ANG kabalaka maeksperiensiahan sang tanan—bisan pa sang katawhan sang Dios. “Nagdamo ang akon kabalaka,” sulat sang salmista. (Salmo 94:19) Kag nagsiling si Jesus nga sa tion sang katapusan, ang “mga kabalaka sa kabuhi” magahimo sa pag-alagad kay Jehova nga makahalangkat gid. (Lucas 21:34) Kamusta ka? Ginaluyahan ka bala tungod sang problema sa pinansial, mga problema sa pamilya, ukon sa panglawas? Paano ka mabuligan ni Jehova sa pag-atubang sini?

Indi naton masarangan atubangon ang kabalaka nga kita lang. ‘Ginaipit kita sa tanan nga paagi,’ sulat ni apostol Pablo. ‘Ginaligban kita . . . ; ginapukan kita.’ Apang, nagsiling man sia nga ‘indi buot silingon nga indi na gid kita makahulag,’ ‘indi buot silingon nga wala na gid kita sing malutsan,’ kag ‘wala kita malaglag.’ Ano ang nakabulig sa aton nga makabatas? Ang “gahom nga labaw sa kinaandan”—ang gahom nga halin kay Jehova, ang aton labing gamhanan nga Dios.—2 Corinto 4:7-9.

Dumduma kon paano ka nakabaton sang “gahom nga labaw sa kinaandan” sadto. Nadumduman mo kon paano ginpadalom sang isa ka makapalig-on nga pamulongpulong ang imo mainunungon nga gugma kay Jehova? Nagbakod pa gid bala ang imo pagtuo sa mga promisa ni Jehova sang gintudlo mo sa iban ang parte sa paglaum nga Paraiso? Sang nagatambong kita sa Cristianong mga miting kag ginapaambit ang aton pagtuo sa iban, nabaton naton ang kusog agod mabatas ang mga kabalaka sa kabuhi kag natigayon ang kalinong sa hunahuna para maalagad si Jehova nga may kalipay.

Mahimo nagabatyag ka nga daw indi ka kahibalo kon diin gid ang imo unahon. Halimbawa, ginasugo kita ni Jehova nga unahon ang Ginharian kag padayunon ang aton espirituwal nga rutina. (Mateo 6:33; Lucas 13:24) Pero, ano kon ginapaluya ka sang pagpamatok, mapigaw nga panglawas, ukon mga problema sa pamilya? Ukon ginakuha sang sekular nga trabaho ang imo tion kag kusog nga kuntani nahinguyang mo upod sa kongregasyon? Tuman kadamo nga buluhaton pero diutay katama sang imo tion kag kusog para mahimo ini. Ayhan magabatyag ka nga indi mo gid ini masarangan. Puede man gani nga pensaron mo nga tuman gid ang ginapaabot ni Jehova sa imo.

Si Jehova mahinangpanon. Wala gid sia nagapaabot sang sobra sa aton masarangan. Kag nakahibalo sia nga kinahanglan naton sing tion agod maulian sa pisikal kag emosyonal nga kahuol.—Salmo 103:13, 14.

Binagbinaga subong halimbawa kon paano gin-atipan ni Jehova si manalagna Elias. Sang nagpalagyo si Elias sa kamingawan tungod sang tuman nga pagluya sang buot kag kahadlok, gin-akigan bala ni Jehova ang manalagna kag ginmanduan sia nga magbalik sa iya asaynment? Wala. Makaduha nga nagpadala si Jehova sang anghel agod pukawon sing inanay si Elias kag hatagan sia sing makaon. Bisan pa sini, pagkatapos sang 40 ka adlaw nagakabalaka  kag nagakahadlok gihapon si Elias. Ano pa gid ang ginhimo ni Jehova agod buligan sia? Una, ginpakita ni Jehova nga makasarang sia sa pag-amlig sa iya. Ikaduha, ginpalig-on ni Jehova si Elias paagi sa “kalma kag mahinay nga tingog.” Sang ulihi, ginsilingan sia ni Jehova nga may nabilin pa nga linibo nga matutom nga nagasimba sa Dios. Wala madugay, nangin aktibo liwat si Elias subong makugi nga manalagna. (1 Hari 19:1-19) Ano ang matun-an naton? Sang gindaug si Elias sang kabalaka, nangin mapinasensiahon kag maluluy-on si Jehova sa iya. Si Jehova wala nagbag-o. Nagaulikid sia sa aton sa amo man nga paagi.

Kon ginapamensar mo kon ano ang mahatag mo kay Jehova dapat ka mangin realistiko. Indi pag-ikumparar ang imo mahimo subong sa imo masarangan sadto. Sa pag-ilustrar: Ang isa ka manugdalagan nga nag-untat sa paghanas sang pila ka bulan ukon tinuig indi gilayon makapadayon sa iya naandan nga rutina. Sa baylo, nagahimo sia sing mga tulumuron nga amat-amat nga makapabalik sang iya kusog kag kapag-on. Ang mga Cristiano kaanggid man sa mga manugdalagan. Nagahanas sila nga may maathag nga tulumuron sa ila hunahuna. (1 Corinto 9:24-27) Ngaa indi maghimo sang isa ka espirituwal nga tulumuron nga masarangan mo subong? Halimbawa, mahimo nga mangin tulumuron mo ang pagtambong sa miting sang kongregasyon. Pangabaya si Jehova nga buligan ka nga malab-ot ang imo tulumuron. Samtang nagapanumbalik ang imo espirituwal nga kusog, ‘matilawan mo kag makita nga si Jehova maayo.’ (Salmo 34:8) Dumduma nga ang bisan ano nga ginahimo mo agod ipakita ang imo gugma kay Jehova—daw ano man ini kadiutay—bilidhon sa iya.—Lucas 21:1-4.

Paano ginhatagan ni Jehova sing kusog si June agod makabalik sa iya? Nagsiling sia sa amon: “Padayon ako nga nangamuyo kay Jehova, nangabay ako nga buligan niya ako. Dayon ang akon umagad nga babayi nakasugid sa akon parte sa asembleya sa amon banwa. Nagdesisyon ako nga tambungan ang isa ka adlaw sang asembleya. Kanami gid sang akon pamatyag nga makaupod liwat ang katawhan ni Jehova! Ato nga asembleya amo gid ang pagpalig-on nga akon ginahulat. Subong, malipayon ako nga nagaalagad liwat kay Jehova. Tuman gid ka makahulugan ang akon kabuhi. Napat-od ko pa gid nga indi mahimo nga painon ko ang akon kaugalingon kag ginakinahanglan ko ang bulig sang mga kauturan. Mapinasalamaton gid ako nga may tion pa para makabalik ako.”