Pagkatapos sang kasal sa Cana, nagkadto si Jesus sa Capernaum. Upod niya ang iya iloy kag mga utod sa iloy nga sanday Santiago, Jose, Simon, kag Judas.

Ngaa nagkadto si Jesus sa Capernaum? Mas maayo ang nahamtangan sini nga siudad sangsa Nazaret ukon Cana kag mas daku ini. Madamo man sa bag-o nga mga disipulo ni Jesus ang nagapuyo sa Capernaum ukon malapit sa sini. Gani mahanas sila ni Jesus sa ila mismo lugar.

Sa iya pagtener sa Capernaum, naghimo man sia sang mga milagro. Gani madamo sa siudad kag sa palibot sini ang nakabati parte sa iya ginhimo didto. Pero si Jesus kag ang iya kaupod nga mga debotado nga Judiyo magalakbay na pakadto sa Jerusalem para magtambong sa Paskua sang 30 C.E.

Samtang sa templo sa Jerusalem, may nakita ang mga disipulo ni Jesus sa iya nga nagdayaw gid sila, kag wala pa gid nila ini makita anay.

Suno sa Kasuguan sang Dios, ang mga Israelinhon kinahanglan maghalad sing sapat sa templo, kag ang mga bisita kinahanglan amanan sing pagkaon sa ila pagtener didto. Gani ginatugutan sang Kasuguan ang mga nagalakbay pa Jerusalem halin sa malayo nga lugar nga magdala sing kuarta para ibakal sang “mga baka, mga karnero, mga kanding,” kag iban pa nga kinahanglanon nila sa ila pagtener sa siudad. (Deuteronomio 14:24-26) Amo kon ngaa ang mga negosyante sa Jerusalem nagabaligya sing mga sapat ukon mga pispis sa sulod mismo sang daku nga luwang sang templo. Kag ginadayaan sang iban sa ila ang mga tawo paagi sa pagsukot sing tama ka mahal.

Naakig gid si Jesus, gani ginpangwas-ag niya ang mga sensilyo sang nagabaylo sang kuarta, ginpamaliskad ang ila mga lamesa, kag gintabog sila pagua. Dayon nagsiling si Jesus: “Kuhaa ninyo ini diri! Untati ninyo ang paghimo sa balay sang akon Amay nga isa ka balaligyaan!”—Juan 2:16.

Sang nakita ini sang mga disipulo ni Jesus, nadumduman nila ang tagna parte sa Anak sang Dios: “Ang kakugi sa imo balay nagadabdab sa sulod ko.” Pero namangkot ang mga Judiyo: “Ano nga tanda ang mapakita mo sa amon nga may kinamatarong ka sa paghimo sini?” Nagsabat si Jesus: “Gub-a ninyo ini nga templo, kag sa sulod sang tatlo ka adlaw patindugon ko ini liwat.”—Juan 2:17-19; Salmo 69:9.

Abi sang mga Judiyo literal nga templo sa Jerusalem ang ginapatuhuyan ni Jesus, gani namangkot sila: “Ini nga templo ginpatindog sa sulod sang 46 ka tuig, kag patindugon mo lang ini sa sulod sang tatlo ka adlaw?” (Juan 2:20) Pero ang ginapatuhuyan ni Jesus nga templo amo ang iya lawas. Pagligad sang tatlo ka tuig, nadumduman ini sang iya mga disipulo sang ginbanhaw sia.