Samtang yara sa Jerusalem para sa Kapiestahan sang mga Tabernakulo (ukon, mga Payagpayag), padayon gihapon si Jesus sa pagpanudlo sang importante nga mga kamatuoran. Ang pila ka Judiyo nga nagapamati bag-o lang nagsiling sa iya: “Mga kaliwat kami ni Abraham kag wala pa gid sing nakaulipon sa amon.” Si Jesus nagsabat: “Nahibaluan ko nga mga kaliwat kamo ni Abraham. Apang nagatinguha kamo sa pagpatay sa akon, bangod wala ninyo ginabaton ang akon ginatudlo. Ginahambal ko ang mga butang nga nakita ko samtang kaupod ako sang akon Amay, gani ginahimo ninyo ang mga butang nga nabatian ninyo sa inyo amay.”—Juan 8:33, 37, 38.

Simple ang punto ni Jesus: Lain ang iya Amay sa ila amay. Bangod wala mahangpan sang mga Judiyo ang ginasiling ni Jesus, ginsulit nila ang ila pangangkon: “Ang amon amay amo si Abraham.” (Juan 8:39; Isaias 41:8) Kaliwat gid man niya sila. Gani abi nila pareho sila sang pagtuo sang abyan sang Dios nga si Abraham.

Pero makapakibot ang sabat ni Jesus: “Kon kamo mga anak ni Abraham, ginahimo ninyo ang mga buluhaton ni Abraham.” Ginailog gid sang matuod nga anak ang iya amay. “Apang karon nagatinguha kamo sa pagpatay sa akon,” siling pa ni Jesus, “ako nga nagsugid sa inyo sang kamatuoran nga nabatian ko sa Dios. Wala ini ginhimo ni Abraham.” Nian nagsiling si Jesus sing makalilibog: “Ginahimo ninyo ang mga buluhaton sang inyo amay.”—Juan 8:39-41.

Wala gihapon mahangpan sang mga Judiyo ang ginapatuhuyan ni Jesus. Nangangkon sila nga legal sila nga mga anak: “Wala kami mabun-ag bangod sa imoralidad; isa lang ang amon Amay, ang Dios.” Pero ang Dios gid bala ang ila Amay? “Kon ang Dios amo ang inyo Amay,” siling ni Jesus, “kuntani higugmaon ninyo ako, kay ako halin sa Dios kag paagi sa iya yari ako. Wala ako magkari sa akon kaugalingon lang nga luyag, kundi ginpadala Niya ako.” Namangkot si Jesus kag ginsabat ini: “Ngaa indi kamo makahangop sa akon ginahambal? Bangod indi ninyo luyag magpamati sa akon ginatudlo.”—Juan 8:41-43.

Gintinguhaan ni Jesus nga ipakita kon ano ang matabo sa mga nagasikway sa iya. Pero prangka sia nga nagsiling: “Halin kamo sa inyo amay nga Yawa, kag luyag ninyo himuon ang mga handum sang inyo amay.” Ano ang kinaiya sang ila amay? Maathag sia nga ginpakilala ni Jesus: “Manugpatay sia sing tawo sugod sang nagbinutig sia tuhoy sa Dios, kag wala sia magpabilin sa kamatuoran.” Nagsiling pa si Jesus: “Ang isa nga halin sa Dios nagapamati sa ginahambal sang Dios. Wala kamo nagapamati, bangod indi kamo halin sa Dios.”—Juan 8:44, 47.

Naakig ang mga Judiyo sa sining pagpakamalaut, gani nagsabat sila: “Indi bala husto ang amon ginasiling, ‘Samaritano ka kag may demonyo’?” Paagi sa pagtawag kay Jesus nga “Samaritano,” ginpabutyag nila ang ila kaakig kay Jesus. Pero wala ini ginsapak ni Jesus kag nagsiling sia: “Wala ako sing demonyo, kundi ginapadunggan ko ang akon Amay. Apang kamo wala nagapadungog sa akon.” Serioso ini nga butang subong sang ginapakita sang makapakibot nga saad ni Jesus: “Kon ang bisan sin-o magtuman sang akon ginatudlo, indi gid sia mapatay.” Indi niya buot silingon nga indi na mapatay ang mga apostoles kag ang iban nga nagasunod sa iya. Sa baylo, indi gid nila maagom ang dayon nga kalaglagan, ang “ikaduha nga kamatayon,” nga wala na sing paglaum nga banhawon.—Juan 8:48-51; Bugna 21:8.

Pero literal nga ginhangop sang mga Judiyo ang ginsiling ni Jesus: “Karon nakahibalo kami nga ikaw may demonyo. Napatay si Abraham, kag ang mga manalagna, apang nagsiling ka, ‘Kon ang bisan sin-o magtuman sang akon ginatudlo, indi gid sia mapatay.’ Labaw ka pa bala sa amon amay nga si Abraham? . . . Sin-o ka sa banta mo?”—Juan 8:52, 53.

Maathag nga ginapadaku ni Jesus nga sia ang Mesias. Pero sa baylo nga sabton sing direkta ang ila pamangkot kon sin-o sia, nagsiling sia: “Kon ginahimaya ko ang akon kaugalingon, wala ini sing pulos. Ang akon Amay amo ang nagahimaya sa akon, ang isa nga ginasiling ninyo nga inyo Dios. Wala kamo makakilala sa iya, apang kilala ko sia. Kag kon magsiling  ako nga wala ako makakilala sa iya, mangin kaangay ako sa inyo nga butigon.”—Juan 8:54, 55.

Ginpatuhuyan dayon ni Jesus ang halimbawa sang ila matutom nga katigulangan: “Si Abraham nga inyo amay nagkasadya gid sa paglaum nga makita ang akon adlaw, kag nakita niya ini kag nagkasadya sia.” Huo, bangod nagapati si Abraham sa saad sang Dios, nagapaabot sia sa Mesias. “Wala pa gani 50 ka tuig ang imo edad, apang nakita mo na si Abraham?” siling sang indi magpati nga mga Judiyo. Nagsabat si Jesus: “Sa pagkamatuod nagasiling ako sa inyo, sang wala pa matawo si Abraham, nagakabuhi na ako.” Ginapatuhuyan niya ang iya pagluntad sadto sa langit subong gamhanan nga anghel.—Juan 8:56-58.

Bangod naakig ang mga Judiyo kay nangangkon si Jesus nga nagakabuhi na sia antes ni Abraham, batuhon nila kuntani sia. Pero nakapalagyo sia nga wala maano.