MAHIMO nahibaluan mo nga ang mga tawo karon nagatigulang, nagamasakit, kag nagakapatay. Bisan gani ang iban nga mga bata nagakapatay. Dapat ka bala mahadlok sa kamatayon ukon sa isa nga napatay?— Nahibaluan mo bala kon ano ang nagakatabo kon mapatay kita?—

Bueno, wala sing tawo karon nga napatay kag nabuhi liwat ang makasugid sini sa aton. Apang sang si Jesus, ang Daku nga Manunudlo, yari sa duta, may subong sini nga tawo. Mahibaluan naton kon ano ang nagakatabo sa mga napatay paagi sa pagbasa sang natabo sa iya. Ini nga tawo abyan ni Jesus nga nagapuyo anay sa Betania, isa ka gamay nga banwa nga indi malayo sa Jerusalem. Ang iya ngalan amo si Lazaro, kag ang iya duha ka utod amo sanday Marta kag Maria. Tan-awon naton kon ano ang ginasiling sang Biblia nga natabo.

Isa ka adlaw nagmasakit si Lazaro. Sadto nga tion, si Jesus yadto sa malayo nga duog. Gani nagpadala sanday Marta kag Maria sing isa ka mensahero agod sugiran si Jesus nga nagamasakit ang ila utod nga si Lazaro. Ginhimo nila ini bangod nahibaluan nila nga mapaayo ni Jesus ang ila utod. Indi doktor si Jesus, apang ginhatagan sia sang Dios sing gahom agod mapaayo niya ang bisan ano nga balatian.—Mateo 15:30, 31.

Apang, antes maduaw ni Jesus si Lazaro, naggrabe si Lazaro kag napatay. Apang ginsugiran ni Jesus ang iya mga disipulo nga nagakatulog si Lazaro kag magakadto Sia agod pukawon sia. Wala ini mahangpi sang mga disipulo si Jesus. Gani maathag nga nagsiling si Jesus: “Si Lazaro napatay.” Ano ang ginapakita sini tuhoy sa kamatayon?— Huo, nga ang kamatayon daw isa lamang ka mahamuok nga pagtulog. Isa ini  ka mahamuok gid nga pagtulog nga ang isa ka tawo wala gani nagadamgo.

Ginduaw karon ni Jesus sanday Marta kag Maria. Madamo nga mga abyan sang pamilya ang nag-abot na. Nagkari sila agod lipayon ang mag-utod bangod napatay ang ila utod. Sang mabatian ni Marta nga nagapakari si Jesus, naglakat sia agod sugataon Sia. Wala madugay nagguwa man si Maria agod makita si Jesus. Masubo gid sia kag nagahibi, kag nagluhod sia sa tiilan ni Jesus. Ang iban pa nga mga abyan nga nagsunod kay Maria nagahibi man.

Namangkot ang Daku nga Manunudlo kon diin nila ginhamyang si Lazaro. Gani, gintudlo nila kay Jesus ang lungib nga ginlubngan kay Lazaro. Sang makita ni Jesus nga nagahibi ang tanan nga mga tawo, naghibi man sia. Nahibaluan niya kon daw ano kasakit nga mamatyan sing isa nga hinigugma.

Natakpan sing bato ang lungib, gani nagsiling si Jesus: “Kuhaa ninyo ang bato.” Himuon bala nila ini?— Sa banta ni Marta indi ini isa ka maayo nga ideya. Sia nagsiling: “Ginuo, sa sining tion mabaho na sia, kay apat ka adlaw na.”

Apang si Jesus nagsiling sa iya: “Wala bala ako magsiling sa imo nga kon magtuo ka makita mo ang himaya sang Dios?” Buot silingon ni Jesus nga makakita si Marta sing isa ka butang nga magapadungog sa Dios. Ano ang himuon ni Jesus? Sang makuha na ang bato, nangamuyo si Jesus sing mabaskog kay Jehova. Nian nagsinggit si Jesus: “Lazaro, guwa ka!” Maguwa bala sia? Makaguwa bala sia?—

Bueno, mapukaw mo bala ang isa nga nagakatulog?— Huo, kon pukawon mo sia sa mabaskog nga tingog. Apang mapukaw mo bala ang patay?— Indi. Bisan ano pa kabaskog ang imo tingog, indi ka mabatian sang patay. Ikaw ukon ako ukon ang bisan sin-o nga tawo sa duta karon indi makapabugtaw sa patay.

Apang tuhay si Jesus. Ginhatagan sia sang Dios sing pinasahi nga gahom. Gani sang gintawag ni Jesus si Lazaro, isa ka makatilingala nga butang  ang natabo. Si Lazaro nga apat ka adlaw na nga patay nagguwa sa lungib! Nabanhaw sia! Nagaginhawa sia kag nagalakat kag nagahambal liwat! Huo, ginbanhaw ni Jesus si Lazaro.—Juan 11:1-44.

Hunahunaa ini karon: Ano ang natabo kay Lazaro sang napatay sia? May isa bala ka bahin sang iya lawas—isa ka kalag ukon isa ka espiritu—nga nagguwa sa iya kag nagkabuhi sa iban nga duog? Nagpalangit bala ang kalag ni Lazaro? Nabuhi bala sia didto sing apat ka adlaw upod sa Dios kag sa balaan nga mga anghel?—

Wala. Dumduma, nagsiling si Jesus nga nagakatulog si Lazaro. Ano ang kahimtangan kon nagakatulog ka? Kon mahamuok ang imo pagtulog, wala ka sing pangalibutan kon ano ang nagakatabo sa palibot mo, indi bala?— Kag kon magbugtaw ka, wala ka makahibalo kon daw ano kadugay nga nagtulog ka luwas kon tan-awon mo ang oras sa relo.

Amo man sini sa patay nga mga tawo. Wala sila sing nahibaluan nga bisan ano. Wala sila sing mabatyagan nga bisan ano. Kag wala sila sing  mahimo nga bisan ano. Amo sini ang kahimtangan ni Lazaro sang napatay sia. Ang kamatayon daw isa ka mahamuok nga pagtulog nga sa sini nga tion wala gid sing madumduman ang isa ka tawo. Ang Biblia nagasiling: “Nahanungod sa mga patay, wala sila makahibalo sing bisan ano.”—Manugwali 9:5, 10.

Hunahunaa man ini: Kon si Lazaro didto sa langit sa sulod sadtong apat ka adlaw, indi bala kuntani may ginsiling sia tuhoy sini?— Kag kon didto na sia sa langit, piliton pa ayhan sia ni Jesus nga magbalik sa duta gikan sa sadtong matahom nga duog?— Indi gid!

Apang, madamo nga mga tawo ang nagasiling nga may kalag kita, kag nagasiling sila nga ang kalag padayon nga nagakabuhi kon mapatay ang lawas. Nagasiling sila nga wala mapatay ang kalag ni Lazaro kundi nagkabuhi sa iban nga duog. Apang wala ini ginasiling sang Biblia. Nagasiling ini nga ginhimo sang Dios ang una nga tawo nga si Adan nga isa ka “buhi nga kalag.” Si Adan isa ka kalag. Nagasiling man ang Biblia nga sang nakasala si Adan, napatay sia. Sia nangin isa ka “patay nga kalag,” kag nagbalik sia sa yab-ok nga ginkuhaan sa iya. Nagasiling man ang Biblia nga ang tanan nga mga anak ni Adan nakapanubli sing sala kag sing kamatayon man.—Genesis 2:7; 3:17-19; Numeros 6:6; Roma 5:12.

 Maathag, kon amo, nga wala kita sing kalag nga nagabulag sa aton lawas. Ang kada isa sa aton isa ka kalag. Kag sanglit nakapanubli ang katawhan sing sala gikan sa una nga tawo, nga si Adan, ang Biblia nagasiling: ‘Ang kalag nga nagapakasala mapatay.’—Ezequiel 18:4.

Ang iban nga mga tawo nahadlok sa patay. Indi sila magpalapit sa patyo bangod nagahunahuna sila nga ang mga patay may mga kalag nga nagabulag sa ila lawas nga mahimo makahalit sa mga buhi. Apang mahalitan bala sang patay nga tawo ang isa nga buhi?— Indi, indi niya mahimo ini.

Ang iban nga mga tawo nagapati pa gani nga ang mga patay sarang makabalik subong mga espiritu agod duawon ang mga buhi. Gani nagaaman sila sing pagkaon para sa mga patay. Apang ang mga tawo nga nagahimo sini wala gid nagapati sa ginasiling sang Dios tuhoy sa mga patay. Kon nagapati kita sa ginasiling sang Dios, indi kita dapat mahadlok sa mga patay. Kag kon nagapasalamat gid kita sa Dios bangod sang aton kabuhi, ipakita naton ini paagi sa paghimo sing mga butang nga ginakahamut-an sang Dios.

Apang mahimo magpalibog ka: ‘Banhawon bala sang Dios ang mga bata nga napatay? Luyag gid bala niya nga himuon ini?’ Amo ini ang masunod nga hambalan naton.