ulipon. Gindala sa iya ang isa ka ulipon nga nakautang sing 10,000 ka talanton [60,000,000 ka denario]. Imposible nga mabayaran niya ina nga utang. Gani nagsugo ang hari nga ibaligya sia upod ang iya asawa, kag mga anak, agod makabayad sia. Ang ulipon nagluhod sa tiilan sang iya agalon kag nagpakiluoy: “Angan-angana lang ako anay, kay bayaran ko ikaw.”—Mateo 18:26.

Naluoy ang hari sa ulipon, gani wala na ginpabayaran ang iya daku nga utang. Pagkatapos sining ginhimo sang hari, ginpangita sang ulipon ang pareho man niya nga ulipon nga may utang sa iya nga 100 ka denario. Ginliab niya sia kag ginkuga, nga nagasiling: “Bayari ang utang mo sa akon.” Pero nagluhod sa iya tiilan ang ulipon  nga nakautang sa iya kag nagpakiluoy: “Angan-angana lang ako anay, kay bayaran ko ikaw.” (Mateo 18:28, 29) Pero ang ulipon nga ginpatawad sang hari wala mag-ilog sa iya agalon. Ginpapriso niya ang pareho niya nga ulipon nga nakautang sa iya, asta mabayaran sini ang diutay nga utang.

Nian nagsiling si Jesus nga ang iban nga ulipon nga nakakita sining wala kaluoy nga pagtratar nanugid sa agalon. Naakig nga ginpatawag sang agalon ang ulipon kag ginsilingan: “Malaut nga ulipon, wala ko ikaw ginpabayad sang imo utang sang nagpakiluoy ka sa akon. Indi bala nga dapat ka man maluoy sa pareho mo nga ulipon subong nga naluoy ako sa imo?” Ang naakig nga hari nagpapriso sa sining indi maluluy-on nga ulipon asta nga mabayaran niya ang iya utang. Si Jesus naghinakop: “Amo man ang himuon sang akon langitnon nga Amay sa inyo kon indi ninyo pagpatawaron sing tinagipusuon ang inyo utod.”—Mateo 18:32-35.

Maayo gid ini nga leksion parte sa pagpatawad! Ginpatawad kita sang Dios sang aton daku nga sala. Ano man ang sala sa aton sang isa ka Cristianong utod mas diutay ini kon ipaanggid. Kag ginapatawad kita ni Jehova indi lang makaisa kundi sing linibo ka beses. Indi bala nga dapat patawaron man naton ang aton utod sing pila ka beses, bisan pa may rason kita nga magreklamo? Subong sang gintudlo ni Jesus sa Sermon sa Bukid, ang Dios ‘magapatawad sang aton mga sala, subong nga ginapatawad man naton ang mga nakasala sa aton.’—Mateo 6:12.