NAHAPUSAN ka bala sa pag-alagad kay Jehova?— Nagsiling ang Daku nga Manunudlo nga indi ini mahapos himuon. Sang gab-i antes ginpatay si Jesus, ginsingganan niya ang iya mga apostoles: “Kon ang kalibutan nagadumot sa inyo, nahibaluan ninyo nga nagdumot ini sa akon sing una sa inyo.”—Juan 15:18.

Nagpahambog si Pedro nga indi gid niya pagbiyaan si Jesus, apang ginsilingan sia ni Jesus nga ipanghiwala sia ni Pedro sing makatlo sa amo gid nga gab-i. Kag amo gid sini ang ginhimo ni Pedro! (Mateo 26:31-35, 69-75) Ngaa natabo ini?— Natabo ini bangod hinadlukan si Pedro kag ang iban man nga mga apostoles.

Nahibaluan mo bala kon ngaa hinadlukan ang mga apostoles?— Wala nila ginhimo ang isa ka importante gid nga butang. Ang paghibalo sini makabulig sa aton sa pag-alagad kay Jehova, bisan ano man ang isiling ukon himuon sa aton. Apang, dapat naton anay repasuhon kon ano ang natabo sang hingapusan nga gab-i nga kaupod ni Jesus ang iya mga apostoles.

Una anay, ginsaulog nila ang Paskuwa. Isa ini ka pinasahi nga panihapon nga ginahiwat kada tuig agod pahanumdumon ang katawhan sang Dios sang paghilway sa ila gikan sa pagkaulipon sa Egipto. Nian ginsugdan ni Jesus ang isa pa ka pinasahi nga panihapon upod sa ila. Binagbinagon ini sa isa ka kapitulo sa ulihi kag ipaathag kon paano ini nga panihapon nagabulig sa aton sa pagdumdom kay Jesus. Pagkatapos sini nga panihapon kag sa tapos mapalig-on ang iya mga apostoles, gindala sila ni Jesus sa hardin sang Getsemane. Amo ini ang ila paborito nga kaladtuan pirme.

 Sang didto na sila sa hardin, nagpalayo diutay si Jesus agod mangamuyo. Ginsingganan man niya sanday Pedro, Santiago, kag Juan nga mangamuyo. Apang natulugan sila. Makatlo nga nagpalayo si Jesus agod mangamuyo, kag makatlo man nga naabtan niya nga nagakatulog si Pedro kag ang iban pa! (Mateo 26:36-47) Nahibaluan mo bala kon ngaa dapat kuntani nga nagpabilin sila nga nagamata agod mangamuyo?— Hambalan naton ini.

Sang temprano sadto nga gab-i, kaupod pa ni Jesus kag sang mga apostoles si Judas Iscariote sa pagsaulog sang Paskuwa. Kon madumduman mo, nangin kawatan si Judas. Karon nangin traidor sia. Nahibaluan niya ang duog sa hardin sang Getsemane nga pirme ginatipunan ni Jesus upod sa iya mga apostoles. Gani gindala didto ni Judas ang mga soldado agod dakpon si Jesus. Pag-abot nila, ginpamangkot sila ni Jesus: “Sin-o ang ginapangita ninyo?”

Ang mga soldado nagsabat: “Si Jesus.” Wala mahadlok si Jesus, gani nagsabat sia: “Ako amo sia.” Nakibot gid ang mga soldado sa kaisog ni Jesus amo nga nag-isol sila kag nagkalatumba sa duta. Nian nagsiling si Jesus: ‘Kon ako ang inyo ginapangita, palakta ang akon mga apostoles.’—Juan 18:1-9.

Sang gindakop sang mga soldado si Jesus kag gingapos ang iya mga kamot, hinadlukan ang mga apostoles kag nagpinalagyo. Apang luyag mahibaluan nanday Pedro kag Juan kon ano ang matabo, gani nagsunod sila gikan sa malayo. Sang ulihi, gindala si Jesus sa puluy-an ni Caifas, ang mataas nga saserdote. Sanglit kilala si Juan sang mataas nga saserdote, ginpasulod sang manugbantay sang ganhaan si Juan kag si Pedro sa luwang.

Nagtipon na ang mga saserdote sa puluy-an ni Caifas para sa kasaba. Luyag nila ipapatay si Jesus. Gani nagdala sila sing butigon nga mga testigo. Ginsumbag kag gintampa si Jesus sang mga tawo. Samtang nagakatabo ini tanan, yara lang si Pedro sa malapit.

Ang suluguon nga babayi, ang manugbantay sang ganhaan nga nagpasulod kay Pedro kag kay Juan, nakatalupangod kay Pedro. “Ikaw man kaupod  ni Jesus!” siling niya. Apang ginpanghiwala ni Pedro nga kilala niya si Jesus. Madugaydugay isa pa ka babayi ang nakakilala kay Pedro kag nagsiling sa mga nagatilindog: “Ini nga tawo kaupod ni Jesus.” Sa liwat ginpanghiwala ni Pedro nga kilala niya si Jesus. Sang ulihi pa gid nakita si Pedro sang isa ka grupo sang mga tawo kag nagsiling sa iya: “Pat-od gid nga ikaw man isa sa ila.” Sa ikatlo nga tion nagpanghiwala si Pedro, nga nagasiling: “Wala ako makakilala sa sina nga tawo!” Nagpanumpa pa gani si Pedro nga matuod ang iya ginasiling, nian nagbalikid si Jesus kag gintulok sia.—Mateo 26:57-75; Lucas 22:54-62; Juan 18:15-27.

Nahibaluan mo bala kon ngaa nagbinutig si Pedro?— Huo, bangod hinadlukan sia. Apang ngaa nahadlok sia? Ano ang wala niya ginhimo agod palambuon ang iya kaisog? Hunahunaa ini. Ano ang ginhimo ni Jesus agod makatigayon sia sing kaisog?— Nagpangamuyo sia sa Dios, kag ginbuligan sia sang Dios nga mangin maisog. Kag dumduma, makatlo nga ginsingganan ni Jesus si Pedro nga mangamuyo kag magpabilin nga nagamata kag magpadayon sa pagbantay. Apang ano ang natabo?—

Sa kada tion sini, natulugan si Pedro. Wala sia mangamuyo, kag wala sia magpadayon sa pagbantay. Gani wala sia makapangaman sang  gindakop si Jesus. Sang ulihi didto sa kasaba, sang ginsakit si Jesus kag ginplano ang pagpatay sa iya, hinadlukan si Pedro. Apang, mga pila lang ka oras antes sini, ano ang ginsiling ni Jesus sa iya mga apostoles nga paabuton nila?— Ginsingganan sila ni Jesus nga subong nga gindumtan sia sang kalibutan, pagadumtan man sila.

Hunahunaon naton karon kon ano ang mahimo matabo sa aton nga mapaanggid sa natabo kay Pedro. Pananglit yara ikaw sa isa ka hulot-klasehan sang magsugod ang iban nga pakalainon ang mga tawo nga wala nagasaludo sa bandera ukon wala nagasaulog sing Krismas. Nian ano kon pamangkuton ka: “Matuod bala nga wala kamo nagasaludo sa bandera?”  Ukon magsiling ang iban: “Nabatian namon nga wala gani kamo nagasaulog sing Krismas!” Mahadlok ka bala nga isugid ang matuod?— Masulay ka bala nga magbinutig, subong sang ginhimo ni Pedro?—

Pagkatapos sang natabo, nagkasubo gid si Pedro nga ginpanghiwala niya si Jesus. Sang marealisar niya ang iya ginhimo, nagguwa sia kag naghibi. Huo, nanumbalik sia kay Jesus. (Lucas 22:32) Hunahunaa ini karon. Ano ang makabulig sa aton agod indi naton mahimo ang ginhimo ni Pedro bangod sa kahadlok?— Dumduma, si Pedro wala magpangamuyo kag wala magpadayon sa pagbantay. Gani, ano sa banta mo ang dapat naton himuon agod mangin sumulunod sang Daku nga Manunudlo?—

Dapat gid kita magpangamuyo agod mangayo sing bulig kay Jehova. Sang mangamuyo si Jesus, nahibaluan mo bala kon ano ang ginhimo sang Dios para sa iya?— Nagpadala sia sing anghel agod palig-unon sia. (Lucas 22:43) Makabulig bala sa aton ang mga anghel sang Dios?— Ang Biblia nagasiling: “Ang anghel ni Jehova nagakampo sa palibot sang mga nagakahadlok sa iya, kag ginaluwas niya sila.” (Salmo 34:7) Apang agod buligan kita sang Dios, kapin pa sa pagpangamuyo para sa sini ang dapat naton himuon. Nahibaluan mo bala kon ano pa ang dapat naton himuon?— Ginsingganan ni Jesus ang iya mga sumulunod nga magpabilin nga nagamata kag magpadayon sa pagbantay. Paano sa banta mo mahimo naton ini?—

Dapat kita mamati sing maayo sa kon ano ang ginahambal sa aton Cristianong mga miting kag maghatag sing igtalupangod sa kon ano ang ginabasa naton sa Biblia. Apang dapat man kita mangamuyo kay Jehova sing regular kag pangabayon sia nga buligan kita sa pag-alagad sa iya. Kon himuon naton ini, makabaton kita sing bulig agod malandas ang aton kahadlok. Nian malipay kita kon makatigayon kita sing kahigayunan nga sugiran ang iban tuhoy sa Daku nga Manunudlo kag sa iya Amay.