Samtang nagahilapit nga matapos ang paglakbay ni Jesus kag sang iya mga disipulo pa bagatnan sa Perea pakadto sa Jerusalem, nagtabok sila sa Suba Jordan malapit sa Jerico. Ang iban naglakbay upod sa ila para sa Paskua sang 33 C.E.

Nauna si Jesus sa iya mga disipulo samtang nagalakat kay luyag gid niya makatambong sa Paskua sa siudad. Pero nahadlok ang mga disipulo. Sang nagligad, sang napatay si Lazaro kag manugpakadto si Jesus sa Judea halin sa Perea, ginsilingan ni Tomas ang iban: “Makadto man kita, agod mapatay kita upod sa iya.” (Juan 11:16, 47-53) Gani makatalagam ang magkadto sa Jerusalem, kag indi katingalahan nga nahadlok ang mga disipulo.

Para ihanda sila sa matabo sa ulihi, gintipon ni Jesus ang mga apostoles kag ginsilingan: “Mataklad kita sa Jerusalem, kag ang Anak sang tawo itugyan sa puno nga mga saserdote kag mga escriba. Pamatbatan nila sia sing kamatayon kag itugyan sia sa mga Gentil agod yagutaon, lapdusan, kag ilansang sa usok, apang sa ikatlo nga adlaw, banhawon sia.”—Mateo 20:18, 19.

Ikatlo na ini nga beses nga ginsugiran ni Jesus ang iya mga disipulo parte sa iya kamatayon kag pagkabanhaw. (Mateo 16:21; 17:22, 23) Pero sa sini nga tion ginsiling niya nga ilansang sia sa usok. Namati sila sa iya, pero indi nila mahangpan ang kahulugan sini. Mahimo nga ginapaabot nila ang pagpasag-uli sa duta sang ginharian sang Israel, kay luyag nila nga matigayon ang himaya kag kadungganan sa ginharian sang Cristo sa duta.

Lakip sa mga nagalakbay amo si Salome nga iloy sang mga apostoles nga sanday Santiago kag Juan. Gintawag ni Jesus ining duha ka apostoles nga “Mga Anak sang Daguob,” wala sing duhaduha bangod sang ila mainit nga disposisyon. (Marcos 3:17; Lucas 9:54) Medyo madugay na nga ginaambisyon sining duha nga mangin prominente  sa Ginharian sang Cristo. Nahibaluan ini sang ila iloy. Ginpalapitan niya si Jesus para sa ila, nagduko sa iya atubang, kag nangabay. Namangkot si Jesus: “Ano ang luyag mo?” Nagsabat sia: “Ginapangabay ko nga papungkuon mo ang akon duha ka anak sa tupad mo sa imo Ginharian. Ang isa sa imo tuo kag ang isa sa imo wala.”—Mateo 20:20, 21.

Ang pangabay naghalin gid kanday Santiago kag Juan. Pagkatapos masambit ang kahuy-anan nga iya maeksperiensiahan, si Jesus nagsiling sa ila: “Wala kamo makahibalo sang inyo ginapangabay. Makasarang bala kamo sa pag-inom sa kopa nga akon imnan?” Nagsabat sila: “Makasarang kami.” (Mateo 20:22) Pero mahimo indi gihapon nila mahangpan kon ano ang buot silingon sini para sa ila.

Ginsilingan pa sila ni Jesus: “Magainom gid kamo sa akon kopa, apang indi ako ang magapili kon sin-o ang magapungko sa akon tuo kag sa akon wala kundi ang akon Amay. Ihatag niya ini sa mga ginpili niya.”—Mateo 20:23.

Sang mahibaluan sang iban nga napulo ka apostoles ang pangabay nanday Santiago kag Juan, naakig sila. Sanday Santiago kag Juan bala amo ang nanguna sa pagbaisay nila anay kon sin-o sa mga apostoles ang pinakamataas? (Lucas 9:46-48) Maathag kon amo nga ginapakita sang pangabay nga wala gin-aplikar sang 12 ka apostoles ang laygay ni Jesus parte sa paggawi sing mapainubuson. Ara gihapon ang ila handum nga mangin prominente.

Namat-od si Jesus nga solbaron ining pinakabag-o nga kontrobersiya kag ang epekto sini. Gintawag niya ang 12 ka apostoles kag mahigugmaon sila nga ginlaygayan: “Nahibaluan ninyo nga ang ginakabig nga mga manuggahom sang mga pungsod nagapakaginuo sa ila mga sakop kag ang mga may awtoridad nagapigos sa ila. Dapat nga indi amo sini sa inyo; kay ang luyag mangin labaw sa inyo mangin alagad ninyo, kag ang luyag mangin una sa inyo mangin ulipon sang tanan.”—Marcos 10:42-44.

Ginsambit ni Jesus ang halimbawa nga dapat nila ilugon—ang iya halimbawa. Nagpaathag sia: “Ang Anak sang tawo wala nagkari agod alagdon, kundi agod mag-alagad kag ihatag ang iya kabuhi nga gawad kabaylo sang madamo.” (Mateo 20:28) Sa sulod na sang mga tatlo ka tuig, nag-alagad si Jesus sa iban. Kag himuon niya ini asta sa punto nga mapatay sia para sa katawhan! Ang mga disipulo dapat may pareho nga disposisyon sa Cristo sa pag-alagad sa iban sa baylo nga alagaron, nga mangin kubos sa baylo nga mangin prominente.