Si Jesus ang Ulo sang Cristianong kongregasyon. (Efeso 5:23) Si Jesus ara subong sa langit, kag ginagiyahan niya ang iya mga sumulunod sa duta paagi sa “matutom kag mainandamon nga ulipon.” (Basaha ang Mateo 24:45.) Si Jesus mismo ang nagtangdo sa sini nga “ulipon” kag ginhatagan ini sing awtoridad, pero dapat ini gihapon magtuman sa Cristo kag mag-alagad sa mga utod sang Cristo. Sin-o ini nga ulipon? Paano kita ginatatap sini?

1. Sin-o “ang matutom kag mainandamon nga ulipon”?

Sa masami, nagahatag si Jehova sing instruksion sa iya katawhan paagi sa lalaki ukon gamay nga grupo sang mga lalaki. (Malaquias 2:7; Hebreo 1:1) Sang napatay si Jesus, ang mga apostoles kag mga gulang sa Jerusalem ang nagpanguna. (Binuhatan 15:2) Pareho sang una, may gamay nga grupo sang mga gulang subong, nga ginatawag Nagadumala nga Hubon sang mga Saksi ni Jehova, nga nagahatag sing espirituwal nga pagkaon kag nagagiya sa pagbantala nga hilikuton. Ini nga grupo amo ‘ang matutom kag mainandamon nga ulipon nga gintangdo ni Jesus.’ (Mateo 24:45a) Ang tanan nga miembro sang Nagadumala nga Hubon hinaplas sang espiritu nga mga Cristiano, kag makaupod nila ang Cristo sa iya Ginharian sa langit kon mapatay na sila diri sa duta.

2. Ano nga espirituwal nga pagkaon ang ginahatag sang matutom nga ulipon?

Si Jesus nagsiling nga ang matutom nga ulipon ‘magahatag sa pareho nila nga mga Cristiano sang pagkaon sa nagakaigo nga tion.’ (Mateo 24:45b) Pareho sa literal nga pagkaon nga nagabulig sa aton nga mangin mabakod ang aton panglawas, ang espirituwal nga pagkaon ukon ang instruksion halin sa Pulong sang Dios, magapabakod man sa aton kaangtanan kay Jehova kag mahimo ang ginsugo ni Jesus. (1 Timoteo 4:6) Ining espirituwal nga pagkaon mabaton naton paagi sa mga miting, asembleya, kag kombension, pati na sa mga publikasyon kag mga video nga nabase sa Biblia. Nagabulig ini sa aton nga mabal-an ang kabubut-on sang Dios kag mapabakod ang aton pagpakig-abyan sa iya.

 USISAA PA GID

3. Dapat organisado ang katawhan ni Jehova

Ginagiyahan ni Jesus ang Nagadumala nga Hubon para maorganisar ang hilikuton sang mga Saksi ni Jehova. Amo man sini ang ginhimo ni Jesus sa mga Cristiano sang una. Tan-awa ang VIDEO.

Basaha ang 1 Corinto 14:33, 40, dayon binagbinaga ini nga pamangkot:

• Paano ginapakita sini nga mga bersikulo nga gusto ni Jehova mangin organisado ang iya mga Saksi?

4. Ginaorganisar sang matutom nga ulipon ang aton pagbantala

Ang pagbantala amo ang pinakaimportante nga hilikuton nga ginhimo sang mga Cristiano sang una. Basaha ang Binuhatan 8:14, 25, dayon binagbinaga ini nga mga pamangkot:

• Sin-o ang nagadumala sa pagbantala sang mga Cristiano sang una?

• Ano ang reaksion nanday Pedro kag Juan sa instruksion nga ginhatag sang pareho nila nga mga apostoles?

Ang pagbantala amo ang pinakaimportante nga hilikuton nga ginaorganisar sang Nagadumala nga Hubon. Tan-awa ang VIDEO.

 Nagsiling si Jesus nga importante gid ang pagbantala. Basaha ang Marcos 13:10, dayon binagbinaga ini nga mga pamangkot:

• Ngaa importante gid ang pagbantala sa Nagadumala nga Hubon?

• Ngaa kinahanglan naton “ang matutom kag mainandamon nga ulipon” para maorganisar ini nga hilikuton sa bilog nga kalibutan?

5. Ang matutom nga ulipon nagahatag sing instruksion

Ang Nagadumala nga Hubon nagahatag sing instruksion sa mga Cristiano sa bilog nga kalibutan. Paano sila nagahimo sing instruksion? Binagbinaga kon paano ini ginhimo sang nagadumala nga hubon sang mga Cristiano sang una. Basaha ang Binuhatan 15:1, 2, dayon binagbinaga ini nga mga pamangkot:

• Ano nga isyu ang ginbaisan sang mga Cristiano sang una?

• Sa diin nangayo sing bulig si Pablo, si Bernabe, kag ang iban pa para mahusay ang isyu?

Basaha ang Binuhatan 15:12-18, 23-29, dayon binagbinaga ini nga pamangkot:

• Antes magdesisyon, ano ang ginhimo sang nagadumala nga hubon sang una para mabal-an ang pagtamod sang Dios sa isyu?—Tan-awa ang bersikulo 12, 15, kag 28.

Basaha ang Binuhatan 15:30, 31 kag 16:4, 5, dayon binagbinaga ini nga mga pamangkot:

• Ano ang reaksion sang mga Cristiano sang una sa instruksion nga ginhatag sang nagadumala nga hubon?

• Paano sila ginpakamaayo ni Jehova kay nagtuman sila?

Basaha ang 2 Timoteo 3:16 kag Santiago 1:5, dayon binagbinaga ini nga pamangkot:

• Sa diin nagapagiya ang Nagadumala nga Hubon subong kon nagahimo sila sang mga desisyon?

 SUMARYO

Ang Nagadumala nga Hubon amo “ang matutom kag mainandamon nga ulipon” nga gintangdo sang Cristo. Nagahatag sila sing instruksion kag espirituwal nga pagkaon sa mga Cristiano sa bilog nga kalibutan.

Rebyu

• Sin-o ang nagtangdo sa “matutom kag mainandamon nga ulipon”?

• Paano kita ginatatap sang Nagadumala nga Hubon?

• Nagapati ka bala nga ang Nagadumala nga Hubon amo “ang matutom kag mainandamon nga ulipon”?