MAY isa ka tawo nga nagpakigkita kay Jesus isa ka adlaw. Nahibaluan niya nga si Jesus maalam gid, gani nagsiling sia kay Jesus: ‘Manunudlo, singgana ang akon utod nga partihan niya ako sang iya pagkabutang.’ Nagdumdom ang tawo nga dapat partihan sia sang iya utod.

Kon ikaw si Jesus, ano ang isiling mo?— Nakita ni Jesus nga may problema ang tawo. Apang ang problema indi nga kinahanglan niya ang pagkabutang sang iya utod. Ang problema sang tawo amo nga wala sia makahibalo kon ano gid ang importante sa kabuhi.

Binagbinagon naton ini. Ano dapat ang mangin importante gid sa aton? Amo bala ang matahom nga mga hampanganan, bag-o nga mga panapton, ukon mga butang kaangay sini?— Indi, may butang nga mas importante sa sini. Kag amo ini ang leksion nga luyag itudlo ni Jesus. Gani ginsaysay niya ang isa ka sugilanon tuhoy sa isa ka tawo nga nalipat sa Dios. Luyag mo bala pamatian ini?—

Ini nga tawo manggaranon gid. May kadutaan sia kag mga tambubo. Ang iya mga pananom nagtubo sing maayo. Indi na makaigo sa iya mga tambubo ang tanan niya nga patubas. Gani, ano ang iya himuon? Bueno, nagsiling sia sa iya kaugalingon: ‘Gub-on ko ang akon mga tambubo kag magpatindog ako sing daku pa nga mga tambubo. Nian tipunon ko ang tanan ko nga patubas kag ang tanan ko nga maayong pagkabutang sa sining bag-o nga mga tambubo.’

Nagdumdom ang manggaranon nga tawo nga amo ini ang maalamon nga  himuon. Nagdumdom sia nga maalam gid sia sa iya pagtipon sing madamo nga butang. Nagsiling sia sa iya kaugalingon: ‘Nakatipon ako sing madamo nga maayong mga butang. Indi ko ini maubos sa sulod sang madamo nga tinuig. Gani makapahunayhunay na ako karon. Makaon ako, mainom, kag maglipaylipay.’ Apang may butang nga indi husto sa panghunahuna sang manggaranon nga tawo. Nahibaluan mo bala kon ano ini?— Ginahunahuna niya ang iya lamang kaugalingon kag ang iya kalipayan. Nalipatan niya ang Dios.

Gani ginhambal sang Dios ang manggaranon nga tawo. Sia nagsiling: ‘Ikaw nga buangbuang nga tawo. Mapatay ka karon nga gab-i. Sin-o karon ang magatag-iya sa mga butang nga gintipon mo?’ Magamit bala sining manggaranon nga tawo ang mga butang kon mapatay sia?— Indi, kuhaon ini sang iban. Si Jesus nagsiling: “Gani amo sina ang nagakatabo sa tawo nga nagatipon sing bahandi para sa iya kaugalingon apang indi manggaranon sa Dios.”—Lucas 12:13-21.

Indi mo luyag nga mangin subong sining manggaranon nga tawo, indi bala?— Ang iya panguna nga katuyuan sa kabuhi amo ang pagtigayon sing  materyal nga mga butang. Sayop ini. Wala sia sing kaayawan. Apang indi sia “manggaranon sa Dios.”

Madamo nga mga tawo ang kaangay sining manggaranon nga tawo. Wala sila sing kaayawan. Apang mahimo ini magdul-ong sa daku nga mga problema. Halimbawa, may mga hampanganan ka, indi bala?— Ano ang imo mga hampanganan? Sugiri ako.— Ano kon ang imo abyan may bola ukon monyika ukon iban pa nga hampanganan nga wala sa imo? Husto bala nga magpabakal ka man sa imo mga ginikanan?—

Mahimo may mga tion nga daw importante gid ang hampanganan. Apang ano ang nagakatabo sa sini paglipas sang pila ka tion?— Nagadaan ini. Mahimo nga maguba ini, kag indi mo na maluyagan. Sa pagkamatuod, may yara ikaw isa ka butang nga mas hamili sangsa mga hampanganan. Nahibaluan mo bala kon ano ini?—

Amo ang imo kabuhi. Ang imo kabuhi tuman ka importante kay kon wala sini, wala gid ikaw sing mahimo. Apang ang imo kabuhi nasandig sa paghimo sing butang nga nagapahamuot sa Dios, indi bala?— Gani indi gid naton pag-ilugon yadtong buangbuang nga manggaranon nga tawo nga nalipat sa Dios.

 Indi lamang mga kabataan ang makahimo sing buangbuang nga mga butang kaangay sadtong manggaranon nga tawo. Madamo man sang may edad na nga mga tawo ang nagahimo sini. Ang iban sa ila wala sing kaayawan. Mahimo nga may kalan-on sila para sa adlaw-adlaw, panapton nga masuksok, kag duog nga mapuy-an. Apang wala sila sing kaayawan. Luyag nila ang madamo nga panapton. Kag luyag nila ang daku pa nga mga balay. Ining mga butang nagakinahanglan sing kuwarta. Gani nagapangabudlay sila sing lakas agod makatigayon sing madamo nga kuwarta. Kag samtang nagadamo ang ila kuwarta, nagadamo man ang luyag nila.

Ang iban nga mga may edad na masako gid sa pagpangita sing kuwarta amo nga wala na sila sing tion para sa ila pamilya. Kag wala sila sing tion para sa Dios. Indi bala sila mapatay kon may kuwarta sila?— Indi subong sini. Magamit bala nila ang ila kuwarta kon mapatay sila?— Indi. Amo sini bangod ang mga patay wala gid sing mahimo.—Manugwali 9:5, 10.

Nagakahulugan bala ini nga malain kon may kuwarta ka?— Indi. Kinahanglan naton ang kuwarta sa pagbakal sing pagkaon kag panapton. Ang Biblia nagasiling nga isa ini ka pangamlig. (Manugwali 7:12) Apang kon ginahigugma naton ang kuwarta, nian mangin problema ini. Mangin subong kita sadtong buangbuang nga manggaranon nga tawo nga nagtipon sing mga bahandi para sa iya kaugalingon apang indi manggaranon sa Dios.

Ano ang kahulugan sang mangin manggaranon sa Dios?— Nagakahulugan ini nga unahon naton ang Dios sa aton kabuhi. Ang iban nga mga tawo nagasiling nga nagapati sila sa Dios. Nagadumdom sila nga ang pagpati sa Dios amo lamang ang kinahanglanon. Apang manggaranon gid bala sila sa Dios?— Indi, kaangay sila sang manggaranon nga tawo nga nalipat sa Dios.

Wala gid malipat si Jesus sa iya Amay sa langit. Wala sia magtinguha nga mangita sing madamo nga kuwarta. Kag wala sia sing madamo nga materyal nga mga butang. Nahibaluan ni Jesus kon ano gid ang importante sa kabuhi. Nahibaluan mo bala kon ano ini?— Amo ang mangin manggaranon sa Dios.

Sugiri ako, paano kita mangin manggaranon sa Dios?— Mangin manggaranon kita sa Dios paagi sa paghimo sing butang nga nagapahamuot sa  iya. Si Jesus nagsiling: “Pirme ko ginahimo ang mga butang nga kalahamut-an sa iya.” (Juan 8:29) Mahamuot ang Dios kon himuon naton ang mga butang nga ginapahimo niya sa aton. Karon sugiri ako, ano nga mga butang ang mahimo mo agod mapahamut-an ang Dios?— Huo, mahimo mo basahon ang Biblia, magtambong sa Cristianong mga miting, mangamuyo sa Dios, kag buligan ang iban nga makilala sia. Amo ini ang labing importante nga mga butang sa kabuhi.

Bangod si Jesus manggaranon sa Dios, gin-atipan sia ni Jehova. Ginpadyaan niya si Jesus sing dayon nga kabuhi. Kon ilugon naton si Jesus, higugmaon man kita kag atipanon ni Jehova. Gani kabay nga ilugon naton si Jesus kag indi gid pag-ilugon yadtong manggaranon nga tawo nga nalipat sa Dios.