ANO ang luyag mo gid, mag-obra ukon maghampang?— Sa pagkamatuod, wala sing malain sa paghampang. Ang Biblia nagasugid tuhoy sa Jerusalem nga ‘napuno sing mga bata nga lalaki kag mga bata nga babayi nga nagahampang sa mga plasa sini.’—Zacarias 8:5.

Nalipay ang Daku nga Manunudlo sa pagtan-aw sa mga bata nga nagahinampang. Antes sia magkari sa duta, sia nagsiling: ‘Yara ako sa tupad sang Dios subong batid nga manugpangabudlay nga nagakalipay sa atubangan niya sa tanan nga tion.’ Talupangda nga si Jesus nagpangabudlay upod kay Jehova sa langit. Kag sang didto pa sia, nagsiling sia: “Ang mga butang nga akon nahamut-an yara sa mga anak sang tawo.” Huo, subong sang natun-an naton sang una, interesado gid ang Daku nga Manunudlo sa tanan, lakip ang mga bata.—Hulubaton 8:30, 31.

 Sa banta mo ayhan naghampang si Jesus sang bata pa sia?— Mahimo gid. Apang sanglit isa sia anay ka “batid nga manugpangabudlay” sa langit, nagpangabudlay man bala sia sa duta?— Bueno, si Jesus gintawag nga “anak sang panday.” Apang gintawag man sia nga “panday.” Ano ang ginapakita sini?— Mahimo gid nga gintudluan si Jesus ni Jose, nga nagpadaku sa iya subong anak niya. Amo kon ngaa nangin panday man si Jesus.—Mateo 13:55; Marcos 6:3.

Ano nga sahi sang panday si Jesus?— Sanglit isa sia ka batid nga manugpangabudlay sa langit, indi ayhan nga nangin batid nga panday man sia sa duta?— Binagbinaga kon daw ano kabudlay ang mangin isa ka panday sadto. Mahimo nga dapat magpulod si Jesus sing kahoy, utdon-utdon  ini, hakuton sa balay, kag dayon kortehan ini agod himuon nga lamesa, bangko, kag iban pa nga mga butang.

Sa banta mo ayhan nalipay si Jesus sa sini nga obra?— Malipay ka bala kon makahimo ka sing matahom nga mga lamesa kag mga pulungkuan kag sing iban pa nga mga butang agod magamit sang mga tawo?— Ang Biblia nagasiling nga maayo nga ‘magkalipay ang isa sa iya mga binuhatan.’ Ang pagpangabudlay nagahatag sa imo sing isa ka sahi sang kalipay nga indi mahatag sang paghampang.—Manugwali 3:22.

Sa pagkamatuod, ang pagpangabudlay maayo para sa aton hunahuna kag lawas. Madamo nga kabataan ang nagapungko lamang kag nagatan-aw sing TV ukon nagahampang sing mga video game. Nagatambok sila sing sobra kag nagaluya, kag indi gid malipayon. Kag wala man nila ginapahalipay ang iban. Ano ang dapat naton himuon agod magmalipayon kita?—

Natun-an naton sa Kapitulo 17 sini nga libro nga ang paghatag kag paghimo sing mga butang agod buligan ang iban nagahatag sing kalipay. (Binuhatan 20:35) Ginatawag sang Biblia si Jehova nga “malipayon nga Dios.” (1 Timoteo 1:11) Kag, subong sang mabasa naton sa Hulubaton, ‘nagkalipay si Jesus sa atubangan niya sa tanan nga tion.’ Ngaa malipayon si Jesus?— Bueno, ginhatag niya ang isa ka rason sang nagsiling sia: “Ang akon Amay padayon nga nagapangabudlay tubtob karon, kag padayon ako nga nagapangabudlay.”—Juan 5:17.

Sang si Jesus yari sa duta, wala sia magpamanday sa iya bug-os nga kabuhi. Ginhatagan sia ni Jehova nga Dios sing isa ka pinasahi nga buluhaton sa duta. Nahibaluan mo bala kon ano ini?— Si Jesus nagsiling: “Dapat ko ibantala ang maayong balita sang ginharian sang Dios, kay sa sining katuyuan ginpadala ako.” (Lucas 4:43) Kon kaisa, nagpati ang mga tawo sa ginbantala sa ila ni Jesus kag ginsugid nila sa iban ang mga butang nga ginsiling niya, subong sang ginhimo sang Samaritana nga makita mo diri.—Juan 4:7-15, 27-30.

Paano gintamod ni Jesus ini nga buluhaton? Sa banta mo ayhan luyag gid niya nga himuon ini?— Si Jesus nagsiling: “Ang akon kalan-on amo ang  paghimo sang kabubut-on sang nagpadala sa akon kag ang pagtapos sang iya buluhaton.” (Juan 4:34) Luyag mo gid bala kaunon ang imo paborito nga pagkaon?— Nagahatag ini sa imo sing ideya kon paano gid naluyagan ni Jesus ang buluhaton nga ginpahimo sa iya sang Dios.

Ginhimo kita sang Dios agod nga makatigayon kita sing kalipay gikan sa pagtuon sa pagpangabudlay. Nagsiling sia nga ang Iya regalo sa tawo amo nga dapat sia “magkalipay sa iya lakas nga pagpangabudlay.” Gani kon makatuon ka sa pagpangabudlay samtang bata pa ikaw, mangin mas makalilipay ang imo bug-os nga kabuhi.—Manugwali 5:19.

Wala ini nagakahulugan nga mahimo sang isa ka bata ang buluhaton sang isa ka daku na nga tawo, apang kita tanan may mahimo nga buluhaton. Ang imo mga ginikanan mahimo nga nagalakat kag nagaobra adlaw-adlaw agod makakita sila sing kuwarta para may makaon ang inyo pamilya kag may balay nga mapuy-an. Kag subong dapat mahibaluan mo, madamo ang buluhaton sa sulod sang balay agod mahuptan ini nga mahipid kag matinlo.

Ano ang imo mahimo nga makahatag sing benepisyo sa bug-os nga pamilya?— Makabulig ikaw sa paghanda sang lamesa, paghugas sing mga pinggan, paghaboy sing basura, kag paghimos sang imo hiligdaan kag sang imo mga hampanganan. Ayhan ginahimo mo na ang pila sining mga butang. Makabenepisyo gid ang pamilya sa sini.

Tan-awon naton kon paano ang buluhaton kaangay sini isa ka benepisyo. Ang mga hampanganan dapat himuson pagkatapos mo hampang. Ngaa sa banta mo importante ini?— Agod mangin mahipid ang puluy-an, kag malikawan man ang mga aksidente. Kon indi mo paghimuson ang imo mga hampanganan, mahimo nga sa isa ka adlaw maabot ang imo iloy nga madamo sing dala kag matapakan niya ang isa sang imo mga hampanganan. Mahimo nga masandad sia kag matumba kag mahalitan. Mahimo nga dalhon pa gani sia sa ospital. Indi bala makahaladlok ina?— Gani kon himuson mo ang imo mga hampanganan pagkatapos mo hampang, isa ini ka benepisyo para sa tanan.

 May iban pa nga buluhaton ang mga kabataan. Halimbawa, ang buluhaton sa eskwelahan. Sa eskwelahan nagatuon ka sa pagbasa. Ang iban nga mga kabataan nanamian magbasa, apang ang iban naman nabudlayan. Bisan pa daw mabudlay ini sa primero, malipay ka kon makatuon ka sa pagbasa sing maayo. Kon makahibalo ka magbasa, madamo ikaw sing matun-an nga makawiwili nga mga butang. Mabasa mo ang libro sang Dios, ang Biblia. Gani kon ginahimo mo sing maayo ang imo mga buluhaton sa eskwelahan, isa gid ini ka benepisyo, indi bala?—

May mga tawo nga nagalikaw sa obra. Ayhan may kilala ka nga subong sini. Apang sanglit ginhimo kita sang Dios agod magpangabudlay, dapat naton tun-an kon paano kita mangin malipayon sa pagpangabudlay. Paano gintamod sang Daku nga Manunudlo ang iya buluhaton?— Daw subong ini sang iya paborito nga pagkaon. Kag ano nga buluhaton ang ginapatuhuyan niya?— Amo ang pagsugid sa iban tuhoy kay Jehova nga Dios kag kon paano sila makabaton sing kabuhi nga walay katapusan.

Gani yari ang butang nga makabulig sa aton agod mangin malipayon kita sa pagpangabudlay. Pamangkuta ang imo kaugalingon, ‘Ngaa dapat tapuson ini nga buluhaton?’ Kon mahibaluan mo nga importante ang isa ka butang, mas mahapos ini himuon. Kag daku man ukon diutay ang buluhaton, himua ini sing maayo. Kon himuon mo ini, makatigayon ka sing kalipay sa binuhatan sang imo mga kamot, kaangay sang aton Daku nga Manunudlo.