Ang ilustrasyon parte sa nadula nga anak, nga bag-o lang ginsugid ni Jesus, dapat magtudlo sa nagapamati nga mga manugsukot sing buhis, mga escriba, kag mga Fariseo nga handa ang Dios magpatawad sa mahinulsulon nga mga makasasala. (Lucas 15:1-7, 11) Ginpatuhuyan subong ni Jesus ang iya mga disipulo. Nagsugid sia sang isa pa ka ilustrasyon, ang parte sa manggaranon nga tawo nga nakahibalo nga ang manugdumala sang iya panimalay, ukon tulugyanan, wala manghikot sing nagakaigo.

Ginsugid ni Jesus nga ang tulugyanan ginsumbong nga indi maayo sa iya pagpalakat sang pagkabutang sang iya agalon. Gani ang agalon nagsiling nga pahalinon niya ang tulugyanan. “Ano ang himuon ko,” palibog sang tulugyanan, “kay pahalinon na ako sang akon agalon? Indi ako makasarang sang mabug-at nga trabaho, kag nahuya ako magpakilimos.” Para malubad ang iya problema, nagsiling sia: “Nahibaluan ko na kon ano ang akon himuon agod kon pahalinon na ako, may makadtuan ako nga magabaton sa akon sa ila balay.” Ginpatawag niya gilayon ang mga nakautang, kag ginpamangkot niya ang kada isa: “Pila ang imo utang sa akon agalon?”—Lucas 16:3-5.

Ang una nagsabat: “Isa ka gatos ka sukob nga lana sang olibo.” Mga 2,200 ka litro ini sang lana. Ang nakautang mahimo may malapad nga talamnan sang olibo ukon isa ka negosyante nga nagabaligya sang lana. Ginsilingan sia sang tulugyanan: “Yari ang imo nasulat nga kasugtanan, pungko ka kag isulat 50 [1,100 ka litro] lang.”—Lucas 16:6.

Ginpamangkot sang tulugyanan ang isa pa: “Ikaw, pila ang imo utang?” Nagsabat sia: “Isa ka gatos ka dalagku nga sukob sang trigo.” Mga 22,000 ka litro ini. Ginsilingan sang tulugyanan ining may utang: “Yari ang imo nasulat nga kasugtanan kag isulat 80 lang.” Gani ginpanubuan niya ang utang sing 20 porsiento.—Lucas 16:7.

Ang tulugyanan amo gihapon ang nagapalakat sang pagkabutang sang iya agalon, gani may kinamatarong gihapon sia nga panubuan ang gin-utang sang iban sa agalon. Paagi sa pagpanubo sang utang, nakig-abyan ang tulugyanan sa makahatag sa iya sing pabor kon wala na sia sing trabaho.

Nahibaluan sang ulihi sang agalon ang natabo. Bisan pa napierde sia bangod sini, nagdayaw sia sa tulugyanan kag ginkomendahan ini kay bisan “indi matarong,” “maalamon ang ginhimo” sini. Si Jesus nagdugang: “Ang mga anak sini nga sistema sang mga butang mas maalam sangsa mga anak sang kapawa kon paano makig-angot sa iban.”—Lucas 16:8.

Wala ginaugyunan ni Jesus ang pamaagi sang tulugyanan, kag wala niya ginapalig-on nga mangdaya sa negosyo. Gani ano ang iya punto? Ginpalig-on niya ang mga disipulo: “Magpakig-abyan kamo paagi sa manggad sining indi matarong nga kalibutan agod kon maubos ini, batunon nila kamo sa mga balay nga wala sing katapusan.” (Lucas 16:9) Huo, may leksion diri parte sa pagbinagbinag sang palaabuton kag mangin maalamon. Ang mga alagad sang Dios, ang “mga anak sang kapawa,” dapat maggamit sing maalamon sang ila pagkabutang, nga ginahunahuna ang dayon nga palaabuton.

 Si Jehova nga Dios kag ang iya Anak amo lamang ang makabaton sa isa sa langitnon nga Ginharian ukon sa Paraiso sa duta sa idalom sina nga Ginharian. Dapat kita magpakig-abyan sa ila paagi sa paggamit sang aton materyal nga manggad sa pagsakdag sang mga intereses sang Ginharian. Gani mangin pat-od ang aton dayon nga palaabuton kon ang bulawan, pilak, kag iban pa nga materyal nga manggad mangin wala na sing pulos ukon madula na.

Nagsiling man si Jesus nga ang matutom sa pag-atipan kag paggamit sang ila manggad ukon materyal nga mga butang mangin matutom man sa pag-atipan sa mga butang nga mas importante. “Gani,” siling ni Jesus, “kon indi kamo matutom sa manggad sining indi matarong nga kalibutan, sin-o ang magasalig sa inyo sang matuod nga manggad [kaangay sang intereses sang Ginharian]?”—Lucas 16:11.

Ginapakita ni Jesus sa iya mga disipulo nga daku ang ginapaabot sa ila kon luyag nila nga batunon sila “sa mga balay nga wala sing katapusan.” Ang matuod nga alagad sang Dios indi puede mangin ulipon man sang materyal nga manggad sining indi matarong nga kalibutan. Si Jesus naghinakop: “Wala sing suluguon nga makapaulipon sa duha ka agalon, kay dumtan niya ang isa kag higugmaon ang isa, ukon unungan niya ang isa kag tamayon ang isa. Indi kamo makapaulipon sa Dios kag sa Manggad.”—Lucas 16:9, 13.