MAGSALIG nga indi ka pagpabay-an ni Jehova sa imo pagbalik sa iya. Buligan ka niya nga atubangon ang kabalaka, nga maumpawan ang imo nasaklaw nga balatyagon, kag makasapo sang malinong nga hunahuna kag tagipusuon nga resulta sang isa ka matinlo nga konsiensia. Dayon mabatyagan mo liwat nga mapahulag ka sa pag-alagad kay Jehova upod sa imo mga masigkasumilimba. Ang imo kahimtangan mangin pareho sa pila ka Cristiano sang unang siglo, nga ginsulatan ni apostol Pedro: “Kaangay kamo sadto sa mga karnero nga nagtalang, apang karon nagbalik na kamo sa manugbantay kag manugtatap sang inyo kalag.”—1 Pedro 2:25.

Ang pagbalik kay Jehova amo ang pinakamaayo nga butang nga mahimo mo. Ngaa? Mapahalipay mo ang tagipusuon ni Jehova. (Hulubaton 27:11) Subong sang nahibaluan mo, si Jehova may balatyagon, gani ang aton ginahimo makaapekto sa iya. Siempre pa, si Jehova indi magpilit sa aton nga higugmaon kag alagdon sia. (Deuteronomio 30:19, 20) Isa ka iskolar sang Biblia ang nagsiling: “Wala sing kalaptan sa gua sang puertahan sang tagipusuon sang tawo. Dapat ini buksan halin sa sulod mismo.” Paagi sa pagsimba kay Jehova halin sa tagipusuon nga puno sang gugma, mahimo naton nga mabuksan ini nga puertahan. Kon himuon naton ini, nagahatag kita sa iya sang isa ka hamili nga regalo—ang aton integridad—kag magadala kita sang daku gid nga kalipay sa iya tagipusuon. Wala gid sing puede ipaanggid sa kalipay nga aton mabatyagan sa paghatag kay Jehova sang pagsimba nga takus sa iya.—Binuhatan 20:35; Bugna 4:11.

Dugang pa, kon magpadayon ka sa imo Cristiano nga pagsimba, ang imo espirituwal nga kinahanglanon mapun-an. (Mateo 5:3) Sa ano nga paagi? Ang katawhan sa bug-os nga kalibutan nagapamangkot, ‘Ngaa yari kita diri?’ Ginagutom sila sa mga sabat sa mga pamangkot parte sa katuyuan sang kabuhi. May amo sina nga kinahanglanon ang mga tawo bangod gintuga sila ni Jehova nga amo sina. Gindesinyo niya kita nga magkalipay sa pag-alagad sa iya. Wala na sang labaw nga makapahalipay sa aton sangsa paghibalo nga ginasimba naton si Jehova tungod sa aton gugma sa iya.—Salmo 63:1-5.

Dumduma palihug nga luyag ni Jehova nga magbalik ka sa iya. Paano mo mapat-od ina? Hunahunaa ini: Paagi sa madamo nga pangamuyo, ginhanda sing mahinalungon ini nga brosyur. Mahimo nga ginpatalupangod ini sa imo sang isa ka Cristianong gulang ukon sang iban nga masigkatumuluo. Dayon napahulag ka nga basahon ini kag nanghikot suno sa mensahe sini. Ini tanan pamatuod nga wala ka ginkalimtan ni Jehova. Sa baylo, may pag-ulikid nga ginabuyok ka niya pabalik sa iya.—Juan 6:44.

Malugpayan kita sa paghibalo nga indi gid pagkalimtan ni Jehova ang iya nadula nga mga alagad. Amo ina ang naapresyar sang isa ka utod nga si Donna. Nagsiling sia: “Amat-amat ako nga nagpalayo sa kamatuoran, apang masami ko ginapamalandungan ang Salmo 139:23, 24, nga nagasiling: ‘O Dios ko, usisaa ako kag hibalua ang akon tagipusuon. Usisaa ako, kag hibalua ang akon nagakabalaka nga mga panghunahuna. Tan-awa kon bala may malaut ako nga panimuot, kag tuytuyi ako sa dalan nga wala sing katapusan.’ Nahibaluan ko nga wala ako sing bahin sa kalibutan—wala gid ako sing duog didto—kag nahibaluan ko nga sa organisasyon ako ni Jehova nagakadapat. Nakita ko nga wala ako ginbayaan ni Jehova; kinahanglan lang nga pangitaon ko ang dalan pabalik sa iya. Kag nalipay gid ako nga nakita ko ini!”

Hanuot namon nga ginapangamuyo nga maeksperiensiahan mo man liwat “ang kalipay ni Jehova.” (Nehemias 8:10) Indi mo gid paghinulsulan ang imo pagbalik kay Jehova.