NAGHIBI si Jesus sang napatay ang iya abyan nga si Lazaro. Sa banta mo ayhan nagkasubo gid bala si Jehova sang si Jesus nagaantos kag napatay?— Ang Biblia nagasiling nga ang Dios mahimo ‘masaklaw’ kag ‘masakitan’ pa gani sa mga butang nga nagakahanabo.—Salmo 78:40, 41; Juan 11:35.

Mahanduraw mo bala ang kasakit nga ginbatyag ni Jehova samtang ginatan-aw niya ang iya pinalangga nga Anak nga nagatagumatayon?— Napat-od ni Jesus nga indi sia pagkalimtan sang Dios. Amo kon ngaa ang iya katapusan nga ginsiling antes sia mapatay amo: “Amay, sa imo mga kamot ginatugyan ko ang akon [kabuhi].”—Lucas 23:46.

Sigurado si Jesus nga banhawon sia, nga indi sia pagpabay-an “sa impierno,” ukon sa lulubngan. Sa tapos mabanhaw si Jesus, ginbalikwat ni apostol Pedro ang nasulat sa Biblia tuhoy kay Jesus, nga nagasiling: “Ang iya kalag wala ginpabay-an sa impierno, ukon ang iya unod nakakita sing kaduluntan.” (Binuhatan 2:31,  King James Version; Salmo 16:10) Ang bangkay ni Jesus wala gid makaagi sing kaduluntan sa lulubngan, buot silingon, madunot kag manimaho.

Sang si Jesus yari sa duta, ginsugiran pa gani niya ang iya mga disipulo nga indi sia magpabilin nga patay sa madugay. Ginpaathag niya sa ila nga “patyon [sia], kag sa ikatlo nga adlaw banhawon.” (Lucas 9:22) Gani, indi dapat makibot ang mga disipulo sang ginbanhaw si Jesus. Apang nakibot bala sila?— Tan-awon naton.

Mga alas tres na sang hapon sang Biernes sang ang Daku nga Manunudlo napatay sa usok sang pag-antos. Si Jose, nga isa ka manggaranon nga katapo sang Sanhedrin, nagatuo man kay Jesus sing likom. Sang mahibal-an niya nga patay na si Jesus, ginkadtuan niya si Pilato, ang Romanong gobernador. Nangayo sia sing pahanugot nga kuhaon ang bangkay ni Jesus sa usok agod ilubong ini. Pagkatapos sini, gindala ni Jose ang bangkay ni Jesus sa isa ka hardin diin may yara isa ka lulubngan, nga amo ang duog nga ginabutangan sing mga patay.

Sa tapos masulod ang bangkay sa lulubngan, gintakpan ini sing daku nga bato. Gani sirado na ang lulubngan. Domingo na karon, ang ikatlo nga adlaw. Wala pa magbutlak ang adlaw, gani madulom pa. May mga lalaki nga nagaguardia sa lulubngan. Ginpabantay sila sang puno nga mga saserdote. Nahibaluan mo bala kon ngaa?—

Nabatian man sang mga saserdote nga si Jesus nagsiling nga banhawon sia. Gani agod indi pagkawaton sang iya mga disipulo ang bangkay kag dayon magsiling nga si Jesus ginbanhaw, ginpaguardiahan sang mga saserdote ang lulubngan. Sa hinali lamang, nagtay-ug ang duta. May kapawa nga nag-igpat sa madulom nga palibot. Isa ini ka anghel ni Jehova! Indi makahulag sa kahadlok ang mga soldado. Nagpalapit ang anghel sa lulubngan kag ginpaligid ang bato nga nagatakop. Wala sing unod ang lulubngan!

Huo, subong sang ginsiling sang ulihi ni apostol Pedro: “Ining Jesus ginbanhaw sang Dios.” (Binuhatan 2:32) Ginbanhaw sang Dios si Jesus nga may lawas nga kaanggid sa iya lawas anay antes sia magkari sa duta.  Ginbanhaw sia nga may espiritu nga lawas kaangay sang mga anghel. (1 Pedro 3:18) Gani agod makita sang mga tawo si Jesus, dapat sia magsul-ob sing undanon nga lawas. Amo bala sini ang ginhimo niya?— Tan-awon naton.

Nagbutlak na ang adlaw. Naglakat na ang mga soldado. Si Maria Magdalena kag ang iban pa nga mga babayi nga mga disipulo ni Jesus nagapakadto sa lulubngan. Nagasinilingay sila: ‘Sin-o ang magapaligid sang mabug-at nga bato para sa aton?’ (Marcos 16:3) Apang sang mag-abot sila sa lulubngan, napaligid na ang bato. Kag wala na sing unod ang lulubngan! Wala na ang bangkay ni Jesus! Sa gilayon gid, nagdalagan si Maria Magdalena agod pangitaon ang pila sang mga apostoles ni Jesus.

Nagpabilin sa lulubngan ang iban nga mga babayi. Nagpalibog sila: ‘Diin ayhan ang bangkay ni Jesus?’ Sa hinali lamang duha ka lalaki nga nagaidlak ang panapton ang nagpakita. Mga anghel sila! Nagsiling sila sa mga babayi: ‘Ngaa ginapangita ninyo diri si Jesus? Ginbanhaw na sia. Lakat kamo sing dalidali kag sugiri ang iya mga disipulo.’ Bueno, mahanduraw mo kon daw ano kadasig nga nagdalagan ang mga babayi! Sa dalanon, isa ka lalaki ang nagsugata sa ila. Nahibaluan mo bala kon sin-o sia?—

Amo si Jesus, nga nagsul-ob sing undanon nga lawas! Ginsingganan man niya ang mga babayi: ‘Lakat kamo kag sugiri ang akon mga disipulo.’ Malipayon gid ang mga babayi. Ginpangita nila ang mga disipulo kag ginsugiran sila: ‘Buhi si Jesus! Nakita namon sia!’ Nasugiran na ni Maria si Pedro kag si Juan tuhoy sa walay unod nga lulubngan. Ginkadtuan nila ini, subong sang makita mo diri. Gintan-aw nila ang lino nga mga tela nga ginburambod kay Jesus, apang indi sila makapat-od kon ano ang hunahunaon. Luyag nila patihan nga si Jesus nabuhi, apang daw indi ini mapatihan.

Sang ulihi sadto nga Domingo, nagpakita si Jesus sa duha sang iya mga disipulo nga nagalakat sa dalan padulong sa minuro sang Emaus. Si Jesus nagdungan sa ila kag nagapakighambal sa ila, apang wala nila sia makilala bangod tuhay ang iya undanon nga lawas. Nakilala lamang nila si Jesus sang magkaon sia upod sa ila kag mangamuyo. Nalipay gid ang mga disipulo  amo nga dalidali nga ginlakat nila liwat ang madamo nga kilometros pabalik sa Jerusalem! Mahimo wala madugay pagkatapos sini nagpakita si Jesus kay Pedro agod pamatud-an sa iya nga buhi Sia.

Nian sang gab-i na sadto nga Domingo, madamo nga disipulo ang nagtipon sa isa ka hulot. Nakandaduhan ang mga ganhaan. Sa hinali lamang, si Jesus yara na sa hulot upod sa ila! Nahibaluan na nila karon nga nabuhi gid ang Daku nga Manunudlo. Handurawa kon daw ano ka malipayon sila!—Mateo 28:1-15; Lucas 24:1-49; Juan 19:38–20:21.

Sa sulod sang 40 ka adlaw nagpakita si Jesus nga may lainlain nga undanon nga lawas agod pamatud-an sa iya mga disipulo nga buhi sia. Nian nagbiya sia sa duta kag nagbalik sa iya Amay sa langit. (Binuhatan 1:9-11)  Wala magdugay ginsugdan sang mga disipulo ang pagsugid sa tanan nga ginbanhaw sang Dios si Jesus gikan sa minatay. Bisan sang ginsakit sila sang mga saserdote kag ginpapatay ang iban sa ila, nagpadayon sila sa pagbantala. Nahibaluan nila nga kon mapatay sila, dumdumon sila sang Dios subong nga gindumdom niya ang iya Anak.

Tuhay gid ining una nga mga sumulunod ni Jesus sa madamo nga mga tawo karon! Ang ginahunahuna lamang sini nga mga tawo amo ang mga Easter rabbit kag de-kolor nga mga Easter egg sa tion sang tuig nga ginbanhaw si Jesus. Apang wala sing ginasugid ang Biblia tuhoy sa mga Easter rabbit kag mga Easter egg. Ang ginasugid sini amo ang tuhoy sa pag-alagad sa Dios.

Mahimo kita mangin kaangay sang mga disipulo ni Jesus paagi sa pagsugid sa mga tawo nga naghimo ang Dios sing isa ka dalayawon nga butang sang ginbanhaw niya ang iya Anak. Indi kita dapat mahadlok, bisan pa kon magsiling ang mga tawo nga patyon nila kita. Kon mapatay gid man kita, dumdumon kita kag banhawon ni Jehova, subong sang ginhimo niya kay Jesus.

Wala bala kita malipay sa paghibalo nga ginadumdom sang Dios ang mga nagaalagad sa iya kag banhawon pa gani sila gikan sa minatay?— Bangod sini dapat kita magtinguha kon paano naton mapahalipay ang Dios. Nahibaluan mo bala nga mahimo gid naton ini?— Amo ini ang masunod nga hambalan naton.